༄༅།། ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་གིས་ལོ་ཤས་སྔོན་ནས་ཇི་ལྟར་གསོལ་བ་བཏབ་པ་བཞིན་ ༢༠༡༨ ཕྱི་ཟླ་ ༤ ཚེས་ ༡༦ ནས་ ༡༩ བར་ཉིན་བཞིའི་རིང་སློབ་དཔོན་ཟམ་གདོང་རིན་པོ་ཆེ་མཆོག་གིས་ལྷ་ཞི་བའི་ཚལ་ཚོགས་ཁང་དུ་བོད་པ་དང་ཕྱིའི་རྒྱལ་ཁབ་མི་འདྲ་བ་ཉི་ཤུ་རྩ་ལྔ་ནས་ཕེབས་པའི་དོན་གཉེར་ཅན་མི་གྲངས་བརྒྱད་བཅུ་ཙམ་ལ་ཨིན་སྐད་ཀྱི་ཐོག་ནས་དྲན་པ་ཉེ་བར་གཞག་པ་བཞིའི་སྐོར་གསུང་བཤད་གནང་ཡོད་ཅིང་། སྐབས་དེར་ངོ་དེབ་བརྒྱུད་ཐད་གཏོང་གསན་གཟིགས་གནང་མཁན་ཡང་མང་པོ་བྱུང་ཡོད།
༄༅།། ཇི་ལྟར་གསོལ་བ་བཏབ་པ་བཞིན་ ༢༠༡༨ ཕྱི་ཟླ་ ༣ ཚེས་ ༣ ནས་ ༡༧བར་༧སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་གིས་དཔལ་ལྡན་རྒྱུད་སྟོད་གྲྭ་ཚང་གི་གཙུག་ལག་ཁང་དུ་རྗེ་བཙུན་ཤེས་རབ་རྒྱ་མཚོ་དཔལ་བཟང་པོས་མཛད་པའི་གྲུབ་ཆེན་ལཱུ་ཨི་པའི་ལུགས་ཀྱི་དཔལ་འཁོར་ལོ་སྡོམ་པའི་རིམ་གཉིས་ཀྱི་དམར་ཁྲིད་ཧེ་རུ་ཀའི་ཞལ་ལུང་བཀའ་ཁྲིད་བསྩལ་ཅིང་།
༢༠༡༨ ཕྱི་ཟླ་ ༢ ཚེས་ ༢༢ ཉིན་རྒྱབ་ཏུ་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་མདུན་ནས་དགེ་སློང་གི་སྡོམ་པ་ནོད་དུ་ཕེབས་པའི་འབྲས་བློ་གླིང་ཕུ་ཁང་ཁང་ཚན་དང་སྤོམ་ར་ཁང་ཚན་གྱི་དགེ་ཚུལ་རྣམས་ཀྱིས་ཇི་ལྟར་གསོལ་བ་བཏབ་པ་བཞིན་༧སྐྱབས་རྗེ་སློབ་དཔོན་ཟམ་གདོང་རིན་པོ་ཆེས་འདུལ་བའི་ལག་ལེན་དང་འབྲེལ་བའི་བླང་དོར་གསུང་བཤད་གནང་འདུག
༄༅།། ཕྱི་ལོ་ ༢༠༡༨ ཟླ་ ༢ ཚེས་ ༢༠ཉིན་རྒྱབ་ཨིན་ཡུལ་དུ་རྟེན་གཞི་བྱས་པའི་གཟའ་རུ་བོད་ཀྱི་ཐེབས་རྩ་ཚོགས་པའི་གོ་སྒྲིག་འོག་དྷ་ས་གངས་སྐྱིད་བོད་ཀྱི་དཔེ་མཛོད་ཁང་དུ་སློབ་དཔོན་ཟམ་གདོང་རིན་པོ་ཆེས་ “རྒྱལ་སྤྱིའི་ནང་བོད་དོན་གྱི་གལ་གནད་རང་བཞིན་” ཞེས་པའི་བརྗོད་གཞིའི་ཐོག་ལམ་སྟོན་གསུང་བཤད་གནང་ཞིང་། སྐབས་དེར་མི་རིགས་སྣ་ཚོགས་ལས་གྲུབ་པའི་དོ་སྣང་ཅན་གྱི་སྐྱ་སེར་ཕོ་མོ་བརྒྱ་ཕྲག་ལས་བརྒལ་བ་འཛོམས་པ་མ་ཟད། ཉེ་ཆར་བོད་ནས་འབྱོར་བའི་མཇལ་སྐོར་བ་ཁག་ཅིག་ཀྱང་མཉམ་ཞུགས་གནང་འདུག
༄༅།། ཕྱི་ལོ་ ༢༠༡༨ ཟླ་ ༡ ཚེས་ ༢ རེས་གཟའ་མིག་དམར་ཉིན་སྔ་དྲོ་ཆུ་ཚོད་ ༩ ཐོག་སློབ་དཔོན་ཟམ་གདོང་རིན་པོ་ཆེ་མཆོག་གིས་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་ཨ་ཏི་ཤའི་ཚོགས་ཁང་དུ་ལྔ་བཅུའི་དུས་སྟོན་དུ་མཉམ་ཞུགས་གནང་མཁན་སློབ་ཟུར་རྣམས་ལ་གསུང་བཤད་གནང་ཡོད།
༄༅།། ༢༠༡༧ ཕྱི་ཟླ་ ༡༢ ཚེས་ ༦ ཉིན་བཞུགས་སྒར་དྷརྨ་ཤཱ་ལཱ་ནས་དིལླཱིར་འབྱོར། ༢༠༡༧ ཕྱི་ཟླ་ ༡༢ ཚེས་ ༧ ནས་ ༩ བར་དིལླཱིར་རྟེན་གཞི་བྱས་པའི་གྲྀཧ་ཞེས་པའི་ཁང་བཀོད་བཟོ་རིག་ཚོགས་པའི་གོ་སྒྲིག་འོག་བི་ཀ་ནེར་ཁང་པའི་ (Bikaner House) ཚོགས་ཁང་དུ་ཉིན་གསུམ་རིང་གི་རྒྱལ་སྤྱིའི་ཁང་བཀོད་བཟོ་རིག་བྱུང་བའི་ཚོགས་ཆེན་ (International Conference on History of Architecture) དུ་ཚོགས་ཞུགས་གནང་བ་མ་ཟད། ཉིན་དང་པོར་སྙིང་དོན་གསུང་བཤད་ (Keynote Address) ཀྱང་བསྩལ་ཅིང་། སྐབས་དེར་རྒྱལ་ཁབ་དུ་མ་ནས་གྲགས་ཅན་ཁང་བཀོད་བཟོ་རིག་པ་ཕེབས་ཡོད་འདུག
༄༅།།ཕྱི་ལོ་ ༢༠༡༧ ཟླ་ ༡༢ ཚེས་ ༤ ཉིན་ཕྱེད་ཡོལ་ཆུ་ཚོད་ ༤ ཐོག་བཞུགས་སྒར་གངས་ཅན་སྐྱིད་གཤོངས་སུ་རྟེན་གཞི་བྱས་པའི་བདེ་ལེགས་སྨན་ཁང་གི་ཚོགས་ཁང་དུ་སློབ་དཔོན་ཟམ་གདོང་རིན་པོ་ཆེ་མཆོག་གིས་“བརྗོད་པར་དཀའ་བའི་མི་ཚེའི་ལོ་རྒྱུས། གཞིས་བྱེས་གཉིས་སུ་གཞུང་ས་དགའ་ལྡན་ཕོ་བྲང་གི་ཞབས་ཞུའི་ལས་སྐལ་བྱུང་བ་” ཞེས་བཀའ་ཟུར་ས་འདུ་རིན་ཆེན་དོན་གྲུབ་མཆོག་གི་སྐུ་ཚེའི་ལོ་རྒྱུས་ཀྱི་ཕྱག་དེབ་དབུ་འབྱེད་གནང་བ་མ་ཟད། གསུང་བཤད་ཀྱང་གནང་ཞིང་། དེ་ནི་བོད་ཀྱི་དཔེ་མཛོད་ཁང་གིས་དཔར་སྐྲུན་གནང་བ་ཞིག་ཡིན་འདུག
༄༅།། ༢༠༡༧ ཕྱི་ཟླ་ ༡༢ ཚེས་ ༢ ཉིན་སློབ་དཔོན་ཟམ་གདོང་རིན་པོ་ཆེ་མཆོག་གིས་ཉིན་གསུམ་རིང་གི་ “སངས་རྒྱས་དང་གཱཾདྷཱིའི་ལམ་དང་། སྒྱུ་རྩལ་དང་ལེགས་བྱང་འདུས་མདོ་ཞེས་པའི་འཇིག་རྟེན་ཞི་བདེའི་ཚོགས་ཆེན་” གྱི་དབུ་འབྱེད་མཛད་སྒོར་གསུང་བཤད་གནང་བ་དང་། དབུ་འབྱེད་མཛད་སྒོའི་ཚོགས་མགོན་དུ་༧གོང་ས་༧སྐྱབས་མགོན་ཆེན་པོ་མཆོག་ཆིབས་བསྒྱུར་བསྐྱངས་ཏེ་བཀའ་སློབ་བསྩལ་ཡོད།
༄༅།། སློབ་དཔོན་ཟམ་གདོང་རིན་པོ་ཆེ་མཆོག་ ༢༠༡༧ ཕྱི་ཟླ་ ༡༠ ཚེས་ ༡༢ ཉིན་བཞུགས་སྒར་དྷ་ས་ནས་དིལླཱིར་འབྱོར། ༢༠༡༧ ཕྱི་ཟླ་ ༡༠ ཚེས་ ༡༣ ཉིན་ཚོགས་འདུ་འགའ་ཞིག་ཏུ་བཅར་བ་དང་མི་སྣ་མཇལ་མཁན་འགའ་ཞིག་ལ་དུས་ཚོད་གནང་། ༢༠༡༧ ཕྱི་ཟླ་ ༡༠ ཚེས་ ༡༤ ཉིན་སྔ་དྲོ་དིལླཱི་ནས་མེརཋ་ (Meerut) ལ་འབྱོར། དེ་ནས་ཚེས་ ༡༥ བར་ཚེས་ ༡༦ ཉིན་༧གོང་ས་མཆོག་གིས་འཇིག་རྟེན་ཀུན་ཁྱབ་བཟང་སྤྱོད་ (Universal ethics) ཀྱི་སློབ་ཚན་འཆར་གཞི་ (School curriculum) རྒྱ་གར་སློབ་གྲྭ་ཁག་བཅུར་ལག་བསྟར་དབུ་འབྱེད་གནང་རྒྱུའི་ཚོགས་འདུའི་གྲ་སྒྲིག་སྟ་གོན་གནང་།