ཨ་རིའི་རྒྱལ་ས་ཝ་ཤིང་ཊོན་ལ་གཞུང་འབྲེལ་འཚམས་གཟིགས་གནང་བ།
༄༅། །རང་གཞུང་བཀའ་བློན་ཁྲི་པ་སློབ་དཔོན་ཟམ་གདོང་བློ་བཟང་བསྟན་འཛིན་མཆོག་ལ་ཨ་རི་གཞུང་གི་བོད་དོན་དམིགས་བསལ་འབྲེལ་མཐུད་ལས་ཁང་ནས་གཞུང་འབྲེལ་མགྲོན་འབོད་གནང་བ་བཞིན་བཀའ་བློན་ཁྲི་པ་མཆོག་ཕྱི་ལོ་ ༢༠༠༧ ཕྱི་ཟླ་ ༢ ཚེས་ ༥ ཉིན་རྒྱ་གར་ནས་ཧོ་ལན་བརྒྱུད་ཨ་རིའི་རྒྱལ་ས་ཝ་ཤིང་ཊོན་དུ་ཆེད་ཕེབས་གནང་སྟེ་ཕྱི་ཚེས་ ༦ ནས་ཕྱི་ཚེས་ ༩ བར་རྒྱལ་ས་ཝ་ཤིང་ཊོན་དུ་འཚམས་འདྲི་གནང་ཞིང༌། བཀའ་ཁྲི་མཆོག་ནས་ཝ་ཤིང་ཊོན་ལ་ཨ་རི་བོད་དོན་དམིགས་བསལ་འབྲེལ་མཐུད་པས་མཚོན་ཨ་རིའི་སྲིད་གཞུང་གི་འབྲེལ་ཡོད་དབུ་ཁྲིད་དང་མཇལ་འཕྲད་གནང་སྟེ་གཙོ་བོ་ཕྱི་ལོ་ ༢༠༠༦ ཕྱི་ཟླ་ ༡༡ པའི་ནང་བོད་དོན་དམིགས་བསལ་འབྲེལ་མཐུད་པས་བཞུགས་སྒར་རྡ་རམ་ས་ལར་འཚམས་འདྲིར་ཕེབས་ཏེ་ྋགོང་ས་ྋསྐྱབས་མགོན་ཆེན་པོ་མཆོག་དང༌། རང་གཞུང་བཀའ་ཤག གཞུང་འབྲེལ་མ་ཡིན་པའི་ཚོགས་པ་ཁག་གི་འགན་ཁུར་བ་བཅས་དང་སྔ་རྗེས་མཇལ་འཕྲད་ཞུས་ཏེ་ཨ་རི་གཞུང་ནས་བོད་དོན་ཐད་ཆབ་སྲིད་ཀྱི་རྒྱབ་སྐྱོར་དང༌། བོད་ཕྱི་ནང་བོད་ཀྱི་ཆོས་དང་རིག་གཞུང་སྲུང་སྐྱོབ། བཙན་བྱོལ་བོད་མིའི་བདེ་དོན་ཆེད་སྔར་བས་རྒྱབ་སྐྱོར་ཤུགས་ཆེར་གཏོང་རྒྱུའི་མཛད་ཕྱོགས་རབས་དང་རིམ་པའི་ཐད་བཀའ་བསྡུར་བྱུང་བའི་ལས་དོན་ཁག་མཇུག་སྐྱོང་དང༌། དེ་བཞིན་བར་སྐབས་ཨ་རིའི་རྒྱལ་ཡོངས་གྲོས་ཚོགས་གོང་འོག་གི་བར་མའི་འོས་བསྡུའི་ནང་རྒྱལ་ཁ་ཐོབ་པའི་བོད་གྲོགས་འཐུས་མི་སྤྱི་དང༌། ལྷག་པར་རྒྱལ་ཡོངས་གྲོས་ཚོགས་འོག་མའི་ཚོགས་གཙོ་གསར་པ་ལྕམ་ནན་སི་པི་ལོ་སི་མཆོག་དང༌། གྲོས་ཚོགས་གོང་འོག་གི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་གཙོ་བོར་གྱུར་པའི་གྲོས་ཚོགས་སྡེ་ཚན་ཁག་གི་དབུ་ཁྲིད་གསར་པ་ཁག་མཇལ་འཕྲད་ཞུས་ཏེ་ྋགོང་ས་ྋསྐྱབས་མགོན་ཆེན་པོས་དབུས་བོད་གཞིས་བྱེས་གཞུང་མང་ཡོངས་ཀྱི་འཚམས་འདྲིའི་བཀྲ་ཤིས་བདེ་ལེགས་ཞུས་པ་དང་འབྲེལ་བོད་དོན་ཐད་སྔར་ལྷག་རྒྱབ་སྐྱོར་ཡོང་ཆེད་དོན་སྨིན་ལྡན་པའི་དགོངས་འཆར་བརྗེ་ལེན་གནང་ཡོད། གཞན་ཡང་ཝ་ཤིང་ཊོན་དུ་བཅའ་བཞུགས་རྒྱལ་ཁབ་འགའ་ཞིག་གི་གཞུང་ཚབ་དང་མཇལ་འཕྲད། ཝ་ཤིང་ཊོན་སྦོཀ་ཀིན་ཞིབ་འཇུག་ཁང་དུ་རྒྱ་ནག་ཐད་ཆེད་ལས་ཉམས་ཞིབ་མཁན་རྒྱ་མི་རིགས་ཤེས་ཡོན་ཅན་དང༌། མང་གཙོ་དོན་གཉེར་ཁག་ཅིག་དང་ཐུག་འཕྲད་གྲོས་མོལ། རྒྱལ་སྤྱིའི་བོད་དོན་ལས་འགུལ་ཁང་གི་འགོ་ལས་དང༌། ཝ་ཤིང་ཊོན་རྒྱལ་སའི་བོད་རིགས་སྤྱི་མཐུན་ཚོགས་ཁོངས་ཀྱི་རང་རིགས་མི་མང་ལ་བཙན་བྱོལ་བོད་གཞུང་གི་ཆབ་སྲིད་དང་འཛིན་སྐྱོང་སྐོར་གསུང་བཤད་བཅས་གནང་སྒོ་ཁག་སྔོན་དཔག་ལས་ཡོངས་སུ་བརྒལ་བའི་གྲུབ་འབྲས་བཅས་ལེགས་པར་ཟིན་ཏེ་ཕྱི་ཚེས་ ༡༠ ཉིན་རྒྱ་གར་དུ་ཕྱིར་ཕེབས་གྲུབ་ཡོད་པ་རེད། ད་རེས་བཙན་བྱོལ་བོད་གཞུང་གི་བཀའ་བློན་ཁྲི་པ་ཨ་རིའི་གཞུང་ནས་གཞུང་འབྲེལ་མགྲོན་འབོད་གནང་སྟེ་རྒྱལ་སར་འཚམས་འདྲི་གནང་བ་ནི་ལོ་རྒྱུས་ཀྱི་ཟིན་ཐོ་གསར་པར་གྱུར་ཡོད། ད་རེས་བཀའ་ཁྲི་མཆོག་ནས་ཝ་ཤིང་ཊོན་དུ་འཚམས་འདྲི་གནང་རིང་ཨ་རི་རང་གཞུང་དམིགས་བསལ་སྐུ་ཚབ་བཀའ་ཟུར་རྒྱ་རི་བློ་གྲོས་རྒྱལ་མཚན་མཆོག་དང༌། ཨ་རི་སྐུ་ཚབ་དོན་གཅོད་བཀའ་ཟུར་བཀྲ་ཤིས་དབང་འདུད་མཆོག ཡོ་རོབ་སྐུ་ཚབ་སྐལ་བཟང་རྒྱལ་མཚན་མཆོག རྒྱལ་སྤྱིའི་བོད་དོན་ལས་འགུལ་ཁང་གི་འགན་ཁུར་བ་བཅས་ནས་ཕེབས་རོགས་ཞུས་འདུག།