༈ ལ་དྭགས་ཁུལ་དུ་མཛད་འཕྲིན་བསྐྱངས་པ།

༄༅།། ༢༠༡༨ ཕྱི་ཟླ་ ༡༠ ཚེས་ ༢༢ ཉིན་རྒྱབ་སློབ་དཔོན་ཟམ་གདོང་རིན་པོ་ཆེ་མཆོག་གིས་ལ་དྭགས་གླེ་རུ་རྟེན་གཞི་བྱས་པའི་དབུས་གཞུང་ནང་པའི་རིག་གནས་གཙུག་ལག་སློབ་གཉེར་ཁང་གི་ཀླུ་སྒྲུབ་ཚོགས་ཁང་དུ་ “ཤེས་ཡོན་དང་ཕ་མས་གསོ་སྐྱོང་བྱེད་ཚུལ་” ཞེས་པའི་བརྗོད་གཞིའི་ཐོག་གསུང་བཤད་དང་།

དྲི་བ་ཁག་ལ་ལན་འདེབས་གནང་ཞིང་། གསུང་བཤད་དེ་ནི་ལ་དྭགས་ནང་པའི་ཚོགས་འདུ་དང་། SEBOL ལ་དྭགས་དབུས་གཞུང་ནང་པའི་རིག་གནས་གཙུག་ལག་སློབ་གཉེར་ཁང་བཅས་ནས་གོ་སྒྲིག་གནང་བ་དང་། སྐབས་དེར་སློབ་གྲྭ་ཁག་གི་སློབ་སྤྱི་དང་། དགེ་རྒན། སློབ་ཕྲུག ཕ་མ་སོགས་ཕེབས་ཡོད།

ཕྱི་ཟླ་ ༡༠ ཚེས་ ༢༣ སྔ་དྲོ་ལ་དྭགས་གླེ་རུ་རྟེན་གཞི་བྱས་པའི་ཇོ་ཁང་དུ་ལ་དྭགས་ནང་པའི་ཚོགས་འདུའི་ལྷན་ཚོགས་ཆེན་མོའི་ཚོགས་མི་རྣམས་ལ་རང་གི་ལས་འགན་དང་འབྲེལ་བའི་ཐོག་ལམ་སྟོན་གསུང་བཤད་བསྩལ་ཡོད། ལྷན་ཚོགས་ཆེན་མོའི་ཚོགས་མི་རྣམས་ནི་ལ་དྭགས་ཀྱི་ས་གནས་སོ་སོའི་འགོ་པ་ལྟ་བུ་ཡིན་ཞིང་། གསུང་བཤད་དེ་ནི་ལ་དྭགས་ནང་པའི་ཚོགས་འདུའི་གོ་སྒྲིག་གནང་བ་ཞིག་ཡིན།

ཕྱི་ཟླ་ ༡༠ ཚེས་ ༢༣ ཕྱི་དྲོ་ལ་དྭགས་ཞི་བའི་ཚལ་ཕོ་བྲང་གི་ཚོགས་ཁང་དུ་ལ་དྭགས་ནང་པའི་ཚོགས་འདུའི་ཆོས་སྐུལ་ཚོགས་པའི་གོ་སྒྲིག་འོག་ལ་དྭགས་ཁུལ་གྱི་བོད་བརྒྱུད་ནང་བསྟན་གྱི་ཆོས་བརྒྱུད་ཆེན་པོ་བཞིའི་མཁན་པོ་དང་དགེ་བཤེས་རྣམས་ལ་ “དུས་རབས་ཉེར་གཅིག་པའི་རབ་བྱུང་ཇི་ལྟར་བྱེད་” ཅེས་པའི་བརྗོད་གཞིའི་ཐོག་གསུང་བཤད་བསྩལ་བ་མ་ཟད། དྲི་བ་དང་དགོངས་ཚུལ་ཁག་ལ་ལན་འདེབས་དང་གསལ་བཤད་རྒྱས་པར་གནང་ཡོད།

ཕྱི་ཟླ་ ༡༠ ཚེས་ ༢༥ ཉིན་སྔ་དྲོ་ལ་དྭགས་གླེ་རུ་རྟེན་གཞི་བྱས་པའི་ཇོ་ཁང་དུ་སྐུ་གཤེགས་སྐུ་ཞབས་བ་ཀུ་ལ་རིན་པོ་ཆེ་མཆོག་གི་དྲན་རྟེན་ལོ་འཁོར་གསུང་བཤད་ཕྲེང་བའི་ཁོངས་ “དེང་རབས་མི་ཚེ་སྐྱེལ་སྟངས་ཀྱི་མཇུག་འབྲས་” ཞེས་པའི་བརྗོད་གཞིིའི་ཐོག་གསུང་བཤད་བསྩལ་ཅིང་། དེ་ནི་དབུས་གཞུང་ནང་པའི་རིག་གནས་གཙུག་ལག་སློབ་གཉེར་ཁང་གིས་གོ་སྒྲིག་གནང་འདུག