༈ རྒྱུད་སྟོད་གྲྭ་ཚང་དུ་རྗེ་བཙུན་ཤེས་རབ་རྒྱ་མཚོ་དཔལ་བཟང་པོས་མཛད་པའི་འཁོར་ལོ་སྡོམ་པའི་རིམ་གཉིས་དམར་ཁྲིད་ཧེ་རུ་ཀའི་ཞལ་ལུང་བཀའ་ཁྲིད་བསྩལ་བ།

༄༅།། ཇི་ལྟར་གསོལ་བ་བཏབ་པ་བཞིན་ ༢༠༡༨ ཕྱི་ཟླ་ ༣ ཚེས་ ༣ ནས་ ༡༧བར་༧སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་གིས་དཔལ་ལྡན་རྒྱུད་སྟོད་གྲྭ་ཚང་གི་གཙུག་ལག་ཁང་དུ་རྗེ་བཙུན་ཤེས་རབ་རྒྱ་མཚོ་དཔལ་བཟང་པོས་མཛད་པའི་གྲུབ་ཆེན་ལཱུ་ཨི་པའི་ལུགས་ཀྱི་དཔལ་འཁོར་ལོ་སྡོམ་པའི་རིམ་གཉིས་ཀྱི་དམར་ཁྲིད་ཧེ་རུ་ཀའི་ཞལ་ལུང་བཀའ་ཁྲིད་བསྩལ་ཅིང་།

ཉིན་རེའི་སྔོན་འགྲོའི་ཆོས་བཤད་དུ་དལ་འབྱོར་གྱི་མི་ལུས་ལ་སྙིང་པོ་ལེན་དགོས་ཚུལ་དང་། ཐུན་མོང་བའི་ལམ་ལ་བློ་ལེགས་པར་སྦྱངས་ནས་སྔགས་ཀྱི་ཐེག་པར་ཞུགས་དགོས་ཚུལ། ཐེག་པ་གཉིས་ཀྱི་ཁྱད་པར་དང་རྒྱུད་སྡེ་བཞིའི་ཁྱད་པར་སོགས།སྔགས་ཀྱི་བསྟན་པ་ཧ་ཅང་དཀོན་ཚུལ། ཧ་ཅང་ཉེན་ཆེ་ཚུལ། ཕ་རྒྱུད་དང་མ་རྒྱུད་གཉིས་མེད་རྒྱུད་ཀྱི་ཁྱད་པར་ཆེ་ཚུལ་སོགས།

དེང་སྐབས་གཏན་གྱི་འདུན་མ་ལས་གནས་སྐབས་ཀྱི་ཁེ་ཕན་ལ་གལ་ཆེ་བར་འཛིན་པ་དང་། སྐྱེ་བ་ཕྱི་མ་ཕན་ཆད་དང་གཏན་གྱི་འདུན་མ་བསྒྲུབ་རྒྱུ་ལས་ཚེ་འདིའི་དོན་དུ་དུས་ཚོད་ཕལ་མོ་ཆེ་གཏོང་བ། དགེ་བའི་བྱ་བ་ཞིག་བྱས་རུང་སྦྱོར་དངོས་རྗེས་གསུམ་མ་ཚང་བ། གཏན་གྱི་འདུན་མ་སྒྲུབ་ཐབས་ཀྱང་སྨོན་ལམ་འདེབས་པ་དང་བསྒུགས་ནས་མི་ཕན་པར་ཐོས་བསམ་སྒོམ་གསུམ་ཡ་མ་བྲལ་བ་དགོས་ཚུལ། བསྔོ་བྱའི་རྫས་ཤིག་མེད་པར་སྨོན་ལམ་རྐྱང་པས་དེ་ཙམ་ཕན་ཐོགས་མེད་པ། རྨོངས་པ་མ་རིག་པ་མེད་པ་བཟོ་ཐབས་རིག་པ་ཡེ་ཤེས་ལས་མེད་ཚུལ། དེ་བསྐྱེད་ཐབས་སུ་སེམས་རྩེ་གཅིག་པ་དགོས་ཚུལ། དེའི་ཆེད་ཚུལ་ཁྲིམས་ཕུན་སུམ་ཚོགས་པ་དགོས་ཚུལ།

དལ་འབྱོར་གྱི་མི་ལུས་ཐོབ་དུས་འདིར་ཆུད་ཟོས་སུ་མ་བཏང་བར་སྐྱེ་བ་གཏན་གྱི་འདུན་མ་བསྒྲུབ་དགོས་ཚུལ། མི་ལུས་ཐོབ་ནས་ཚེ་འདི་སྣང་དང་སྡིག་པའི་བྱ་བ་ལ་གཞོལ་བ་རྣམས་ཧ་ཅང་བླུན་ཚབས་ཆེ་ཚུལ། ད་ལྟ་མི་ལུས་ཐོབ་སྐབས་འདིར་དུད་འགྲོ་ལས་ཁྱད་ཐོན་པ་དགོས་ཚུལ། ཆོས་ལ་ཧ་ཅང་དཀོན་པ་དང་དོན་ཆེ་བའི་འདུ་ཤེས་དགོས་ཚུལ་སོགས་ལས་བརྩམས་ཏེ། ཆོས་ཉན་པའི་ཀུན་སློང་ཀུན་སྤྱོད་ཀྱི་རིམ་པ་རྣམས་སྤྱིར་བྱང་ཆུབ་ལམ་གྱི་རིམ་པ་དང་། ཁྱད་པར་རྡོ་རྗེ་ཐེག་པའི་ལམ་གྱི་རིམ་པ་ནས་ཇི་ལྟར་བྱུང་བ་བཞིན་གསལ་བཏབ་སྟེ་ཉན་དགོས་ཚུལ་ལེགས་པར་གདམས་ཤིང་།

དེ་ནས་རྗེ་བཙུན་ཤེས་རབ་རྒྱ་མཚོ་དཔལ་བཟང་པོས་མཛད་པའི་གྲུབ་ཆེན་ལཱུ་ཨི་པའི་ལུགས་ཀྱི་དཔལ་འཁོར་ལོ་སྡོམ་པའི་རིམ་གཉིས་ཀྱི་དམར་ཁྲིད་ཧེ་རུ་ཀའི་ཞལ་ལུང་ལྗགས་ལུང་དང་མཉམ་བཀའ་ཁྲིད་གནང་བ་མ་ཟད། མཇུག་ཏུ་བླང་དོར་ལམ་སྟོན་གསུང་བཤད་ཀྱང་རྒྱས་པར་ཕེབས་སོང་། དེ་རྗེས་དཔལ་ལྡན་གསང་ཆེན་སྟོད་རྒྱུད་གྲྭ་ཚང་ངོས་ནས་༧སྐྱབས་རྗེ་ཟམ་གདོང་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་ཤིང་། ད་རེས་གསུང་ཆོས་སུ་དཔལ་ཤར་པ་ཆོས་རྗེ་རིན་པོ་ཆེ་མཆོག་དང་། རྒྱུད་སྟོད་གྲྭ་ཚང་གི་མཁན་བླ། གདན་ས་ཁག་ནས་བླ་སྤྲུལ་རྣམ་པ་དང་།དཔེ་ཁྲིད་དགེ་རྒན། དགེ་བཤེས། ཕྱི་རྒྱལ་བ། ཁྱིམ་པ་ཕོ་མོ་སོགས་ཕོན་ཆེ་ཙམ་ཕེབས་འདུག