༈ བཞུགས་སྒར་དྷ་སའི་ཁུལ་དུ་མཛད་འཕྲིན་བསྐྱངས་པ།
༄༅།། ༢༠༡༨ ཕྱི་ཟླ་ ༡༢ ཚེས་ ༧ ཉིན་སློབ་དཔོན་ཟམ་གདོང་རིན་པོ་ཆེ་མཆོག་གིས་ལྷ་ཞི་བའི་ཚལ་ཚོགས་ཁང་དུ་བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་དང་ཆོས་ལུགས་ལ་མ་བརྟེན་པའི་བཟང་སྤྱོད་སྐོར་གྱི་ཟབ་སྦྱོང་དུ་ཕེབས་པའི་བོད་པའི་སློབ་གྲྭ་ཁག་གི་སྔོན་འགྲོའི་དགེ་རྒན་རྣམས་ལ་
“བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་ཀྱི་དགེ་མཚན་དང་སྔོན་འགྲོའི་དགེ་རྒན་གྱི་གལ་གནད་དང་ལས་འགན་” ཞེས་པའི་བརྗོད་གཞིའི་ཐོག་གསུང་བཤད་དང་། དྲི་བ་ཁག་ལ་ལན་འདེབས་གནང་ཞིང་། དེ་ནི་དྷ་སར་རྟེན་གཞི་བྱས་པའི་ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་གི་གོ་སྒྲིག་ཞུས་པ་ཞིག་ཡིན།
༢༠༡༨ ཕྱི་ཟླ་ ༡༢ ཚེས་ ༨ ཉིན་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་གོ་སྒྲིག་འོག་བོད་ཀྱི་དཔེ་མཛོད་ཁང་གི་ཚོགས་ཁང་དུ་བོད་ཀྱི་དཔེ་མཛོད་འཛིན་སྐྱོང་མ་ལག་མཉེན་ཆས་དང་འབྲེལ་བའི་བགྲོ་གླེང་ཚོགས་འདུར་ལམ་སྟོན་གསུང་བཤད་གནང་ཞིང་།
བགྲོ་གླེང་ཚོགས་འདུ་དེར་མཁས་པ་དང་། ཤེས་ཡོན་པ། དགེ་རྒན། དཔེ་མཛོད་ཁང་ཁག་གི་ལས་བྱེད་པ་སོགས་ཕེབས་ཡོད།