༈ དྷརྨ་ཤཱ་ལཱའི་ཁུལ་དུ་ ༢༠༡༨ ཕྱི་ཟླ་ ༢ ནང་གསུང་བཤད་གནང་བ་ཁག
༢༠༡༨ ཕྱི་ཟླ་ ༢ ཚེས་ ༢༢ ཉིན་རྒྱབ་ཏུ་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་མདུན་ནས་དགེ་སློང་གི་སྡོམ་པ་ནོད་དུ་ཕེབས་པའི་འབྲས་བློ་གླིང་ཕུ་ཁང་ཁང་ཚན་དང་སྤོམ་ར་ཁང་ཚན་གྱི་དགེ་ཚུལ་རྣམས་ཀྱིས་ཇི་ལྟར་གསོལ་བ་བཏབ་པ་བཞིན་༧སྐྱབས་རྗེ་སློབ་དཔོན་ཟམ་གདོང་རིན་པོ་ཆེས་འདུལ་བའི་ལག་ལེན་དང་འབྲེལ་བའི་བླང་དོར་གསུང་བཤད་གནང་འདུག
༢༠༡༨ ཕྱི་ཟླ་ ༢ ཚེས་ ༢༤ ཉིན་རྒྱབ་ཏུ་སློབ་དཔོན་ཟམ་གདོང་རིན་པོ་ཆེ་མཆོག་སྐུ་ཞབས་ཨ་ཇཡ་པཱ་རཱ་ཤར་གྱིས་བརྩམས་པའི་སྙན་རྩོམ་ཕྱོགས་བསྡུས་ཀྱི་ཕྱག་དེབ་ “ངག་བཅད་ཀྱི་སྨྲ་བརྗོད་” (मौन की अभिव्यक्ति) Expression of silence” ཅེས་པའི་དབུ་འབྱེད་མཛད་སྒོར་སྐུ་མགྲོན་གཙོ་བོའི་ཚུལ་དུ་མཉམ་ཞུགས་གནང་བ་མ་ཟད། གསུང་བཤད་ཀྱང་གནང་ཞིང་། སྙན་ངག་མཁན་ཨ་ཇཡ་པཱ་རཱ་ཤར་ནི་ཧི་མཱ་ཅལ་མངའ་སྡེ་གཞུང་གི་དྲིལ་བསྒྲགས་དང་མང་ཚོགས་འབྲེལ་ལམ་སྡེ་ཚན་ནང་ངེས་སྟོན་པ་གཞོན་པའི་འགན་ཁུར་གནང་མུས། སྐབས་དེར་དྷརྨ་ཤཱ་ལཱའི་ཁུལ་དུ་གནས་པའི་གྲགས་ཅན་གྱི་སྙན་ངག་མཁན་དང་། ལྟ་གྲུབ་སྨྲ་བ། རྩོམ་རིག་པ་སོགས་རྒྱ་གར་བའི་གལ་ཆེ་མི་སྣ་འདུ་འཛོམས་འདུག
༢༠༡༨ ཕྱི་ཟླ་ ༢ ཚེས་ ༢༦ ཉིན་སྔ་དྲོ་༧སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་གིས་དཔལ་ལྡན་རྒྱུད་སྟོད་གྲྭ་ཚང་གི་གནས་བརྟན་བགྲེས་སོང་རྣམས་ཀྱི་བཞུགས་གནས་གསར་པ་རྭ་ཆེ་གཉིས་པའི་ལྕང་རྒྱབ་ཁང་གསར་དབུ་འབྱེད་གནང་བ་མ་ཟད། མཛད་སྒོའི་ཐོག་བླང་དོར་གསུང་བཤད་བསྩལ་ཅིང་། སྐབས་དེར་བཙན་བྱོལ་བོད་མིའི་སྒྲིག་འཛུགས་ཀྱི་གཞུང་ཞབས་པ་དང་། སྦྱིན་བདག་ཁག རྒྱུད་སྟོད་ཀྱི་གནས་བརྟན་བགྲེས་སོང་གིས་གཙོས་ལས་སྣེ་རྣམ་པ་སོགས་ཕེབས་འདུག
ཇི་ལྟར་གསོལ་འདེབས་ཞུས་པ་བཞིན་ ༢༠༡༨ ཕྱི་ཟླ་ ༢ ཚེས་ ༢༨ ཉིན་སྔ་དྲོ་སློབ་དཔོན་ཟམ་གདོང་རིན་པོ་ཆེ་མཆོག་གིས་གོ་པཱལ་པུར་བོད་ཕྲུག་ཁྱིམ་སྡེའི་དགེ་རྒན་དང་ལས་བྱེད་ཡོངས་ལ་ཆོས་ལུགས་ལ་མ་བརྟེན་པའི་བཟང་སྤྱོད་ཐོག་གསུང་བཤད་བསྩལ་བ་མ་ཟད། དྲི་བ་ཁག་ལ་ལན་འདེབས་ཀྱང་གནང་འདུག
