དཔེ་སྟོན་ཆོས་དགེ་གསེར་རྟ་ཐུབ་བསྟན་ཆོས་འཕེལ། བློ༵་གྲོས་དྲི་མེད་གངས་ཀྱི་རི་བོའི་སྤོར།། བཟ༵ང་པོའི་ལེགས་བཤད་འབུམ་གྱི་གཡུ་རལ་ཅན།། བསྟ༵ན་འགྲོའི་མགོན་དུ་བྱོན་པའི་གདོང་ལྔ་པ།། ཟམ་གདོང་སྤྲུལ་སྐུ་བློ་བཟང་བསྟན་འཛི༵ན་འདུད།།

ངག་དབང་རྡོ་རྗེ། (སྨྱུག་མིང་། བསེ་རུ།) (ཨོ་གླིང་།) སྐུ་མཆོག་མཚན་དཔེའི་ཉིན་བྱེད་འོད་ཟེར་གངས་རིའི་ལྗོངས་ནས་གླིང་འདིར་འཕྲོས།། གསུང་དབྱངས་འཚེ་མེད་བདེན་དོན་དབྱར་རྔ་འཇིག་རྟེན་རྨོངས་པའི་མགོན་དང་སྐྱབས།། ཐུགས་རྒྱུད་བྱམས་བརྩེ་ཆུ་གཏེར་ཆེན་པོ་ཉམ་ཐག་འགྲོ་བའི་དཔུང་དང་གཉེན།། ང་ཡི་བླ་མ་སྐྱབས་རྗེ་གང་དེ་སྐུ་ཚེ་བསྐལ་བརྒྱར་བརྟན་གྱུར་ཅིག།།

ཚེ་རིང་ཟླ་བ། ས་རཱ་མཐོ་སློབ། མེས་པོའི་མཁར་རྫོང་ཞིག་པའི་སོ་མཚམས་དེར།། གང་གི་ལྟེ་མཚལ་ཐོར་སྟངས་ནོར་བ་སྟེ།། དེ་མིན་སྐུ་ཚེ་གང་པོར་བྲན་པོ་བཞིན།། རིགས་འདིའི་ཆེད་དུ་རྔུལ་ཆུ་གཏོར་དོན་མེད།།

མགོ་ལོག་ཟླ་བྷེ། ༸རྒྱལ་དབང་ཐུགས་དང་འགལ་བ་མེད།། བླ་མའི་བཀའ་ལས་འདའ་བ་མེད།། ཁས་བླངས་དམ་བཅར་འགྱུར་བ་མེད།། མདོར་ན་གཤིས་ལ་གཡོ་བ་མེད།།

ཨ་རིག་དགེ་མཐོང་། ཟམ་གདོང་བླ་མའི་རྣམ་ཐར་གླེང་ན་གླེགས་བམ་བྲག་ལ་རྩིག་རྒྱུ་མཆིས།། དམ་པ་ཁོང་གིས་ད་ལྟའི་བར་དུ་གདོང་དམར་བོད་ཀྱི་ཆོས་སྲིད་ཟུང་།། ཕྱག་གིས་བཟུང་སྟེ་ཐུགས་ལ་འཆང་བ་ཐམས་ཅད་སེམས་སུ་གསལ་མོད་ཀྱང།། མཛད་འཕྲིན་མཐའ་ཡས་རྒྱ་མཚོའི་ཀློང་ནས་ཆུ་ཐིགས་ཙམ་ཞིག་སེམས་སུ་ལྷུང་།།

ཚ་རུ་མ་ཐབས་མཁས། ཨོ་སི་ཁྲེའུ་ལེ་ཡ། ཤེས་བྱའི་དཀྱིལ་འཁོར་བློ་ལ་འཁོར་བ་ཡིན།། སྤྲིན་དཀར་ལྷུན་པོར་འགྲན་པའི་དགེ་སྦྱོང་ཞིག། གསེར་མདོག་པཎ་ཞྭ་གློག་དམར་འཁྱུགས་པའི་འོག།། ཟབ་རྒྱས་ལེགས་བཤད་འབྲུག་སྟོང་ལྷང་ལྷང་གྲགས།།

འབྲས་སྤུངས་སྒོ་མང་། ཤེས་རབ་ཚུལ་ཁྲིམས། རྒྱ་ཆེན་ཚོགས་གཉིས་ཕ་མཐའ་ལ་སོན། །ཡིད་འཕྲོག་གཟུགས་ཀྱི་གངས་རི་ལྷུན་པོ་ལས། །འཕྲིན་ལས་རྣམ་བཞི་མཁའ་ཁྱབ་ཞིང་ས་རུ། །འབེབས་མཁས་ཡིད་བཞིན་འཁོར་ལོས་ཤིས་པ་རྩོལ། །འདི་ན་དམུ་རྒོད་བདུད་ཀྱི་ཆོ་འཕྲུལ་ལས། །གངས་ཅན་མགོན་པོའི་ཞིང་ས་གཤིན་པོ་རུ། །

གློ་སྒྲིག་ས་གནས་འགོ་འཛིན་ཟུར་པ། ཚེ་རིང་སྲི་བསྟན།། གཞུང་ལུགས་རབ་འབྱམས་མཁྱེན་པས་རབ་ཏུ་མཁས།། ཐོས་དོན་ཉམས་སུ་བླངས་པས་བཙུན་པའི་མཆོག།། བློ་གྲོས་བཟང་པོའི་སྐྱེས་བཟང་ཀུན་ལ་སྤེལ།། བསྟན་པའི་རྒྱལ་མཚན་འཛིན་པའི་བཤེས་དེར་འདུད།།

གདན་ས་དགའ་ལྡན། དགའ་ཉག་འཁྱམ་པོ། འདུལ་འཛིན་དབུས་སུ་རྣམ་དག་ཁྲིམས་ཀྱིས་བརྗིད།། མཁས་མང་ཁྲོད་དུ་ལེགས་བཤད་དཔལ་གྱིས་ཕྱུག། འཚོ་བའི་ཁྲོད་དུ་ཉམ་ཆུང་ཀུན་སྤངས་ཚུལ།། མི་རྗེ་མཁས་དབང་ཟམ་གདོང་བླ་མར་འདུད།།