བཀུར་འོས་དགེ་འདུན་རྣམ་པ། བཀུར་འོས་སྐུ་ངོ་བཀའ་བློན་ཁྲི་པ་མཆོག བཀུར་འོས་སྐུ་ངོ་ཚོགས་གཙོ་གཞོན་པ། བཀུར་འོས་བཀའ་བློན་རྣམ་པ། སྤྱི་འཐུས་རྣམ་པ་ཚང་མ་ལ་ད་རེས་སྐབས་བཅིུས་པའི་སྤྱི་འཐུས་ཀྱི་ཚོགས་དུས་གཉིས་པ་འདི་སྐབས་ཐོག་མར་ཚོགས་གཙོའི་ངོས་ནས་སྤྱི་འཐུས་རྣམ་པ་དང་བཀའ་བློན་རྣམ་པས་མཚོན་ཚང་མར་འཚམས་འདྲི་ཞུ་གི་ཡོད།
ད་རིང་ཚོགས་གཙོས་ཚོགས་འདུ་དང་འབྲེལ་བ་ཡོད་པའི་གསལ་བཤད་ཞུ་རྒྱུ་ཁ་ཤས་དང་སྦྲགས་ནས་ཚོགས་འདུ་མཇུག་བསྡོམས་ཀྱི་བཀའ་མོལ་དེ་ཞུ་རྒྱུ་ཡིན། སྐབས་བཅུ་གཉིས་པའི་སྤྱི་འཐུས་ལྷན་ཚོགས་ཀྱི་ཚོགས་དུས་དང་པོ་འདིའི་ཉིན་གཉིས་པ་ནས་རྒྱུན་ལས་སྐབས་དང་པོ་དེ་ཡང་གཏན་འཁེལ་བྱུང་ནས་རྒྱུན་ལས་ཀྱི་ལས་དོན་འགོ་འཛུགས་ཟིན་པ་ཡིན།
ད་ལྟ་ཚོགས་གཙོས་མཚམས་སྦྱོར་གྱི་ནང་ལ་གསལ་བཤད་བྱེད་དགོས་རྒྱུ་ཞིག་ལ། ཆེས་མཐོའི་ཁྲིམས་ཞིབ་ཁང་སྒོ་ཕྱེ་ཡོད་མ་རེད་གསུངས་པ་དེ་བདེན་པ་མ་རེད། ཆེས་མཐོའི་ཁྲིམས་ཞིབ་ཁང་གི་ནང་ལ་ཁྲིམས་ཞིབ་པ་ཆེ་བས་དམ་འབུལ་ཞུས་པ་ནས་བཟུང༌། ཆེས་མཐོའི་ཁྲིམས་ཞིབ་ཁང་གི་ངོ་བོ་ལ་འགྱུར་ཟིན་པ་ཞིག་རེད།
ྋགོང་ས་ྋསྐྱབས་མགོན་རྒྱལ་བའི་དབང་པོའི་ཡང་དག་པའི་དབུ་ཁྲིད་དང་ལམ་སྟོན་གྱི་འོག་བཙན་བྱོལ་བོད་མིའི་སྤྱི་ཚོགས་མང་གཙོའི་རིང་ལུགས་ཀྱི་ནང་ལ་བསྐྱོད་པ་ནས་བཟུང་སྟེ་མང་ཚོགས་ཀྱིས་འོས་འདེམས་བྱས་པའི་བོད་མི་མང་སྤྱི་འཐུས་ལྷན་ཚོགས་སྐབས་བཅུ་གཅིག་བར་སྐབས་སོ་སོའི་བསྒྲུབ་བྱའི་ལས་དོན་ལྷག་བསམ་རྣམ་དག་གིས་བསྒྲུབས་ཏེ་དུས་ཡུན་ཚང་ནས་ད་ལྟའི་གནས་སྐབས་འདི་ལ་
བཙན་བྱོལ་བོད་མིའི་བཅའ་ཁྲིམས་གཏན་ལ་ཕབ་པ་ནས་བཟུང༌། བཙན་བྱོལ་གཞུང་གི་ཡོང་འབབ་དང་འགྲོ་སོང་ཆེད་ལོ་འཁོར་སྔོན་རྩིས་སྤྱི་འཐུས་གྲོས་ཚོགས་ནས་གཏན་ལ་ཕབ་པའི་ལམ་སྲོལ་ཞིག་བྱུང་བ་རེད། དེ་དཔལ་འབྱོར་གྱི་ཆ་ནས་གནད་འགག་ཡོད་པ་བཤད་མ་དགོས་པའི་ཐོག་དེ་ལས་གནད་འགག་ཆེ་བ་ཞིག་ཆབ་སྲིད་དང་བཟང་སྤྱོད་ཆ་ནས་ཡིན་པར་དགོངས་བཞེས་ཀྱིས་ཁྲིམས་ཀྱི་འགྲོ་ལུགས་དང་མཐུན་པའི་སྔོན་རྩིས་གཏན་འབེབས་བྱེད་རྒྱུ་དང༌།
སྐབས་ ༡༡ སྤྱི་འཐུས་ཁྲིམས་བཟོ་གྲོས་ཚོགས་ཀྱི་ངོ་བོར་བསྒྱུར་བ་ནས་བཟུང་ཁྲིམས་དང་དཔལ་འབྱོར་གྱི་ལམ་སྲོལ་གཉིས་ཀའི་ཐོག་ཡར་ཐོན་མང་གཙོའི་རིང་ལུགས་ལྡན་པའི་རྒྱལ་སྤྱིའི་སྤྱི་སྲོལ་དང་མཐུན་པ་ཞིག་ཡོང་རྒྱུའི་འབད་བརྩོན་བྱས་པ་རེད། གང་ཡིན་ཞེ་ན་ྋགོང་ས་ྋསྐྱབས་མགོན་ཆེན་པོའི་ཐུགས་ཀྱི་དགོངས་གཞི་ལ་དེ་འདྲ་ཞིག་ཡོད་པར་བརྟེན།
མང་གཙོའི་ལམ་སྲོལ་ཅན་གྱི་རྒྱལ་ཁབ་ག་འདྲ་ཞིག་ཡིན་ན་ཡང༌། ཆབ་སྲིད་ཀྱི་མངའ་དབང་དེ་མང་ཚོགས་ལ་གནས་པ་དང༌། མང་ཚོགས་ཀྱིས་འོས་འདེམས་བྱས་པའི་གྲོས་ཚོགས་ཀྱི་འཐུས་མིའི་བརྒྱུད་ནས་མངའ་དབང་ལག་བསྟར་བྱ་རྒྱུ་དང༌། གྲོས་ཚོགས་ཀྱི་འཐུས་མིས་ཁྲིམས་བཟོ་དང་བཏང་འཛིན་གྱི་ལས་དོན་གྱི་ཐོག་ནས་ལས་འཆར་གཏན་འབེབས་བྱ་རྒྱུ།
ཚོགས་དུས་སྔ་མ་མང་པོའི་ནང་ཡང་ཡང་ཞུས་ཟིན་པ་བཞིན། ད་དུང་ཡང་བློ་ཕམ་ཐོག་ནས་ཞུ་དགོས་པ་ཞིག་ལ། གྲོས་ཚོགས་ནང་དྲི་བ་དང་འཕྲོ་དོན་དྲི་བ་གནང་མཁན་གྲོས་ཚོགས་འཐུས་མི་ཚོའི་དྲི་བའི་གནས་ཚད་དང༌། དེ་ལ་བཀའ་ལན་གནང་མཁན་གྱི་བཀའ་བློན་ཚོའི་བཀའ་ལན་གྱི་གནས་ཚད་གཉིས་ཀ་མང་གཙོའི་གྲོས་ཚོགས་ཀྱི་ལམ་སྲོལ་དང་མཐུན་པའི་ཚད་ལྡན་བློ་ཁ་ཁེངས་པ་ཞིག་ཡོང་གི་མེད་པའི་ཚོར་བ་དེ་ཚོགས་གཙོ་ལ་ཡང་ཡང་ཡོང་གི་འདུག
གྲོས་ཚོགས་ཀྱི་སྒྲིག་གཞི་གལ་ཆེན་པོ་ཞིག་ལ་བརྩི་གི་ཡོད་རེད། སྤྱིར་བཏང་ནས་གྲོས་ཚོགས་རིང་ལུགས་ཅན་གྱི་མང་གཙོའི་ནང་གྲོས་ཚོགས་ལས་གཙོ་ཆེ་བའི་སྒྲིག་འཛུགས་དང་སྡེ་ཚན་གཞན་མེད་པ་ཞིག་རེད། བཅའ་ཁྲིམས་དང་སྒྲིག་གཞི་ཡོངས་རྫོགས་ཀྱི་དགོངས་དོན་དུ་ཁྲིམས་ལུགས་རང་གི་ཐོག་ནས་བཀའ་ཤག་གིས་གྲོས་ཚོགས་ལ་འགན་འཁྱེར་དགོས་པ་དང༌།