ལི་ཐང་བློ་བཟང་ཉི་མའམ་འབྲོང་ཚ། འབྲས་སྒོ་མང་ཧར་གདོང་ཁང་ཚན། མཁྱེན་ལྡན་ཐབས་མཁས་འཁྲུངས་ཡུལ་བདེ་ཆེན་རང་སྐྱོང་ཁུལ།། ཤེས་རབ་རྩལ་གྱི་སོན་པའི་རྣམ་དཔྱོད་ཕྱོགས་སུ་ཁྱབ།། གངས་ཅན་གཟི་འོད་འཕྲོ་བའི་ཆོས་སྲིད་ཟབ་ཡངས་གཏེར།། དབུ་མའི་སྒྲོམ་གཞི་འབྱེད་མཁས་ཟམ་གདོང་རིན་པོ་ཆེ།།
འཇམ་གཅེས་སམ་པིར་མིང་ལྷ་རྒོད། རྒྱལ་ཀུན་སྙིང་རྗེའི་རང་གཟུགས་པད་དཀར་འཆང་། ། གསུམ་ལྡན་ངུར་སྨིག་འཛིན་པའི་རྣམ་རོལ་ཏེ། ། བསྟན་འཛིན་རྒྱལ་མཚོའི་སྲས་ཀྱི་མཆོག་གྱུར་བ། ། ཟམ་གདོང་བློ་བཟང་བསྟན་འཛིན་གུས་པས་འདུད། །
ནག་པོ་གཤིན་རྗེ་གཤེད། དངོས་མིང་འཇམ་མགོན། སུ་ཇཱ། རིག་པའི་རྩ་ལག་ཕྱོགས་བཅུར་རྒྱས་པའི་ངང་ཚུལ་ལས།། སྲིད་པ་འདི་ན་སྙན་པ་སྟོང་གི་བ་དན་གཡོ།། གླིང་ག་ཞིག་ན་བག་ཡོད་ཚུལ་གྱི་སྒོམ་ཞུགས་ཏེ།། འཚོ་བ་ངན་ངོན་ཞིག་ལ་བརྟེན་མཁས་མཆོག་མཉེས་པ།།
མཁན་པོ་ཀཿ བྲག་དངོས་གྲུབ་བསོད་ནམས། དུས་རབས་ཉི་ཤུའི་འཛུམ་དཀར་འཕྲོས་པའི་ཚེ།། འཇིག་རྟེན་དགེ་བཅུའི་ཐོས་བསམ་དཔལ་གྱི་རྒྱན།། ཆབ་སྲིད་རྒྱལ་རྔ་ལྡིར་བའི་ཁྱོན་དུ་ཁྱབ།། ༸རྒྱལ་བའི་དགོངས་པ་འཁྲུལ་བྲལ་ཐོག་མར་བཞད།།
སྒྲོལ་མ་གླིང་། བློ་བཟང་ཆོས་སྒྲོན། བྱམས་དང་བརྩེ་བས་འགྲོ་དོན་བྱོན་པའི།། རྒྱལ་མཆོག་གང་གི་ཐུགས་ཀྱི་སྲས་མཆོག། ཉེར་གཅིག་དུས་ཀྱི་མཁས་པའི་གཙུག་རྒྱན།། སློབ་དཔོན་མཆོག་ལ་སྒོ་གསུམ་གུས་འདུད།།
ཨོ་ཐོག གཡང་འཛོམས། བོད་ཀྱི་མདུན་ལམ་སྲུང་བའི་མཛད་པ་དག། མི་རབས་ཕྱི་མས་སེམས་ནས་བརྗེད་མི་སྲིད།། སྒོ་གསུམ་གུས་ཕྱག་བྱེ་བ་གྲངས་མེད་ཀྱིས།། མངོན་པར་བསྟོད་པའི་ལས་ལ་རབ་ཏུ་ཞུགས།།
འབྲས་སྤུངས་བློ་གསལ་གླིང་དགེ་རྒན་ལྕོག་རི་ཕུར་བུ། <<དགེ་སློང་དབུ་དཀར་ཞིག་གི་རྐང་རྗེས་འགྲེལ་བ།>> དགུང་ལོའི་བབས་ཀྱི་ལྷོད་པོར་མ་བཞུགས་པར།། འོད་ཀྱི་རྐང་རྗེས་འདེད་དེ་མིག་ལ་ཐོགས།། གོ་ལའི་སྐད་ཆ་བླགས་པའི་ནངས་མོ་དེར།།
སེར་སྨད་གཙང་མཁྱེན་རབ་སངས་རྒྱས། འཇམ་དབྱངས་ཀྱི་ཐུགས་དང་དབྱེར་མེད་པའི།། ཕྱག་ཆེན་གྱི་ལྟ་བ་འདོམས་མཁས་ཤིང་།། ༸སྐྱབས་མགོན་གྱི་རྒྱལ་བའི་སྲས་ཀྱི་མཆོག། དྲིན་ཅན་གྱི་བླ་མའི་ཞབས་ལ་འདུད། །
དྷ་ས། སོག་ཚང་ལེགས་བཤད། རྣམ་འདྲེན་ཤཱཀྱའི་ལུང་རྟོགས་བསྟན་པའི་ཆོས།། འཛིན་ཅིང་སྤེལ་ལ་དཔའ་བའི་བདག་ཉིད་ཆེ།། ལས་བསོད་རྟེན་འབྲེལ་སྨིན་པའི་རོལ་གར་ལས། འཕགས་མཆོག་ཕྱག་ན་པད་མོའི་སྲས་སུ་བྱོན།།