བཀའ་རྩ་ཁྱབ་བསྒྲགས་དང་འབྲེལ་བའི་ཐོག་ལས་རིམ་རྣམ་གཞག་གསུངས་པ།
ལས་རིམ་རྣམ་གཞག་ཅིག་མ་ཞུས་ཐབས་མེད་བྱུང་སོང༌། ྋགོང་ས་ྋསྐྱབས་མགོན་ཆེན་པོའི་བཀའ་རྩ་ཁྱབ་བསྒྲགས་ཀྱི་ལམ་ནས་བཅའ་ཁྲིམས་ཀྱི་འབྲེལ་ཡོད་དོན་ཚན་བསྐྱར་བཅོས་ཕྱིན་ཟིན་པ་ཞིག་རེད། དེ་འདྲ་སོང་ཙང་སླར་ཡང་བཅའ་ཁྲིམས་བསྐྱར་བཅོས་ཀྱི་གྲོས་འཆར་གསར་པ་ཞིག་འདོན་རྒྱུ་དེ་སྒྲིག་གཞི་དང་མཐུན་པ་མ་རེད། ྋགོང་ས་མཆོག་གིས་བཀའ་རྩ་ཁྱབ་བསྒྲགས་ཀྱི་ལམ་ནས་བཅའ་ཁྲིམས་བསྐྱར་བཅོས་གནང་བ་དེ་གྲོས་ཚོགས་ཀྱིས་དེ་དོན་གཏན་ལ་འབེབས་སམ་བཟོ་བཅོས། སྒྱུར་བཀོད། ཡང་ན་ཕྱིར་འཐེན་གནང་རྒྱུ་མ་གཏོགས། བཅའ་ཁྲིམས་བསྐྱར་བཅོས་ཀྱི་གྲོས་འཆར་འདི་སླར་ཡང་བསྣམས་ཕེབས་པ་ཡིན་ན་བཀའ་རྩ་ཁྱབ་བསྒྲགས་ནུས་མེད་ཆགས་ཀྱི་རེད། དེའི་ཐོག་དགོངས་བཞེས་གནང་རོགས་གནང་ཞུ་རྒྱུ་ཡིན།
བཀའ་རྩ་ཁྱབ་བསྒྲགས་དང་འབྲེལ་བའི་བསྐྱར་བཅོས་གྲོས་འཆར་ལ་དགག་བྱ་གནང་བ།
ཡིག་ཆ་ཨང་ ༣ པ་འདི་ཚུད་པར་དགག་བྱ་མ་ཞུས་ཐབས་མེད་བྱུང་སོང༌། དགོངས་འགལ་མེད་པ་ཞུ་རྒྱུ་ཡིན། འདིའི་ནང་འཁོད་པའི་ཚིག་བརྗོད་རྙིང་པ་དེ་ད་ལྟ་བསྡད་མེད། གལ་སྲིད་དེ་བསྐྱར་བཅོས་ཤིག་གནང་དགོས་ཀྱི་ཡོད་ན་ྋགོང་ས་ྋསྐྱབས་མགོན་ཆེན་པོའི་བཀའ་རྩ་ཁྱབ་བསྒྲགས་ཀྱི་ལམ་ནས་བསྐྱར་བཅོས་གནང་ཟིན་པའི་ཚིག་བརྗོད་རྙིང་པ་ཆགས་དགོས་ཀྱི་རེད། ཕྱི་ལོ་ ༢༠༠༦ ཟླ་ ༦ ཚེས་ ༡ གི་ཉིན་མོ་འདིར་ཡང་བཙན་བྱོལ་བོད་མིའི་བཅའ་ཁྲིམས་ཀྱི་དོན་ཚན་ཞེ་ལྔ་པའི་ནང་གསེས་གཉིས་པའི་ཚིག་བརྗོད་ཡིག་ཆ་འདིའི་ནང་འགོད་པ་ནང་བཞིན་བསྡད་ཡོད་ན་བར་བརྒལ་གྱི་ཚོགས་གཙོ་དང་སྐབས་བཅུ་བཞི་པའི་དཔལ་ལྡན་ཚོགས་གཙོ་ཚོགས་གཞོན་གྱི་དམ་འབུལ་བཅའ་ཁྲིམས་དང་མི་མཐུན་པ་ཞིག་ཆགས་པར་ངོས་ལེན་གནང་དགོས་ཀྱི་རེད། དེ་འདྲ་ཡིན་ན་ྋགོང་ས་ྋསྐྱབས་མགོན་ཆེན་པོས་ཁྲིམས་ལུགས་གཞིར་བཟུང་བཀའ་རྩ་ཁྱབ་བསྒྲགས་གནང་བ་དེ་ནུས་མེད་ཡིན་པ་ཆགས་ཀྱི་རེད། དེ་འདྲ་སོང་ཙང་བསྐྱར་བཅོས་གྲོས་འཆར་འདི་གྲོས་ཚོགས་སུ་ཚུད་པ་ལ་དགག་བྱ་མ་ཞུས་ཐབས་མེད་བྱུང་སོང༌།
གྲོས་ཚོགས་ཀྱི་ལས་དོན་གནང་སྟངས་འགའ་ཞིག་ཐོག་གསུངས་པ།
ད་ལྟ་ངས་སྙན་གསན་ཞུ་རྒྱུ་འདི་བགྲོ་གླེང་གི་ལས་རིམ་རང་གི་ཆ་ཤས་སུ་བརྩི་བ་གནང་ན་འགྲིག་གི་ཡོད། དངོས་འབྲེལ་བྱས་ན་སྤྱི་འཐུས་རྣམ་པས་བགྲོ་གླེང་གནང་ཟིན་པའི་མཇུག་ཏུ་བཀའ་ཤག་གིས་གསལ་བཤད་ཞུ་དགོས་པ་ཡིན་ནའང༌། སྟབས་མ་ལེགས་པ་ཞིག་ལ་བགྲོ་གླེང་མཇུག་བསྡོམས་མ་གནང་གོང་ཞུ་དགོས་བྱུང་བ་འདིར་དགོངས་སེལ་ཞུ་རྒྱུ་ཡིན། སྔོན་ནས་སྙན་གསན་ཞུས་ཟིན་པ་བཞིན་ཟློག་ཏུ་མེད་པའི་ལས་རིམ་ཟླ་གྲངས་མང་པོའི་སྔོན་ནས་ཁས་ལེན་ཞུས་ཟིན་པ་ཞིག་ཏུ་བཅར་དགོས་ལ་བརྟེན་གྲོས་ཚོགས་ཉིན་གཉིས་པ་དང་ཉིན་དང་པོའི་ཚོགས་ཐེངས་མཐའ་མ་དགོངས་པ་མ་ཞུས་ཐབས་མེད་ཀྱི་གནས་སྟངས་ཆགས་པར་བརྟེན་ད་ལྟའི་དུས་ཚོད་འདི་གཏམ་བཤད་ཞུ་དགོས་བྱུང་བ་རེད།
དེ་རིང་སྐབས་བཅུ་བཞི་པའི་སྤྱི་འཐུས་ལྷན་ཚོགས་ཀྱི་ཚོགས་དུས་དང་པོ་རེད། དེར་བརྟེན་ཐོག་མ་བཀའ་ཤག་གི་ངོས་ནས་བཀུར་འོས་ཚོགས་གཙོ་མཆོག་གིས་དབུས་གསར་དུ་འོས་འདེམས་བྱུང་བའི་སྤྱི་འཐུས་རྣམ་པ་ཡོངས་ལ་འཚམས་འདྲི་བཀྲིས་བདེ་ལེགས་ཞུ་དགོས་ཀྱང༌། ལམ་འགྲོ་མ་རྒྱུགས་པ་ཞིག་ལ་ད་ནངས་སྔ་དྲོ་ལས་རིམ་རྣམ་གཞག་དང་གྲོས་འཆར་ཚུད་རྒྱུར་དགག་བྱ་ཞུས་དགོས་བྱུང་བ་ཡིན་ཙང༌། ཐོག་མ་བཀྲིས་བདེ་ལེགས་ཞུ་རྒྱུའི་ཚབ་ཏུུ་དགག་བྱའི་བརྗོད་ཚིག་ཞུས་དགོས་བྱུང་སོང་བས་བློ་ཕམ་དང་བཅས་བཟོད་གསོལ་ཞུ་རྒྱུ་དང༌། ད་ལྟའི་གོ་སྐབས་འདི་བླངས་ནས་བཀུར་འོས་ཚོགས་གཙོ་མཆོག་དང༌། ཚོགས་གཞོན་མཆོག སྤྱི་འཐུས་རྣམ་པ་ཡོངས་རྫོགས། ལྷག་པར་གྲོས་ཚོགས་འདིའི་ནང་གསར་དུ་ཕེབས་མཁན་གྱི་སྤྱི་འཐུས་རྣམ་པ་ཚོ་ལ་བཙན་བྱོལ་བོད་གཞུང་བཀའ་ཤག་དང༌། ང་རང་སྒེར་གྱི་ངོས་ནས་འཚམས་འདྲི་དང་བཀྲིས་བདེ་ལེགས་ཞུ་བ་དང་ཆབས་ཅིག ྋགོང་ས་ྋསྐྱབས་མགོན་ཆེན་པོས་ཡིད་ཆེས་དང་ཐུགས་རེ་ཇི་ལྟར་གནང་བ་བཞིན་འཛིན་སྐྱོང་བཀའ་ཤག་གི་ངོས་ནས་ཀྱང་གྲོས་ཚོགས་ལ་བརྒྱ་ཆ་བརྒྱ་ཐམ་པའི་ཡིད་ཆེས་དང་བློ་གཏད་ཞུ་རྒྱུ་ཡིན། དེ་དང་ཆབས་ཅིག་ཏུ་རེ་བསྐུལ་ཞུ་རྒྱུ་ཞིག་ཡོད། དེ་ལ་སྐྱོན་བརྗོད་ཞུས་པར་མ་དགོངས་རོགས་གནང༌། མང་གཙོའི་རིང་ལུགས་ཀྱི་ནང་ཁྲིམས་དང་སྒྲིག་གཞི་ལ་རྩི་སྲུང་ཞུ་རྒྱུ་ཧ་ཅང་གིས་གལ་གནད་ཆེན་པོ་ཡིན་སྟབས། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞིའི་ཐོག་ཚོགས་དྲུང་ལས་ཁུངས་ནས་རྒྱུན་དུ་ཞིབ་ཚགས་པོས་ཐུགས་སྣང་གནང་དགོས་པ་གལ་ཆེན་པོ་ཡིན་པའི་ཚོར་སྣང་བྱུང༌། ཚོགས་གཙོ་རྣམ་པ་ཡང་ཡང་འཕོ་འགྱུར་ཕེབས་ཀྱི་རེད། གསར་དུ་ཕེབས་པའི་ཚོགས་གཙོས་དང་པོ་ནས་སྒྲིག་གཞི་ཚང་མ་ཐུགས་ལ་ངེས་མ་ངེས་ཅི་རིགས་ཡོང་སྲིད་པ་རེད། དེར་བརྟེན་རྒྱུན་ལྡན་དུ་གནས་པའི་ཚོགས་དྲུང་ལས་ཁུངས་ཀྱིས་ཚོགས་གཙོ་རྣམ་པར་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞིའི་སྐོར་གསལ་འདེབས་ཞུ་རྒྱུ་དང༌། ལས་རིམ་རྣམས་དོན་གནད་གལ་ཆེ་ཆུང་གཞིར་བཟུང་བང་རིམ་སྒྲིག་ཐུབ་པ་གནང་རྒྱུ་དེ་དག་ཚོགས་དྲུང་ལས་ཁུངས་ཀྱི་ལས་འགན་གྱི་ཆ་ཤས་གལ་ཆེའི་གྲས་ཤིག་རེད། ལྷག་པར་དུ་གྲོས་ཚོགས་ཀྱི་གནས་ཚད་དང་མཚན་མཐོང་གི་ཆ་ནས་གལ་ཆེན་པོ་ཆགས་ཀྱི་ཡོད་པ་རེད། བཅའ་ཁྲིམས་དོན་ཚན་ ༤༣ ནང་གསེས་དང་པོའི་འོག་སྐབས་བཅུ་བཞི་པའི་གྲོས་ཚོགས་ཚོགས་དུས་དང་པོའི་ཐོག་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་སྐུ་དངོས་སུ་ྋཞབས་སོར་འཁོད་མ་ཐུབ་པ་ཡིན་ཙང༌། གསུང་འཕྲིན་ཕེབས་རྒྱུ་ཡིན་པ་སྨོས་མེད་རེད། འོན་ཀྱང་ཉེ་སྔོན་ཚོགས་འདུའི་ལས་རིམ་རགས་ཟིན་བཀྲམས་པ་དེའི་ནང་ྋགོང་ས་མཆོག་གི་ཆིབས་སྒྱུར་དང༌། གསུང་འཕྲིན་གཉིས་ཀའི་སྐོར་གང་ཡང་འཁོད་མི་འདུག གསུང་འཕྲིན་གསོལ་སྩལ་ཞུ་རྒྱུ་དང༌། དུས་ཐོག་ཞབས་སྐུལ་གནང་རྒྱུ་དེ་དག་ཚོགས་དྲུང་ལས་ཁུངས་ཀྱིས་ཐུགས་འགན་བཞེས་དགོས་ཀྱི་རེད།
ད་ལྟ་ངས་སྙན་གསན་ཞུ་རྒྱུ་དེ་ལས་རིམ་རྣམ་གཞག་མིན་ལ། སྐྱོན་བརྗོད་ཀྱང་མིན། བྱུང་རབས་ཀྱི་ནང་གྲོས་ཚོགས་ཀྱི་དེབ་ཐེར་དུ་གཞག་རྒྱུའི་ཆེད་དང༌། ལྷག་པར་བཀུར་འོས་ཚོགས་གཙོ་སྦྲེལ་པོས་མ་འོངས་པར་ཐུགས་སྣང་ཡོང་བའི་ཆེད་དུ་ཡིན། ྋགོང་ས་ྋསྐྱབས་མགོན་ཆེན་པོ་མཆོག་གི་གསུང་འཕྲིན་གྱི་ཐོག་བགྲོ་གླེང་གནང་ཕྱོགས་སྐོར་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞི་ལེའུ་དྲུག་པའི་དོན་ཚན་བཅུ་བདུན་པའི་ནང་གསེས་དང་པོ་ནས་ལྔ་པའི་བར་གསལ་ཡོད། འོན་ཀྱང་དེ་རིང་འདིར་བགྲོ་གླེང་གནང་ཕྱོགས་སྒྲིག་གཞི་དོན་ཚན་དེ་དག་དང་མཐུན་པར་གནང་མ་སོང་སྙམ་པ་ཞིག་བྱུང༌། འོན་ཀྱང་སྒྲིག་གཞིའི་དོན་ཚན་དེ་ཚོ་དོན་ཚན་ ༧༤ པའི་འོག་ཚོགས་གཙོས་འགྱུར་བ་གཏོང་ཆོག་པའི་གྲས་རེད། སྲོལ་རྒྱུན་ལྟར་བྱས་ན་སྒྲིག་གཞི་དོན་ཚན་རེ་ཟུང་འགྱུར་བ་གཏོང་གནང་བའི་སྐབས་ཚོགས་གཙོས་གྲོས་ཚོགས་སུ་སྒྲིག་གཞི་དོན་ཚན་འདི་དང་འདི་ཚོགས་ཐེངས་འདིའི་རིང་རྩིས་མེད་ཡིན་ཞེས་གསལ་བཤད་གནང་བའི་ཐོག་ནས་ལས་རིམ་འགོ་འཛུགས་གནང་དགོས་ཀྱི་རེད། དེ་འདྲ་གནང་བ་ཡིན་ན་ལས་རིམ་རྣམ་གཞག་སོགས་ཞུ་མི་དགོས་པར་ཐུགས་སྟབས་བདེ་བ་ཡོང་གི་རེད། སྒྲིག་གཞིའི་དོན་ཚན་དེ་ཚོའི་ནང་བགྲོ་གླེང་གི་མཇུག་ཏུ་བཀའ་ཤག་གིས་གསལ་བཤད་ཞུ་དགོས་འཁོད་ཡོད། དེ་འདྲ་སོང་ཙང་ད་ལྟ་བགྲོ་གླེང་མཇུག་བསྡོམས་གནང་མེད་ཀྱང་བཀུར་འོས་ཚོགས་གཙོ་མཆོག་གི་བཀའ་ཁྲོལ་དང་བསྟུན་ཏེ་ས་བཅད་མ་སྟོང་ཙམ་དུ་བཀའ་ཤག་གི་ངོས་ནས་ཚིག་རེ་ཟུང་ཞུ་རྒྱུའི་གོ་སྐབས་བླངས་པ་ཡིན།
ྋགོང་ས་མཆོག་གི་གསུང་འཕྲིན་ཐུགས་གལ་ཆེན་པོ་ཡིན་པ་དང༌། ྋགོང་ས་ྋསྐྱབས་མགོན་ཆེན་པོ་མཆོག་བཅའ་ཁྲིམས་ནང་གསལ་ལྟར་གྲོས་ཚོགས་སུ་ྋཞབས་སོར་འཁོད་ཐུབ་ཐབས་འབད་བརྩོན་གནང་དགོས་པ་སོགས་བཀུར་འོས་སྤྱི་འཐུས་རྣམ་པ་མི་ཉུང་བ་ཞིག་གིས་ཚོར་སྣང་དྲག་པོའི་ཐོག་ནས་བཀའ་གནང་སོང་བ་དེ་ཚོ་ཐམས་ཅད་ལ་དགའ་བསུ་དང་རྒྱབ་སྐྱོར་ཞུ་རྒྱུ་ཡིན། དེ་བཞིན་བཀུར་འོས་སྤྱི་འཐུས་མང་ཆེ་བས་གསུངས་པ་བཞིན་དུ་ྋགོང་ས་མཆོག་གི་གསུང་འཕྲིན་གྱི་དགོངས་དོན་ཉམས་ལེན་ཞུ་རྒྱུ་དང༌། དེ་བཞིན་ཐུགས་རྗེ་ཆེ་ཞུའི་གྲོས་འཆར་ལ་བཀའ་ཤག་གི་བཀའ་བློན་མི་རེ་ངོ་རེ་ནས་རྒྱབ་སྐྱོར་བརྒྱ་ཆ་བརྒྱ་ཐམ་པ་ཞུ་རྒྱུ་ཡིན།
བོད་མི་མང་སྤྱི་འཐུས་ལྷན་ཚོགས་སྐབས་བཅུ་བཞི་པ། ཚོགས་དུས་དང་པོ། ༢༠༠༦།༦།༡ ནས་ ༢༠༠༦།༦།༢