ཞར་བྱུང་ལ་དེ་རིང་གྲོས་ཚོགས་འདི་དང༌། ལྷག་པར་དུ་འདས་པའི་ཉི་མ་གཅིག་གཉིས་ནང་སྤྱི་འཐུས་རྣམ་པས་བགྲོ་གླེང་ཐོག་བཀའ་བསྡུར་གནང་སྟངས་དེ་ཚིག་འདྲ་མིན་སྣ་ཚོགས་བེད་སྤྱོད་བཏང་བ་དང༌། སྐབས་དང་གྲོས་གཞིར་འབྲེལ་བ་མེད་པ་དེ་ཚོར་ཤུགས་ཆེན་པོས་བཏང་འཛིན་ཞུས་མེད། གང་ཡིན་ཞེ་ན། འདི་ཚོགས་དུས་མཐའ་མ་དེ་ཡིན་སྟབས།

ཡི་གེ་དག་ཆའི་ཐོག་ལ་ལག་པ་བརྐྱངས་ནས་མང་མོས་བསྡུས་པའི་ལུགས་སྲོལ་ཡོད་མ་རེད། དེ་ནི་བརྡ་སྤྲོད་ཀྱི་གཞུང་ལ་གཏུགས་ནས་འགྲོ་རྒྱུ་ཞིག་རེད། ད་ལྟ་བཅའ་ཁྲིམས་ཀྱི་སྒྲིག་གཞི་བསྐྱར་བཅོས་ཀྱི་གྲོས་འཆར་ཟིན་བྲིས་སླེབས་པའི་སྐབས་ལ་ཚོགས་གཙོའི་ངོས་ནས་ཞིབ་འཇུག་གནང་སྟེ་གཟིགས་གཟོས་དང་གཟིགས་གསོལ་གཉིས་ཀྱི་ནང་ནས་གཟིགས་གསོལ་འདི་སྟབས་བདེ་བའི་དབང་གིས་གསོལ་ཞེས་བཞག་ཡོད་རེད།

སྐབས་འདིར་ཚོགས་གཙོས་སྟོང་པའི་དུས་ཚོད་ཅིག་བླངས་ཏེ་ཟུར་བརྗོད་ཁ་ཤས་ཤིག་བྱ་འདོད་བྱུང༌། ད་རང་སྟོང་པའི་དུས་ཚོད་སྐབས་སུ་བཀུར་འོས་སྤྱི་འཐུས་གཅིག་གིས་དབྱིན་ཇིའི་སྐད་དུ་ Secular ཞེས་པའི་བོད་སྐད་དུ་ཆོས་མེད་ལ་གོ་གི་ཡོད་རེད་ཅེས་གསུངས་པ་ལྟ་བུ་བྱུང་སོང༌།

སྤྱི་ཡོངས་མང་གཙོའི་རིང་ལུགས་དང་ལྡན་པའི་གྲོས་ཚོགས་ཁག་གི་འགྲོ་སྟངས་ཀྱི་ཆ་ནས་གྲོས་ཚོགས་ལ་དགོས་ངེས་ཅན་གྱི་ཁང་ཁུངས་ཇི་ཙམ་དགོས་སྐོར་རྒྱལ་ཁབ་ཁ་ཤས་ཀྱི་རྩ་ཁྲིམས་ནང་དུའང་གསལ་ཡོད། གལ་ཏེ་མ་གསལ་ནའང་ལམ་ལུགས་སྲོལ་རྒྱུན་ཞིག་གི་ཐོག་ནས་གྲོས་ཚོགས་ལ་ངེས་པར་དུ་དགོས་པའི་ཁང་ཁུངས་རྣམས་གཏན་ལ་ཕབ་སྟེ་ཡོད་བསྡད་པ་ཞིག་རེད།

བཙན་བྱོལ་བོད་མིའི་བཅའ་ཁྲིམས་གཏན་ལ་འབེབས་སྐབས་རྒྱལ་རྟགས་དང༌། རྒྱལ་དར། རྒྱལ་གླུ། རྒྱལ་ས་བཅས་བཅའ་ཁྲིམས་ཀྱི་ཆ་ཤས་སུ་གཏན་འབེབས་གནང་ཡོད་མ་རེད། རྒྱལ་ཁབ་མང་པོའི་རྩ་ཁྲིམས་སུ་རྒྱལ་ས་དང༌། རྒྱལ་དར། རྒྱལ་རྟགས། རྒྱལ་གླུ་བཞི་གཏན་ལ་ཕབ་པའི་ལུགས་སྲོལ་ཡོད་པ་ཞིག་རེད།

འོས་བསྡུ་ལས་ཁང་དང༌། གཞུང་ཞབས་འདེམས་བསྐོ་ལྷན་ཁང༌། རྩིས་ཞིབ་ལས་ཁང་བཅས་ཀྱི་ཐོག་བགྲོ་གླེང་བྱུང་བའི་སྐབས་གསལ་བཤད་བཀའ་ཤག་ནས་གནང་དགོས་ཀྱི་ཡོད། བཀའ་བློན་ཁྲི་པས་གནང་ནའང་འདྲ། བཀའ་བློན་གཞན་སུས་གནང་ཡང་འགྲིགས་ཀྱི་རེད། ད་ལན་ང་ཚོ་དུས་ཚོད་ཏོག་ཙམ་འགྱངས་ན་བསམ་པ་བྱུང་སྟེ་ཕལ་ཆེར་ཕན་ཐོགས་གང་ཡང་ཡོང་གི་མེད་པ་འདྲ།

བཅའ་ཁྲིམས་དང་ལྡན་པའི་མང་གཙོའི་སྲིད་གཞུང༌། དེ་ཡང་ཞེ་དྲགས་ཀྱི་སྤོབས་པ་ཆེན་པོའི་ཐོག་ནས་ཆོས་སྲིད་ཟུང་འབྲེལ་ཡིན་ཞེས་ང་རང་ཚོས་ཡང་ཡང་བཤད་བསྡད་རྒྱུ་དང༌། ྋགོང་ས་ྋསྐྱབས་མགོན་ཆེན་པོའི་དབུ་ཁྲིད་ཀྱི་འོག་ལ་ཡོད་པའི་སྲིད་གཞུང་ཞིག་གི་གྲོས་ཚོགས་ནང་གྲོས་འཆར་གྱི་ཡིག་ཆ་འདིའི་འགོ་བརྗོད་དེར་གཟིགས་པ་ཡིན་ན།

ངས་གྲོས་ཚོགས་སྐབས་བཅུ་གཅིག་ནས་བཟུང་སྟེ་སྐབས་བཅུ་གཉིས་ཀྱི་བར་དུ་ལན་འགའ་ཤས་གསལ་བཤད་ཞུས་ཡོད་ཀྱང༌། སྤྱི་འཐུས་རྣམ་པས་ཐུགས་དགོངས་སུ་མ་ངེས་པར་བརྟེན། བསྐྱར་ལྡབ་ཞུ་དགོས་བྱུང་སོང༌། ཕྱི་རྒྱལ་དོན་གཅོད་ཁང་ཁག་གི་སྐུ་ཚབ་ངོ་མ་རྣམས་ྋགོང་ས་མཆོག་གིས་ཐད་བསྐོ་གནང་བ་མ་གཏོགས་ལས་བྱེད་སྒྲིག་གཞི་གཞིར་བཟུང་གིས་བསྐོ་གཞག་གནང་གི་མེད།