༈ བློ་སྦྱོང་ཚིགས་བརྒྱད་མའི་བཀའ་ཁྲིད།
(ཐོག་མར་གསུང་ཆོས་ཞུ་བ་པོས་སྤོས་སྣེས་སྔུན་བསུས་བཞུགས་ཁྲིར་འཁོད་མཚམས། ཚོགས་མང་གིས་ཤེས་རབ་སྙིང་པོ་དང་སེང་གདོང་མའི་བཟློག་པ་དང་བཅས་བཏོན་ཏེ། མཎྜལ་ཕུལ་རྗེས།) ༄༅།། འོ་ཡ། དེ་རིང་ཝཱ་རཱ་ཎ་སཱིའི་མཐོ་རིམ་སློབ་གྲྭའི་སློབ་ཟུར་རྣམ་པ་ཚོ་དང། ངོས་ཀྱི་ལོ་བདུན་ཅུ་དོན་ལྔ་འཁོར་བའི་སྐྱེས་སྐར་གྲ་སྒྲིག་ཚོགས་ཆུང་གིས་དུས་ཡུན་རིང་པོ་ནས་བཀའ་གདམས་པའི་དགེ་བཤེས་གླང་རི་ཐང་པའི་བློ་སྦྱོང་ཚིགས་བརྒྱད་མའི་ཆོས་འབྲེལ་ཞིག་དགོས་ཞེས་གསུངས་སོང་། ཆོས་འབྲེལ་བྱེད་རྒྱུ་ནི་ལས་སླ་པོ་ཞིག་མིན། སྔ་མོ་ཡིན་ན་ངས་ཆོས་འབྲེལ་བྱེད་ཀྱི་མེད། གཞུང་ལུགས་དང་ཆོས་ཀྱི་སྐོར་བཤད་དགོས་བྱུང་ན་འཛིན་གྲྭའི་ནང་ཤེས་ཡོན་རང་གི་རྣམ་པར་གཏམ་བཤད་ཞུས་པ་མ་གཏོགས། ཆོས་འཆད་ཉན་གྱི་ངོ་བོར་བྱེད་ཀྱི་མེད། གང་ལགས་ཤེ་ན། ཆོས་འབྲེལ་བཞག་སྟེ་བླ་མ་དང་སློབ་མའི་འབྲེལ་བ་བྱུང་ན་བཤེས་གཉེན་བསྟེན་ཚུལ་ཧ་ཅང་གལ་ཆེན་པོ་ཞིག་ཆགས་ཀྱི་ཡོད། དེ་ལ་སྐྱོན་ཤོར་ན་བླ་སློབ་གཉིས་ཀར་གནོད་སྐྱོན་དང། ལྷག་པར་དུ་སློབ་མ་ལ་ཚེ་འདི་ཕྱིའི་ལེགས་ཚོགས་ཀྱི་རྩ་བ་ཉམས་ཉེན་ཡོད།