༄༅།། མཁྱེན་བརྩེའི་བདག་ཉིད་དུས་གསུམ་རྒྱལ་བ་དང་།། དེ་སྲས་བྱང་སེམས་ཉན་རང་སློབ་མར་བཅས།། བདག་ཅག་གདུང་བའི་སྨྲེ་ངག་འདིར་དགོངས་ལ།། ཡིད་སྨོན་ལྷུན་གྱིས་འགྲུབ་པར་བྱིན་གྱིས་རློབས།། ངག་གི་དཔལ་ཡོན་སྡེ་སྣོད་ལུང་གི་ཚོགས།། དབང་འབྱོར་གཟུངས་སྤོབས་ལམ་དང་འགོག་པའི་ཆོས།། བློ་ལྡན་གདུལ་བྱའི་གསོས་སུ་བསྐྱངས་པའི་མགོན།། བཟང་པོའི་བརྟུལ་ཞུགས་འཛིན་ལ་གསོལ་བ་འདེབས།།

༄༅།། ཨེ་མ་ཧོ། ཨེ་མ་ཧོ། ཨེ་མ་ཧོ། དགེ་ལེགས་ཀུན་འབྱུང་ཤེས་ཡོན་སྣང་བའི་མཛོད།། བློ་གསལ་ཡིད་ཀྱི་འདབ་བརྒྱ་བཞད་པའི་གཉེན།། འཆད་ཉན་ཉམས་ཞིབ་བྱ་བའི་རྟ་ལྗང་གིས།། འདྲེན་མཁས་གཙུག་ལག་ཁང་ཆེན་ཨེ་མ་ཧོ།། ༡ །།

༢༠༠༨ ཕྱི་ཟླ་༨ ཚེས་༡༨ ཉིན། ༄༅།། དེ་རིང་འདིར་ཟབ་སྦྱོང་དུ་ཕེབས་པའི་རྒན་ལགས་རྣམ་པ་ཚང་མར། ཐོག་མར་བཙན་བྱོལ་བོད་གཞུང་བཀའ་ཤག་དང༌། ང་རང་སྒེར་བཅས་ཀྱི་ངོས་ནས་འཚམས་འདྲི་དང་བཀྲིས་བདེ་ལེགས་ཞུ་རྒྱུ་ཡིན། ཁྱེད་རང་ཚོ་ཤེས་རིག་ལས་ཁུངས་ཀྱིས་གྲ་སྒྲིག་ཞུས་པའི་ཟབ་སྦྱོང་ལ་གལ་ཆེན་པོར་བརྩིས་ཏེ་ཐག་རིང་པོའི་སློབ་གྲྭ་མང་པོ་ནས་སྐུ་ངལ་འཛེམས་མེད་ཀྱིས་ཕེབས་པ་རེད། ཟབ་སྦྱོང་ཉིན་མང་པོ་དེའི་རིང་ཐུགས་སྣང་ཆེན་པོས་ཤེས་ཡོན་སྲིད་བྱུས་སྐོར་ལ་ཉམས་ཞིབ་དང་སློབ་སྦྱོང་གཏིང་ཟབ་གནང་རྒྱུའི་གོ་སྐབས་བྱུང་ཡོད་པར་བརྟེན།   ཟབ་སྦྱོང་དུ་མ་ཕེབས་སྔོན་གྱི་སློབ་ཁྲིད་གནང་སྟངས་དང༌། ཟབ་སྦྱོང་རྗེས་སློབ་ཁྲིད་གནང་སྟངས་ཀྱི་སྤུས་ཀའི་ཐོག་ཏན་ཏན་ཁྱད་པར་དང་ཡར་རྒྱས་ཡོང་བའི་ཡིད་ཆེས་བྱེད་ཀྱི་ཡོད། དེ་མ་བྱུང་ན་ཟབ་སྦྱོང་རྣམས་ཆོ་ག་ཕྱག་ལེན་ལྟ་བུ་ཆགས་ཉེན་ཡོད།

༄༅།། ཨོཾསྭསྟི། དོན་གཉིས་མཐར་ཕྱིན་རྫོགས་པའི་སངས་རྒྱས་དང༌།། སྲིད་ཞིའི་འཇིགས་སྐྱོབ་ཐེག་གསུམ་དམ་པའི་ཆོས།། རིག་གྲོལ་འཕགས་པའི་དགེ་འདུན་ཚོགས་རྣམས་ཀྱིས།། བྱིན་རླབས་དངོས་གྲུབ་ཆར་ཆེན་དེང་འདིར་ཕོབ།། 

༄༅། །ཆོས་ནོར་འདོད་དང་ཐར་པ་མཆོག་གི་དཔལ།། འདོད་རྒུར་འཇོ་བ་ཤེས་ཡོན་རིན་ཆེན་མཛོད།། བསམ་སྒོམ་འཆད་རྩོམ་བྱ་བས་ལེགས་བཟུང་བའི།། བྷོ་ཊའི་གཙུག་ལག་ཁང་ཆེན་རྣམ་པར་རྒྱལ།།

༄༅། །འཁོར་གསུམ་ཡོངས་དག་སྤྲོས་བྲལ་གདོད་མའི་གཤིས།། དུས་གསུམ་རྒྱལ་བའི་ཐུགས་བཅུད་གསང་བའི་མཛོད།། རིགས་གསུམ་རྣམ་གྲོལ་འབྲས་བུ་བསྐྱེད་པའི་ཡུམ།། སྒོ་གསུམ་གུས་པས་རྟག་ཏུ་དད་ཕྱག་བརྩེགས།།

༄༅། །རྩེ་གཅིག་འགྲོ་ལ་ཕན་བཞེད་ཐུགས་བསྐྱེད་ཀྱིས།། ཚོགས་གཉིས་སྤྱོད་མཆོག་རྒྱ་མཚོའི་མཐར་སོན་ཏེ།། སྐུ་གསུམ་ནོར་བུའི་གླིང་ལ་དབང་འབྱོར་བའི།། བདུད་བཞི་ལས་རྒྱལ་ཐུབ་དབང་དེ་ལ་འདུད།།