བཀའ་ཤག་གསར་པའི་ལས་འཆར་ཁག་ངོ་སྤྲོད་ཐོག་དྲི་བ་བྱུང་བར་ལན་འདེབས།

ཐོག་མར་ད་ལྟ་ཚོགས་འདུའི་དབུ་བཞུགས་གནང་བཞིན་པའི་ཚོགས་གཙོ་མཆོག་ཉི་མ་གཉིས་ཀྱི་སྔོན་དུ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་གཞོན་པའི་མཚན་གནས་ཀྱི་ཐོག་མང་མོས་འོས་ཐོན་གྱི་རྒྱལ་ཁ་ཐོབ་པ་གཞིར་བཟུང་ྋསྐྱབས་མགོན་རིན་པོ་ཆེའི་སྐུ་མདུན་དུ་དམ་འབུལ་གནང་རྗེས། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུ་ཐོག་མར་གཙོ་སྐྱོང་གནང་བའི་སྐབས་སུ་བཀའ་ཤག་གི་གསལ་བཤད་ཞུ་རྒྱུའི་གོ་སྐབས་འཁེལ་བར་ཧ་ཅང་གི་དགའ་པོ་དང་རྟེན་འབྲེལ་བཟང་པོ་བྱུང༌། དེས་ན་ང་དང་ངའི་ཕྱག་རོགས་བཀའ་བློན་ཚང་མའི་ངོས་ནས་ད་ལྟའི་ཚོགས་གཙོ། བོད་མི་མང་སྤྱི་འཐུས་ཀྱི་ཚོགས་གཙོ་སྐུ་གཞོན་མཆོག་ལ་འཚམས་འདྲི་དང་བཀྲ་ཤིས་བདེ་ལེགས་ཞུ་རྒྱུ་ཡིན།
ཉེ་སྔོན་བཀའ་ཤག་གི་གསལ་བཤད་མདོར་བསྡུས་ཤིག་ཞུས་པར་སྤྱི་འཐུས་རྣམ་པ་ཚོས་ཐུགས་ཁུར་ཆེན་པོ་བཞེས་ནས་ཉི་མ་གཅིག་དང་ཕྱེད་ཀའི་བར་དུ་གསུང་བཤད་དང༌། དགོངས་འཆར། དྲི་བ། ལམ་སྟོན་བཅས་རྒྱ་ཆེན་པོ་གནང་བར་བཀའ་ཤག་གི་ངོས་ནས་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། ལྷག་པར་དུའང་ང་ཚོའི་ལས་འཆར་དང་བསམ་ཞིབ་བྱེད་རྒྱུའི་དོན་ཚན་མང་ཆེ་བ་སྤྱི་མོས་དང༌། དོན་ཚན་རེ་ཟུང་མང་མོས་ཀྱི་ཐོག་ནས་རྒྱབ་སྐྱོར་ཡོད་པ་གསལ་པོ་ར་འཕྲོད་བྱུང་བར་དམིགས་བསལ་གྱིས་ཐུགས་རྗེ་ཆེ་ཞུ་རྒྱུ་ཡིན། སྤྱི་འཐུས་ཚོས་རྒྱབ་སྐྱོར་གནང་བ་དེས་ང་ཚོའི་ལས་དོན་གྱི་ཐོག་སེམས་ཤུགས་འཕེལ་བ་དང༌། ལས་དོན་བྱེད་སྐབས་ནུས་པ་ཐོན་པར་ཧ་ཅང་ཕན་ཐོགས་ཆེན་པོ་བྱུང༌། སྤྱི་འཐུས་རྣམ་པ་ཚོས་ཉི་མ་ཕྱེད་དང་གཉིས་རིང་གསུང་བཤད་གནང་བ་ཚང་མ་ལ་གསལ་བཤད་དང་ལན་འདེབས་བརྒྱ་ཆ་བརྒྱ་ཐམ་པ་ཞུ་ཐུབ་པའི་རེ་བ་མེད། དེ་ཡང་ཁ་ཤས་ཚིག་ཟིན་ལ་དོན་མ་ཟིན་པ་དང༌། ཁ་ཤས་དོན་ཟིན་ལ་ཚིག་མ་ཟིན་པ། ཁ་ཤས་ཚིག་དོན་གཉིས་ཀ་མ་ཟིན་པ་ལྟ་བུ་བྱུང་སོང༌། ཡིན་ནའང་བརྒྱ་ཆ་སུམ་ཅུ་སོ་གསུམ་ལས་མ་ཉུང་བའི་ཐོག་ལན་འདེབས་ཞུ་ཐུབ་པའི་འབད་རྩོལ་ཞུ་རྒྱུ་ཡིན། དེང་སང་འཛམ་གླིང་སྤྱི་ཡོངས་ཀྱི་འགྲོ་སྟངས་སུ་བརྒྱ་ཆ་སུམ་ཅུ་སོ་གསུམ་ལོངས་ན་འགྲིགས་པར་བརྩི་སྲོལ་ཡོད་པ་ལྟར། བཀའ་ཤག་གིས་བརྒྱ་ཆ་སུམ་ཅུ་སོ་གསུམ་ལ་ལན་ཐེབས་ན་རྒྱུགས་སྤྲོད་ཐོན་པར་བརྩི་རོགས་གནང་ཞུ་རྒྱུ་ཡིན། ཁ་སང་ངས་གསལ་བཤད་ཞུས་སྐབས་ཡིག་ཆའི་ནང་དུ་ལས་ཁུངས་ཁག་གི་གོ་རིམ་འཁྲུགས་ཡོད་ཚོད་ཅེས་ཞུས་མོད་ཀྱང༌། དོན་དངོས་སུ་ལས་ཁུངས་ཁག་གི་གོ་རིམ་འཁྲུགས་མི་འདུག་ཅེས་ཞུ་རྒྱུ་ཡིན།
དེ་ནས་ཐོག་མར་འཛིན་སྐྱོང་སྐོར་དང༌། དེའི་རྗེས་ཆབ་སྲིད་དང་ཕྱི་དྲིལ་གཉིས་མཉམ་དུ་ཞུ་རྒྱུ་ཡིན། འཛིན་སྐྱོང་གི་སྐོར་ལ་བཀུར་འོས་སྤྱི་འཐུས་མང་པོས་ང་ཚོས་སེམས་འཚབ་བྱེད་དགོས་པའི་གནས་ཚུལ་ཞིག་གང་བཀའ་གནང་སོང་ཞེ་ན། ལས་བྱེད་བསྐོ་ཕྱོགས་དང༌། གནས་སྤར་གཏོང་ཕྱོགས། ཕྱི་རྒྱལ་ལ་སློབ་གྲྭ་གཏོང་རྒྱུ་དང༌། རྒྱ་གར་ནང་སྨན་པ་དང་འཕྲུལ་ལས་པ་ལ་སོགས་སུ་མི་འགྲོ་གཏོང་ཕྱོགས་སོགས་གང་ལྟར་བཙན་བྱོལ་བོད་གཞུང་གིས་མང་ཚོགས་ཀྱི་ནང་ནས་འདེམས་སྒྲུག་བྱེད་དགོས་པའི་རིགས་རྣམས་དྲང་པོ་དང་གསལ་པོ་ཡོང་གི་མེད་ཚུལ་དང༌། དེའི་ཐོག་ནས་མི་མང་གིས་གཞུང་ལ་ཡིད་ཆེས་བརླག་པ་དང༌། རྡ་རམ་ས་ལར་ངོ་ཤེས་རྒྱབ་རྟེན་ཞིག་མེད་ན་གང་ཡང་ཡོང་གི་མ་རེད་ཅེས་སྤྱི་ཚོགས་ཀྱི་ནང་གླེང་གཞི་ཡོད་སྐོར་སྤྱི་འཐུས་མང་པོས་ཐུགས་ཚོར་ཆེན་པོའི་ཐོག་ནས་བཀའ་གནང་སོང༌། ཡིན་ནའང་བཀའ་ཤག་གི་བསམ་ཚུལ་ལ་གང་ཡོད་ཅེ་ན། འདས་པའི་བྱུང་རིམ་གྱི་ནང་འདེམས་སྒྲུག་བྱེད་སྐབས་འདེམས་སྒྲུག་གི་ལས་རིམ་རྣམས་ཕྱི་གསལ་ནང་གསལ་མེད་པ་དང༌། གཅིག་གྱུར་མེད་པ། ཇི་ཙམ་མང་ཚོགས་ཀྱིས་ཤེས་རྟོགས་དགོས་པ་དེ་ཙམ་ཤེས་རྟོགས་མ་བྱུང་བ་ལ་སོགས་པ་དེ་འདྲའི་གནས་ཚུལ་བྱུང་ཡོད་སྲིད་ཀྱི་རེད། དེ་མིན་དྲང་པོ་མ་བྱས་པར་ཡོན་ཏན་ཡོད་པ་རྣམས་དོར་ནས་ཡོན་ཏན་མེད་པ་རྣམས་བསྒྲུགས་པ་དང༌། ཆ་རྐྱེན་ཚང་བ་རྣམས་མ་བདམས་པར་ཆ་རྐྱེན་མ་ཚང་བ་རྣམས་འདེམས་པ་སོགས་བྱུང་ཡོད་རྒྱུ་མ་རེད་སྙམ་པའི་ཡིད་ཆེས་ཡོད། ཡིན་ནའང་འདེམས་སྒྲུག་འདི་དང་འདིའི་ནང་གང་ཟག་ཆེ་གེ་མོ་ཞིག་གནས་ཚད་དང་ཆ་རྐྱེན་ཚང་ཡང་མ་ཚུད་པ་དང༌། གནས་ཚད་དང་ཆ་རྐྱེན་མ་ཚང་བའི་གང་ཟག་ཆེ་གེ་མོ་ཞིག་ཚུད་ཡོད་པའི་མིང་དང་ཟླ་དུས་ཚེས་གྲངས་གནས་སྟངས་ཇི་འདྲ་ཞིག་གི་ཐོག་ནས་བྱུང་བ་རྣམས་གསལ་པོ་བཀའ་གནང་རྒྱུ་ཡོད་ན། ངེས་པར་དུ་ཞིབ་འཇུག་མཐར་ཕྱིན་བྱས་ཏེ་དེ་འདྲའི་མ་དྲང་བ་དང་མ་འཐུས་པ་བྱེད་མཁན་གྱི་གང་ཟག་སུ་འདྲ་ཞིག་ཡིན་ནའང་དེ་ལ་ཁྲིམས་སྒྲིག་དང་མཐུན་པའི་བཏང་འཛིན་ཡན་པོར་མ་སོང་བ་ངེས་པར་དུ་ཞུ་རྒྱུ་ཡིན། སོ་སོའི་ཕ་མ་སྤུན་མཆེད་དང༌། དགའ་པོ་ཉེ་པོ་སོགས་སུ་ལ་ཐུག་ཀྱང་མ་འགྲིགས་པ་ལ་མ་འགྲིགས་པར་ངོས་འཛིན་གྱི་ཐོག་ནས་མང་ཚོགས་དང་གྲོས་ཚོགས་ཀྱི་ནང་གསལ་པོ་བཟོ་རྒྱུ་དང༌། ནོར་འཁྲུལ་བྱེད་མཁན་ལ་ཉེས་པ་གཏང་རྒྱུ་བཅས་ངེས་པར་དུ་དམ་དོན་ཞུ་རྒྱུ་ཡིན། འོན་ཀྱང་སྤྱི་ཡོངས་ཀྱི་ཐོག་ནས་སྐྱོན་བརྗོད་གནང་བ་ཙམ་ལས་ནོར་འཁྲུལ་ཇི་བྱུུང་མིག་སྟོན་ར་སྤྲོད་གནང་རྒྱུ་མེད་ན། ད་ལྟ་དཔལ་ལྡན་ཚོགས་གཙོ་ཆེན་མོས་བཀའ་གནང་བ་ལྟར་གྲོས་ཚོགས་སུ་བཀའ་མོལ་བྱུང་བ་རྣམས་ཁྲིམས་ཁང་དུའང་གཏུག་ས་མེད་པས་གང་བྱུང་གསུང་ཆོག་པའི་ཐོབ་ཐང་ལ་བེད་སྤྱོད་གནང་བ་ཙམ་མ་གཏོགས། མ་འོངས་པར་ལས་དོན་ཡར་རྒྱས་འགྲོ་རྒྱུ་ལ་ཕན་ཐོགས་ཡོང་གི་མ་རེད་བསམ་གྱི་འདུག མ་འོངས་པར་བཀའ་ཤག་གི་ངོས་ནས་འདེམས་སྒྲུག་གི་རིགས་གང་ཡིན་གྱི་ལས་རིམ་ལ་སྐྱོན་སེལ་དང་ལེགས་བཅོས་ཞུ་དགོས་ཇི་འདྲ་ཞིག་ཡོད་ཀྱང༌། སྤྱི་འཐུས་རྣམ་པ་དང་ཁྱད་མཁས་པ་རྣམས་ལ་གོ་བསྡུར་ཞུས་ཏེ། ཕྱི་གསལ་ནང་གསལ་དང་དྲང་པོ་དྲང་ཤག་ཡོང་ཐབས་ཀྱི་འབད་རྩོལ་ཞུ་རྒྱུ་ཡིན། ཅི་སྟེ་དྲང་པོ་མ་ཡིན་པའི་གནས་ཚུལ་བྱུང་ན། ད་ལྟ་ནང་བཞིན་སྤྱི་ཡོངས་ཀྱི་ཐོག་ནས་མ་ཡིན་པར་འདི་དང་འདི་ཞེས་བྱ་བ་ཞིག་མ་དྲང་བ་བྱུང་འདུག་ཅེས་མིང་འདོན་བྱས་ནས་བཀའ་གནང་ཐུབ་ན། མ་འོངས་པར་ལས་དོན་ཡར་རྒྱས་འགྲོ་བ་ལ་ཕན་ཐོགས་ཡོང་གི་རེད་ཅེས་ཞུ་རྒྱུ་ཡིན།
དོན་ཚན་གཉིས་པ་བཀའ་ཤག་གི་གསལ་བཤད་ནང་ལས་འབོར་ཉམས་ཞིབ་ཚོགས་ཆུང་ཞིག་འཕྲལ་དུ་བཙུགས་ནས་རྩ་བའི་གཞུང་གི་སྲི་ཞུ་བ་ཡོངས་རྫོགས་ཀྱི་ས་མིག་དང་གནས་རིམ་ཚང་མ་བསྐྱར་ཞིབ་བྱས་ཏེ་འགྱུར་བ་ཆེ་ཙམ་ཞིག་གཏང་གི་ཡིན་ཞེས་ཞུས་པ་ལ་སྤྱི་འཐུས་རྣམ་པ་ཁ་ཤས་ཀྱིས་སྒྲིག་གཞིའི་ནང་ལས་འབོར་ཉམས་ཞིབ་ཚོགས་ཆུང་ལོ་གཉིས་རེའི་མཚམས་འཛུགས་རྒྱུའི་ཆ་རྐྱེན་གསལ་ཡོད་པས། ད་ལྟ་ལས་འབོར་ཉམས་ཞིབ་ཚོགས་ཆུང་གཅིག་བཙུགས་པ་ཡིན་ན་སྒྲིག་གཞི་དང་མཐུན་པ་ཡོང་གི་ཡོད་མེད་དྭོགས་འདྲི་གནང་བ་དེའི་ཐད་གཞུང་ཞབས་འདེམས་བསྐོ་ལྷན་ཁང་གི་སྒྲིག་གཞི་དོན་ཚན་ ༡༡ ནང་གསེས་ ༢ པའི་ནང་ལོ་གཉིས་རེའི་མཚམས་བཀའ་ཤག་གིས་ལས་འབོར་ཉམས་ཞིབ་ཚོགས་ཆུང་རེ་བཙུགས་ཏེ་ས་མིག་ཕྱིར་བསྡུ་དང༌། གསར་གཏོད། སྤོ་གཞུག་གང་དགོས་བྱ་རྒྱུ་ཞེས་གསལ་ཡོད་པ་དངོས་བདེན་རེད། འདས་པའི་བཀའ་ཤག་གིས་ལས་འབོར་ཉམས་ཞིབ་ཚོགས་ཆུང་ཕྱི་ལོ་ ༢༠༠༠ ཕྱི་ཟླ་ ༥ ཚེས་ ༢ ཉིན་མཇུག་བསྡོམས་དང་སྙན་ཐོ་ཕུལ་ནས་ཧ་ལམ་ལོ་གཅིག་ལྷག་ཙམ་ཕྱིན་ཚར་འདུག དེས་ན་ད་ལྟ་ལས་འབོར་ཉམས་ཞིབ་ཚོགས་ཆུང་ཞིག་བཙུགས་པ་ཡིན་ན་ཕྱི་ལོ་ ༢༠༠༢ ཟླ་ ༤ པའི་ཟླ་མཇུག་ཚུན་ཆད་ལ་ཁོ་ཚོས་སྙན་ཐོ་འབུལ་ཐུབ་པའི་དབང་དུ་བཏང་ན། ལོ་གཉིས་ཞེས་པའི་སྒྲིག་གཞི་དང་འགལ་གྱི་མི་འདུག གལ་སྲིད་ང་ཚོས་བཙུགས་པའི་ལས་འབོར་ཉམས་ཞིབ་ཚོགས་ཆུང་གིས་ ༢༠༠༡ ཕྱི་ཟླ་ ༥ སྔོན་ལ་སྙན་ཐོ་ཕུལ་ཐུབ་པ་དང༌། ཡང་ན་ཕྱི་ཟླ་ ༣ པའི་ནང་གྲོས་ཚོགས་ཀྱི་སྔོན་རྩིས་ཚོགས་དུས་ཀྱི་སྔོན་ལ་ལས་འབོར་ཉམས་ཞིབ་ཚོགས་ཆུང་གི་སྙན་ཐོ་ཕུལ་ཐུབ་པ་བྱུང་ན། གཞུང་ཞབས་འདེམས་བསྐོ་ལྷན་ཁང་གི་སྒྲིག་གཞི་དོན་ཚན་ ༡༡ ནང་གསེས་ ༢ པར་བསྐྱར་བཅོས་བྱེད་རྒྱུའི་སྒྲིག་འཆར་གྲོས་ཚོགས་རྗེས་མར་བཏོན་ཆོག་པ་ཞུ་རྒྱུ་ཡིན། དེ་བཞིན་གཞུང་ཞབས་ལས་བྱེད་པ་ལ་རྒྱ་གར་གཞུང་གི་འཛིན་སྐྱོང་གཞུང་ཞབས་པ་རྣམས་ལ་མ་སུ་རིར་སློབ་སྦྱོང་སྤྲོད་ཀྱི་ཡོད་པ་ལྟར་ཚད་ལྡན་གྱི་སློབ་སྦྱོང་སྤྲད་དགོས་པའི་དགོངས་འཆར་གནང་བ་ཡང་དངོས་ཡོད་ཀྱི་དགོངས་འཆར་རེད། ཡིན་ནའང་དེ་མ་ཐག་ཏུ་སྦྱོང་བརྡར་སྤྲད་ཐུབ་རྒྱུ་ཁག་པོ་ཡིན་ཡང་ལས་འབོར་ཉམས་ཞིབ་ཚོགས་ཆུང་གི་སྙན་ཐོའི་རྗེས་ལ་ས་མིག་མང་པོ་ཞིག་ཐོན་པ་ཡིན་ན། ལོ་གཅིག་ལས་མ་ཉུང་བའི་ནང་ལས་བྱེད་སྦྱོང་བརྡར་སྤྲད་རྒྱུའི་འཆར་གཞི་ཞིག་བཟོ་རྒྱུའི་སླད་བསམ་ཞིབ་ངེས་པར་བྱེད་ཀྱི་ཡིན།
མང་ཚོགས་དང་གཞུང་དབར་འབྲེལ་ལམ་ཡག་པོ་དགོས་པའི་དགོངས་འཆར་གནང་བའང་དངོས་ཡོད་ཀྱི་གནས་ཚུལ་རེད། མང་ཚོགས་དང་གཞུང་དབར་འབྲེལ་བ་ཡག་པོ་ཡོང་ཐབས་ནི་སྤྱིར་བཏང་གཞུང་གི་སྲི་ཞུ་བ་ཚོས་ལས་ཀ་བྱེད་སྟངས་དང༌། ལྷག་པར་དུའང་ས་གནས་གཞིས་ཆགས་ཁག་ལ་ཡོད་པའི་ས་གནས་འགོ་འཛིན་གྱིས་མཚོན་པའི་སྲི་ཞུ་བ་ཚོས་ལས་དོན་བྱེད་སྟངས་ལ་རག་ལས་པ་ཞིག་རེད། དེས་ན་བཀའ་ཤག་གི་ངོས་ནས་ལས་བྱེད་སྤྱི་དང༌། ཡང་སྒོས་མང་ཚོགས་ཀྱི་ནང་ཉིན་ནས་ཉིན་བསྟུད་ཀྱི་འབྲེལ་བ་བྱེད་མཁན་གྱི་ལས་བྱེད་རྣམས་ལ། གཞུང་དང་མང་ཚོགས་དབར་གྱི་ཡིད་ཆེས་གོང་མཐོར་སྤེལ་ཐབས་ཞུ་ཕྱོགས་སྐོར་བཀོད་ཁྱབ་དང༌། ལམ་སྟོན། ཟབ་སྦྱོང༌། བགྲོ་གླེང་སོགས་གང་ཐུབ་ཞུས་ཏེ་མ་འོངས་པར་མངོན་གསལ་དོད་པོའི་འགྱུར་བ་དང་ཡར་རྒྱས་འགྲོ་ཐུབ་པའི་འབད་རྩོལ་ཞུ་རྒྱུ་ཡིན།
བོད་མི་ཕྱི་རྒྱལ་དུ་གཞིས་ཆགས་གཏོང་ན་དགེ་མཚན་ཡོད་པ་དང༌། དེའི་ཆེད་འབད་བརྩོན་གནང་གི་ཡོད་ཅེས་བཀའ་ཤག་རྙིང་པས་གསལ་བཤད་གནང་ཡོད་པ་འདིའི་ཐོག་བཀའ་ཤག་གསར་པའི་བསམ་ཚུལ་གང་ཡོད་བཀའ་འདྲི་ཕེབས་ཐད། བཀའ་ཤག་རྙིང་པས་ཕྱི་རྒྱལ་དུ་བོད་མི་གཞིས་ཆགས་གཏང་རྒྱུའི་འཆར་གཞི་བཟོས་ནས་ད་ལྟ་གྲུབ་འབྲས་ཐོན་གྲབས་ཡོད་པ་ཡོད་ཚེ་ང་ཚོས་འཕྲོ་བརླག་བཏང་འདོད་མེད། འོན་ཀྱང་དེ་འདྲ་ཡོད་པ་ད་ལྟ་ཤེས་རྟོགས་མ་བྱུང༌། བཀའ་ཤག་གསར་པ་ལ་དེ་ལྟའི་འཆར་གཞི་གསར་སྒྲིག་བྱེད་རྒྱུའི་ནུས་པ་དང་སེམས་ཤུགས་གཉིས་ཀ་མེད་ཅེས་ཞུ་རྒྱུ་ཡིན། ད་ལྟ་བོད་མི་ལྷག་འཕྲོས་ཉུང་ཟད་ཅིག་ཡོད་པ་རྣམས་རྒྱ་གར་ནང་གི་གཞིས་ཆགས་ཁག་ཏུ་ག་ཚོད་བསྡད་ཐུབ་ཐུབ་ཀྱི་འབད་རྩོལ་ཞུ་འདོད་ཡོད་མ་གཏོགས་ཕྱི་རྒྱལ་ཁག་ལ་གཏོང་རྒྱུའི་འདོད་པ་མེད། འོན་ཀྱང་སོ་སོའི་ངོས་ནས་ཐབས་ཤེས་གནང་སྟེ་ཕེབས་མཁན་ཡོད་རིགས་དེ་ཚོར་ང་ཚོའི་སྲི་ཞུ་བའི་ཁྲོད་དུའང་བཀག་ཐུབ་ཀྱི་མེད་ན། སྤྱི་ཚོགས་ཀྱི་ནང་བཀག་ཐུབ་པའི་རེ་བ་དེ་བས་ཀྱང་ག་ནས་ཡོད། རྩ་བའི་སྤྱི་ཚོགས་ཀྱི་བསམ་སྤྱོད་ལ་འགྱུར་བ་ཞིག་མ་ཕྱིན་བར་དུ་ད་ལྟའི་གནས་སྟངས་འདི་ལ་འགྱུར་བ་ཆེན་པོ་འགྲོ་བའི་རེ་བ་ཡོད་པ་མ་རེད་བསམ་གྱི་འདུག
ཚོགས་དྲུང་ཡིག་ཚང་ནང་དེང་དུས་དང་མཐུན་པའི་ཆ་རྐྱེན་ཀམ་སྤུ་ཊར་དང་གློག་འཕྲིན་བཙུག་དགོས་པའི་བཀའ་མོལ་བྱུང་སོང༌། ཚོགས་དྲུང་ལས་ཁུངས་བཀའ་ཤག་གི་ཁྱབ་ཁོངས་འོག་མེད་པར་བརྟེན། དེའི་ཡར་རྒྱས་གཏོང་ཕྱོགས་བཀའ་ཤག་གི་གསལ་བཤད་ནང་གང་ཡང་འཁོད་ཐུབ་མ་སོང༌། ངས་ཤེས་ཚོད་ལྟར་བྱས་ན། སྐབས་བཅིུས་པའི་གྲོས་ཚོགས་མཇུག་བསྡོམས་མ་གནང་གོང་ཚོགས་དྲུང་ཡིག་ཚང་ནང་ཀམ་སྤུ་ཊར་དང་གློག་འཕྲིན་ལ་སོགས་པའི་མཐུན་རྐྱེན་བཟོས་ཚར་ཡོད་སྙམ། གློག་འཕྲིན་གནང་རྒྱུར་ད་ལྟའི་གནས་སྐབས་སྐུ་ངལ་ཡོད་པའི་རྣམ་པ་མཐོང་མ་སོང༌། སྤྱིར་བཏང་ཚོགས་དྲུང་ལས་ཁུངས་ཡར་རྒྱས་གཏོང་ཕྱོགས་ཐད་རྒྱུན་ལས་དང་ཚོགས་གཙོ་སྦྲེལ་པོའི་ཐོག་ནས་བཀའ་ཤག་ལ་ག་འདྲ་ཞིག་བཀའ་གནང་ཡང༌། གཞུང་གི་དཔལ་འབྱོར་གྱིས་ལྕོགས་ཚོད་གཅིག་ཡིན་ཚེ་ངེས་པར་དུ་མོས་མཐུན་དང་རྒྱབ་གཉེར་ཞུ་རྒྱུ་མ་གཏོགས། མཁྲེགས་བཟུང་བྱེད་རྩིས་མེད། གྲོས་ཚོགས་རང་ལའང་དངུལ་གྱི་མཐུན་རྐྱེན་ཕྲན་བུ་ཡོད་རྒྱུ་རེད་སྙམ། གལ་ཏེ་བཀའ་ཤག་གི་ངོས་ནས་ཕུལ་དགོས་དེ་འདྲ་ཡོད་ན། ད་ལྟ་བསྐྱར་བཅོས་སྔོན་རྩིས་འགྲོ་རྒྱུ་རེད། དེ་བཞིན་ལོ་རྗེས་མའི་སྔོན་རྩིས་སྐབས་ལ་བཏང་ནའང་བཀའ་ཤག་གིས་རྒྱབ་གཉེར་ཞུ་རྒྱུ་ཡིན།
དེ་ནས་སྤྱི་འཐུས་གཅིག་གིས་ཧ་ཅང་གལ་གནད་ཆེ་བའི་གནས་ཚུལ་ཞིག་གི་ཐོག་གླེང་སློང་གནང་སོང༌། བཀའ་བློན་ཁྲི་པ་མང་ཚོགས་ཀྱིས་ཐད་ཀར་འོས་འདེམས་བྱས་པའི་ལམ་སྲོལ་གསར་གཏོད་མཛད་པ་འདི་ལ་བརྟེན་ནས་བཅའ་ཁྲིམས་རིན་པོ་ཆེའི་ནང་བཀའ་ཤག་དང་གྲོས་ཚོགས་དབར་གྱི་ལས་འགན་ཁུར་སྟངས་དང་འབྲེལ་བ་བྱེད་སྟངས། ལྷག་པར་དུ་དབང་ཆ་བགོ་བཤའ་རྒྱག་སྟངས་དང་དབང་ཆ་ཐ་དད་བཟོ་སྟངས་ཐོག་བསྐྱར་ཞིབ་གནང་དགོས་པའི་བཀའ་གནང་སོང༌། དེ་ནི་སྤྱི་འཐུས་ཤིག་གིས་བཀའ་གནང་བ་དེ་ཧ་ཅང་དགེ་མཚན་ཆེན་པོ་རེད། བཀའ་ཤག་གི་ངོས་ནས་འདིའི་སྐོར་ཞུས་པ་ཡིན་ན། སོ་སོའི་དབང་ཆ་འཐབ་རྩོད་བྱེད་མཁན་གྱི་བཟོ་འདྲ་པོར་མཐོང་སྲིད། ད་ལྟའི་བཀའ་ཤག་གིས་བཅའ་ཁྲིམས་རིན་པོ་ཆེའི་ནང་གང་གསལ་བ་བཞིན་ལས་དོན་ཆེ་ཕྲ་ཇི་འདྲ་ཞིག་ཡིན་རུང་བོད་མི་མང་སྤྱི་འཐུས་ལྷན་ཚོགས་ལ་འགན་འཁུར་ཞིང་བཀའ་སྒུག་པའི་ཐོག་ནས་བྱ་རྒྱུའི་ཆོད་སེམས་ཡོད་པ་དེ་བཀའ་བློན་ཁྲི་པའི་དམ་འབུལ་སྐབས་ཀྱི་གསལ་བཤད་ནང་ཡོད་ལ། བཀའ་སྤྱི་ལྷན་ཚོགས་སུ་བཅར་བའི་སྐབས་རྒྱུན་ལས་རྣམས་ལའང་དེ་རང་ཞུས་པ་ཡིན་ཞིང༌། མ་ཟད་ད་ལན་བཀའ་ཤག་གི་གསལ་བཤད་ནང་དུའང་གསལ་པོ་འཁོད་ཡོད། ད་ལྟ་ང་ཚོ་ལོ་ལྔའི་རིང་དེའི་ཐོག་འགྲོ་རྒྱུའི་ཆོད་སེམས་ཡོད། ཡིན་ནའང་བོད་མིའི་སྤྱི་ཚོགས་ནང་མང་གཙོའི་འཕེལ་རིམ་དང་དེའི་བྱུང་བའི་ཐོག་དོ་སྣང་དང་བསྐྱར་ཞིབ་བྱེད་རྒྱུ་ཤིན་ཏུ་གལ་ཆེན་པོ་ཡིན། དེར་བརྟེན་ང་ཚོའི་ལོ་ལྔའི་རིང་བསམ་ཞིབ་བྱས་ནས་ད་ལྟའི་བཀའ་ཤག་གི་ལས་ཡུན་རྫོགས་ལ་ཉེ་བའི་སྐབས་བཅའ་ཁྲིམས་རིན་པོ་ཆེ་ལ་བསྐྱར་བཅོས་ག་འདྲ་བྱེད་དགོས་པ་དང༌། བཀའ་ཤག་དང་གྲོས་ཚོགས་ཀྱི་དབར་དབང་ཆ་ཐ་དད་དང་བགོ་བཤའ་བྱེད་སྟངས་ལ་བསྐྱར་ཞིབ་བྱེད་དགོས་སམ་མི་དགོས། དགོས་ན་ག་འདྲ་བྱེད་དགོས་པ་དང༌། བོད་མིའི་སྤྱི་ཚོགས་ལ་ཕན་ཐོགས་ཆེ་ཤོས་དང་འཁྲུལ་གཞི་ཉུང་ཤོས་ཡོང་ཐབས་ཇི་དགའ་བསམ་ཞིབ་ཞུ་རྒྱུ་ཡིན། བཅའ་ཁྲིམས་རིན་པོ་ཆེ་གཏན་ལ་ཕབ་ནས་ལོ་བཅིུས་ཙམ་སོང་ཟིན་པ་དང༌། ད་དུང་ལོ་གང་ཙམ་སོང་བའི་རྗེས་བཅའ་ཁྲིམས་བསྐྱར་ཞིབ་ཚོགས་ཆུང་གཅིག་བཙུག་ན་དགེ་མཚན་མེད་དམ་སྙམ། མཁས་དབང་ཁག་དང་གྲོས་ཚོགས་ཀྱི་འཐུས་མི་སོགས་ལས་གྲུབ་པའི་བཅའ་ཁྲིམས་བསྐྱར་ཞིབ་ཚོགས་ཆུང་གཅིག་བཙུག་པ་ཡིན་ན། དེའི་ཐོག་ནས་སྤྱི་ཡོངས་ཀྱི་བཅའ་ཁྲིམས་ལ་ད་བར་གྱི་ཉམས་མྱོང་ལ་གཞི་བཅོལ་ཏེ་དུས་བསྟུན་འགྱུར་བ་གཏོང་ཕྱོགས་ཇི་དགེ་དགོངས་པ་བཞེས་ན་དགེ་མཚན་མེད་དམ་སྙམ།
དེ་མིན་འཛིན་སྐྱོང་དང་འབྲེལ་བའི་ང་ཚོའི་ལས་འཆར་གང་བཀོད་པ་ལ་རྒྱབ་སྐྱོར་གནང་བ་ལ་ཐུགས་རྗེ་ཆེ་ཞུ་རྒྱུ་ཡིན། ཆོས་རིག་དང་འབྲེལ་བའི་སྐོར་ལ་བཀུར་འོས་སྤྱི་འཐུས་གཅིག་གིས་དུས་འཁོར་དབང་ཆེན་སྐབས་ཤ་ཆང་ལོངས་སུ་མི་སྤྱོད་པའི་བཀོད་ཁྱབ་གནང་དགོས་རྒྱུ་བཀའ་གནང་སོང༌། དེའི་ཐོག་ཁ་སང་སྔོན་མ་ནས་དུས་འཁོར་དབང་ཆེན་དང་སྨོན་ལམ་འཕར་མ་ལ་སོགས་པ་དེའི་ཆེད་དུ་གྲ་སྒྲིག་གི་ཚོགས་ཆུང་ཟུར་འཛུགས་ཡོད་པ་དེའི་ནང་བཀའ་མོལ་བྱུང་དང་འབྱུང་བཞིན་པ་ཡིན། ད་ལྟ་གྲོས་ཚོགས་ནང་དགོངས་འཆར་བྱུང་བར་བརྟེན། ཇི་ཙམ་གྱི་ནུས་པ་ཐོན་མིན་ལ་མ་ལྟོས་པར་གང་ཐུབ་འབད་རྩོལ་བྱ་རྒྱུའི་འདུན་པ་ཡོད།
ཡང་གཞིས་ཆགས་ཁག་ནང་ཡོད་པའི་ཟློས་གར་ཚོགས་པ་དེ་དག་དབུས་ཀྱི་ཟློས་གར་ཚོགས་པ་བཞིན་ཕྱི་རྒྱལ་ཁག་ལ་བསྐྱོད་ཐུབ་པར་བྱ་རྒྱུའི་འབད་བརྩོན་གནང་དགོས་པའི་དགོངས་འཆར་བྱུང་སོང༌། དེ་ཡང་ཕྲན་བུའི་འགོ་འཛུགས་བྱས་ཟིན་པ་དཔེར་ན། འདས་པའི་ལོའི་ནང་ཨ་རིར་བོད་ཀྱི་དུས་ཆེན་སྐབས་ས་གནས་ཁག་རེ་ཟུང་ནས་རིག་གཞུང་ཚོགས་པ་འགྲོ་ཐུབ་པ་དང༌། མ་འོངས་པར་དེའི་ཐོག་ངེས་པར་དུ་ད་དུང་མུ་མཐུད་ནས་འབད་བརྩོན་ཞུ་རྒྱུ་ཡིན།
བཀའ་ཤག་གི་ཡིག་ཆའི་ནང་ཆོས་དོན་ལས་ཁུངས་དང་ཆོས་རིག་ལས་ཁུངས་ཞེས་གཉིས་འཁོད་འདུག དེ་གཉིས་གང་ལ་ཚད་ལྡན་དུ་ངོས་འཛིན་བྱེད་དགོས་ཞེས་བཀའ་གནང་སོང༌། ནམ་རྒྱུན་ང་ཚོའི་ཁ་རྒྱུན་དུ་ཆོས་རིག་དང་ཆོས་དོན་གཉིས་ཀ་བེད་སྤྱོད་གཏོང་གི་ཡོད་ཀྱང༌། ལས་ཁུངས་ཀྱི་ཐ་སྙད་ངོ་མ་ནི་ཆོས་རིག་ལས་ཁུངས་རེད། ཡང་བཀུར་འོས་སྤྱི་འཐུས་འགའ་ཤས་ཀྱིས་ཤེས་རིག་དང་ཆོས་རིག་གཉིས་ཀ་ལ་ ‘རིག་’ ཅེས་པའི་ཐ་སྙད་བཀོད་ན་འགྲིགས་ཀྱི་མི་འདུག གལ་ཏེ་ཤེས་ཡོན་ལས་ཁུངས་ལ་ཤེས་རིག་ལས་ཁུངས་ལབ་ཀྱི་ཡོད་ན། ཆོས་རིག་ལས་ཁུངས་ཀྱི་ ‘རིག་’ བཏོན་དགོས། གལ་སྲིད་ཆོས་དོན་ལས་ཁུངས་ལ་ཆོས་རིག་སྦྱར་ན། ཤེས་རིག་ལས་ཁུངས་ཀྱི་ ‘རིག་’ བཏོན་ནས་ཤེས་ཡོན་ལས་ཁུངས་ཞེས་བརྗོད་དགོས་པའི་སྐོར་གྲོས་ཚོགས་ནང་བཀའ་མོལ་མང་པོ་བྱུང་མྱོང་བ་རེད། ཡིན་ནའང་གྲོས་ཚོགས་ཀྱི་ངོས་ནས་ཐག་ཆོད་པའི་གྲོས་ཆོད་དང་ལམ་སྟོན་གང་ཡང་མ་བྱུང་བར་བརྟེན། ད་ལྟ་ཆོས་དོན་ལས་ཁུངས་ལ་ཆོས་རིག་ལས་ཁུངས་དང༌། ཤེས་ཡོན་ལས་ཁུངས་ལའང་ཤེས་རིག་ལས་ཁུངས་ཞེས་བརྗོད་ཀྱི་ཡོད། ད་ལྟ་བཀའ་ཤག་གི་གསལ་བཤད་ནང་ཆོས་དོན་ཞེས་འཁོད་པ་འདི་སྣང་མེད་དུ་ནོར་འཁྲུལ་ཤོར་བ་ཞིག་རེད།
ཐེ་ཝན་གྱི་ཐེབས་རྩ་འདི་དོན་གཅོད་ཁང་རེད་དམ། ཆོས་ཚོགས་རེད་ཅེས་བཀའ་འདྲི་གནང་སོང༌། ད་ལྟ་འདི་གཅིག་ལྕོགས་བྱེད་ཀྱི་ཡོད་རེད། ཐེ་ཝན་དུ་གཞུང་འབྲེལ་གྱིས་ཁྲིམས་ཐོག་དེབ་བསྐྱལ་བྱས་པ་དེ་ཆོས་དང་རིག་གཞུང་གི་ཐེབས་རྩ་རེད། ཐེབས་རྩ་འདིའི་ནང་ཕྱག་ལས་གནང་མཁན་ཚོས་བོད་གཞུང་གི་དོན་གཅོད་ཀྱི་ལས་དོན་ཡང་མཉམ་ལྕོགས་བྱས་ནས་གནང་གི་ཡོད་རེད། ཡིན་ནའང་དོན་གཅོད་གཞན་དང་མཚུངས་པར་ཕྱི་དྲིལ་ལས་ཁུངས་ཀྱི་ཁྱབ་ཁོངས་སུ་བཞག་མེད། ཆོས་དང་རིག་གཞུང་གི་ཐེབས་རྩ་ཡིན་ཙང༌། ཕྱི་དྲིལ་གྱི་ཁྱབ་ཁོངས་སུ་མ་བཞག་པར་བཀའ་བློན་ཁྲི་པའི་ཐད་ཀའི་ལྟ་རྟོག་འོག་ཡོད། འདིའི་ནང་མི་འགྲོ་གཏོང་ཕྱོགས་ཐད་གནས་སྐབས་ཐེ་ཝན་ས་གནས་རང་ནས་གང་སྟབས་འགྲིགས་པ་ཞིག་མ་གཏོགས། ཆོས་བརྒྱུད་ཚང་མ་ནས་སྐུ་ཚབ་གཏོང་རྒྱུའི་གོ་སྐབས་བྱུང་མི་འདུག ད་ལྟ་ང་ཚོའི་གནས་སྟངས་བརྟན་པོ་མེད་པ་གྲོས་ཚོགས་ཀྱིས་མཁྱེན་གསལ་རེད། གནས་ཚུལ་མང་པོར་བལྟས་ན་གཟབ་གཟབ་བྱས་ནས་སྡོད་དགོས་པའི་གནས་སྟངས་ཆགས་ཡོད། དེར་བརྟེན་ད་ལྟ་གནས་ཚུལ་གསལ་པོ་ཞུ་ཐུབ་ཀྱི་མི་འདུག མ་འོངས་པར་ཆོས་ཚོགས་དེ་སྲ་བརྟན་ཞིག་ཆགས་ན་དེའི་ནང་ཆོས་བརྒྱུད་ཚང་མའི་སྐུ་ཚབ་དགོས་པའི་ངོས་འཛིན་ཞུས་ཀྱི་ཡོད། ཐེབས་རྩ་འདིའི་གོ་སྒྲིག་འོག་ཆོས་ཀྱི་དགེ་རྒན་གཏོང་རྒྱུའི་འབད་བརྩོན་ཞུས་ཀྱི་ཡོད། དེའི་ནང་ཆོས་བརྒྱུད་རིས་མེད་ཀྱི་ཆོས་དགེ་རེ་མོས་བྱས་ནས་ཕེབས་ཐུབ་པའི་ཐབས་ཤེས་ཞུ་རྒྱུ་ཡིན། ཐེབས་རྩ་དེའི་འོག་གི་སློབ་ཕྲུག་རྣམས་རྒྱ་གར་དུ་ཡོང་བའི་སྐབས། སེ་འབྲས་དགའ་གསུམ་ནང་ཕེབས་རྐྱང་གནང་གི་འདུག་གསུངས་པ་ནི་དངོས་ཡོད་ཀྱི་གནས་ཚུལ་མ་རེད། ད་ལྟ་སློབ་ཕྲུག་དེ་ཚོ་རྒྱ་གར་ནང་ཡོང་ཐུབ་པའི་གོ་སྐབས་བྱུང་མེད། དེ་མིན་ཐེ་ཝན་རྒྱ་མིའི་ཆོས་ཚོགས་གཞན་དག་གི་སློབ་ཕྲུག་རྒྱ་གར་དུ་ཡོང་སྐབས་ཁོ་རང་གང་དུ་འགྲོ་ཡང་སོ་སོའི་འདོད་མོས་མ་གཏོགས་ང་ཚོས་ལམ་སྟོན་བྱེད་ས་མེད།
སྤྱིར་བཏང་ཆོས་རིག་ལས་ཁུངས་ཀྱི་གནས་སྟངས་བསྐྱར་ཞིབ་ཞུ་རྒྱུའི་ཐད། ཆོས་རིག་ལས་ཁུངས་ཀྱི་བསྒྲུབ་བྱ་དང༌། དམིགས་ཡུལ། ལས་དོན་བྱེད་ཕྱོགས་བཅས་ལ་བསྐྱར་ཞིབ་ཞུས་ཏེ་བཙན་བྱོལ་གཞུང་དང་ཆོས་ལུགས་དང་ཆོས་བརྒྱུད་དབར་གྱི་འབྲེལ་ལམ་གྱི་ངོ་བོ་ཇི་ཡིན། སྲིད་གཞུང་གི་ངོས་ནས་ཆོས་ལུགས་ཁག་ལ་སྲི་ཞུ་ཞུ་ཕྱོགས་ཀྱི་ས་མཚམས་དང་ལམ་སྲོལ་ཁྲིམས་སྲོལ་དང་མཐུན་ཞིང་ལག་ལེན་ཐུབ་པའི་བྱེད་སྒོ་ལམ་སྟོན་ཁ་གསལ་ཞིག་གཏན་འབེབས་ཞུ་རྒྱུའི་ཐད་བསམ་ཞིབ་བྱ་རྒྱུའི་སྐོར། བཀའ་ཤག་གི་ངོས་ནས་གསལ་བཤད་དུ་བཀོད་པ་དེ་གསལ་པོ་ཡིན་བསམ་པ་ཡིན། གསལ་བཤད་ཀྱི་ཚིག་བརྗོད་སོ་སོའི་ངོ་གདོང་གི་གོ་དོན་དེ་རང་མ་གཏོགས་སྦས་དོན་མངོན་རྟོགས་ཀྱི་རིམ་པ་གང་ཡང་མེད། ད་ལྟའི་ཆོས་རིག་ལས་ཁུངས་ཀྱི་བསྒྲུབ་བྱ་ནི་བཀའ་བློན་ལས་ཁུངས་གཞན་དག་དང་གཅིག་གྱུར་ལྟ་བུ་དང༌། དེའི་ནང་གི་སྲི་ཞུ་བའང་དྲུང་ཆེ་དང༌། དྲུང་འཕར། ཟུང་དྲུང་སོགས་འཆར་ཅན་གྱི་ལས་བྱེད་ཤ་སྟག་ལས། ཆོས་ལ་མཁས་པའི་གང་ཟག་གཅིག་ཀྱང་མེད། ངའི་མཐོང་ཚུལ་ལ་ཆོས་རིག་ལས་ཁུངས་འདི་ཞབས་བརྟན་བསྒྲུབ་རྒྱུའི་ལས་དོན་ཙམ་ལས་ཆོས་དང་རིག་གཞུང་གི་ལས་དོན་རླབས་ཆེ་བ་ཞིག་བྱེད་རྒྱུ་ཡོད་པ་མ་མཐོང༌། བྱས་ཙང་ལས་ཁུངས་འདི་ལ་ཞབས་བརྟན་ལས་ཁུངས་ཞེས་མིང་བཏགས་ན་མ་འོས་པ་མི་འདུག་སྙམ། ཆོས་བརྒྱུད་ཁག་གི་བླ་ཆེན་དང་དབུ་ཁྲིད་སོགས་བཞུགས་སྒར་དུ་ཕེབས་སྐབས་སྣེ་ལེན་དང་ཕེབས་བསུ་ཕེབས་སྐྱེལ་ཞུ་རྒྱུ། ཞབས་བརྟན་བསྒྲུབ་རྒྱུའི་གནས་ཡིག་འབུལ་རྒྱུ་དང༌། བསྒྲུབས་ཐོ་ལེན་རྒྱུ་ཙམ་མ་གཏོགས། ཆོས་དང་རིག་གཞུང་གི་འཛིན་སྐྱོང་དང་འབྲེལ་བའི་ལས་དོན་རྒྱ་ཆེན་པོ་མི་འདུག་ཅིང༌། ད་ལྟའི་ལས་དོན་འདི་ཚོ་ནི་གཞུང་ཞབས་སུ་ཡིན་གྱིས་བྱེད་ཐུབ་པ་ཞིག་རེད། ང་ཚོའི་བསམ་པར་རང་ཅག་ལྟ་བུ་ཆོས་སྲིད་ཟུང་འབྲེལ་གྱི་སྲིད་གཞུང་ཞིག་གི་ནང་ཆོས་དོན་ནམ་ཆོས་རིག་ལས་ཁུངས་ནི་དཔལ་འབྱོར་དང༌། ནང་སྲིད། ཕྱི་དྲིལ་ལྟ་བུ་འཆར་ཅན་གྱི་ལས་དོན་ཙམ་མ་ཡིན་པར་ཆོས་ལུགས་དང་ཆོས་བརྒྱུད་ཡོངས་རྫོགས་ལ་ཕན་གནོད་འདྲེས་པའི་ཞབས་འདེགས་དང་ལམ་སྟོན་ཞུ་ཐུབ་མཁན་ཞིག་བཟོས་ན་དགེ་མཚན་འདུག་སྙམ། གསལ་བཤད་དོན་ཚན་གཉིས་པའི་ནང་འཁོད་པ་ལྟར་མི་མང་གིས་འོས་འདེམས་བྱེད་པའམ་ཆོས་ལུགས་ཆོས་བརྒྱུད་སོ་སོའི་དབུ་འཛིན་རྣམ་པས་ཐད་བསྐོས་གནང་བ་ཇི་ལྟར་ཡང་ཆོས་བརྒྱུད་སོ་སོའི་མང་ཚོགས་ཀྱི་བཀའ་ལུང་ཡོད་པའི་སྐུ་ཚབ་ཁག་ལས་གྲུབ་པའི་ལས་ཁུངས་གཞུང་གི་འཆར་ཅན་ལས་ཁུངས་གཞན་ལས་གནས་ཚད་མཐོ་བ་ཞིག་ཡོད་ན། གཞུང་དང་ཆོས་ལུགས་དབར་གྱི་འབྲེལ་བ་བྱེད་སྟངས། གཞུང་གིས་ཆོས་ལུགས་ཁག་ལ་ཞབས་འདེགས་ཞུ་སྟངས་སོགས་གང་གི་ཐོག་ལའང་ནུས་པ་ཐོན་པ་ཞིག་ཡོང་ཐུབ། ད་ལྟའི་གནས་སྐབས་སུ་སྐབས་རེ་གཞུང་གིས་ཆོས་ལུགས་ཀྱི་སྒྲིག་འཛུགས་ཁག་གི་ནང་བྱུས་མེད་བྱུས་འཁྲི་བྱས་པ་ལྟ་བུ་དང༌། སྐབས་རེ་དགོས་ངེས་ཀྱི་ཕན་གྲོགས་དང་སྲི་ཞུ་མ་བྱུང་བ་ལྟ་བུ་ཅི་རིགས་ཤིག་ཡོང་གི་ཡོད་པ་འདི་གང་ལ་ཐུག་པ་རེད་ཅེ་ན། ཆོས་རིག་ལས་ཁུངས་ནང་གཞུང་ཞབས་ཁོ་ན་མ་གཏོགས། ཆོས་ལུགས་ཆོས་བརྒྱུད་ཀྱི་བཀའ་ལུང་ཡོད་པའི་གང་ཟག་ཆོས་ཕྱོགས་ཀྱི་སྐུ་ཚབ་མཚོན་ཐུབ་པ་ཞིག་མེད་པ་དེ་ལ་ཐུག་པ་རེད་བསམ་གྱི་ཡོད། སྤྱི་འཐུས་ཁ་ཤས་ཀྱི་བཀའ་མོལ་གནང་ཕྱོགས་ལ་བལྟས་ན་གྲོས་ཚོགས་ནང་ཡོད་པའི་ཆོས་ལུགས་ཆོས་བརྒྱུད་ཀྱི་འཐུས་མི་རྣམས་གྲོས་ཚོགས་ནས་བཏོན་ཏེ་ཆོས་དོན་ལས་ཁུངས་ནང་གཞག་རྒྱུའི་འཆར་གཞི་མིན་ནམ་སྙམ་པའི་ཐུགས་དྭོགས་ཤིག་ཡོད་པའི་བཟོ་འདྲ་ཞིག་མཐོང་སོང༌། གལ་ཏེ་དེ་ལྟའི་ཐུགས་དྭོགས་འཁྲུངས་པ་ཡིན་ན་དེ་ནི་ཧ་ལས་པའི་ནོར་འཁྲུལ་རེད། དེ་ལྟའི་བསམ་ཚུལ་དངོས་ཤུགས་བརྒྱུད་གསུམ་ནས་མེད་ངེས་ཡིན་ཞེས་ངས་ཚིག་ཐག་བཅད་ནས་ཞུ་རྒྱུ་ཡིན། ྋགོང་ས་ྋསྐྱབས་མགོན་ཆེན་པོའི་དགོངས་གཞི་དང་བསྟུན་ནས་བཙན་བྱོལ་བོད་མིའི་བཅའ་ཁྲིམས་ཀྱི་ནང་གཏན་ལ་ཕབ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲུབ་ཆ་དེ་བོད་མི་གཞིས་བྱེས་མ་འཛོམས་ཀྱི་བར་དུ་འགྱུར་བ་གཏོང་ཐབས་གཏན་ནས་མེད་པ་བཙན་བྱོལ་བོད་གཞུང་གི་རྩ་བའི་དམ་བཅའ་ཞིག་རེད། བོད་མིའི་ཆབ་སྲིད་ཀྱི་རང་བཞིན་ཆོས་ལུགས་རིས་མེད་དང་ཆོས་སྲིད་ཟུང་འབྲེལ་གང་བྱས་ཀྱང་རུང་སྤྱི་འཐུས་ལྷན་ཚོགས་ཀྱི་གྲུབ་ཆ་ད་ལྟའི་སྒྲོམ་གཞི་འདི་ལ་བཙན་བྱོལ་དུ་གནས་རིང་འགྱུར་བ་ནམ་ཡང་གཏོང་རྒྱུ་མིན་པ་དེ་༧གོང་ས་མཆོག་གིས་ཐོག་མ་ནས་གསལ་པོར་བཟོས་གནང་མཛད་ཡོད། མི་འབོར་ལ་ལྟོས་ཏེ་སྤྱི་འཐུས་མང་ཉུང་གཏོང་ཆོག་པའི་ཆ་རྐྱེན་ཡོད་ནའང་རྩ་བའི་ཆོལ་ཁ་ཆོས་ལུགས་ཀྱི་སྐུ་ཚབ་ཚང་དགོས་པ་ནི་བཅའ་ཁྲིམས་རིན་པོ་ཆེའི་གཞི་སྒྲོམ་ཡིན་པ་དེ་མཁྱེན་དགོས། སྤྱི་འཐུས་རྣམ་པར་དགོངས་སེལ་ཞུ་བ་དང་སྦྲགས་ཞུ་རྒྱུ་ཞིག་ལ། སྐབས་རེ་སྤྱི་འཐུས་རེ་ཟུང་གིས་གནད་དོན་གསལ་པོ་མ་མཁྱེན་པའི་ཐོག་ནས་བཀའ་མོལ་མང་པོ་གནང་གི་ཡོད་པ་ལྟ་བུ་ཞིག་ང་རང་གི་མཐོང་ཚུལ་ལ་བྱུང༌། དཔེར་མཚོན་ན་སྐབས་བཅིུག་པ་དང་སྐབས་བཅིུས་པ་གཉིས་ཀའི་ནང་ཆོས་སྲིད་ཟུང་འབྲེལ་དང་ཆོས་ལུགས་རིས་མེད་ལས་བརྩམས་པའི་བཀའ་བསྡུར་མང་པོ་བྱུང་ཡོད་ནའང༌། ཆོས་སྲིད་ཟུང་འབྲེལ་དང་ཆོས་ལུགས་རིས་མེད་ཀྱི་དོན་དག་གང་ཡིན་མ་མཁྱེན་པའི་ཐོག་ནས་བགྲོ་གླེང་གནང་བ་མང་པོ་བྱུང་སོང༌། ཆབ་སྲིད་ཀྱི་གལ་ཆེའི་གནད་དོན་ཐོག་བགྲོ་གླེང་གནང་སྐབས་རྒྱལ་ཁབ་དང་མི་རིགས་ཀྱི་གཞི་རྩའི་ཁེ་ཕན་དང་བསྒྲུབ་བྱ་ལ་ཕན་གནོད་དང་ཁེ་གྱོང་གི་གནས་ཚུལ་རྒྱ་ཆེ་སའི་ཐོག་ནས་དགོངས་པ་མ་བཞེས་པར་འཕྲལ་རྐང་གི་གནས་ཚུལ་ཆུང་ཙག་གི་ངོས་ནས་དགོངས་པ་བཞེས་པ་ཡིན་ན་ཚུལ་དང་མཐུན་པ་ཞིག་ཡོང་གི་མ་རེད། ཆོས་ལུགས་རིས་མེད་ངོས་ལེན་ཞུས་ན་གྲོས་ཚོགས་ནང་ཆོས་ལུགས་ཀྱི་འཐུས་མི་ཚུད་ཀྱི་མ་རེད་དགོངས་ཏེ་ཆོས་ལུགས་རིས་མེད་ལ་དགག་པ་བསྐྱོན་པ་ཡིན་ན། དམིགས་ཡུལ་ཆུང་བ་མ་ཟད་གནད་དོན་ཡང་མ་རྟོགས་པ་རེད། མང་གཙོའི་ལྟ་གྲུབ་ཀྱི་ནང་ཆོས་ལུགས་རིས་མེད་བྱེད་ན་གྲོས་ཚོགས་ཀྱི་ནང་ཆོས་ལུགས་ཀྱི་འཐུས་མི་ཡོང་མི་ཆོག་པ་དང༌། ཆོས་སྲིད་ཟུང་འབྲེལ་བྱེད་ན་གྲོས་ཚོགས་སུ་ཆོས་ལུགས་ཀྱི་འཐུས་མི་ངེས་པར་དུ་ཡོད་དགོས་པའི་ཁྱབ་པ་རྩ་བ་ནས་ཡོད་མ་རེད། ད་ལྟའི་འཛམ་གླིང་རྒྱལ་ཁབ་ཁག་གི་ནང་ཆོས་ལུགས་རིས་མེད་ཀྱི་ལྟ་གྲུབ་བཟུང་ཡང་གྲོས་ཚོགས་ནང་ཆོས་ལུགས་དང་དགོན་སྡེ་ཁག་གི་འཐུས་མི་ཡོད་པ་དང༌། ཆོས་ལུགས་ཀྱི་རྒྱལ་ཁབ་མང་པོའི་ནང་གྲོས་ཚོགས་སུ་ཆོས་ལུགས་ཀྱི་འཐུས་མི་མེད་པ་མང་པོ་ཡོད་པ་གཟིགས་བཞྀན་པ་རེད། ཆོས་སྲིད་ཟུང་འབྲེལ་དང་ཆོས་ལུགས་རིས་མེད་ཀྱི་དབར་དོན་དང་ལྡན་པའི་བགྲོ་གླེང་ཞིག་གནང་འདོད་ཡོད་ན་རིག་པའི་གཞུང་ལུགས་དང་བསྟུན་ནས་གནང་དགོས་པ་མ་གཏོགས། ཆོས་ལུགས་ཆོས་བརྒྱུད་ཀྱི་སྤྱི་འཐུས་གྲོས་ཚོགས་སུ་སླེབས་དང་མ་སླེབས་རྐྱང་པ་རྩོད་གཞིར་བྱས་ནས་བགྲོ་གླེང་གནང་བ་ཡིན་ན་བགྲོ་གླེང་དེ་ཁྱབ་ཆུང་བ་མ་ཟད། བྱབ་ཆུང་བ་ཞིག་ཀྱང་ཆགས་ཀྱི་རེད་ཅེས་ད་རེས་གྲོས་ཚོགས་སུ་འཛེམས་ཟོན་མེད་པར་ཞུ་འདོད་བྱུང༌།
མ་འོངས་པར་ཆོས་དོན་ལས་ཁུངས་དེ་ཆོས་ལུགས་ཆོས་བརྒྱུད་ཀྱི་སྐུ་ཚབ་ལས་གྲུབ་པ་ཞིག་བཟོ་ཐུབ་པའི་དབང་དུ་བཏང་ནའང༌། དེར་ཕེབས་མཁན་གྱི་སྐུ་ཚབ་ཁག་ནི་ཆོས་ལུགས་དབུ་ཁྲིད་ཁག་གིས་ཐད་བསྐོས་སམ། ཡང་ན་ཆོས་ལུགས་དང་ཆོས་བརྒྱུད་སོ་སོའི་རྗེས་འཇུག་གི་མང་ཚོགས་ནས་འོས་བསྡུ་བྱས་པ་ཇི་ལྟར་ཡང༌། དེའི་རྐྱེན་གྱིས་ད་ལྟའི་གྲོས་ཚོགས་སུ་ཡོད་བཞིན་པའི་ཆོས་ལུགས་ཆོས་བརྒྱུད་ཀྱི་འཐུས་མི་ཚོ་ལ་དོ་ཕོག་འགྲོ་དགོས་པའི་གཞི་རྩ་གང་ཡང་མེད། ཆོས་དོན་ལས་ཁུངས་དེ་ཆོས་ལུགས་དང་མང་ཚོགས་ཀྱི་བཀའ་ལུང་ལྡན་པའི་སྐུ་ཚབ་ཀྱི་གྲུབ་ཆ་ཡོད་པ་ཞིག་ཡིན་ན། ལས་དོན་གང་ཅིར་ད་ལྟ་ཆོས་རིག་བཀའ་བློན་དང་དྲུང་ཆེས་ཐག་བཅད་པ་ལྟ་བུ་མ་ཡིན་པར་ནུས་པ་ཆེ་བ་ཞིག་ཡོང་ཐུབ། ད་ལྟ་ཆོས་རིག་ལས་ཁུངས་ཀྱི་ཐག་གཅོད་རྣམས་དགོན་པ་དང་ཆོས་སྡེ་ཚང་མས་གཅིག་གྱུར་གྱིས་ངོས་ལེན་དང་བརྩི་བཀུར་ཞུ་བའི་ངེས་པ་མེད། མཆོད་དོད་ཕུལ་ནས་ཞབས་བརྟན་བསྒྲུབ་རྒྱུའི་འབོད་བསྐུལ་ཞུས་པ་དེ་རིགས་ཚང་མས་སྒྲུབ་ཀྱི་ཡོད་ནའང༌། དེ་ལས་ལྷག་པའི་ཆོས་ལུགས་ཆོས་བརྒྱུད་ལ་ཕན་གནོད་འདྲེས་པའི་སྲིད་བྱུས་དང༌། སྒྲིག་གཞི། ཁྲིམས་ལུགས་སོགས་ད་ལྟའི་ཆོས་རིག་ལས་ཁུངས་འདིས་གཏན་ལ་ཕབ་ཐུབ་ཀྱི་མེད། དེའི་དབང་གིས་འགྱུར་བ་ཞིག་བཏང་ན་བསམ་པ་རེད། ཡིན་ནའང་འཕྲལ་དུ་སང་ཉིན་རང་འགྱུར་བ་གཏང་ཐུབ་པའི་རེ་བ་བྱེད་ཀྱི་མེད་ལ། ལོ་ལྔའི་ནང་འགྱུར་བ་གཏང་ཐུབ་མིན་ཡང་ཐག་གཅད་རྒྱུ་ཁག་པོ་རེད། ཡིན་ནའང་ད་ལྟ་བསམ་འཆར་གྱི་ས་བོན་ཞིག་བཏབ་པ་ཡིན་ན་རིམ་པས་གོ་བསྡུར་དང་བགྲོ་གླེང་གི་ཐོག་ནས་གོམ་པ་གཅིག་གཉིས་སྤོ་ཐུབ་པའི་རེ་བ་ཙམ་ཡིན།

ཤེས་རིག་གི་སྐོར།
སློབ་ཕྲུག་གི་ཤེས་ཡོན་གནས་ཚད་ཉམས་རྒུད་ཕྱིན་པ་དེར་ཉམས་ཞིབ་གཏིང་ཟབ་བྱེད་དགོས་པ་དང༌། དེའི་ཆེད་རང་དབང་ལྡན་པའི་ཞིབ་འཇུག་ཚོགས་ཆུང་ཆེད་འཛུགས་དགོས་རྒྱུ། སློབ་དེབ་ཀྱི་སྤུས་ཚད་བཟང་དུ་གཏོང་དགོས་པ། སློབ་དེབ་ཁག་གི་ནང་ཆོས་ཚིག་དང་ཕལ་ཚིག་འདྲེས་མར་བེད་སྤྱོད་བྱེད་དགོས་པ་སོགས་དང༌། དེ་བཞིན་ད་ལྟའི་གཞི་རིམ་སློབ་གྲྭ་ཁག་གི་ནང་བོད་ཡིག་སློབ་སྟོན་གྱི་དུས་ཚོད་གཅིག་ལས་མེད་པ་དེ་མང་དུ་གཏོང་དགོས་པ་བཅས་ཀྱི་དགོངས་འཆར་གནང་བ་དེ་ཚོ་ཚང་མ་ལག་ལེན་བསྟར་ཐབས་ཀྱི་འབད་རྩོལ་ཞུ་རྒྱུ་ཡིན། ཡང་ཐ་སྙད་གསར་བཟོ་དགོས་པའི་དགོངས་འཆར་གནང་བའང་ལག་ལེན་བཀལ་ཐབས་ངེས་པར་དུ་ཞུ་རྒྱུ་ཡིན། ཡང་ཤེས་འབྱོན་ཡོད་པའི་མི་མང་པོ་གཞུང་གིས་བདག་པོ་རྒྱག་མ་ཐུབ་པ་དང༌། ལྷག་པར་དུ་དགེ་རྒན་འོས་ངེས་ཤེས་པ་མང་པོ་ལ་དགེ་རྒན་གྱི་གོ་གནས་མ་ཐོབ་པའི་དཀའ་ངལ་ཡོད་ཚུལ་གསུངས་སོང༌། དེ་ནི་དེང་སང་གཞུང་འཛིན་སློབ་གྲྭ་ཁག་གི་ནང་ཁྲིམས་སྲོལ་གྱི་ཐོག་ནས་ངོས་ལེན་ཡོད་པའི་གནས་ཚད་ལག་ཁྱེར་དང༌། དགེ་རྒན་འོས་སྦྱོང་གི་ལག་ཁྱེར་ཡོད་དགོས་པའི་ཆ་རྐྱེན་ཡོད་པ་ཡིན་ཙང༌། བོད་ཀྱི་སྐད་ཡིག་དང་རིག་གཞུང་གི་མཁྱེན་ཡོན་ཡོད་པ་ཙམ་གྱིས་དགེ་རྒན་དུ་བསྐོ་མ་ཐུབ་པའི་དཀའ་ངལ་ནི་ཡོང་སྲིད་པ་ཞིག་རེད། མ་འོངས་པར་རང་རེའི་སློབ་གྲྭ་ཁག་ཏུ་སློབ་སྦྱོང་གི་བརྒྱུད་ལམ་གྱི་སྐད་ཡིག་བོད་སྐད་དུ་བསྒྱུར་ཐུབ་པ་ཡིན་ན་ད་ལྟའི་དཀའ་ངལ་རྣམས་རིམ་པས་སེལ་ཐུབ་ཀྱི་རེད་སྙམ། ཡང་དགེ་རྒན་ལ་དམིགས་བསལ་ཆེ་མཐོང་དགོས་པ་དང༌། དེ་ཡོང་བའི་ཆེད་དུ་གླ་ཕོགས་ཆེན་པོ་དགོས་པའི་དགོངས་འཆར་གནང་སོང༌། དགེ་རྒན་ལ་ཆེ་མཐོང་དགོས་པ་བཤད་མ་དགོས་ཀྱང༌། ཕོགས་ཆེན་པོ་ཡོད་ན་མཐོང་ཆེན་པོ་ཡོང་རྒྱུ་དང༌། ཕོགས་ཆུང་ཆུང་ཡིན་ན་མཐོང་ཆུང་ཆུང་ཆགས་རྒྱུ་ཡིན་པ་དེ་མཐའ་གཅིག་ཏུ་བདེན་པ་ཡིན་མིན་མི་ཤེས། དེང་དུས་ཀྱི་གནས་སྟངས་ཀྱི་ཆ་ནས་བདེན་པའང་ཡིན་སྲིད། གང་ལྟར་བཅའ་ཁྲིམས་རིན་པོ་ཆེའི་དགོངས་དོན་བཞིན་དགེ་རྒན་ནང་མི་འགྲོ་ཡག་ཤོས་འདེམས་དགོས་རྒྱུ་ནི་དངོས་ཡོད་ཀྱི་གནས་ཚུལ་ཡིན་ཙང༌། དེ་ལ་ང་ཚོས་འབད་རྩོལ་ཞུ་རྒྱུ་ཡིན། སྤྱིར་བཏང་ཤེས་རིག་ལས་ཁུངས་ཀྱི་ཐད་ཀའི་འཛིན་སྐྱོང་འོག་སློབ་གྲྭ་མང་པོ་མེད། བོད་ཕྲུག་ཁྱིམ་སྡེ་དང༌། དབུས་བོད་སློབ་འཛིན་སྐྱོང་ཚོགས་པ་གཉིས་ཀ་རང་སྐྱོང་གི་སྡེ་ཚན་ཡིན་ཞིང༌། དེ་རིགས་ལ་ཤེས་རིག་ལས་ཁུངས་ཀྱིས་བསམ་འཆར་འབུལ་རྒྱུ་དང་མཐུན་འགྱུར་ཞུ་རྒྱུ་ཙམ་མ་གཏོགས་བཀའ་གཏང་ས་མེད། ཤེས་རིག་ལས་ཁུངས་ཀྱི་ཐད་ཀར་འཛིན་སྐྱོང་འོག་ཡོད་པའི་སློབ་གྲྭ་ཁག་གི་དགེ་རྒན་གྱི་གནས་ཚད་ཡག་ཏུ་གཏོང་རྒྱུའི་ཆེད་ཕོགས་རིམ་བསྐྱར་ཞིབ་ཚོགས་ཆུང་བཙུག་རྒྱུས་མཚོན་པའི་ཐབས་ལམ་གང་ཡོད་ལག་བསྟར་ཞུ་རྒྱུ་ཡིན། ཡང་བཀུར་འོས་སྤྱི་འཐུས་གཅིག་གིས་རྒྱུགས་སྤྲོད་ནང་བརྒྱ་ཆ་མཐོ་པོ་ཐོབ་ཀྱང༌། དངོས་སུ་ཤེས་ཡོན་གྱི་གནས་ཚད་དམའ་པོ་ལས་མེད་པ་མང་པོ་འདུག་པ་དེར་ཞིབ་འཇུག་བྱེད་དགོས་གསུངས་སོང་བ་དེ་ནི་གནད་འགག་ཆེ་བའི་དགོངས་འཆར་ཞིག་རེད། དེའི་ཐོག་ངེས་པར་ཞིབ་འཇུག་ཞུ་རྒྱུའི་འབད་བརྩོན་ཞུ་རྒྱུ་ཡིན། ཡང་ཡ་རབས་བཟང་སྤྱོད་ཀྱང་རྒྱུགས་སྤྲོད་ཀྱི་ལམ་ནས་ཨང་ཀི་སྤྲོད་རྒྱུ་ཡོད་པ་བཟོས་ན་ཡག་པོ་ཡོང་གི་རེད་ཅེས་བཀའ་གནང་མཁན་བྱུང་སོང༌། ང་རང་སྒེར་གྱི་བསམ་ཚུལ་ལ་དེ་ཡག་པོ་མ་མཐོང་ཡང༌། བཀའ་བློན་གཞན་དག་གིས་དེ་ལའང་དགེ་མཚན་ཡོད་པའི་དགོངས་ཚུལ་བྱུང་སོང༌། བོད་མི་ཉམ་ཐག་གི་ཕྲུ་གུ་སློབ་གྲྭར་མ་ཚུད་པ་འདུག་ཚུལ་གསུངས་པའི་ཐད། སྤྱིར་བཏང་ནང་ཤེས་འཕྲོད་གསུམ་གྱི་ཞིབ་འཇུག་ཚོགས་ཆུང་གི་བརྒྱུད་ནས་ཉམ་ཐག་ཕྲུ་གུ་ཚང་མ་ཤེས་རིག་གིས་སློབ་འཇུག་ཞུ་བཞིན་པ་ཡིན་ནའང༌། ད་དུང་ཉམ་ཐག་གི་ཕྲུ་གུ་ལུས་པ་ཡོད་སྲིད་ཚེ་མིང་བཏོན་གྱིས་ངོ་སྤྲོད་བྱུང་བ་ཡིན་ན་འཕྲལ་དུ་སློབ་འཇུག་ཞུ་རྒྱུ་ཡིན། སྔོན་འགྲོའི་དགེ་རྒན་ཚད་ལྡན་དགོས་ཚུལ་གསུངས་པ་དེའང་ངོས་ལེན་ཞུ་རྒྱུ་ཡིན། ཡང་བོད་སློབ་འཛིན་ཚོགས་ཀྱི་ནང་དགེ་རྒན་ཚོགས་པའི་ངོས་ནས་དཀའ་ངལ་མང་པོ་བཟོ་བཞིན་ཡོད་པ་དེ་དག་སེལ་ཐབས་བྱེད་དགོས་ཞེས་བཀའ་གནང་སོང༌། དེ་ནི་ཕྲན་བུ་དཀའ་ལས་ཁག་པོ་མིན་ནམ་སྙམ། ན་ཚ་དེ་ལོ་མང་ཕྱིན་པའི་ན་ཚ་རྙིང་པ་ཞིག་རེད། སྐབས་རེ་སྨན་ནུས་ཤུགས་ཆེ་ཙམ་བྱུང་དུས་ན་ཚ་དངོས་གསལ་ཆུང་དུ་འགྲོ་ནའང༌། སྨན་རྫོགས་དུས་ན་ཚ་སྔར་ལས་མཐོ་བ་ལངས་ཡོང་གི་ཡོད་པ་རེད། གནས་ཚུལ་འདིའི་ཐོག་གཞི་རིམ་གྱི་འགྱུར་བ་ཆེ་ཙམ་ཞིག་མ་བྱུང་གི་བར་དུ་དཀའ་ངལ་ཆ་ཚང་སེལ་ཐུབ་པའི་རེ་བ་ཆེན་པོ་མེད། ཡིན་ནའང་འབད་རྩོལ་གང་ཐུབ་ཞུ་རྒྱུ་ཡིན། ཡང་བཀུར་འོས་སྤྱི་འཐུས་གཅིག་གིས་བཀའ་ཤག་གི་གསལ་བཤད་ནང་ ‘ཤངས་ལེན་’ཞེས་པའི་ཚིག་ཅིག་བཀོད་འདུག་པ་དེའི་དོན་གང་ཡིན་བཀའ་གནང་སོང༌། དེང་སང་ཤངས་ལེན་ཞེས་པའི་ཐ་སྙད་འབྲི་མཁན་དཀོན་ནའང་རྣམ་ཐར་ལོ་རྒྱུས་སོགས་བོད་ཀྱི་སྔོན་མའི་ཡིག་ཆ་མང་པོའི་ནང་ཐ་སྙད་དེ་བེད་སྤྱོད་མང་པོ་གནང་ཡོད། དེའི་གོ་དོན་ནི་‘སྣ་ལེན་’ གྱི་ཞེ་ས་ཙམ་ཞིག་རེད། དེང་སང་སྣ་ལེན་ལ་སྣེ་ལེན་ཞེས་འབྲི་སྲོལ་དར་ཏེ་དཔེར་ན། རྡ་ས་སྣེ་ལེན་ཁང་དང་བལ་ཡུལ་སྣེ་ལེན་ཁང་ལྟ་བུ་བྲིས་ཀྱི་ཡོད་ནའང༌། བོད་སྐད་རྙིང་པར་སྣ་ལེན་ཞེས་བརྗོད་སྲོལ་ཡོད་ཅིང༌། དེ་ལ་ཞེ་ས་བྱེད་སྐབས་ཤངས་ལེན་ཞེས་བརྗོད་པ་རེད། ཡོངས་གྲགས་བེད་སྤྱོད་མེད་པའི་ཚིག་ཅིག་འདིར་བེད་སྤྱོད་བྱས་པར་བརྟེན་སྤྱི་འཐུས་རྣམ་པ་ཁ་ཤས་ལ་སྐུ་ངལ་བྱུང་འདུག་པ་དགོངས་འགལ་མེད་པ་ཞུ་རྒྱུ་ཡིན། དེ་ནས་གལ་གནད་ཤིན་ཏུ་ཆེ་བ་ཞིག་ལ། བཀའ་ཤག་གི་གསལ་བཤད་དུ་གཞི་རིམ་འཛིན་གྲྭ་དྲུག་པ་ནས་བཅིུས་པའི་བར་དུ་སློབ་སྦྱོང་གི་སྐད་ཡིག་བོད་སྐད་དུ་བསྒྱུར་རྒྱུའི་སྐོར་བསམ་ཞིབ་དང་ཐབས་ཤེས་ཞུ་རྒྱུ་ཡིན་ཞེས་བཀོད་ཡོད་པ་དེའི་ཐོག་སྤྱི་འཐུས་རྣམ་པ་མང་པོས་ཐུགས་འཚབ་ཆེན་པོའི་ངང་ནས་དེ་འདྲ་བྱེད་ན་ཧ་ཅང་དཀའ་ངལ་ཆེན་པོ་ཡོང་གི་ཡོད་པའི་སྐོར་བཀའ་གནང་སོང༌། དེ་ལ་གསལ་བཤད་རྒྱས་ཙམ་ཞིག་ཞུ་དགོས་བསམ་གྱི་ཡོད། ཚང་མའི་དགོངས་པར་མངའ་གསལ་ལྟར། འཛིན་གྲྭ་དང་པོ་ནས་ལྔ་པའི་བར་སློབ་སྦྱོང་གི་སྐད་ཡིག་བོད་སྐད་དུ་བསྒྱུར་རྒྱུའི་འཆར་གཞི་བསྒྲིག་འགོ་ཚུགས་ནས་ལག་ལེན་དུ་བསྟར་བའི་བར་ལོ་བཅོ་ལྔ་ལྷག་ཙམ་ཞིག་འགོར་བ་རེད། འཛིན་གྲྭ་དྲུག་པ་ནས་བཅིུས་བར་སློབ་སྦྱོང་གི་སྐད་ཡིག་བོད་སྐད་དུ་བསྒྱུར་རྒྱུའི་འབད་རྩོལ་ད་ལྟ་ནས་བྱེད་པ་ཡིན་ན་ཉུང་མཐར་ལོ་བཅུའམ་བཅོ་ལྔ་ཙམ་མ་འགོར་བར་བསྒྱུར་ཐུབ་པའི་རེ་བ་ཡོད་མ་རེད། ད་ལྟ་ང་ཚོའི་ལས་དོན་དེ་འགོ་མ་བཙུག་པར་བཞག་པ་ཡིན་ན། ང་ཚོའི་མི་རབས་ནང་ལས་དོན་དེ་མ་གྲུབ་པར་ལུས་བསྡད་ཀྱི་རེད། ཡིན་ནའང་མི་རབས་རྗེས་མ་ཚོས་དགོས་གལ་མཐོང་བའི་ཚེ་ངེས་པར་ཁོ་ཚོས་འབད་རྩོལ་གནང་གི་རེད་དེ། དེ་དུས་རྗེས་ལུས་གང་འཚམས་ཐེབས་ཟིན་པ་དང༌། འཕྲོ་བརླག་གང་འཚམས་ཕྱིན་ཟིན་པ་དེ་དག་བསྐྱར་གསོ་བྱེད་མི་ཐུབ། ད་ལྟ་ནས་འགོ་འཛུགས་ཀྱིས་ལོ་བཅུའམ་བཅོ་ལྔའི་ནང་གྲུབ་འབྲས་ཐོན་པ་ཡིན་ན་གནས་ཚུལ་མང་པོ་ད་ལྟའི་མི་རབས་ཡོད་བཞིན་པའི་སྐབས་སླར་གསོ་བྱེད་ཐུབ་པའི་རེ་བ་ཡོད།
སྔོན་ནས་ལན་མང་ཞུས་པ་བཞིན་ད་ལྟ་ང་ཚོས་བེད་སྤྱོད་བྱེད་བཞིན་པའི་ཤེས་ཡོན་སློབ་སྦྱོང་གི་ལམ་སྲོལ་འདི་ནི་རྒྱ་གར་དབྱིན་ཇིའི་བྲན་གཡོག་ཏུ་དུས་རྟག་ཏུ་བཀོལ་སྤྱོད་ཐུབ་པའི་ཆེད་དུ་འཆར་གཞི་གཏིང་ཟབ་ལྡན་པའི་ལམ་སྲོལ་བཟོས་པ་དེའི་ནང་ང་ཚོ་འགྲོ་བཞིན་པ་རེད། ལམ་སྲོལ་དེ་ནས་ཤེས་ཡོན་སློབ་སྦྱོང་ཐོན་པ་དེ་ཚོ་གཡོག་པོ་བྱེད་རྒྱུའི་བསམ་བློ་ཞིག་མ་གཏོགས། བདག་པོ་བྱེད་རྒྱུའི་བསམ་བློ་ཞིག་འཁོར་ཐུབ་ཀྱི་མ་རེད། སློབ་སྦྱོང་ཐོན་འཕྲལ་ལས་ཀ་སྤྲོད་མཁན་དང༌། གཡོག་པོ་བཀོལ་མཁན་ཞིག་ཨེ་རྙེད་ལྟ་བ་མ་གཏོགས། ང་སློབ་སྦྱོང་ཐོན་པའི་མི་ཞིག་ཡིན་པས་སུ་གང་གི་གཡོག་པོ་བྱེད་འདོད་མེད། སོ་སོའི་རྐང་པའི་ཐོག་ལངས་ནས་རང་འཚོ་ཐུབ་པའི་ལས་ཀ་ཞིག་བྱེད་བསམ་པའི་བསམ་བློ་ཆ་ཚང་བརླགས་ཟིན། སྡེར་མ་བཀྲུ་རྒྱུ་དང༌། གད་ཕྱིས་བྱེད་རྒྱུའི་ལས་ཀ་ཞིག་ཡིན་ནའང་ཕོགས་ཐོབ་ཡག་པོ་ཡོད་ན་ཐེ་ཚོམ་མེད་པར་བྱེད་རྒྱུ་དང༌། རང་གི་ཕ་མེས་ཀྱི་སྲོལ་རྒྱུན་གྱི་ལས་ཀ་དང་གཞན་ཡང་རང་གི་རྣམ་དཔྱོད་བེད་སྤྱོད་བཏང་སྟེ་རང་འགན་རང་ལ་འཁུར་དགོས་པའི་ལས་ཀ་བྱེད་འདོད་མེད་པ་ཆགས་ཏེ་ལོ་རེ་བཞིན་སློབ་ཐོན་ལས་མེད་ཀྱི་མི་འབོར་ཆེ་རུ་འགྲོ་བཞིན་པ་དེ་ད་ལྟའི་སློབ་སྦྱོང་གི་ལམ་སྲོལ་འདིའི་གནས་སྐབས་ཀྱི་དངོས་འབྲས་དེ་རེད། ལྷག་པར་དུ་མིའི་བསམ་སྤྱོད་ལ་འགྱུར་བ་ཆེ་ཤོས་གཏོང་མཁན་ནི་སློབ་སྦྱོང་གི་བརྒྱུད་ལམ་གྱི་སྐད་ཡིག་དེ་ཡིན། སྐད་ཡིག་གང་གི་བརྒྱུད་ནས་ཤེས་ཡོན་སློབ་སྦྱོང་བྱེད་སའི་སྐད་ཡིག་དེ་གང་ཟག་དེའི་ནམ་རྒྱུན་བསམ་བློ་འཁོར་སའི་སྐད་ཡིག་ཏུ་རང་བཞིན་གྱིས་ཆགས་འགྲོ དཔེར་ན། དབྱིན་སྐད་ཀྱི་བརྒྱུད་ནས་སློབ་སྦྱོང་བྱེད་པའི་བོད་མི་ཞིག་ཡིན་ན་ཁོའི་བསམ་བློ་དབྱིན་ཇིའི་སྐད་ནང་འཁོར་ནས་བོད་སྐད་དུ་བཤད་སྐབས་སྒྲ་བསྒྱུར་དགོས་པ་ཞིག་ཆགས་ཀྱི་རེད། སྐད་ཡིག་ནི་ལེགས་བྱང་དང་གོམས་གཤིས་ཀྱི་རྩ་བ་ཡིན་པས་སྐད་ཡིག་གང་གི་ཐོག་ནས་བསམ་བློ་འཁོར་བའི་སྐད་ཡིག་དེའི་འགྲོས་དང་མཐུན་པའི་བསམ་བློ་འཁྱེར་ཕྱོགས་ཀྱང་རང་གཤིས་ཀྱིས་ཡོང་བ་དཔེར་ན། ནུབ་ཕྱོགས་པའི་སྐད་ཡིག་གི་ཐོག་ནས་བསམ་བློ་གཏོང་མཁན་དེའི་བསམ་བློའི་འགྲོ་ཕྱོགས་ཀྱང་ནུབ་ཕྱོགས་པའི་བསམ་བློའི་འགྲོ་ཕྱོགས་དང་མཐུན་པ་དང༌། བོད་སྐད་ཀྱི་ཐོག་ནས་བསམ་བློ་འཁོར་མཁན་དེའི་བསམ་བློ་གཏོང་ཕྱོགས་བོད་པའི་བསམ་ཚུལ་དང་མཐུན་པ་ཞིག་ཡོང་བ་མངོན་སུམ་དུ་མཐོང་ཐུབ། རྒྱུ་མཚན་དེ་དག་ལ་བརྟེན་ནས་རང་གི་ཡུལ་སྐད་ཀྱི་ཐོག་ནས་སློབ་སྦྱོང་མ་བྱས་པར་སྐད་ཡིག་གཞན་གྱི་བརྒྱུད་ནས་སློབ་སྦྱོང་བྱེད་པའི་མི་ཞིག་གིས་རང་གི་རིགས་རྒྱུད་ཀྱི་ལེགས་བྱང་དང་གོམས་གཤིས་ཡོངས་སུ་རྫོགས་པ་ཞིག་སྲུང་སྐྱོབ་བྱེད་མི་ནུས་པ་སྨོས་མ་དགོས། ྋགོང་ས་ྋསྐྱབས་མགོན་ཆེན་པོས་ཐུགས་འཚབ་ཆེན་པོའི་ཐོག་ནས་ཉུང་མཐར་ཡང་གཞི་རིམ་འཛིན་གྲྭ་དང་པོ་ནས་ལྔ་པའི་བར་སློབ་སྦྱོང་གི་བརྒྱུད་ལམ་བོད་སྐད་དུ་བསྒྱུར་རྒྱུའི་འབད་བརྩོན་གནང་བའི་དགོངས་གཞི་དང་དགོས་པའང་དེ་འདྲ་ཞིག་རེད། ཕྱོགས་གཞན་ཞིག་ནས་ཞུ་ན། ཚོགས་ཁང་འདིའི་ནང་དེང་རབས་ཀྱི་ཚན་རིག་ལ་ཡིད་མི་ཆེས་མཁན་དང་སྐྱོན་བརྗོད་བྱེད་མཁན་ད་ལྟ་སྐད་ཆ་བཤད་མཁན་གྱི་མི་འདི་ཁོ་ན་མ་གཏོགས་ཕལ་ཆེར་ཡོད་མདོག་ཁ་པོ་མ་རེད། དེང་སང་བོད་མི་མང་ཆེ་བས་ཚན་རིག་གི་གྲུབ་དོན་དེ་ཚོ་སངས་རྒྱས་ཀྱི་གསུང་ལས་ཀྱང་ཁུངས་བཙན་པར་འདོད་ཀྱི་ཡོད་རེད། དེ་འདྲ་ཡིད་ཆེས་ཡོད་ན་དེང་དུས་ཀྱི་ཚན་རིག་པ་ཚོས་སྤྱི་མཐུན་དུ་ཕྲུ་གུ་ཆུང་ཆུང་ཚོའི་གཞི་རིམ་གྱི་སློབ་སྦྱོང་སྤྲོད་རྒྱུའི་བརྒྱུད་ལམ་ངེས་པར་དུ་སོ་སོའི་མ་སྐད་ཀྱི་ཐོག་ནས་བྱེད་དགོས་པ་བཤད་ཀྱི་ཡོད། དེ་འདྲ་ཡིན་ཙང་རང་སྐད་ཀྱི་ཐོག་ནས་སློབ་སྦྱོང་སྤྲད་ན་ཉེན་ཁ་ཡོད་རེད་གསུང་མཁན་དེ་ཚོའི་དགོངས་པ་བཞེས་སྟངས་དེ་ཚན་རིག་དང་མཐུན་པ་ཞིག་བྱུང་ཡོད་མ་རེད། ད་ལྟ་འདིར་གསལ་བཤད་ཞུ་མཁན་གྱི་བླ་རྒན་དེའི་ཁ་ལ་ཆ་མ་བཞག་པར་ཨ་མི་རི་ཀའི་མི་མགོ་སེར་ཞིག་ལ་ཕྲུ་གུར་སློབ་སྦྱོང་གི་བརྒྱུད་ལམ་སྐད་ཡིག་གང་གི་ཐོག་ནས་བྱེད་དགོས་ཞེས་བཀའ་འདྲི་གནང་བ་ཡིན་ན། མི་དེས་ངེས་པར་དུ་རྒྱུ་མཚན་མང་པོ་དང་བཅས་ཏེ་རང་གི་ཡུལ་སྐད་ཀྱི་ཐོག་ནས་སློབ་སྦྱོང་སྤྲད་དགོས་པ་བཤད་ཀྱི་རེད། དེ་ནས་ཁྱེད་རྣམ་པ་ཐུགས་ཡིད་དྭངས་པ་ཡོང་མདོག་ཁ་པོ་རེད། འཛིན་གྲྭ་དྲུག་པ་ནས་བཅིུས་བར་བོད་སྐད་བརྒྱུད་ནས་སློབ་སྦྱོང་སྤྲད་པ་ཡིན་ན་རྗེས་སུ་མཐོ་རིམ་སློབ་གྲྭར་འགྲོ་སྐབས་དཀའ་ངལ་ཆེན་པོ་འཕྲད་རྒྱུ་ཡིན་པའི་དགོངས་ཚུལ་གསུང་མཁན་མང་པོ་བྱུང་སོང༌། དེ་ཚོར་ནན་ཏན་གྱིས་ཞུ་རྒྱུ་ཞིག་ལ། འཛིན་གྲྭ་དྲུག་པ་ནས་བཅིུས་བར་སློབ་ཚན་སྤྱིའི་བརྒྱུད་ལམ་གྱི་སྐད་ཡིག་བོད་སྐད་ལ་བསྒྱུར་རྒྱུའི་བསམ་ཚུལ་ཞིག་ཞུས་པ་མ་གཏོགས་བཀའ་ཤག་གི་གསལ་བཤད་ནང་དབྱིན་ཇི་དང་ཧིན་དི་ལ་སོགས་པའི་སྐད་ཡིག་གཞན་པ་བསླབ་མི་ཆོག་པ་བཟོ་རྒྱུ་ཡིན་ཚུལ་ནམ་ཡང་ཞུས་མེད། སློབ་སྦྱོང་གི་བརྒྱུད་ལམ་བོད་སྐད་དུ་བསྒྱུར་ནའང་གཞི་རིམ་འཛིན་གྲྭ་དང་པོ་ནས་བཅིུས་བར་དབྱིན་ཇིའི་སྐད་ཡིག་ངེས་པར་དུ་བསླབ་ཆོག་པ་མ་ཟད། ད་ལྟའི་སློབ་སྦྱོང་གི་ལམ་སྲོལ་ནང་སྐད་ཡིག་གསུམ་གྱི་དགོས་མཁོ་ཡོད་པ་ཡིན་ཙང༌། སློབ་སྦྱོང་གི་བརྒྱུད་ལམ་ལས་གཞན་པའི་ཉུང་མཐར་ཡང་སྐད་ཡིག་གཉིས་མ་བསླབ་མི་ཆོག་པ་རེད། དེའི་ནང་བོད་ཕྲུག་ཚང་མས་དབྱིན་ཇི་བསླབ་ཀྱི་ཡོད་པ་རེད། ད་ལྟ་གཞི་རིམ་འཛིན་གྲྭ་དང་པོ་ནས་ལྔ་པའི་བར་སློབ་སྦྱོང་གི་བརྒྱུད་ལམ་བོད་སྐད་དུ་བསྒྱུར་ཟིན་ནའང་དབྱིན་ཇིའི་སྐད་ཡིག་གི་སློབ་ཚན་རང་འཇགས་བསྡད་ཡོད་པ་ལས་ཉམས་ཆག་གང་ཡང་ཕྱིན་མེད། འཛིན་གྲྭ་དང་པོ་ནས་བཅིུས་པའི་བར་དུ་དབྱིན་ཇིའི་སྐད་ཡིག་སློབ་ཚན་གལ་ཆེ་ཞིག་གི་ངོ་བོར་སློབ་སྦྱོང་བྱས་ནས་འཛིན་གྲྭ་བཅིུས་ཐོན་མཚམས་མཐོ་རིམ་སློབ་གྲྭར་འགྲོ་ཐུབ་པའི་དབྱིན་སྐད་ཅིག་མ་ཤེས་པ་ཡིན་ན་ཞབས་འདྲེན་རེད། ལོ་བཅིུས་བར་དབྱིན་སྐད་བསླབས་ནས་མཐོ་རིམ་སློབ་གྲྭར་འགྲོ་རྒྱུག་འཕེར་བ་ཞིག་ཡོང་ཐུབ་ཀྱི་མེད་ན་སློབ་སྦྱོང་གི་བརྒྱུད་ལམ་དབྱིན་སྐད་བྱས་པ་ཡིན་ནའང་བག་ཆགས་ལྷག་མ་གཞག་རྒྱུ་གང་ཡང་མེད། ལར་ནས་ད་ལྟའི་བར་དུ་དབྱིན་ཇིའི་བརྒྱུད་ལམ་ནས་སློབ་སྦྱོང་བྱས་པའི་བོད་ཕྲུག་སློབ་ཐོན་ཚོའི་ནང་ནས་དབྱིན་ཇིའི་སྐད་ཡིག་མཐར་ཕྱིན་པ་དང༌། སྐད་གྲགས་ཡོད་པ་ག་ཚོད་ཐོན་ཡོད་དམ། ངས་ནི་མཐོང་ཐོས་མ་བྱུང༌། ཕྱོགས་གཞན་ཞིག་ནས་གཟིགས་ན་རྒྱ་གར་གྱི་མངའ་སྡེ་སོ་སོའི་ནང་གཞི་རིམ་འཛིན་གྲྭ་དང་པོ་ནས་བཅིུས་བར་བང་གལ་ནང་བང་ག་ལ་དང༌། ཨ་སམ་ནང་ཨ་ས་མི། ཨོ་རི་སའི་ནང་ཨོ་རི་ཡ། ཏ་མིལ་ན་གྲུའི་ནང་ཏ་མིལ་སོགས་རང་རང་གི་སྐད་ཡིག་གི་ཐོག་ནས་སློབ་བཞིན་པ་ཡིན་ནའང༌། ཁོ་ཚོ་མཐོ་རིམ་སློབ་གྲྭར་འགྲོ་དུས་དཀའ་ངལ་གང་ཡང་འཕྲད་ཀྱི་ཡོད་མ་རེད། ད་ལྟའི་གནས་སྐབས་སུ་རྒྱ་གར་གྱི་ཆེས་མཐོའི་སློབ་གྲྭ་ཁག་གི་ནང་སྨན་དང༌། འཕྲུལ་ལས། ཚན་རིག་སོགས་ཀྱི་སློབ་སྦྱོང་རང་སྐད་ཀྱི་ཐོག་ནས་བྱེད་རྒྱུའི་མཐུན་རྐྱེན་ཡོད་མ་རེད། ཡིན་ནའང་མངའ་སྡེ་སོ་སོའི་སློབ་གྲྭ་ཁག་ཏུ་དབྱིན་སྐད་སློབ་ཚན་ཞིག་གི་ངོ་བོར་འཛིན་གྲྭ་བཞི་པའམ་དྲུག་པ་ཡན་ཆད་ནས་བསླབས་ཏེ་ཡོང་མཁན་དེ་ཚོ་མཐོ་རིམ་སློབ་གྲྭར་སླེབས་སྐབས་དབྱིན་སྐད་ཁུངས་འཁྱོལ་བ་ཆགས་ཐུབ་ཀྱི་ཡོད་ན། བོད་པའི་སློབ་ཕྲུག་ཚོ་ག་རེ་བྱས་ནས་ཁུངས་འཁྱོལ་བ་ཆགས་ཐུབ་ཀྱི་ཡོད་པ་མ་རེད། ངས་ནི་དེ་ལ་རྒྱུ་མཚན་གང་ཡང་མཐོང་གི་མི་འདུག མདོར་བསྡུས་ན་དབྱིན་ཇིའི་སྐད་ཡིག་ཟེར་བ་དེ་ཧ་ཅང་རྩ་ཆེན་པོ་ཡིན་པའི་བསམ་བློའི་བག་ཆགས་ངན་པ་དེ་ཇི་སྲིད་ཀྱི་བར་དུ་མ་དོར་བ་དེ་སྲིད་ཀྱི་བར་དུ་ང་ཚོ་བོད་པས་བོད་ཀྱི་རིག་གཞུང་སྲུང་སྐྱོབ་བྱེད་ཀྱི་ཡིན་གསུངས་པ་དེ་བདེན་པ་མ་རེད་ཅེས་ཐག་བཅད་ནས་བརྗོད་ཀྱི་ཡོད། དགོངས་འགལ་མེད་པ་ཞུ།

ནང་སྲིད་ཀྱི་སྐོར།
བཀུར་འོས་སྤྱི་འཐུས་ཤིག་གིས་བཀའ་ཤག་གི་གསལ་བཤད་ནང་འཁོད་པའི་གནས་ཚུལ་མང་པོ་ཞིག་དངོས་སུ་མིང་སྨོས་མ་བྱས་པ་མ་གཏོགས། དོན་དུ་བདག་ཉིད་ཆེན་པོ་གན་རྡིས་བཤད་པའི་གྲཱམ་སྭརཱཇ་སྟེ་གྲོང་གསེབ་ཀྱི་རང་སྐྱོང་ཞེས་པའི་ལྟ་གྲུབ་དང་འདྲ་པོ་འདུག དེ་ལ་བོད་མི་ཚོས་ངོས་ལེན་དང་རྒྱབ་སྐྱོར་གནང་མཁན་ཡོང་གི་རེད་དམ་ཞེས་བཀའ་གནང་སོང༌། དེ་ལ་ནི་བོད་མིའི་ནང་ནས་ངོས་ལེན་དང་རྒྱབ་སྐྱོར་ད་ལྟ་ཐོབ་ཀྱི་མ་རེད་ཅེས་ཐག་བཅད་དེ་ཞུ་རྒྱུ་ཡིན། དེང་སང་གི་བོད་མི་ཕལ་མོ་ཆེ་དེང་རབས་དང༌། ཆེས་དེང་རབས། དེང་རབས་གོང་མ་ལ་མདུན་མཆོང་བྱེད་རྒྱུའི་ཐུགས་འདོད་གནང་བ་མ་གཏོགས། བདག་ཉིད་ཆེན་པོ་གན་རྡིའི་དྲུང་དུ་ཕྱིར་ལོག་རྒྱག་མཁན་མེད་པ་གསལ་པོ་ཤེས་ཀྱི་ཡོད། ཡིན་ནའང་ངས་རྒྱུན་དུ་གན་རྡིས་བཞེད་པའི་གྲཱམ་སྭརཱཇ་ཞེས་པའི་ལྟ་གྲུབ་དེ་གླེང་སློང་བྱེད་དགོས་པའི་རྒྱུ་མཚན་གང་ཡིན་ཞེ་ན། འཛམ་གླིང་ས་ཡི་གོང་བུ་འདིའི་ཐོག་ད་དུང་ལོ་སྟོང་ཕྲག་ཁ་ཤས་ཀྱི་བར་དུ་མིའི་སྤྱི་ཚོགས་ཀྱིས་མཚོན་པའི་སྲོག་ཆགས་དེ་དག་འཚོ་གནས་ཐུབ་པ་ཞིག་དགོས་ཀྱི་ཡོད་ན་གྲཱམ་སྭརཱཇ་ཞེས་པའི་ལམ་སྲོལ་ཉམས་ལེན་མ་བྱས་པར་ཐབས་ལམ་གཞན་པ་རྩ་བ་ནས་མེད་པ་ཡིན་ཙང་ཡང་ཡང་གླེང་སློང་བྱེད་ཀྱི་ཡོད། ཐབས་ལམ་གཞན་མེད་པ་དེ་ངས་ཐག་གཅོད་བྱས་པའི་བསམ་ཚུལ་ཞིག་མ་རེད། དེང་དུས་འཛམ་གླིང་གི་ཤེས་ཡོན་ཅན་མང་ཆེ་བ་ཞིག་གིས་ཁས་ལེན་གནང་བའི་གནད་དོན་ཞིག་ངས་བསྐྱར་ཟློས་བྱེད་ཀྱི་ཡོད། ཡར་ཐོན་ཅན་གྱི་རྒྱལ་ཁབ་མང་པོའི་ནང་གན་རྡིའི་ལྟ་གྲུབ་སྤྱི་དང༌། ཁྱད་པར་གྲཱམ་སྭརཱཇ་ཞེས་པའི་ལམ་སྲོལ་ལ་དོ་སྣང་དང་སློབ་སྦྱོང་གནང་མཁན་ཇི་ཙམ་ཞིག་མང་དུ་འགྲོ་བཞིན་ཡོད་པ་ཚང་མས་མཁྱེན་གསལ་རེད། དུས་ཚོད་མ་འགོར་བའི་ཆེད་མདོར་བསྡུས་ཏེ་ཞུ་ན། ༧གོང་ས་༧སྐྱབས་མགོན་ཆེན་པོས་དུས་རྟག་ཏུ་བཀའ་སློབ་གནང་བའི་དགོངས་དོན་ལྟར་རང་ཅག་བོད་མི་རྣམས་ལ་འཇིག་རྟེན་སྤྱི་ཡོངས་ལ་འཁྲི་བའི་ལས་འགན་གལ་ཆེ་བ་ཞིག་ཡོད། དེ་ནི་ས་ཡི་གོ་ལ་འདི་ཐོར་ཞིག་ལ་མ་ཕྱིན་པར་དེའི་ཐོག་གནས་པའི་སྲོག་ཆགས་རྣམས་བསྐལ་པའི་མཐའ་ལ་མ་སླེབས་བཞིན་དུ་དུས་མ་ཡིན་པའི་འཇིག་པའི་དབང་དུ་མི་འགྲོ་བའི་ཐབས་ཤེས་བྱ་རྒྱུ་དེ་ཡིན། དེ་འདྲའི་ལས་འགན་དེ་སྒྲུབ་པའི་ཐབས་ལམ་ནི་གན་རྡིས་བསྟན་པའི་འཚེ་བ་མེད་པའི་ལམ་དང་གྲོང་གསེབ་ཀྱི་རང་སྐྱོང་གི་ལྟ་གྲུབ་ལས་གཞན་དུ་མེད་པ་རྣམ་དཔྱོད་ཅན་མང་ཆེ་བས་ངེས་པ་རྙེད་ཟིན་པ་ཞིག་རེད། དྲི་བ་གཉིས་པ་གལ་ཏེ་བོད་མི་ཚོས་རྒྱབ་སྐྱོར་མ་བྱས་པ་ཡིན་ན་ཁྱེད་རང་ཅང་མི་སྨྲ་བར་བསྡད་ཀྱི་ཡིན་ནམ་ཞེ་ན། དེ་ལྟར་རྩ་བ་ནས་སྡོད་ཀྱི་མིན། བོད་མིའི་གཞིས་ཆགས་སོ་སོའི་ནང་ས་ཆ་ཨེ་ཀར་གཅིག་གམ་ཕྱེད་ཀ་ཙམ་ལས་མ་བྱུང་ཡང་དེའི་ཐོག་གན་རྡིས་བསྟན་པའི་སྲོལ་རྒྱུན་གྱི་ཐབས་ལམ་དངོས་སུ་ལག་ལེན་ལ་བསྟར་ནས་གྲུབ་འབྲས་ཀྱི་མཚོན་དཔེ་མིག་སྟོན་ཐུབ་པ་ཞིག་བྱ་རྒྱུའི་འབད་བརྩོན་བྱེད་རྒྱུ་ཡིན། ལམ་སྲོལ་དེའི་དགོས་པ་དང་ཁེ་ཕན་གང་ཡོད། ཁོར་ཡུག་དང་སྲོག་ཆགས་ལ་ཕན་ཐོགས་ཇི་ཡོད། འཚེ་བ་མེད་པའི་ཉམས་ལེན་ཇི་ལྟར་བྱེད་ཐུབ་པ་སོགས་མིག་སྟོན་དང་དཔེ་མཚོན་ཐུབ་པའི་ཚོད་བལྟ་བྱེད་རྒྱུ་དེ་ང་ཚོའི་ལས་འགན་ཡིན་བསམ་གྱི་ཡོད། སང་ཉིན་ནས་ཞིང་ཁ་རྨོས་བརྒྱབ་མི་ཆོག རྫས་ལུད་བརྒྱབ་མི་ཆོག་ཅེས་ཉི་མ་གཅིག་ལ་བཀའ་བཏང་ནས་འགྱུར་བ་གཏོང་ཐུབ་ཐབས་ཡོད་པ་མ་རེད། སུས་ཀྱང་ཉན་གྱི་མ་རེད། རྫས་ལུད་བརྒྱབ་ན་གནོད་པ་གང་ཡོད་དང་མ་བརྒྱབ་ན་ཕན་ཐོགས་གང་ཡོད་དངོས་སུ་ཚོད་བལྟ་བྱས་ནས་མིག་སྟོན་ཐུབ་པ་ཡིན་ན་རིམ་པས་མི་ཚོས་ངོས་ལེན་དང་རྒྱབ་སྐྱོར་ཐོབ་པའི་རེ་བ་ཡོད་རེད། གཅིག་བྱས་ན་མིག་བསྟན་ནའང་ཁས་མི་ལེན་མཁན་ཡོང་སྲིད། མངོན་གྱུར་རྟགས་ཀྱིས་བདེན་པ་ངོ་སྤྲོད་ཀྱང༌། །ངམ་གནག་བཞིན་གྱི་གཉེར་མ་མི་སངས་པ། །ཞེས་གསུངས་པ་ལྟར་རྭ་མི་འཕྲོད་མཁན་ཡོང་སྲིད་པ་རེད་དེ། ཇི་ཙམ་དཀའ་ལས་ཁག་པོ་ཡིན་ནའང་ད་དུང་འབད་བརྩོན་བྱས་ནས་བསྒྲུབ་དགོས་པའི་དོན་ཆེན་ཞིག་ཡིན་པར་ངོས་འཛིན་བྱེད་ཀྱི་ཡོད།
ཉམ་ཐག་ལྟ་སྐྱོང་སྐོར་དགོངས་འཆར་མང་པོ་གནང་བ་དེ་དག་ཚང་མ་ལག་ལེན་བཀལ་ཐབས་འབད་བརྩོན་བྱེད་ཀྱི་ཡིན། འགྲིམས་འགྲུལ་དཀའ་ངལ་ཡོད་པའི་གཞིས་ཆགས་ཁག་གི་དཀའ་ངལ་སེལ་ཐབས་ཀྱང་སྤྱི་འཐུས་རྣམ་པའི་དགོངས་ཚུལ་དང་མཐུན་པར་སྒྲུབ་ཐབས་ཞུ་རྒྱུ་དང༌། ཡང་གཞིས་ཆགས་ཁ་ཤས་ནང་ཁང་པའི་ཉམས་གསོའི་རོགས་རམ་སྤྲོད་སྟངས་རྒྱུག་པ་ལེབ་བརྡུངས་བྱས་པ་དེ་མ་འགྲིགས་པའི་སྐོར་བཀའ་གནང་སོང༌། དེ་ནི་བཀའ་ཤག་ནས་ཀྱང་མ་འགྲིགས་པར་ངོས་ལེན་ཞུས་ཟིན་པ་ཡིན། མ་འོངས་པར་ནོར་འཁྲུལ་དེ་བཟོ་བཅོས་བྱེད་ཐབས་ཇི་དགེ་བསམ་ཞིབ་ཞུ་རྒྱུ་ཡིན། ཨོ་རི་སའི་ནང་འཚོ་བའི་དཀའ་ངལ་ཡོད་པའི་ཉམ་ཐག་ཁ་ཤས་སྐོར་བཀའ་གནང་བ་བཞིན་དེ་འཕྲལ་ཨོ་རི་སའི་ས་གནས་འགོ་འཛིན་དང་འབྲེལ་བ་ཞུས་པར་ཉམ་ཐག་གཅིག་ནི་དེའི་བར་འདས་གྲོངས་ཕྱིན་འདུག ལྷག་མ་རྣམས་ལྟ་རྟོག་བྱེད་དགོས་པའི་བཀོད་མངགས་ཞུས་ཡོད། ཡང་གཞིས་ཆགས་འགའ་ཤས་ནང་བུ་ལོན་ཆེན་པོ་ཡོད་པའི་ཉམ་ཐག་གི་སྐོར་བཀའ་གནང་སོང༌། དེ་ནི་དངོས་ཡོད་ཀྱི་གནས་ཚུལ་རེད་འདུག འདི་གར་བཀའ་ཤག་ཏུའང་བུ་ལོན་སྤྲོད་མ་ཐུབ་པའི་རྒས་འཁོགས་ཤིག་སྙན་ཞུ་འཁྱེར་ནས་ཕེབས་བྱུང༌། བུ་ལོན་དེ་ཚོའི་གནས་སྟངས་ནི་ཧ་ལས་པའི་རྙོག་འཛིངས་ཆེན་པོ་རེད་འདུག ཐོག་མ་བུ་ལོན་གཏོང་ཕྱོགས་དང༌། སྐྱེད་ཁ་བརྩི་ཕྱོགས་སོགས་ད་ལྟ་གསལ་པོ་ཤེས་རྟོགས་ཐུབ་མ་སོང༌། བུ་ལོན་དེ་ཚོ་དེད་མ་ཐུབ་པ་ཡིན་ན་མཉམ་འབྲེལ་ཁུངས་མ་འཁྱོལ་བ་ཆགས་རྒྱུ་དང༌། དེད་པ་ཡིན་ན་བུ་ལོན་འཇལ་མཁན་ཚོའི་འཚོ་བ་ཁུངས་མ་འཁྱོལ་བའི་གནས་སུ་གྱར་རྒྱུ་བཅས་ཕྱོགས་གཉིས་ཀར་དཀའ་ངལ་འཕྲད་པའི་གནས་ཚུལ་ཞིག་རེད་འདུག བཀའ་ཤག་ནས་བུན་རྙིང་དེ་དག་སྐོར་བསྐྱར་ཞིབ་ནན་པོ་བྱས་ཏེ་དཀའ་ངལ་སེལ་ཐབས་ཀྱི་འབད་རྩོལ་ཞུ་རྩིས་ཡོད། རྡ་སར་ཚོགས་སྐྱིད་ཁག་གི་ཐུགས་སྤྲོ་མང་བ་དང༌། དེ་ཚོའི་སྐབས་ཤོ་སྦག་དང་རྒྱན་རྩེད་སྣ་ཚོགས་ཆེད་མངགས་ཀྱིས་གོ་སྒྲིག་བྱེད་ཀྱི་ཡོད་པ་ཚུལ་མཐུན་མ་ཡིན་པའི་སྐོར་བཀའ་གནང་སོང༌། དེ་ཚོ་བཀག་བསྡོམས་བྱེད་ཐབས་རྡ་སའི་ས་གནས་གྲོས་ཚོགས་དང་ས་གནས་འགོ་འཛིན་བཅས་ལ་འབྲེལ་བ་ཞུས་ཏེ་ལག་བསྟར་ཞུ་རྒྱུ་ཡིན། ཡང་བོད་མི་སུད་ཚོང་བ་རྣམས་ལ་ཁྲོམ་ས་དང་ཁྲལ་གྱི་དཀའ་ངལ་འཕྲད་ཀྱི་ཡོད་ཚུལ་གསུངས་པ་དེའི་ཐད་བཀའ་ཤག་ལའང་འདི་སྐོར་སེམས་ཁྲལ་ཡོད་མུས་ཡིན། ནམ་ཕུགས་བོད་མི་རྣམས་སུད་ཚོང་ལ་བརྟེན་མ་དགོས་པར་གཞིས་སྒར་སོ་སོའི་ནང་དཔལ་འབྱོར་འདུ་འགོད་ཁུངས་འཁྱོལ་ཐབས་ཤིག་ཡོང་བའི་དམིགས་ཡུལ་བཟུང་སྟེ་ཐབས་ལམ་བཙལ་དགོས་ཀྱི་འདུག འཕྲལ་རྐང་སུད་ཚོང་བ་རྣམས་ལ་ཁྲལ་དང་ས་ཆའི་དཀའ་ངལ་སེལ་ཐབས་གང་ཡོང་འབད་བརྩོན་ཞུ་རྒྱུ་ཡིན།

དཔལ་འབྱོར་སྐོར།
དཔལ་འབྱོར་ཚོང་གི་སྡེ་ཚན་ནང་བོད་ཀྱི་རིག་གཞུང་དང་འབྲེལ་བ་ཡོད་པའི་ཅ་དངོས་ཐོན་སྐྱེད་བྱེད་མཁན་གྱི་བཟོ་ཚོང་དེ་དག་མུ་མཐུད་འཛིན་སྐྱོང་བྱེད་དགོས་པ་དང༌། ཁེ་བཟང་ཡོད་པའི་ཚོང་རིགས་མུ་མཐུད་འཛིན་སྐྱོང་བྱེད་ན་ཡག་པོ་ཡོད་པའི་སྐོར་བཀའ་གནང་སོང༌། དེའི་ཐོག་མདོར་བསྡུས་ཏེ་ཞུ་ན། རིག་གཞུང་འཛིན་སྐྱོང་གི་ཆེད་དུ་ཅ་དངོས་ཐོན་སྐྱེད་བྱེད་པ་དང༌། ཚོང་གི་ཆེད་དུ་ཅ་དངོས་ཐོན་སྐྱེད་བྱེད་པ་གཉིས་ཀྱི་བར་ཁྱད་པར་ཧ་ཅང་ཆེན་པོ་འདུག རིག་གཞུང་འཛིན་སྐྱོང་གི་ཆེད་དུ་དམིགས་ནས་ཐོན་སྐྱེད་བྱེད་པའི་ཅ་དངོས་དེ་ཚོ་བཙོང་མི་ཆོག་པ་མེད་ནའང༌། ཅ་དངོས་དེ་ཚོ་བཟོ་སྐྲུན་བྱེད་པའི་སྐབས་རིག་གཞུང་འཛིན་སྐྱོང་གི་ཆེད་དུ་དམིགས་ནས་བཟོ་སྐྲུན་བྱེད་པ་མ་གཏོགས་ཚོང་གི་ཆེད་དུ་དམིགས་ནས་བཟོས་པ་ཞིག་མ་རེད། རིག་གཞུང་འཛིན་སྐྱོང་གི་སྡེ་ཚན་དེ་དག་ཚོང་ལས་ཀྱི་སྡེ་ཚན་ཞིག་ཏུ་བསྒྱུར་བ་ཡིན་ན་རིག་གཞུང་འཛིན་སྐྱོང་གི་ལས་དོན་ཉམས་རྒུད་འགྲོ་རྒྱུ་ཉག་གཅིག་རེད། དཔེར་ན་སྨན་རྩིས་ཁང་ལྟ་བུར་ཆ་བཞག་ན། ཕྲན་རང་དམ་འབུལ་བྱས་མ་ཐག་སྨན་རྩིས་ཁང་གི་གནས་ཚུལ་ལ་ལྟ་རྟོག་བྱེད་དགོས་པའི་རྒྱུ་རྐྱེན་ཞིག་བྱུང་སོང༌། དེའི་སྐབས་འཛིན་སྐྱོང་ཚོགས་མི་རྣམས་ལ་འཇིགས་སྣང་ཆེ་ཤོས་ཤིག་གང་བྱུང་ཞེ་ན། སྨན་རྩིས་ཁང་དེ་རིག་གཞུང་འཛིན་སྐྱོང་གི་སྡེ་ཚན་ཞིག་ཏུ་མ་གནས་པར་དངུལ་གྱི་ཁེ་བཟང་བཟོ་མཁན་གྱི་ཚོང་འབྲེལ་སྡེ་ཚན་ཞིག་ལ་འགྱུར་བའི་ཉེན་ཁ་འདུག་སྙམ་པ་ཞིག་བྱུང༌། ཚོང་འབྲེལ་གྱི་སྡེ་ཚན་ཞིག་ཏུ་འགྱུར་བ་ཡིན་ན་ང་ཚོའི་དམིགས་ཡུལ་གྱི་གཙོ་བོ་རིག་གཞུང་འཛིན་སྐྱོང་གི་ལས་དོན་དེ་རྩ་བརླག་ཏུ་འགྲོ་རྒྱུ་ཉག་གཅིག་རེད། རིག་གཞུང་དང་འབྲེལ་བའི་སྡེ་ཚན་མང་ཆེ་བ་ནི་རང་སྐྱོང་ཡིན་པ་དང༌། བོད་གཞུང་གིས་ཐད་ཀར་འཛིན་སྐྱོང་བྱེད་པའི་བཟོ་ཚོང་གི་སྡེ་ཚན་ཚང་མ་རིག་གཞུང་འཛིན་སྐྱོང་དང་འབྲེལ་བ་ཡོད་མེད་ལ་མ་ལྟོས་པར་མ་འོངས་པར་རིམ་པས་སྒེར་བདག་ཅན་དུ་བསྒྱུར་རྒྱུ་མ་གཏོགས་ཐབས་ལམ་གཞན་མི་འདུག རང་སྐྱོང་གི་སྡེ་ཚན་ནོར་བུ་གླིང་ཁ་དང༌། སྨན་རྩིས་ཁང་ལ་སོགས་པ་དེ་ཚོ་བཀའ་ཤག་གི་འདོད་པ་ལྟར་བྱས་ན་ཚོང་ལས་ཀྱི་སྡེ་ཚན་དུ་མ་བསྒྱུར་བར་རིག་གཞུང་འཛིན་སྐྱོང་གི་སྡེ་ཚན་ནང་བསྡད་ཐུབ་ཐབས་དང༌། ཁོ་ཚོའི་ཐོན་སྐྱེད་ཕྲན་བུ་ཡོད་པ་རྣམས་ཚོང་བསྒྱུར་གྱི་ལས་དོན་ཞར་བྱུང་གི་ཚུལ་དུ་བྱེད་ན་མི་འགྲིགས་པ་མེད་ཅིང༌། ཡིན་ནའང་མཛད་གཙོ་ཚོའི་དགོངས་པའི་ནང་སྡེ་ཚན་དེ་ཚོ་ཚོང་ལས་ཀྱི་སྡེ་ཚན་མིན་པའི་ཚོར་སྣང་གསལ་པོ་ཞིག་མེད་ན། དེང་རབས་གོང་མའི་དུས་ཚོད་འདིའི་ནང་བག་མེད་ལོངས་སྤྱོད་ཀྱི་རིང་ལུགས་ངན་པའི་རླུང་འཚུབ་ཆེན་པོའི་ནང་རིག་གཞུང་དང་ལེགས་བྱང་གང་ཡང་གནས་ཐུབ་པ་ཁག་པོ་རེད། དེ་བཞིན་ལོ་མང་པོར་གཞི་རྟེན་ཚུགས་པ་ལྟ་བུར་སྣང་བའི་བཟོ་ཚོང་ཁེ་བཟང་ཡོད་རིགས་དེ་དག་ཀྱང་ཤོག་བུའི་ཐོག་ཁེ་བཟང་གི་བརྒྱ་ཆ་བཏོན་པའི་ཡིག་ཆ་གྲོས་ཚོགས་སུ་སྤྱན་བསྟར་ཞུས་ཡོད་མོད། ཁེ་བཟང་དེ་ཚོ་དངོས་གནས་ཚན་རིག་དང་མཐུན་པ་ཞིག་རྩིས་སྐོར་ཡོད་ཅེས་ཞུ་ཐུབ་རྒྱུ་ཁག་པོ་འདུག དུས་རྒྱུན་དུ་ཁེ་བཟང་མ་གཏོགས་གྱོང་གུན་ཡོང་མི་སྲིད་པའི་ངེས་པ་ཡོད་པའི་སྡེ་ཚན་གཅིག་ཡོད་ན་བསམ་བློ་གཏོང་ཆོག་པ་ཞིག་རེད་མོད། ཚོང་ལ་ཁེ་གྱོང་གཉིས་ཀ་ཡོང་སྲིད་པ་ཆོས་ཉིད་ཡིན་སྟབས། བཙན་བྱོལ་སྲིད་གཞུང་ཞིག་གིས་སྒེར་ས་ཚོ་ནང་བཞིན་གྱོང་གུན་གྱི་ཉེན་ཁ་ལེན་ཐུབ་ཐབས་མེད། རྗེས་ལོའི་ཕྱི་ཟླ་ ༣ པའི་ནང་གྲོས་ཚོགས་ཀྱི་ཚོགས་དུས་གསུམ་པའི་ཐོག་བཙན་བྱོལ་གཞུང་གི་དཔལ་འབྱོར་གནས་སྟངས་ཀྱི་བསྐྱར་ཞིབ་སྙན་ཐོ་ཞིག་གྲོས་ཚོགས་སུ་འབུལ་རྒྱུ་ཡིན། དེའི་ཐོག་ནས་སྤྱི་འཐུས་རྣམ་པས་གནས་ཚུལ་གསལ་པོ་མཁྱེན་ཐུབ་ཀྱི་རེད། མ་དངུལ་ཐེབས་རྩ་ཁྲིམས་མཐུན་དེབ་སྐྱེལ་བྱེད་དགོས་གསུངས་པ་ནི་དངོས་གནས་རེད། ད་ལྟ་ཐེབས་རྩ་དེབ་སྐྱེལ་ཟིན་པ་འགའ་ཤས་འདུག་ཅིང༌། ད་དུང་ཡང་ཐེབས་རྩ་གསར་པ་དེབ་སྐྱེལ་ཞུ་ཕྱོགས་སྐོར་བསམ་ཞིབ་ཞུ་བཞིན་པ་ཡིན། གང་ལྟར་མ་འོངས་པར་བཟོ་ཚོང་སྡེ་ཚན་རྣམས་སྒེར་བདག་ཏུ་བསྒྱུར་ནས་རིམ་པས་མ་དངུལ་ཚུར་ལོག་པའི་སྐབས་མ་དངུལ་ཡོངས་རྫོགས་ཐེབས་རྩ་གཅིག་གི་ནང་བཞག་པའམ། ཐེབས་རྩ་ཁ་ཤས་ནང་ཆ་བགོས་ཀྱིས་བཞག་པ་གང་འགབ་མདོ་དོན་ཡུལ་གྱི་ཁྲིམས་དང་མཐུན་པ་དང༌། ཁྲལ་ཆག་ཐོབ་ཐུབ་པ་བཅས་ཡིད་ཆེས་ཆོག་པའི་གནས་སྟངས་གཙང་མ་ཞིག་བཟོ་རྒྱུ་གལ་ཆེན་པོར་ངོས་འཛིན་བྱེད་ཀྱི་ཡོད། དེ་བཞིན་དཔལ་འབྱོར་ལས་ཁུངས་ཀྱིས་གསོལ་རས་bonusམེད་པ་བཟོས་པ་དེ་ལས་བྱེད་སེམས་ཤུགས་ཆག་རྒྱུ་མ་གཏོགས་ཁེ་བཟང་ལ་ཕན་གྱི་མི་འདུག་གསུངས་པའང་དངོས་བདེན་རེད། ཇི་སྲིད་ཀྱི་བར་འཛིན་སྐྱོང་བྱེད་པའི་རིང་ཁེ་བཟང་ཡོད་པའི་སྡེ་ཚན་རྣམས་ལ་གཙང་ཁེའི་ཆ་ཤས་ངེས་ཅན་ཞིག་གསོལ་རས་bonusའབུལ་དགོས་པ་ངོས་ལེན་བྱེད་ཀྱི་ཡོད། ཡང་དཔྱ་ཁྲལ་ཆ་ཚང་བསྡུ་མི་ཐུབ་པ་ཨ་རི་དང་ཁེ་ན་ཌ་ལྟ་བུ་དཔེ་མཚོན་གསུངས་སོང༌། དེའི་ཐོག་ང་ཚོས་བསྐྱར་ཞིབ་ཞུ་རྒྱུ་དང༌། གསལ་བཤད་ནང་འཁོད་པ་བཞིན་མ་འོངས་པར་བོད་མི་ཡོངས་རྫོགས་ཀྱིས་དཔྱ་ཁྲལ་འབུལ་ཐུབ་པ་བཟོ་རྒྱུའི་འབད་བརྩོན་ཞུ་རྒྱུ་ཡིན། གྱོང་གུན་ཡོད་པའི་ལས་རིགས་སྡེ་ཚན་བཞི་སྒོ་བརྒྱབས་པའི་སྐབས་དེ་ཚོའི་ནང་ཡོད་པའི་ལས་བྱེད་ཚོའི་གནས་སྟངས་ག་འདྲ་ཞིག་ཡོང་གི་ཡོད་མེད་སྐོར་སྤྱི་འཐུས་ཁ་ཤས་ཀྱིས་ཐུགས་འཚབ་གནང་སོང༌། གྱོང་གུན་ཆེན་པོ་ཡོད་པའི་ཚོང་ལས་སྡེ་ཚན་བཞི་པོ་དེ་གྱོང་གུན་ཡོད་ནའང་ཉིན་གཅིག་གི་ནང་སྒོ་བརྒྱབ་ཐུབ་ཐབས་མི་འདུག སྒོ་བརྒྱབ་རྒྱུའི་ལས་རིམ་འཕྲལ་དུ་འགོ་འཛུགས་རྒྱུ་ཡིན་ཞེས་ཞུས་པ་མ་གཏོགས་སང་ཉིན་རང་སྒོ་བརྒྱབ་རྒྱུ་ཡིན་ཞེས་ཞུས་མེད། ཚོང་ལས་ཀྱི་སྡེ་ཚན་ག་འདྲ་ཞིག་ཡིན་རུང་ཕྱིར་བསྡུ་བྱེད་སྐབས་གྲོས་ཚོགས་གྲོལ་ནས་ཚོགས་ཁང་སྒོ་བརྒྱབས་པ་ལྟ་བུ་ལས་སླ་པོ་ཞིག་མ་རེད། གང་ལྟར་ཡང་བཀའ་ཤག་གི་ངོས་ནས་གྲོས་ཚོགས་སུ་གསལ་པོ་ཞུ་རྒྱུ་ཞིག་ལ། ལས་བྱེད་དེ་ཚོར་ད་ལྟ་ནང་བཞིན་མཐུན་རྐྱེན་ཡོངས་སུ་རྫོགས་པ་སྤྲོད་ཐུབ་མིན་ལ་མ་ལྟོས་པར། ལས་བྱེད་སུའང་ཐ་ངན་ལ་མི་འགྲོ་བ་དང༌། བོད་གཞུང་གི་ལས་བྱེད་སྤྱི་འགྲེ་སྤྱི་མཚུངས་ཀྱི་ཐོབ་ཐང་ཡོད་པ་ཞིག་ངེས་པར་དུ་ཞུ་རྒྱུ་ཡིན། ད་ལྟ་ཛ་དྲག་ཡོད་པའི་བཟོ་ཚོང་གི་སྡེ་ཚན་བཞི་ཙམ་དུ་མ་ཟད། གཞུང་གིས་ཐད་འཛིན་བྱེད་པའི་ཚོང་ལས་དང་བཟོ་ལས་ཡོངས་རྫོགས་སྒེར་བདག་ཏུ་བསྒྱུར་བའམ་སྒོ་བརྒྱབ་རྒྱུ་ཐག་གཅོད་ཟིན་པ་ཞིག་རེད། དེ་ཚོའི་ནང་གི་ལས་བྱེད་ཚང་མ་ད་ལྟ་སྤྱི་ཡོངས་ཀྱི་གཞུང་ཞབས་ཀྱི་གནས་སྟངས་དང་མཚུངས་པའི་འགྲོ་སྟངས་བཟོ་རྒྱུ་དེ་དཔལ་འབྱོར་ལས་ཁུངས་དང་བཀའ་ཤག་གི་ལས་འགན་ཡིན་ཞེས་ཚིག་ཐག་ཆོད་པོའི་ཐོག་ནས་ཞུ་རྒྱུ་ཡིན། ཡང་སྤྱི་འཐུས་ཁ་ཤས་ཀྱིས་ཕྱོགས་བསྡོམས་མ་དངུལ་ནང་མ་ཚུད་པའི་དངུལ་མང་པོ་ཡོད་པ་དེ་ཚོ་ཕྱོགས་བསྡོམས་མ་དངུལ་ནང་ཚུད་དགོས་ཀྱི་འདུག་ཅེས་བཀའ་གནང་སོང༌། དེའི་ཐད་དེ་སྔ་བཀའ་ཤག་གི་གསལ་བཤད་སྔ་རྗེས་ནང་ཕྱོགས་བསྡོམས་མ་དངུལ་ནང་མ་ཚུད་པའི་གཞུང་དངུལ་རྩ་བ་ནས་མེད་ཅེས་གསུངས་ཡོད། དེའི་བརྒྱུད་རིམ་དེ་ད་ལྟ་བཀའ་ཤག་གིས་འཁྱེར་རྒྱུ་ཡིན། གལ་སྲིད་ཕྱོགས་བསྡོམས་མ་དངུལ་ནང་མ་ཚུད་པའི་གཞུང་དངུལ་ཞིག་ཟུར་དུ་ལུས་ཡོད་པ་ཡིན་ན། ངེས་པར་དུ་ཕྱོགས་བསྡོམས་མ་དངུལ་ནང་ཚུད་པར་བྱེད་རྒྱུའི་ཆོད་སེམས་བརྟན་པོ་ཡོད་ཅེས་ཞུ་རྒྱུ་ཡིན།

འཕྲོད་བསྟེན་སྐོར།
བོད་མིའི་གཞིས་ཆགས་མང་པོའི་ནང་ཕྱི་ལུགས་ཀྱི་སྨན་པས་མ་འདེང་བའི་སྐུ་ངལ་ཡོད་པ་དང༌། དེའི་ཆེད་རྒྱ་གར་ནང་སྨན་པའི་སློབ་སྦྱོང་གི་ས་མིག་མང་དུ་གཏོང་ཐབས་ཞུ་དགོས་པའི་དགོངས་འཆར་གནང་སོང༌། དགོངས་འཆར་གནང་དོན་བཞིན་དོན་འབྲས་སོན་མིན་ལ་མ་ལྟོས་པར་འབད་བརྩོན་ཞུ་རྒྱུ་ཡིན། ཡང་བཙན་བྱོལ་གཞུང་གིས་རྒྱ་གར་གྱི་ཚོང་པ་སྟོབས་ཆེན་ཁག་དང་འབྲེལ་བ་བྱས་ཏེ་སྨན་གྱི་མཐོ་སློབ་གསར་འཛུགས་ཐུབ་ན་ཡག་པོ་ཡོད་ཚུལ་བཀའ་གནང་སོང༌། ཡིན་ནའང་དགོངས་འཆར་དེ་ནི་ཉེས་གཅོད་བཟང་པོའི་གདན་སྒང་གི་རྐྱལ་རྒྱག་པའི་བཟོ་འདྲ་ཞིག་རེད། དགོངས་འཆར་ཡག་པོ་རེད་དེ། ང་ཚོས་སྒྲུབ་ཐུབ་པ་ཞིག་མ་རེད། ཡང་གཞིས་ཆགས་འགའ་ཞིག་ནང་སྨན་ཁང་མེད་པའི་དཀའ་ངལ་ཡོད་སྐོར་གསུངས་སོང༌། གཞིས་ཆགས་ཡོངས་རྫོགས་བསྐྱར་ཞིབ་བྱེད་པའི་སྐབས་སྨན་ཁང་མེད་པའི་གཞིས་ཆགས་ཁག་ངོས་འཛིན་བྱས་ཏེ་སྨན་ཁང་བཙུག་རྒྱུའི་ཐབས་ཤེས་ཞུ་རྒྱུ་ཡིན། དེ་བཞིན་སྨན་ཁང་ཡོད་པ་དེ་ཚོའི་ནང་དགོས་མཁོ་མ་ཚང་བ་རྣམས་ཡར་རྒྱས་གཏོང་རྒྱུ་དང༌། ས་གནས་འགའ་ཞིག་ཏུ་ས་ཐག་རིང་པོའི་བར་སྨན་བཅོས་ཀྱི་མཐུན་རྐྱེན་མེད་པའི་དཀའ་ངལ་ཡོད་པ་རྣམས་ཀྱང་སེལ་ཐབས་ཞུ་རྒྱུ་ཡིན། ཡང་སྤྱི་འཐུས་ཁ་ཤས་ཀྱིས་སྨན་རྩ་འདེབས་ལས་ཞུ་དགོས་ཀྱི་དགོངས་འཆར་གནང་སོང༌། བོད་ཀྱི་གསོ་བ་རིག་པའི་ལམ་སྲོལ་དང་བསྟུན་ན་སྨན་རྩ་འདེབས་ལས་བྱ་རྒྱུ་ཚུལ་དང་མཐུན་པ་ཞིག་མ་རེད། རང་བྱུང་གི་སྨན་རྩ་ཉི་མ་ཤར་ས་དང༌། ས་སྲིབ་དང༌། ལུང་པའི་ཁ་བསྟན་ཕྱོགས། ས་བབས་མཐོ་དམན་སོགས་ངེས་ཅན་དུ་སྐྱེས་པ་ལས་བསྒྲུབ་དགོས་པ་གསུངས་ཡོད། རང་བྱུང་འབྱུང་ཁམས་ཀྱི་དབང་གིས་མ་རྨོས་མ་བཏབ་པར་སྐྱེས་པའི་སྨན་རྩ་མཁོ་སྒྲུབ་བྱེད་རྒྱུའི་ལག་ལེན་ཉམས་པ་ཡིན་ན། བོད་ཀྱི་གསོ་བ་རིག་པའི་སྲོལ་རྒྱུན་ཡང་དག་པ་འཛིན་ཐུབ་ཀྱི་མ་རེད། ཡིན་ནའང་སྨན་རྩ་རྩ་མེད་དུ་ཕྱིན་པ་ལས་སྨན་རྩ་བཅོས་མ་ཞིག་ཡོད་པ་དགའ་བ་ཡིན་ཙང༌། སྨན་རྩ་འདེབས་ལས་ཀྱི་བསམ་ཚུལ་དེ་ང་ཚོའི་ལས་རིམ་ནང་ཡོད་པ་བཞིན་གང་ཐུབ་འབད་བརྩོན་ཞུ་རྒྱུ་ཡིན། ཧི་མ་ལཱ་ཡའི་རི་རྒྱུད་དང་འབྲེལ་བའི་རྒྱ་གར་གྱི་མངའ་སྡེ་ཇ་མུ་ཀཤ་མིར་དང༌། ཨུཏཱ་རན་ཅལ། ཧི་མ་ཅལ་པྲ་དེ་ཤ། ནུབ་བང་གལ། འབྲས་ལྗོངས། ཨ་རུ་ན་ཅལ་པྲ་དེ་ཤ། མེ་གྷ་ལ་ཡ་བཅས་ཀྱི་ཚེའི་རིག་བྱེད་ཀྱི་སྡེ་ཚན་དང་འབྲེལ་བ་ཞུས་ཏེ་ཧི་མ་ལ་ཡའི་རི་རྒྱུད་དུ་རང་བཞིན་གྱིས་སྐྱེ་བའི་སྨན་རྩ་སྲུང་སྐྱོབ་བྱེད་ཐབས་ལས་འགུལ་སྤེལ་དགོས་པ་གལ་ཆེར་མཐོང་གི་ཡོད། ཉེ་ཆར་ཕྱི་ཟླ་ ༩ ཚེས་ ༢༥ ཉིན་མཛད་སྒོ་གཅིག་གི་ནང་ཧི་མ་ཅལ་མངའ་སྡེའི་འཕྲོད་བསྟེན་བློན་ཆེན་མཇལ་བྱུང་ཞིང༌། ཁོང་དང་མཉམ་དུ་འདིའི་སྐོར་བཀའ་མོལ་བྱུང༌། མངའ་སྡེ་གཞན་དང་མཉམ་དུ་འབྲེལ་གཏུགས་བྱེད་ཕྱོགས་སྐོར་རིམ་པས་བསམ་བློ་གཏོང་རྒྱུ་ཡིན། ཡང་སྤྱི་འཐུས་རྣམ་པས་སྨན་རྩིས་ཁང་གཞི་རྒྱ་ཆེན་པོ་ཡིན་ཙང་སྡེ་ཚན་ཁ་ཤས་སུ་དབྱེ་ན་ཡག་པོ་ཡོང་གི་རེད་གསུངས་སོང༌། སྤྱིར་བཏང་སྨན་རྩིས་ཁང་དེ་རྒྱ་གར་གྱི་ཡུལ་ཁྲིམས་འོག་དེབ་སྐྱེལ་བྱས་པའི་རང་སྐྱོང་གི་སྡེ་ཚན་ཞིག་རེད། སྨན་རྩིས་ཁང་སྡེ་ཚན་ཁ་ཤས་སུ་དབྱེ་ན་ཡག་ཏུ་འགྲོ་དང་མི་འགྲོ་ད་ལྟ་ཞུ་ཐུབ་ཀྱི་མི་འདུག སྨན་རྩིས་ཁང་གི་སྒྲིག་འཛུགས་ཚགས་ཚུད་ཡོང་ཐབས་སྐོར་ལས་རིམ་འགོ་ཚུགས་ཟིན་པ་ཡིན། མ་འོངས་པར་སྨན་རྩིས་ཁང་འཛིན་སྐྱོང་ཉམས་ཆག་མེད་པར་སྲ་བརྟན་ཡོང་ཐབས་བསམ་ཞིབ་དང་གོ་བསྡུར་ཞུ་བཞིན་པ་ཡིན། ཡང་སྤྱི་ཚོགས་ནས་མྱོས་འགྱུར་རིགས་བག་མེད་དུ་ལོངས་སྤྱོད་ཀྱི་ཡོད་པ་བཀག་བསྡོམས་སླད་འཕྲོད་བསྟེན་ལས་ཁུངས་ཀྱིས་ལྟ་སྐྱོང་བྱེད་དགོས་བཀའ་གནང་སོང༌། དེའི་ཐོག་དེ་སྔའང་གང་ལ་གང་འཚམས་འབད་བརྩོན་གནང་འདུག་ཅིང༌། ད་དུང་མུ་མཐུད་དེ་གང་ཐུབ་ཞུ་རྒྱུ་ཡིན། འཕྲོད་བསྟེན་ལས་བྱེད་པ་དང་སྨན་ཞབས་པ་སློབ་སྦྱོང་བྱེད་མཁན་ཉུང་དུ་འགྲོ་བཞིན་པ་དེ་ཡར་རྒྱས་གཏོང་དགོས་གསུངས་པ་ལྟར་རིམ་པས་འཕྲོད་བསྟེན་ལས་བྱེད་དང་སྨན་ཞབས་མང་དུ་གཏོང་རྒྱུའི་ཐབས་ཤེས་ཞུ་རྒྱུ་ཡིན། མཐའ་མར་སྦྲུམ་མའི་འཕྲོད་བསྟེན་དང༌། བྱིས་པ་བཙའ་ཐབས། བྱིས་པ་གསོ་སྐྱོང་ལ་སོགས་པའི་ཆེད་འཕགས་བོད་ཀྱི་གསོ་བ་རིག་པའི་གཞུང་ལུགས་ནས་བྱུང་བ་ལྟར་བྱ་རྒྱུ་ཡིན་ཞེས་གསལ་བ་དེའི་ནང་དེང་རབས་ཀྱི་གསོ་བ་རིག་པ་ཚུད་མི་འདུག་ཅེས་སྤྱི་འཐུས་གཅིག་གིས་བཀའ་གནང་སོང༌། དེ་ནི་བསམ་བཞིན་དུ་ཆེད་མངགས་ཀྱིས་འཕགས་བོད་མ་གཏོགས། དེང་རབས་ཀྱི་གསོ་བ་རིག་པའི་མིང་མ་སྨོས་པ་ཡིན། དེང་རབས་ཀྱི་གསོ་བ་རིག་པ་བརྗེད་པའམ་ལུས་པ་མ་རེད། དེང་རབས་ཀྱི་གསོ་བ་རིག་པའི་ནང་བོད་ཀྱི་མི་རིགས་སྲུང་སྐྱོབ་བྱེད་ཐུབ་པའི་སྦྲུམ་མའི་འཕྲོད་བསྟེན་དང༌། བྱིས་པ་བཙའ་ཐབས། བྱིས་པ་གསོ་སྐྱོང་བཅས་ཀྱི་སྐོར་ཕན་ཐོགས་ཡོད་པའི་ཐབས་ལམ་དང་སྨན་དཔྱད་གང་ཡང་ཡོད་མ་རེད་ཅེས་གསལ་པོ་ཞུ་རྒྱུ་ཡིན། དེ་ནི་ངས་རང་འཚམས་ཀྱིས་བཤད་པ་མིན་པར་དེང་དུས་ཀྱི་མཁས་པ་མང་པོས་གསུངས་ཀྱི་ཡོད་པ་རེད། དཔེ་མཚོན་ཆུང་ངུ་ཞིག་ཞུ་ན། དེང་རབས་ཀྱི་གསོ་བ་རིག་པ་བ་ཚོས་འདས་པའི་ལོ་མང་པོའི་རིང་བྱིས་པ་ཆུང་ངུ་ལ་ཨ་མའི་འོ་མ་མ་སྤྲོད་པར་ཤེལ་དམ་ནས་བཅོས་མའི་འོ་མ་སྤྲོད་དགོས་ཞེས་བརྗོད་པ་ WHO གྱིས་མཚོན་པའི་འཕྲོད་བསྟེན་གྱི་སྒྲིག་འཛུགས་ཕལ་ཆེ་བས་ཁས་ལེན་བྱས་པ་རེད། ལོ་བཅུ་ཕྲག་ཁ་ཤས་ཕྱིན་པའི་རྗེས་སུ་གཞི་ནས་དེ་ནོར་འཁྲུལ་རེད་འདུག ཕྲུ་གུ་ཆུང་ཆུང་ལ་ཨ་མའི་འོ་མ་སྤྲོད་དགོས་པ་གལ་ཆེན་པོ་རེད་ཅེས་ལབ་ཀྱི་ཡོད་པ་རེད། དེ་འདྲའི་ནོར་འཁྲུལ་དེ་མི་རབས་ཁ་ཤས་ཀྱི་འཕྲོད་བསྟེན་ལ་གནོད་སྐྱོན་བྱས་ཟིན་པའི་རྗེས་སུ་གཞི་ནས་རྭ་འཕྲོད་པ་ཞིག་ཡིན་པས་དེང་རབས་ཀྱི་གསོ་བ་རིག་པ་ལ་ཡིད་ཆེས་བྱེད་མི་ཐུབ། ད་ལྟ་ང་ཚོའི་སེམས་ཁྲལ་ཆེ་ཤོས་ནི་བཙན་བྱོལ་དུ་སྐྱེས་ནས་འཚར་ལོངས་བྱས་པའི་བོད་མི་ན་གཞོན་ཚོའི་ནང་བོད་ཀྱི་མི་རབས་སྔོན་མ་ཚོ་ནང་བཞིན་ཧ་ལས་དགོས་པའི་རིག་སྟོབས་དང་ཤེས་རབ་ཡོད་པ་དཀོན་པོ་ཆགས་འདུག བོད་ཡིག་དང༌། ཨང་རྩིས། ཕྱི་རྒྱལ་གྱི་སྐད་ཡིག་སོགས་སློབ་ཚན་ག་འདྲ་ཞིག་གི་ཐོག་ལ་ཡིན་ནའང་འགྲན་ཟླ་མེད་པའི་མཁས་པ་སྙན་གྲགས་ཅན་དབྱིན་ཇིའི་སྐད་ལ་ Genius ཟེར་བ་དེ་འདྲ་གཅིག་ཀྱང་ཐོན་མི་འདུག བོད་ཀྱི་མི་རིགས་ལ་ལོ་སྟོང་ཕྲག་བརྒལ་བའི་རིང་རང་ཆས་སུ་ཡོད་པའི་བོད་མིའི་ཤེས་རབ་དེ་དེང་སང་ཉམས་འགྲོ་བ་ཕལ་ཆེར་སྦྲུམ་མའི་འཕྲོད་བསྟེན་དང༌། ཕྲུ་གུ་གསོ་སྐྱོང་གི་ཐབས་ལམ་སྲོལ་རྒྱུན་བཞིན་མ་བྱུང་བ་དང༌། ལྷག་པར་རྫས་སྦྱོར་རིག་པའི་སྨན་དང་ཁབ་མང་པོ་བེད་སྤྱོད་བྱས་པའི་དབང་གིས་ཕྲུ་གུའི་ཤེས་རབ་དང་ལུས་སྟོབས་ལ་གནོད་ཀྱི་མེད་དམ་སྙམ་པའི་དྭོགས་པ་ཆེན་པོ་ཡོད། ང་ཚོས་དེང་རབས་ཀྱི་འཕྲོད་བསྟེན་བྱེད་མི་ཆོག་ཅེས་ལབ་མི་ཐུབ་ཀྱང༌། སྲོལ་རྒྱུན་གྱི་རིག་གནས་ཀྱི་ནང་ཕྲུ་གུའི་ལུས་སེམས་གཉིས་ཀར་སྨན་པའི་ཐབས་ཚུལ་ཡོད་པ་དེ་ཚོ་བེད་སྤྱོད་བྱེད་དགོས་པའི་བསམ་ཚུལ་བཏོན་པ་ཡིན།

བདེ་སྲུང་གི་སྐོར།
ྋགོང་ས་མཆོག་གི་སྐུའི་སྲུང་སྐྱོབ་དང་འབྲེལ་བའི་ཞུ་སྒོ་རྣམས་སྔར་ལས་དོ་སྣང་ཆེ་བ་བྱེད་དགོས་པ་དང༌། ཉམས་ཞིབ་ཀྱི་ལས་གཞི་རྒྱ་ཆེ་རུ་གཏོང་དགོས་པའི་དགོངས་འཆར་བྱུང་བ་དེ་ཚོ་ངོས་ལེན་ཞུས་པ་དང་ཆབས་ཅིག་གང་ཐུབ་ཅི་ཐུབ་ཀྱིས་འབད་བརྩོན་ལྷོད་ཡངས་མ་སོང་བ་ཞུ་རྒྱུའི་ཁས་ལེན་ཞུ་རྒྱུ་ཡིན།
དེ་ནས་ཆབ་སྲིད་དང་ཕྱི་དྲིལ་དང་འབྲེལ་བ་རྣམས་མཉམ་དུ་ཞུ་རྒྱུ་ཡིན། སྤྱི་འཐུས་ཁ་ཤས་ཀྱིས་བཙན་བྱོལ་གཞུང་གིས་ཕྱོགས་གཅིག་ནས་རྒྱ་མི་དང་ཐད་ཀར་འབྲེལ་བ་བསྐྱར་གསོ་ཡོང་རྒྱུའི་ཐབས་ཤེས་བྱེད་བཞིན་པའི་ཐོག་ཕྱོགས་གཞན་ཞིག་ནས་རྒྱལ་སྤྱིའི་ནང་རྒྱབ་སྐྱོར་བཙལ་རྒྱུ་དང༌། བོད་ཀྱི་དཀའ་རྙོག་རྒྱལ་སྤྱིའི་རྣམ་པ་ཅན་དུ་སྒྱུར་ཐབས་བྱེད་པ་དེ་འགལ་ཟླ་མ་རེད་དམ་ཞེས་བཀའ་གནང་སོང༌། དྲི་བ་འདི་གནད་འགག་ཆེན་པོ་རེད། འོན་ཀྱང་ད་ལྟ་བཙན་བྱོལ་གཞུང་གི་བྱེད་ཕྱོགས་འདི་བསམ་ཞིབ་གཏིང་ཟབ་བྱས་རྗེས་གཏན་ལ་ཕབ་པའི་སྲིད་བྱུས་ཤིག་གི་ཐོག་ནས་བྱས་པ་མ་གཏོགས་ཧོལ་རྒྱུགས་བྱས་པ་མིན། ད་ལྟའི་གནས་སྐབས་འདིར་རྒྱ་དམར་དང་མཉམ་དུ་ཐད་ཀར་འབྲེལ་བ་ཡོང་རྒྱུའི་ཐབས་ལམ་རྒྱལ་སྤྱིའི་རྒྱབ་སྐྱོར་དང་གནོན་ཤུགས་ཀྱི་ཐོག་ནས་བཙལ་བ་མ་གཏོགས་བོད་མི་རང་གི་ངོས་ནས་བྱེད་ཐབས་གཞན་གང་ཡང་མེད། ཕྱོགས་གཉིས་ཀའི་སྟོབས་ཤུགས་ཕལ་ཆེར་དོ་མཉམ་པ་ཞིག་མ་བྱུང་ན་ཐད་ཀའི་འབྲེལ་བ་དང་ཞི་མོལ་ཡོང་རྒྱུ་ཁག་པོ་ཡིན་པ་དང༌། ང་ཚོའི་ངོས་ནས་རྒྱལ་སྤྱིའི་ནང་ནུས་པ་སྤེལ་རྒྱུ་མ་གཏོགས། དེ་ལས་གཞན་པའི་ནུས་པ་སྤེལ་ཐབས་ཕལ་ཆེར་མེད་པ་ལྟ་བུ་ཞིག་རེད། ད་ལྟའི་རྒྱ་དམར་གྱི་འགོ་ཁྲིད་ཚོས་༧གོང་ས་མཆོག་དང་ལྷན་དུ་ཞི་མོལ་བྱེད་འདོད་མེད་པ་ནི་གསལ་པོ་རེད། རྒྱ་དམར་གྱི་འགོ་ཁྲིད་ཚོས་འབོད་ཚིག་ཅིག་རྒྱ་སྐད་ཀྱི་ནང་ལ་བཟོས་ཡོད་པ་དེ་བོད་སྐད་དུ་རགས་བསྒྱུར་བྱེད་ན་ “ཞི་མོལ་གྱི་དར་ཆ་མཐོན་པོར་འཕྱར་བའི་འོག་ཏུ་ཏཱ་ལའི་ཕྱིར་ལོག་མི་ཐུབ་པའི་ལས་དོན་དེ་ཧུར་བརྩོན་བྱས་ནས་བསྒྲུབ་དགོས་” ཞེས་པ་ཞིག་རེད། དེ་འདྲའི་གནས་སྐབས་སུ་རྒྱལ་སྤྱིའི་ནང་ནུས་ཤུགས་མུ་མཐུད་མ་སྤེལ་བར་བསྡད་ན་དགོས་པ་དང་ཁེ་ཕན་གང་ཡང་མི་འདུག གལ་སྲིད་རྒྱ་དམར་གྱི་འགོ་ཁྲིད་ཚོས་ད་ལྟའི་འབོད་ཚིག་ལྟ་བུ་མ་ཡིན་པར་ཞི་མོལ་ཡོང་བའི་རེ་བ་ཡོད་པའི་རྣམ་འགྱུར་ཞིག་ཐོན་པ་ཡིན་ན། དེའི་སྐབས་རྒྱལ་སྤྱིའི་ནང་ལས་འགུལ་སྤེལ་ཕྱོགས་ལ་འགྱུར་བ་བཏང་ན་ཕན་ཐོགས་ཡོད་པ་ཡིན་ན་ངེས་པར་དུ་གཏོང་ཆོག་གི་རེད། ཡང་རྒྱ་དམར་གྱི་འགོ་ཁྲིད་དང་རྒྱ་ནག་སྐམ་ས་ཆེན་པོའི་ནང་ཉམས་ཞིབ་བྱེད་དགོས་གསུངས་པ་དེ་བདེན་པ་རེད། སྤྱི་འཐུས་ཤིག་གིས་ད་ལྟའི་བཙན་བྱོལ་གཞུང་གི་དབུ་ཁྲིད་རྣམ་པར་རྒྱ་ནག་གི་མཐོ་རིམ་མི་སྣ་བཅུའི་ལོ་རྒྱུས་ཤེས་ཀྱི་ཡོད་དམ་ཞེས་འདྲི་ན་ཤེས་མཁན་སུའང་ཡོད་མ་རེད་གསུངས་པ་དེ་ཕྱེད་ཀ་བདེན་པ་རེད། དཔེར་ན་ད་ལྟའི་བཀའ་བློན་སུ་ལའང་རྒྱ་དམར་གྱི་མཐོ་རིམ་མི་སྣ་བཅུའི་ལོ་རྒྱུས་ཆ་ཚང་བ་ཞུ་རྒྱུ་ཡོད་མདོག་ཁ་པོ་མ་རེད། ཡིན་ནའང་དེ་ལྟའི་ལོ་རྒྱུས་ཤེས་དགོས་པའི་དགོས་གལ་བྱུང་བའི་སྐབས་ང་ཚོ་དེ་དག་ཤེས་ཐུབ་པའི་ཐབས་ལམ་དང་གྲ་སྒྲིག་ཆ་ཚང་ཡོད། རྒྱ་ནག་ནང་གི་གནས་ཚུལ་ཤེས་རྟོགས་ཀྱི་ཐོག་ལ་རྗེས་ལུས་ཐེབས་པའི་དྭོགས་པ་མེད་ཅེས་ཞུ་རྒྱུ་ཡིན། ཡང་དབུས་དང་ལྷོ་ཤར་ཨེ་ཤི་ཡའི་ནང་ལས་འགུལ་སྤེལ་རྒྱུ་མ་གཏོགས་ཨ་ཕི་རི་ཀ་དང་ལྷོ་ཨ་མི་རི་ཀའི་ཡུལ་ལུང་ཁག་ཏུ་ལས་འགུལ་སྤེལ་རྒྱུའི་གསལ་ཁ་མི་འདུག་ཅེས་གསུངས་སོང༌། ལྷོ་ཨ་མི་རི་ཀའི་ཡུལ་ལུང་ཁག་གི་ནང་དེ་སྔོན་ལས་འགུལ་གང་ལ་གང་འཚམས་སྤེལ་ཡོད་རེད། ད་ལྟའི་གནས་སྐབས་སུ་ལྷོ་ཨ་མི་རི་ཀའི་དོན་གཅོད་ཟུར་འཛུགས་བྱ་རྒྱུའི་མི་འགྲོ་ཡང་གཏན་འཁེལ་ཟིན་ཏེ་མི་འགྲོ་དེར་ Spanish སྐད་ཡིག་ཛ་དྲག་གི་ཐོག་ནས་སྦྱོང་བརྡར་སྤྲོད་ཀྱི་ཡོད། དེ་འདྲ་ཡིན་ཙང་དམིགས་བསལ་ལས་འགུལ་གསར་གཏོད་བྱ་རྒྱུའི་གྲས་སུ་བཞག་ཡོད། ཨ་ཕི་རི་ཀའི་རྒྱལ་ཁབ་ཁག་ལ་མཚོན་ན། མ་གཞི་གལ་ཆེན་པོ་རེད་དེ། ད་ལྟ་ལྷོ་ཤར་ཨེ་ཤི་ཡ་དང༌། དབུས་ཨེ་ཤི་ཡ་ནང་བཞིན་ཛ་དྲག་ཆེ་བ་ཞིག་མཐོང་གི་མེད་ཅིང༌། ད་ལྟ་ལྷོ་ཨ་ཕི་རི་ཀར་དོན་གཅོད་གཅིག་ཀྱང་ཡོད་མུས་ཀྱི་ཐོག་ནས་ལས་འགུལ་སྤེལ་བཞིན་པ་ཡིན་པས་མིང་བཏོན་མ་བྱས་པ་ཡིན། ཡང་མང་གཙོའི་ལྟ་གྲུབ་དང་ཆབ་སྲིད་ཀྱི་གོ་རྟོགས་མང་ཚོགས་ནང་སྤེལ་དགོས་ཀྱི་འདུག་གསུངས་པ་དངོས་གནས་རེད། དེ་བཞིན་བོད་རྒྱའི་ཞི་མོལ་སྐོར་མང་ཚོགས་ཀྱི་ལས་འགུལ་སྤེལ་དགོས་གསུངས་པའང་དངོས་ཡོད་ཀྱི་གནས་ཚུལ་ཡིན་པས་གཉིས་ཀའི་ཐོག་འབད་རྩོལ་ཞུ་རྒྱུ་ཡིན། འཇི་ནི་ཝའི་རྒྱལ་ཚོགས་ནང་ལས་དོན་མཚམས་འཇོག་མ་བྱས་པར་མུ་མཐུད་བྱེད་དགོས་གསུངས་པ་དེའི་ཐད། སྤྱིར་བཏང་རྒྱལ་ཚོགས་ཀྱི་ལས་དོན་ཆ་ཚང་མཚམས་འཇོག་བྱེད་རྒྱུའི་བསམ་ཚུལ་མེད་ཀྱང༌། འགྲོ་བ་མིའི་ཀུན་སྤྱོད་ཐོབ་ཐང་གི་ཚོགས་ཆེན་ནང་རྒྱ་ནག་གི་ཐོག་སྐྱོན་བརྗོད་ཀྱི་གྲོས་ཆོད་གཞག་རྒྱུའི་ལས་འགུལ་མཚམས་འཇོག་བྱེད་རྒྱུའི་སྐོར་བསམ་ཞིབ་བྱེད་རྒྱུ་ཡིན་ཞེས་ཞུས་པ་ལས་མཚམས་འཇོག་བྱེད་རྒྱུའི་ཐག་གཅོད་བྱས་ཟིན་པ་ཡིན་ཞེས་ཞུས་མེད། ད་ལྟ་འགྲོ་བ་མིའི་ཀུན་སྤྱོད་ཐོབ་ཐང་གི་ཚོགས་ཆེན་ནང་གྲོས་ཆོད་འཇོག་ཐབས་བྱེད་རྒྱུར་སྐྱོན་དང་དགེ་མཚན་གཉིས་ཀ་གསུང་མཁན་མང་པོ་ཡོད་པ་རྣམས་དང་གོ་བསྡུར་བྱེད་བཞིན་པ་ཡིན། ཞིབ་འཇུག་དང་གྲོས་བསྡུར་ཆ་ཚང་ཟིན་པའི་རྗེས་ཐག་གཅོད་ཞུ་རྒྱུ་ཡིན། ཡང་བཀུར་འོས་སྤྱི་འཐུས་ཤིག་གིས་ཕྱི་རྒྱལ་དུ་ཡོད་པའི་བོད་ཀྱི་དོན་གཅོད་ཁང་དེ་དག་བོད་ཀྱི་ཡིག་ཚང་གི་མིང་ཐོག་ནས་ཆབ་སྲིད་ཁོ་ན་བྱེད་དགོས་གསུངས་པ་ནི་ཕྲན་བུ་ངོས་ལེན་ཞུ་བདེ་པོ་མི་འདུག བཀའ་ཤག་གི་གསལ་བཤད་ནང་ཆབ་སྲིད་ཙམ་མ་ཡིན་པར་ཆོས་དང་རིག་གཞུང་གི་ལས་དོན་ཡང་བྱེད་དགོས་ཞུས་པ་མ་གཏོགས་ཆབ་སྲིད་རྩ་བ་ནས་བྱེད་ཀྱི་མིན་ཞེས་ཞུས་མེད། ཆབ་སྲིད་ནི་དོན་གཅོད་ཁག་གི་ལས་དོན་གྱི་གཙོ་བོ་ཡིན་ཡང༌། ད་ལྟའི་གནས་སྐབས་སུ་རང་བཙན་ཡོད་པའི་རྒྱལ་ཁབ་ཚོ་ནང་བཞིན་ཆབ་སྲིད་ཀྱི་ལས་དོན་རྒྱ་ཆེན་པོ་བྱེད་རྒྱུ་མེད་པའམ། བྱེད་མ་ཐུབ་པའི་སྐབས་མང་པོ་ཡོང་བཞིན་པ་རེད། ཡང་སྐབས་རེ་ཆབ་སྲིད་ཀྱི་ལས་དོན་གོང་མཐོར་སྤེལ་བའི་ཐབས་སུ་ཆོས་དང་རིག་གཞུང་བེད་སྤྱོད་གཏོང་དགོས་པ་རྒྱ་དམར་གྱིས་ལབ་པ་ནང་བཞིན་དམར་རྗེན་བྱས་ནས་བཤད་ན་ཆོས་དང་རིག་གཞུང་གི་འབག་གྱོན་དགོས་པའང་ཡོང་གི་འདུག དེར་བརྟེན་༧གོང་ས་༧སྐྱབས་མགོན་ཆེན་པོའི་དགོངས་གཞི་ལ་སྐུ་ཚབ་ལས་ཁུངས་ཡོད་ས་ཚང་མའི་ནང་ཆོས་དང་རིག་གཞུང་གི་སྐོར་སྐད་ཆ་འདྲི་མཁན་བྱུང་ན་བཤད་ཐུབ་མཁན་དང༌། ལྷག་པར་དུ་གསོ་བ་རིག་པའི་ལམ་ནས་ཁུལ་དེའི་ཡུལ་མིར་ཕན་ཐོགས་བྱེད་མཁན་ཞིག་ཡོད་ན་མང་ཚོགས་དང་འབྲེལ་བ་ལས་སླ་པོ་དང༌། ཤུགས་ཆེན་པོ་འཕེལ་ཐུབ་པ་ཡོང་བའི་ཐུགས་རེ་གནང་གི་ཡོད་རེད། རྒྱུ་མཚན་དེ་ལ་བརྟེན་ནས་ད་ལྟའི་བོད་ཀྱི་དོན་གཅོད་དེ་དག་ཆབ་སྲིད་ཀྱི་དོན་གཅོད་ཙམ་མ་ཡིན་པར་ཆོས་དང་རིག་གཞུང་གི་སྐུ་ཚབ་མཚོན་ཐུབ་པ་དང༌། ལྷག་པར་དུ་གསོ་བ་རིག་པའི་ཐོག་ནས་མང་ཚོགས་ལ་ཕན་ཐོགས་བྱེད་ཐུབ་པ་ཡོང་ཐབས་བྱ་རྒྱུ་བཅས་ཀྱི་བསམ་ཚུལ་དེ་ཞུས་པ་རེད། ཡང་ས་གནས་སོ་སོའི་དོན་གཅོད་ཚོས་ཁུལ་དེར་ཡོད་པའི་བོད་མི་ཚོ་ངོ་མཁྱེན་པ་དགོས་ཞེས་གསུངས་པ་ནི་དངོས་བདེན་ཡིན་པར་ངོས་འཛིན་བྱེད་ཀྱི་ཡོད། དེ་མཚུངས་དོན་གཅོད་ཀྱི་མི་འགྲོ་རྣམས་ལུང་པ་དེའི་སྐད་ཡིག་ཤེས་པ་དགོས་ཚུལ་གསུངས་པ་དེ་ངོས་ལེན་ཞུ་རྒྱུ་ཡིན་ཡང༌། དེ་ནི་ཉི་མ་གཅིག་གི་ནང་ཡོང་ཐུབ་ཐབས་མེད། མི་རབས་རྗེས་མའི་ནང་དེ་འདྲ་ཡོང་ཐུབ་པའི་རེ་བ་བྱེད་ཀྱི་ཡིན། དོན་ཚན་གལ་ཆེ་བ་ཞིག་ལ། འཚེ་མེད་ཞི་བའི་ལས་འགུལ་སྤེལ་ཕྱོགས་ཀྱི་གཞི་རྒྱ་ཆེ་བའི་འཆར་གཞི་བསྒྲིག་རྒྱུའི་ལས་རིམ་ནང་དེ་སྔོན་གཏན་འཁེལ་ཟིན་པའི་མི་འགྲོ་དེ་ཚོ་བསྐྱར་ཞིབ་ཀྱིས་གོ་སྒྲིག་ཞུ་དགོས་གསུངས་པ་ནི་བདེན་པ་རེད། མི་འགྲོ་གོ་སྒྲིག་བསྐྱར་དུ་ཞུ་ཐུབ་པའི་འབད་བརྩོན་བྱེད་ཀྱི་ཡིན། ཡིན་ནའང་མི་འགྲོའི་མཚན་གཞུང་ཐག་གཅོད་གནང་མཁན་སློབ་དཔོན་ཆེན་པོ་ཇིན་ཤརྤ་མཆོག་གི་ཐུགས་འདོད་དང་བསྟུན་དགོས་པ་ཡིན་སྟབས། སྔོན་མ་ཁོང་གིས་ཟབ་སྦྱོང་ལན་མང་སྤྲད་སའི་གྲས་ནས་འདེམས་སྒྲུག་གིས་ཐོ་གཞུང་གནང་བ་དེའི་ནང་ནས་གདམ་རྒྱུ་མ་གཏོགས། དེ་མིན་ག་ས་ག་ནས་འདེམས་ཆོག་གི་ཡོད་མ་རེད། ཡང་གཞུང་ཞབས་དྲུང་ཆེ་ཡན་ཆད་ལ་རྒྱ་ནག་གི་གནས་སྟངས་སྐོར་ཟབ་སྦྱོང་སྤྲོད་དགོས་གསུངས་པ་ལྟར་སློབ་སྦྱོང་སྤྲོད་རྒྱུའི་ཐབས་ཤེས་ཞུ་རྒྱུ་ཡིན། དེ་བཞིན་དུ་བོད་པའི་སྤྱི་ཚོགས་ནང་བོད་དོན་བདེན་མཐའ་གསལ་ཐབས་ྋགོང་ས་མཆོག་གི་དགོངས་བཞེད་དབུ་མའི་ལམ་གྱི་སྐོར་ཟབ་སྦྱོང་སྤྲོད་དགོས་གསུངས་པའང་གལ་ཆེ་ཡིན་པར་ངོས་འཛིན་གྱིས་ལག་ལེན་འཁེལ་ཐབས་ཞུ་རྒྱུ་ཡིན། རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་ཐེངས་བཞི་པ་ངེས་པར་དུ་བསྐོང་ཚོགས་ཞུ་དགོས་གསུངས་པའང་དེ་དོན་བསྐོང་ཚོགས་ཐུབ་ཐབས་ཞུ་རྒྱུ་དང༌། ཕྱོགས་མཚུངས་ གྲངྕ ནང་བོད་པ་ཞུགས་ཐབས་ཀྱི་གོ་སྐབས་བཙལ་དགོས་གསུངས་པ་ནི་ཕལ་ཆེར་ཐུབ་ཀྱི་མ་རེད་བསམ་གྱི་འདུག དེ་སྔོན་འབད་བརྩོན་མང་པོ་བྱས་ཀྱང་ཚོགས་འདུ་དེའི་ནང་ལས་ཀ་བྱེད་རྒྱུ་ཧ་ཅང་ཁག་པོ་ཡོད་སྟབས་གྲུབ་འབྲས་གང་ཡང་ཐོན་མེད། ཡང་ཨ་རིའི་གྲོས་ཚོགས་ནང་ད་ལྟ་བགྲོ་གླེང་གནང་བཞིན་པའི་བོད་དོན་སྐོར་གྲོས་ཆོད་གྲོས་འཆར་ཡོད་པ་དེ་མགྱོགས་པོ་ཐོན་ཐབས་བྱེད་དགོས་གསུངས་པ་ནི་དངོས་ཡོད་ཀྱི་གནས་ཚུལ་རེད། བཀའ་ཤག་གི་ངོས་ནས་ཐབས་ཤེས་གང་ཐུབ་ཞུ་རྒྱུ་ཡིན། ྋགོང་ས་མཆོག་ཕྱི་རྒྱལ་ཁག་ཏུ་ཆིབས་སྒྱུར་གནང་སྐབས་མཛད་པ་འཕྲིན་ལས་ཧ་ཅང་རྒྱ་ཆེན་པོ་ཡོང་གི་ཡོད་ནའང༌། དེའི་རྗེས་སུ་བཙན་བྱོལ་གཞུང་གིས་མཇུག་སྐྱོང་ཞུ་ཐུབ་ཀྱི་མི་འདུག་གསུངས་པ་དེ་བདེན་པ་རེད། དེའི་ཐོག་བཀའ་ཤག་གི་ཚོགས་འདུའི་ནང་དུའང་གོ་བསྡུར་བྱུང་སོང༌། མ་འོངས་པར་མཇུག་གནོན་གང་ཐུབ་ཞུ་རྒྱུའི་སྐོར་བསམ་ཞིབ་དང་ཐབས་ཤེས་ཞུ་རྒྱུ་ཡིན། ཡང་ཕཱ་ལོང་གོང་དང་མཉམ་དུ་འབྲེལ་བ་བྱེད་དགོས་གསུངས་པ་དེ་ད་ལྟ་ང་ཚོ་ཐེ་ཚོམ་གྱི་ངང་བསྡད་ཡོད། ལོ་ཁ་ཤས་སྔོན་དུ་ཕཱ་ལོང་གོང་དང་འབྲེལ་བ་བྱེད་ན་ཕན་ཐོགས་ཡོད་མེད་ཚོད་བལྟ་ཞིག་བྱས་པ་རེད། ཡིན་ནའང་ངེས་པ་རྙེད་པ་ཞིག་བྱུང་མ་སོང༌། དེར་བརྟེན་གནས་སྐབས་ཕཱ་ལོང་གོང་དང་འབྲེལ་བ་བྱེད་རྩིས་མེད། ཡང་སྤྱི་འཐུས་ཤིག་གིས་བཀའ་བློན་ཁྲི་པས་གསར་ཤོག་ནང་ཨ་རིའི་ཐོག་ཟུར་ཟ་བྱས་འདུག ཕྱིས་འབྱུང་དེ་འདྲ་མ་བྱེད་ན་ལེགས་ཞེས་བཀའ་གནང་བ་དེའི་ཐད། ངས་དུས་རྒྱུན་དུ་ཨ་རིའི་ལས་ཀ་དྲང་བདེན་མིན་པ་ཚོ་ལ་ཟུར་ཟ་བྱེད་ཀྱི་ཡོད། བཀའ་བློན་ཁྲི་པའི་འགན་ཁུར་བླངས་རྗེས་རང་ངོས་ནས་ཆེད་མངགས་ཀྱིས་ཟུར་ཟ་བྱེད་ཀྱི་མེད་ནའང༌། གསར་འགོད་པས་སྐད་ཆ་འདྲི་བའི་སྐབས་བདེན་པའི་གནས་ཚུལ་བཤད་དགོས་པ་ཡིན་ཙང་ཟུར་ཟ་ཆགས་སྲིད་པ་རེད། ལྷག་པར་དུ་འཚེ་བའི་བྱ་བ་ག་འདྲ་ཞིག་ཡིན་ནའང་ང་ཚོས་དེ་ལ་ཟུར་ཟ་མ་བྱས་པར་བསྡད་ཐབས་ཡོད་པ་མ་རེད། ངས་ཡང་ནས་ཡང་དུ་བདེན་པ་དང་འཚེ་བ་མེད་པ་གཉིས་ང་ཚོའི་ལྟ་གྲུབ་ཀྱི་གཞི་རྩ་ཡིན་ཞེས་ཞུས་པ་ལྟར། རྒྱ་མིས་དམག་བརྒྱབ་ན་ངོ་རྒོལ་བྱེད། ཨ་རིས་དམག་བརྒྱབ་ན་ཁ་བཙུམས་ནས་བསྡད་པ་ཡིན་ན་དྲང་བདེན་ཆགས་ཀྱི་མ་རེད། འཚེ་བའི་ལས་ཀ་བྱེད་མཁན་རྒྱ་གར་དབྱིན་ཇི་བོད་པ་རྒྱ་མི་ཨ་རི་སོགས་སུས་བྱས་རུང་སྐྱོན་བརྗོད་མ་བྱས་པར་འཇོག་ཐབས་ག་ནས་ཡོད། ད་ལྟའི་བཀའ་ཤག་གིས་ཕྱི་འབྲེལ་དང་ནང་སྲིད་སོགས་ཇི་འདྲ་ཞིག་ཡིན་རུང་དངོས་ཡོད་ཀྱི་གནས་ཚུལ་དེ་བཤད་པ་མ་གཏོགས། སོ་སོའི་དགོས་མཁོ་དང་བསྟུན་ནས་མཛོ་ཁ་སྤྲོད་ཐབས་བྱེད་ཐུབ་ཀྱི་མ་རེད། གནས་ཚུལ་འདི་སྤྱི་འཐུས་ཚང་མས་མཁྱེན་དགོས་པ་ཞིག་རེད། བདེན་པ་དང་འཚེ་བ་མེད་པ་ལ་གཞི་བཅོལ་ནས་འགྲོ་དགོས་པ་ཡིན་ཙང༌། སྐབས་རེ་ང་ཚོས་རྒྱབ་སྐྱོར་བྱེད་མཁན་ཚོར་སྐྱོན་བརྗོད་བྱེད་དགོས་པ་དང༌། སྐབས་རེ་ང་ཚོའི་འགལ་ཟླ་ལའང་བསྔགས་བརྗོད་བྱེད་དགོས་པའི་གོ་སྐབས་ཡོང་མི་སྲིད་པ་མ་རེད།
དུས་ཚོད་ཧ་ཅང་མང་པོ་ཞུས་སོང༌། དེ་ལ་དགོངས་འགལ་མེད་པ་ཞུ་རྒྱུ་ཡིན། གོང་དུ་ཞུས་པ་བཞིན་སྤྱི་འཐུས་རྣམ་པ་ཚོས་གསུངས་པའི་དགོངས་འཆར་དང་དྲི་བ་ཁག་ལ་བརྒྱ་ཆ་སུམ་ཅུ་སོ་གསུམ་ཙམ་ཞིག་ལན་ཐེབས་ཡོད་པའི་རེ་བ་ཡོད། དུས་ཚོད་རིང་པོ་གནང་བར་དཔལ་ལྡན་ཚོགས་གཙོ་ཆེན་མོ་མཆོག་ལ་ཐུགས་རྗེ་ཆེ་ཞུ་རྒྱུ་ཡིན།
བོད་མི་མང་སྤྱི་འཐུས་ལྷན་ཚོགས་སྐབས་བཅུ་གསུམ་པའི་ཚོགས་དུས་གཉིས་པ། ༢༠༠༡།༩།༡༩ ནས་ ༢༠༠༡།༩།༢༨