མདོ་སྨད་པ་དགེ་འདུན་ཆོས་འཕེལ་གྱིས་བརྩམས་པའི་གཏམ་རྒྱུད་གསེར་གྱི་ཐང་མའི་གླེང་བསླང་བའི་ཚུལ་ཅུང་ཟད་བརྗོད་པ།
༄༅། །རྩེ་གཅིག་འགྲོ་ལ་ཕན་བཞེད་ཐུགས་བསྐྱེད་ཀྱིས།།
ཚོགས་གཉིས་སྤྱོད་མཆོག་རྒྱ་མཚོའི་མཐར་སོན་ཏེ།།
སྐུ་གསུམ་ནོར་བུའི་གླིང་ལ་དབང་འབྱོར་བའི།།
བདུད་བཞི་ལས་རྒྱལ་ཐུབ་དབང་དེ་ལ་འདུད།།
བྱང་གྲོལ་བདུད་རྩིའི་འོད་ཀྱི་རླབས་གྲོལ་ཞིང༌།།
རྗེས་བརྩེའི་ཆ་ཤས་གང་བ་རྫོགས་པའི་གཟིས།།
མཐའ་དག་སྲིད་ཞིའི་ཚ་གདུང་ཀུན་འཕྲོག་པའི།།
སྔོན་མེད་ཟླ་བ་མིག་མི་འཛུམ་དེར་བསྔགས།།
གཏམ་བཟང་སྒྲོ་སྐུར་སྤངས་པ་བདེན་པའི་ཚིག།
རྒྱུད་མང་སྒྲ་ཡི་སྙན་པས་མི་བསྒྲུན་པའི།།
གསེར་བཞིན་དཔྱད་གསུམ་དག་པའི་རང་འོད་ཀྱིས།།
ཐང་མར་བརྡལ་དེ་སྐབས་འདིའི་གླེང་གཞི་ཡིན།།
དེ་ཡང་བདག་གི་མཁན་ཆེན་ཐམས་ཅད་མཁྱེན་པས། ༼མདོ་སྨད་པ་དགེ་འདུན་ཆོས་འཕེལ་ནི་དུས་རབས་ཉི་ཤུ་པ་འདིའི་ནང་བོད་མི་རིགས་ཀྱི་ཁྲོད་ནས་གཞན་དྲིང་མི་འཇོག་པའི་ཤེས་དཔྱོད་ཀྱི་བློའི་རང་རྩལ་དང༌། སྤྱི་བྱེའི་གནས་ཚུལ་ཐོག་ཕུགས་རྒྱང་རིང་པོར་མནོ་བསམ་ཐོངས་པའི་ནུས་པ་བཅས་ཀྱི་ཆ་ནས་ཡར་ཐོན་པར་བགྲང་འོས་པའི་སྐྱེས་བུ་ཞིག་ཡིན།༽༡ ཞེས་གསུངས་པ་ལྟར། ཕྱི་ནང་གི་གཞུང་ལུགས་མང་པོར་རྣམ་དཔྱོད་ཀྱི་འཇུག་པ་མཆོག་ཏུ་དགེ་བ་ཨ་མདོ་དགེ་འདུན་ཆོས་འཕེལ་དུ་༥༨
གྲགས་པ་དེ་ནི་དུས་རབས་ཉི་ཤུ་པ་འདིའི་ནང་ཡུལ་གངས་ཅན་པའི་མཁས་པ་རྣམས་ཀྱི་མཇུག་སྡུད་ལྟ་བུར་བྱོན་ཏེ་སྣང༌། སྤྱིར་ཨ་མདོའི་ཡུལ་དེ་ ༼རིག་པའི་འབྱུང་གནས།༽༢ཞེས་གངས་ཅན་པར་གྲགས་པ་ལྟར་མཁས་གྲུབ་ཀྱི་སྐྱེས་བུ་བགྲངས་ཀྱིས་མི་ལང་བ་ཞིག་བྱོན་ཅིང་ཁྱད་པར་དགེ་འདུན་ཆོས་འཕེལ་ལ་དམིགས་བསལ་གྱི་ཁོ་རང་གི་མཁྱེན་དཔྱོད་ཆེས་གུ་ཡངས་སུ་གཏོང་བར་སྨན་པའི་མཐུན་རྐྱེན་མང་ཙམ་ཞིག་རང་བྱུང་འབད་མེད་ལྟ་བུར་ཐོབ་འདུག ཁོང་གི་རྣམ་ཐར་ལ་བསམ་ཞིབ་བྱེད་སྐབས་བོད་ཀྱི་ཆོས་སྐད་དུ། བྱརྐྱེན་ངན་དགེ་གྲོགས་བྱ ཟེར་བ་དོན་ལ་གནས་པ་འདུག་སྙམ་པ་བྱུང༌། བོད་སྤྱི་དང༌། བྱེ་བྲག་མདོ་སྨད་ཁུལ་དུ་དགེ་ཆོས་དང་མཁྱེན་རབས་མཉམ་པའི་སྐྱེས་བུ་གྲངས་མེད་ཅིག་བྱུང་མོད། བོད་མི་རྣམས་རྒྱལ་སྤྱིའི་འབྲེལ་ལམ་ཆུང་ཞིང༌། རྒྱལ་ཁབ་གཞན་དག་གི་ནང་དུ་དུས་ཡུན་རིང་པོ་ནས་ཡར་རྒྱས་འགྲོ་བཞིན་པའི་ཤེས་ཡོན་དང༌། རིག་གཞུང་གང་ལའང་དོ་སྣང་རྩ་བ་ནས་མ་བྱས་པར་འཇིག་རྟེན་ཡོངས་རྫོགས་གངས་རིའི་མུ་ཁྱུད་ཆུང་ངུ་དེ་རང་གི་ནང་ཚུད་པ་ལྟ་བུའི་བསམ་ཚུལ་གྱིས་དུས་རབས་ཉི་ཤུ་པའི་དཀྱིལ་ཙམ་བར་ཁེར་བསྡད་ཟུར་འགྲོས་བྱེད་རྐྱང་གིས་རང་ཡུལ་དུ་དར་ཁྱབ་ཡོད་བཞིན་པའི་རིག་པའི་གནས་དང༌། ཤེས་ཡོན་གྱི་རྒྱུན་དེ་ཁོ་ནས་ཚིམ་སྟེ་གནས་པ་ལས་ཕྱིའི་རྒྱལ་ཁབ་སྤྱི་དང༌། ལྷག་པར་ནུབ་ཕྱོགས་ཀྱི་རྒྱལ་ཁབ་ཁག་ཏུ་འདས་པའི་ལོ་བརྒྱ་ཕྲག་ཁ་ཤས་ནང་བྱུང་བའི་རིག་གནས་ཀྱི་ཡར་རྒྱས་ལ་དོ་སྣང་མ་བྱས་ཤིང༌། ཁེ་ཕན་མ་བླངས་པའི་ཉེར་ལེན་ལས་གཞི་རྩ་རང་གི་རིག་གཞུང་ཆེས་རྒྱ་ཆེ་གཏིང་ཟབ་ཀྱི་གནས་ཚུལ་གཞན་འགྲན་བྲལ་ཞིང༌། གཞན་དྲིང་མི་འཇོག་པ་ཞིག་ཡོད་ནའང༌། ཐ་སྙད་ཀྱི་རིག་གསར་རེ་ཟུང་སྣང་མེད་དུ་བཞག་པས་ཕྱིའི་སྣང་ངོར་རྗེས་ལུས་ཐེབས་པའི་རྣམ་པ་དང༌། རང་གི་ཆེས་འགང་ཆེན་གྱི་རིག་གཞུང་གི་ཁྱད་ཆོས་དང༌། གནད་འགག་རྣམས་ཀྱང་གཞན་ལ་སྟོན་མ་ཐུབ་པར་གཞུང་ལུགས་རྒྱ་མཚོ་ལྟ་བུར་ནང་བྱན་ཆུད་པའི་མཁས་ཆེན་གནམ་གྱིས་ས་བཀབ་པ་ལྟ་བུ་རྣམས་ཀྱང་སྐབས་རེ་རིག་གསར་གྱི་ཐ་སྙད་ཆུང་ངུ་རེའི་ཐོག་རྨོངས་ཏེ་གནའ་བོའི་བོད་ཀྱི་གཏམ་དཔེར་༼གཙང་ཆུར་ཐར་ཡང་ཡུར་ཆུར་མ་ཐར་༽ཞེས་པའི་ཚུལ་དེ་བོད་ཀྱི་སྐྱེས་ཆེན་མང་པོ་ཞིག་ལ་བྱུང་འདུག
སྤྱིར་བཤད་གཡམ་ཙམ་དུ། ༼རིག་པའི་གནས་ལྔ་དག་ལ་མཁས་པར་མ་བྱས་ན།༽ ཞེས་སོགས་དང༌། ༼རྒྱལ་སྲས་རྣམས་ཀྱིས་མི་བསླབ་པའི།། དངོས་དེ་གང་ཡང་ཡོད་མ་ཡིན།།༽༣ ཞེས་སོགས་ལུང་འདྲེན་པོད་ཁ་ལོངས་ཙམ་རེ་བྱས་ཏེ་ཐུན་མོང་དང་ཐུན་མོང་མིན་པའི་རིག་པའི་གནས་ཐམས་ཅད་ལ་སྦྱོང་དགོས་པའི་སྒྲོས་ཤིག་ཡོད་ནའང༌། དངོས་དོན་ལག་ལེན་བསྟར་སྐབས་ཁྱིམ་མཚེས་རྒྱལ་ཁབ་རྣམས་ཀྱི་རིག་གཞུང་ལའང་དོ་སྣང་མ་བྱས་པར་བོད་རྐྱང་པ་དང༌། དེའི་ནང་ནས་ཀྱང་རང་གི་ཆོས་རྒྱུད། རང་གི་གདན་ས། རང་གི་གྲྭ་ཚང༌། རང་གི་ཡིག་ཆ། རང་གི་བླ་མའི་གསུང་རྒྱུན་ཙམ་ལ་གཙོར་འདོན་གྱིས་ཐོས་བསམ་གྱི་ཕྱོགས་སུ་འདུན་པ་འཁྱེར་སྟངས། དུང་ཆེན་གྱེན་བསླངས་ཀྱི་ནང་དུ་སྤྱི་བོ་ཚུགས་སུ་འཛུལ་བ་ལྟ་བུ་ཞིག་མང་ཆེ་བས་བྱས་འདུག་པ་དེས་རྒྱལ་ཁབ་ཀྱི་ཤེས་ཡོན་ལ་དུས་རབས་དང་འཚམས་པའི་ཡར་རྒྱས་དང༌། གསར་བརྗེ་མ་བྱུང་བར་མ་ཟད། ཆབ་སྲིད་དང༌། སྤྱི་ཚོགས་ལའང་ཕན་གནོད་ཇི་བྱུང་དེང་སྐབས་རང་ཅག་གིས་ཉམས་སུ་མྱོང་བཞིན་པ་དེར་ཟད།
དགེ་འདུན་ཆོས་འཕེལ་མཆོག་སྤྱིར་མཁྱེན་དཔྱོད་དང༌། རིག་རྩལ་ཕུན་སུམ་ཚོགས་པའི་ཐོག་རྒྱ་གར་དང༌། ཤྲིའལངྐཱ་སོགས་ཕྱིའི་རྒྱལ་ཁབ་ཁག་མང་དུ་ཕེབས་བཞུགས་ཀྱིས་ལེགས་སྦྱར་དང༌། པཱལི། དབྱིན་ཧིན་སོགས་སྐད་ཡིག་དུ་མ་ལ་ཐུགས་སྣང་གནང་ཞིང༌། ཕྱི་རོལ་པའི་གྲུབ་མཐའ་དང༌། བསྟན་བཅོས་མང་པོ་ལའང་གཟིགས་རྟོག་དང༌། ནུབ་ཕྱོགས་པའི་ཤེས་རིག་སྤྱི་དང༌། ལྷག་པར་སློབ་སྦྱོང་དང་ཉམས་ཞིབ་བྱེད་སྟངས་ཀྱི་ལམ་སྲོལ་རྣམས་ལ་ཐུགས་སྣང་ཆེན་པོ་མཛད་དེ། དུས་རབས་འདིར་གལ་ཆེར་བརྩི་བའི་ཤེས་བྱའི་དངོས་པོ་དག་ལ་རྣམ་དཔྱོད་ཀྱི་རྩལ་ཐོགས་མེད་དུ་འཇུག་པར་བརྟེན་བོད་ཀྱི་མཁས་པ་གཞན་དག་ལས་ཀྱང་ཁྱད་ཐོན་པའི་གནས་ཚུལ་ཞིག་བྱུང་བ་ཀུན་གྱི་མཐུན་སྣང་དུ་གྲུབ་པ་དེ་བཞིན་དང༌། སྤྱིར་གདན་ས་ཆེན་པོའི་ནང་དབུ་ཚད་སེང་གེའི་མཇིང་བསྣོལ་གྱིས་རིགས་ལམ་ལ་སྦྱངས་པའི་གང་ཟག་ཅིག་ཕྱིའི་རིག་གནས་གཞན་དག་གི་སློབ་སྦྱོང་བྱ་རྒྱུར་དཀའ་ཚེགས་མེད་པ་སྨོས་མི་དགོས་ཀྱང༌། དོ་སྣང་དང་དགའ་ཚོར་གྱིས་དོན་གཉེར་བྱེད་རྒྱུ་དེ་གང་ཟག་ཁྱད་པར་བ་རེ་ཟུང་མ་གཏོགས་ཐམས་ཅད་ལ་མི་འབྱུང་བ་འདི་མིའི་ཁམས་གཤིས་ཀྱི་ཁྱད་པར་ཞིག་ཡིན་པ་གོར་མ་ཆག
སྤྱིར་འཇིག་རྟེན་གྱི་སྐྱེ་རྒུ་རྣམས་ཆགས་སྡང་རྨོངས་གསུམ་གྱི་གཞན་དབང་དུ་སོང་བ་ཤ་སྟག་ལ་བརྟེན་སྤྱི་ཚོགས་ཀྱི་ནང་མི་ཐམས་ཅད་མགུ་བ་ཞིག་ནི་མཆོག་གི་སྤྲུལ་སྐུའི་མཛད་པ་ཅན་གྱི་སངས་རྒྱས་ཀྱིས་ཀྱང་མཛད་མ་ནུས་པར་འདུག་སྟེ། བདག་ཅག་གི་སྟོན་པ་ཐུགས་རྗེ་ཅན་དེ་ལ་ཡང་སྐུ་ལ་བསྡོ་བའི་སྦྱོར་ངན་ཇི་སྙེད་ཅིག་བྱུང་བ་ལུང་དུ་གསལ་ཞིང༌། ལྷག་པར་རྒྱ་གར་དང༌། བོད་ལྗོངས་གཉིས་ཀར་སྐྱེས་བུ་མཁས་པ་དང༌། སྙན་གྲགས་ཅན། ལྷག་བསམ་དང་ལྡན་པ་རྣམས་ལ་སྐུ་འཚོ་བཞུགས་ཀྱི་སྐབས་འགྲན་སེམས་དང༌། ཕྲག་དོག་འབའ་ཞིག་གིས་མཐོ་འཚམས་ཤིང༌། ནམ་ཞིག་ཞལ་མ་བཞུགས་པ་ན་ད་གཟོད་བསྔགས་པ་བརྗོད་པ་དང༌། རྣམ་ཐར་འབྲི་བ། འདྲ་སྐུ་བཞེངས་པ་ཡན་ཆད་བྱེད་སྲོལ་ཞིག་ཆེས་སྔ་མོ་ནས་འདུག་པ་ཚད་ལྡན་གྱི་ལོ་རྒྱུས་དུ་མར་གསལ། དེས་ན་དགེ་འདུན་ཆོས་འཕེལ་ཡང་འཚོ་བཞུགས་རིང་མ་ཉེས་ཁ་གཡོག་སོགས་རྐྱེན་ངན་དུ་མས་སྐུ་ངལ་དང༌། ཐུགས་བསུན་ཚད་མེད་ཅིག་བྱུང་འདུག་པ་དང༌། དེར་བརྟེན་ཐུགས་ཡིད་གཏིང་ནས་སྐྱོ་བའི་བསྟིང་ཚིག་དང༌། འཁང་ར་མང་པོ་ཞིག་ཁོང་གི་གསུང་རྩོམ་ཕལ་ཆེ་བའི་ནང་སྙིང་རྩ་འདར་ནུས་ཀྱི་ཉམས་འགྱུར་དང་བཅས་ཡང་ཡང་ཡོང་གི་འདུག་པ་ཐུགས་ཁག་མ་མཆིས་མོད། འོན་ཀྱང་ངོས་ཀྱི་མཐོང་སྣང་དུ་འཕགས་བོད་ཀྱི་མཁས་གྲུབ་ཕལ་ཆེར་དེ་འདྲའི་ཐུགས་ཕམ་མ་བྱུང་བ་མེད་པ་ལྟ་བུ་ཞིག་འདུག་སྟེ། འཁོར་བའི་ཆོས་ཉིད་དུ་ཟད་དམ་སྙམ། མཁས་པ་རྣམས་ལ་རྒྱུན་དུ་གཞན་གྱིས་ཕྲག་དོག་གིས་མཐོ་འཚམས་པ་དང༌། འོས་པའི་བཀུར་སྟི་མ་ཐོབ་པའི་གནས་ཚུལ་འདི་གནའ་རབས་ནས་ཡོད་པར་སྣང་སྟེ། ༼ཕྱོགས་ལས་རྣམ་པར་རྒྱལ་བ་ང་མིན་སུ།།༽༤ ཞེས་ཁེངས་པ་མཛད་པའི་འཕགས་ཡུལ་གྱི་མཁས་དབང་ཆོས་ཀྱི་གྲགས་པ་ལྟ་བུས་ཀྱང༌། ༼སྐྱེ་བོ་ཕལ་ཆེར་ཕལ་ལ་ཆགས་ཤིང་ཤེས་རབ་རྩལ་མེད་པས་ན་ལེགས་བཤད་རྣམས།། དོན་དུ་མི་གཉེར་ཁོ་ནར་མ་ཟད་ཕྲག་དོག་དྲི་མ་དག་གིས་སྡང་བར་ཡང༌།།༽༥ ཞེས་སྡུག་སྐད་ཆེན་པོ་སྐྱོན་དགོས་བྱུང་འདུག མཁས་པ་རྣམས་ལ་རྒྱུན་དུ་གཞན་གྱིས་བརྙས་བཅོས་དང༌། མཐུན་རྐྱེན་ཡང་དཀོན་སེ་ཞིག་ཕལ་ཆེར་ལ་བྱུང་སྣང་སྟེ། ནོར་རྒྱུན་མ་དང༌། དབྱངས་ཅན་མ་གཉིས་ཀས་སྒྲུབ་པ་པོ་གཅིག་ལ་དངོས་གྲུབ་མི་སྟེར་བའི་ཐུགས་བསྐྱེད་ཀྱི་སེལ་ཡོད་ཚུལ་ཕྱི་ནང་གཉིས་ཀར་གྲགས་པ་དེ་དོན་ལ་གནས་སམ་སྙམ། དགེ་ཆོས་ཀྱང་རྒྱུན་དུ་ཕྱག་སྣེ་སོགས་མཐུན་རྐྱེན་དཀའ་ཙམ་ཞིག་དང༌། འོས་པའི་གུས་བཀུར་མ་ཐོབ་པར་བརྙས་པའི་གནས་ཚུལ་ཡང་ཡང་བྱུང་ཡོད་པ་ཁོང་རང་གི་གསུང་རྩོམ་ཁག་ནས་གསལ་བར་མངོན་པ་མ་ཟད། ཁོ་བོས་རང་ཉམས་ཀྱི་ཐོག་ནས་ཀྱང་རྗེས་སུ་དཔག་ནུས། རྒྱལ་སྲས་ཆེན་པོ་ཞི་བ་ལྷས་ཀྱང༌། ༼མཁས་པ་རྣམས་ནི་བཀུར་བ་དང༌།། བསོད་སྙོམས་དག་ཀྱང་རྙེད་པར་ཤོག།༽༦ ཅེས་འུ་ཐུག་གི་ཚུལ་དུ་ཐུགས་སྨོན་གནང་དགོས་བྱུང་བ་ཐུགས་ཁག་མེད་པར་སེམས། ལར་ནས་སྙན་ངག་མཁན་རྣམས་ལ་ཇི་ཙམ་གྱི་བཀུར་བཟོས་དང༌། ཆེ་བ་ཐོབ་རུང་ཡིད་མ་རང་བའི་འཁང་ར་ཞིག་ཕལ་ཆེར་ལ་བྱུང་སྣང་སྟེ། འདི་ནི་གཅིག་ཏུ་ན་ཅུང་ཟད་འདོད་རྔམ་ཆེ་བའང་མིན་ནམ་སྙམ། འཕགས་ཡུལ་གྱི་སྙན་ངག་མཁན་ཆེན་པོ་ཏུལསཱི་ཁོལ་གྱིས་ཀྱང་དགའ་བྱེད་རྟོགས་བརྗོད་ཀྱི་འགོར། ༼རང་གི་ཡིད་བདེ་ཙམ་གྱི་དོན་དུ།༽ཞེས་གཞན་སུས་ཀྱང་ཁོང་གི་སྙན་ངག་ལ་བརྟེན་ནས་སིམ་པའི་ཉམས་འགྱུར་བསྐྱེད་མི་ཐུབ་པ་ལྟ་བུར་བཤད་པ་དང༌། རྒྱ་གར་གྱི་གོང་མ་གྲགས་ཅན་ཨཀ་བར་གྱི་དུས་སུ་བྱུང་བའི་ཕོ་བྲང་གི་སྙན་ངག་མཁན་གཱལིབ་ཞེས་པས་ཀྱང་འཁང་ར་དང་བཅས་ཏེ། ༼ཁུ་དཱ་ལ། ཡང་ན་ཁོ་རང་ལས་སྙན་ངག་རྩོམ་པའི་རིག་རྩལ་དེ་ཕྱིར་བཞེས་གནང་རྒྱུ་དང༌། ཡང་ན་མི་གཞན་འགའ་ལའང་དེ་ཉན་ཤེས་པའི་ཤེས་རབ་གནང་སྐྱོང༌། དེ་ལྟར་མ་གནང་ན་ཁུ་དཱ་ནི་ཆེས་མ་དྲང་བ་ཞིག་གོ།༽ཞེས་བསྟིང་ཚིག་བརྗོད་འདུག་པ་དང༌། དུས་ཕྱིས་ཀྱི་འཕགས་ཡུལ་གྱི་སྙན་ངག་མཁན་ཆེན་པོ་ཉི་དབང་མགོན་པོས་ཀྱང་༼ཁོ་བོ་ནག་མོ་ཁོལ་གྱི་དུས་སུ་མ་སྐྱེས་པར་ད་ལྟ་དུས་རབས་འདི་འདྲ་སུས་ཀྱང་བརྩི་མཐོང་བྱེད་མཁན་མེད་དུས་སུ་སྐྱེས་པ་ཨང༌།༽ ཞེས་སྡུག་སྐད་ལྷང་ལྷང་སྐྱོན་འདུག་པ་ནོ་སྦེལ་ཞེས་བྱ་བའི་བྱ་དགའ་དེས་ཀྱང་སྙན་ངག་མཁན་དེ་མ་ཚིམས་པར་སྣང་སྟེ། དོན་དུ་ནི་རྗེ་ས་པཎ་གྱིས། ༼མཁས་པ་མཁས་པའི་ནང་ན་མཛེས།། བླུན་པོས་མཁས་པ་ཇི་ལྟར་གོ།༽༧ །ཞེས་པ་ལྟར་མཁས་པ་ཚིམ་པའི་བཀུར་སྟི་མཁས་པ་ཉིད་ཀྱིས་མ་གཏོགས་གཞན་གྱིས་བྱ་མི་ནུས་ལ། མཁས་པ་ནང་ཕན་ཚུན་ནི་ཕྲག་དོག་གིས་མ་གོས་པ་ཞིག་ཡོང་བར་དཀའ་བས་དུས་རབས་ཀུན་གྱི་མཁས་པ་རྣམས་ཡིད་མ་རངས་པའི་རྒྱུ་མཚན་གཙོ་བོར་འདིར་ཐུག་པར་སྙམ།
ཚུལ་འདི་དག་སྐབས་དང་མ་འབྲེལ་བ་ལྟ་བུར་མངོན་སྲིད་ཀྱང༌། མཁས་པ་ཕལ་ཆེར་ཡིད་མ་རངས་པའི་སྐྱོ་ཉམས་ཡོང་དགོས་ཀྱི་སེམས་ཚོར་གྱི་གནས་ལ་ཅུང་ཟད་རྟོགས་པའི་རྣམ་རྟོག་ཞོར་འཕྲོས་སུ་ཐལ་བ་སྟེ། གཅིག་ཏུ་ན་༼གློ་བ་འདྲིད་པར་བྱ་བའི་ཕྱིར་གཱལིབ་ཀྱི་རྣམ་རྟོག་འདི་བཟང་ངོ༌།།༽ཞེས་པའི་ངང་ཚུལ་དུ་ཟད།
དགེ་འདུན་ཆོས་འཕེལ་གྱི་ཡོན་ཏན་ཐམས་ཅད་ཀྱི་ནང་ནས་རྩོམ་པའི་ཡོན་ཏན་ཉིད་མཆོག་ཏུ་སྣང་ཞིང༌། དེའི་ནང་ནས་ཀྱང་ཚིགས་བཅད་ཀྱི་རྩོམ་འགྲོས་ཧ་ཅང་ལེགས་པ་ཞིག་འདུག་སྟེ། བོད་ལ་རྩོམ་རིག་གི་ཐོག་བར་སྐབས་དེར་ཡིད་ཚོར་ལྡན་པ་དཀོན་ཞིང༌། ལྷག་པར་རང་རེའི་རིག་གཞུང་གི་ནང་རྩོམ་འགྲོས་ཀྱི་རིན་ཐང་གཞལ་བའི་མཐའ་དཔྱོད་དང༌། བསྐྱར་ཞིབ་བྱེད་སྲོལ་མ་དར་བས་ཅུང་ཟད་རྗེས་ལུས་ཐེབས་པ་མ་གཏོགས་སྐད་རིགས་གཞན་དག་དང་མཚུངས་པར་མཐའ་དཔྱོད་བྱ་སྲོལ་ཞིག་ཡོད་ན་དགེ་འདུན་ཆོས་འཕེལ་ནི་འཛམ་གླིང་གི་འབྲི་རྩོམ་མཁན་ཚོའི་ནང༌། ཉི་དབང་མགོན་པོ་དང༌། ཤེཀསི་པི་ཡར་སོགས་ཀྱི་མདུན་གྲལ་དུ་བཞུགས་རྒྱུ་མ་གཏོགས་རྒྱབ་གྲལ་དུ་ནམ་ཡང་མི་ལུས་པ་ཞིག་ཡིན་པར་ཁོ་བོས་བསམ་གྱིན་ཡོད།
ངོས་རང་དགེ་འདུན་ཆོས་འཕེལ་དངོས་སུ་མཇལ་མ་མྱོང་ཞིང༌། ཁོང་གིས་གསུངས་ཚད་ཚད་མར་བཟུང་བའི་རྗེས་འཇུག་དད་པའི་རྗེས་འབྲང་ཞིག་གཏན་ནས་མིན་རུང༌། ཧ་ཅང་དགའ་ཞེན་ཡོད་པའི་མ་མཐོང་བའི་གྲོགས་པོ་ཞིག་ཡིན། ༼སྔོན་གྱི་རྒྱལ་པོ་གྲགས་པའི་གཟུགས།། ངག་གི་རང་བཞིན་མེ་ལོང་ཐོབ།། དེ་དག་ཉེ་བར་མི་གནས་ཀྱང༌།། དེ་ཉིད་ཉམས་པ་མེད་ལ་ལྟོས།།༽༨ ཞེས་པ་ལྟར་ཁོང་གི་མཁྱེན་ཡོན་དང༌། གྲགས་པའི་གཟུགས་བཟང་ངག་གི་རང་བཞིན་གྱི་མེ་ལོང་དུ་འཕོས་པ་ད་ལྟའང་མངོན་སུམ་བཞིན་ཉམས་སུ་མྱོང་ནུས་པར་བརྟེན་ཡུན་རིང་འདྲིས་པའི་གྲོགས་ལྟ་བུ་ཞིག་གི་སེམས་ཚོར་ཡོང་གི་ཡོད། ངོས་རང་ལོ་བཅུ་གཅིག་ལོན་པ་ན་ང་ཚོའི་ཕ་ཡུལ་གྱི་རྙིང་མའི་རབ་བྱུང་ཀུན་དགའ་བློ་གྲོས་སུ་འབོད་པ་བདག་གི་ཡོངས་འཛིན་རིན་པོ་ཆེ་ཞལ་སྔ་ནས་ངག་དབང་སྦྱིན་པ་མཆོག་དང་ཐུགས་འདྲིས་ཆེ་བ་ཞིག་ཡོད་པ་དེ། རྒྱ་གར་ལ་གནས་སྐོར་དུ་སོང་སྟེ་ཕྱིར་འཁོར་སྐབས་རྒན་ཡོངས་འཛིན་རིན་པོ་ཆེ་མཇལ་དུ་ཡོང་བར་མཚན་མོ་ཕྱིས་པོའི་བར་རྒྱ་གར་གྱི་གནས་ཚུལ་མང་པོ་གསུང་མོལ་གནང་སྟེ་བཞུགས་སོང་བར་ཉན་གྱིན་བསྡད་པས། བྱང་ཆུབ་ཆེན་པོ་དང༌། ཝཱརཱཎསཱི་སོགས་ཀྱི་གནས་ཚུལ་དང༌། ཆུ་བོ་གངྒཱ་ཞེས་པ་གང་འདྲ་ཞིག་འདུག་དྲིས་པར་ཟམ་པའི་སྒང་ནས་མར་བལྟས་ན་ཆུ་བོའི་བབས་ཕྱོགས་གང་དུ་ཡིན་མིན་མི་ཤེས་པ་ཞིག་འདུག་སོགས་བྱིས་པ་ངོ་མཚར་སྐྱེས་པའི་གཏམ་དུ་མ་ཐོས་ཤིང༌། ཆུ་བོ་གངྒཱའི་བྱེ་མ་དང༌། གནས་ཆེན་ཁག་གི་ས་སྣ། བྱང་ཆུབ་ཆེན་མོའི་ལོ་མ། དགེ་འདུན་ཆོས་འཕེལ་གྱིས་བརྩམས་པའི་རྒྱ་གར་གནས་ཆེན་ཁག་གི་ལམ་ཡིག་བཅས་སྐྱེས་སུ་ཕུལ་སོང་བར། ལམ་ཡིག་གི་དེབ་དེ་བཞིན་ཁོ་བོས་རྒྱུན་དུ་ཀློག་རྒྱུའི་བོད་ཀྱི་དཔེ་ཆ་དཔར་མ་གཞན་དང་མི་འདྲ་བར་ལྕགས་འབྲུར་བསྒྲིགས་པའི་དཔར་ཡིག་འབྲུ་ཆུང་ཞིང་ཁམས་གཙང་མོ་འདུག་པ་དགའ་སྣང་གིས་བལྟས་པས། དེའི་ནང་ཤོག་ལྷེ་ལྟེབས་རྩིག་བརྒྱབས་པ་ཞིག་གི་ནང་རྒྱ་གར་གྱི་ས་བཀྲ་ཆུང་ངུ་དང༌། བྱང་ཆུབ་ཆེན་པོའི་དཔེ་རིས་བཅས་འདུག་པའི་འོག་ཟུར་ན། ༼ཉག་གཅིག་ཞི་བའི་དབྱིངས་སུ་འཇུག་པའི་སྒོ།། བདེན་གཉིས་ཆོས་ཚུལ་ཟབ་མོ་དྲི་མེད་ལམ།། རིགས་གསུམ་གདུལ་བྱའི་ཚོགས་ལ་འདོམས་མཛད་པའི།། སྐུ་བཞིའི་བདག་ཉིད་ཐུབ་དབང་དེ་ལ་འདུད།། རྒྱ་ཁྱོན་མཚོ་དང་འདྲ་བའི་གྲོང་ཁྱེར་དང༌།། རྒྱ་དཔངས་རི་དང་མཉམ་པའི་མཆོད་རྟེན་སོགས།། རྒྱ་ཆེན་ངོ་མཚར་འདི་དག་གཟིགས་པའི་སླད།། རྒྱ་གར་ཡུལ་དུ་ལན་གཅིག་བྱོན་པར་ཞུ།།༽ཞེས་པའི་ཤ྄ལོཀ་གཉིས་འདུག་པ་ཧ་ཅང་ཡིད་ལ་འཐད་པས་ལན་འགའ་བཀླགས་པ་དང༌། འཕྲལ་དུ་བློ་ལ་བྱང་བ་ཞིག་བྱུང༌། སྙན་ངག་གི་ཁྱད་ཆོས་ནི། རྒྱ་གར་ལྷོ་པ་རྣམས་ཀྱི་བཞེད་པ་ལྟར། ཚིག་གཞོན་ཞིང༌། བརྗོད་བདེ་འདྲེན་པ་ཞིག་དགོས། ཇི་ཙམ་བརྗོད་བདེ་འདྲེན་པ་ཡིན་མིན་གྱི་རྣམ་དབྱེ་ཀློག་པ་ན་ངག་ལ་འབྱར་དཀའ་སླའི་ཐོག་ནས་བརྟགས་ནུས་ཤིང༌། བཀླགས་པ་ཙམ་གྱིས་ངག་ལ་བྱང་བ་དང༌། བྱང་ཟིན་པ་ནམ་ཡང་མི་བརྗེད་པ་ཞིག་བྱུང་ན། སྙན་ངག་དེ་ཆེས་ཕུན་སུམ་ཚོགས་པའི་མཚོན་བྱེད་ཡང་དག་པ་ཞིག་ཡིན། གོང་འཁོད་ཤ྄ལོཀ་གཉིས་པོ་དེ་ངོས་རང་ལོ་བཅུ་གཅིག་པའི་སྐབས་སུ་ཀློག་པ་ད་ལྟའི་བར་མི་ལོ་སུམ་ཅུ་སོ་དྲུག་སོང་ཡང་བློ་ལ་ལྷང་ངེར་གསལ་བ་འདི་དགེ་ཆོས་ཀྱི་རྩོམ་འགྲོས་ཀྱི་གཟི་བརྗིད་ཅིག་རེད། མདོ་སྨད་པ་དགེ་འདུན་ཆོས་འཕེལ་གྱི་མཚན་ཡང་དེབ་དེའི་ཐོག་ནས་ཐོག་མར་ཤེས་ཤིང༌། ཁོ་བོའི་ཡོངས་འཛིན་དམ་པ་དེས་ཀྱང་གནས་ཡིག་འདི་ཧ་ཅང་ཡག་པོ་འདུག་ཅེས་མཉེས་མཉེས་མཛད་པ་ད་ལྟའང་དྲན།
དགེ་འདུན་ཆོས་འཕེལ་གྱི་མཁྱེན་རྒྱ་དང༌། ལྷག་པར་ཡར་ཐོན་ཅན་གྱི་དགོངས་པ་བཞེས་ཕྱོགས་སྐབས་དེའི་བོད་ཀྱི་སྤྱི་ཚོགས་དང་མ་འཚམས་པས་མཁྱེན་ཡོན་དང་མཉམ་པའི་མཛད་འཕྲིན་མ་བྱུང་ཡང༌། ཞར་དང་ཞོར་ལ་རྩོམ་སྒྲིག་མཛད་པའི་གཞུང་དེ་དག་ད་ཆ་མཁས་པ་མགུ་བའི་ལེགས་བཤད་རྨད་དུ་བྱུང་བ་ཡིན་པར་ར་འཕྲོད་བྱུང་བ་དང་ཆབས་ཅིག་ཚང་མས་དོ་སྣང་དང་འཚོལ་ཞིབ་ཀྱིས་དེང་སྐབས་ཁོང་གི་ལོ་རྒྱུས་འབྲི་མཁན་དང༌། གསུང་ཐར་ཐོར་རེ་རྙེད་སོན་བྱུང་ནའང་འཕྲལ་འཕྲལ་དཔར་འདེབས་བྱེད་མཁན་སོགས་ལག་མ་ཐོགས་པར་ཡོང་གི་ཡོད་པ་འདི་ཡང་མཁས་པའི་ཡོན་ཏན་བླུན་པོས་ནག་བསུབ་གཏོང་མི་ཐུབ་པའི་བདེན་རྟགས་ཤིག་ཡིན་པར་སྨོས་མ་དགོས།
སྔ་ལོ་ཕྱི་ཟླ་གཉིས་པའི་ནང་དགེ་འདུན་ཆོས་འཕེལ་གྱི་སྐུ་ཚེའི་མཇུག་གི་སློབ་མའི་གྲས་སྣར་སྐྱིད་ངག་དབང་དོན་གྲུབ་མཆོག་འདི་གར་ཕེབས་བཞུགས་སྐབས་གླེང་མོལ་གྱི་ཞོར་དུ་ཁོང་སར་བོད་ནས་དགེ་འདུན་ཆོས་འཕེལ་གྱི་གསུང་རྩོམ་གསར་རྙེད་ཅིག་འབྱོར་རེ་ཡོད་པས་འབྱོར་ཚེ་འདི་གའི་སློབ་གྲྭ་ནས་དཔར་འགྲེམས་གནང་ན་འབྲེལ་ཡོད་ཤིན་ཏུ་འོས་ཤིང་འཚམས་པ་ཞིག་ཡོང་རྒྱུའི་རེ་བསྐུལ་གནང་བྱུང་བར། སྐབས་དེར་ཁོ་བོའི་བསམ་པར་བདག་གི་ཡབ་རྗེ་རྡོ་རྗེ་འཆང་ཆེན་པོའི་ཞལ་སྔ་ནས། བྱབྱདགེ་ཆོས་ཀྱི་བསྙེལ་ཐོ་ལྟ་བུར་བྲིས་པའི་གནས་ཚུལ་ལོ་རྒྱུས་མང་པོ་དང༌། བར་བར་དུ་དཀའ་གནད་ཀྱི་དྭོགས་གཅོད་དང༌། འདྲ་རིས་ཡིད་དུ་འོང་བ་དུ་མ་ཡོད་པའི་ཉིན་དེབ་འདྲ་བའི་དཔེ་དེབ་རིང་མ་ཐུང་མཐུག་པོ་ཞིག་འདུག་པ། ངའི་སར་བསྟན་རྒྱུ་འཁྱེར་ཡོང་སྟེ་རྒྱུན་རིང་ཙམ་བཞག་སོང་ཡང་ཉིན་གཅིག་ནོར་གླིང་ཤག་ཏུ་གློ་བུར་ཕེབས་ཏེ་དེབ་དེ་དགོས་ཞེས་ཕར་བསྣམས་སོང་བར་དེ་ནས་ཉི་མ་གཉིས་རྗེས་ཁོང་འཛིན་བཟུང་བྱས་འདུག སྐབས་དེར་ངས་ཕྱག་དཔེ་དེ་ཕར་མ་ཕུལ་ནའང་ཡོང་བ་ཡོད།བྱབྱ ཅེས་བཀའ་བསྩལ་བ་ལྷམ་མེར་དྲན་ཏེ་ཕལ་ཆེར་དཔེ་དེབ་དེ་རང་ཨེ་ཡིན་སྙམ་པའི་རེ་བ་ཆེན་པོ་ཞིག་བྱུང་རུང༌། རྗེས་མར་ལག་སོན་སྐབས་ཕྱག་དཔེ་དེ་རང་གི་ཆ་ཤས་ཕལ་ཆེར་ཡིན་བཟོ་འདུག་རུང༌། གསུང་རྩོམ་དེ་སྡེ་ཚན་དྲུག་དང༌། ཤོག་ལྡེབས་བཞི་བརྒྱ་ལྷག་ཙམ་ཞིག་ཡོད་འདུག་སྟེ། ད་ལྟ་རྙེད་སོན་བྱུང་བ་འདི་སྡེ་ཚན་དང་པོ་རྐྱང་པ་ལས་མི་འདུག གང་ལྟར་ད་ལམ་དཔར་སྐྲུན་ཞུ་རྒྱུའི་དགེ་ཆོས་ཀྱི་གསུང་འདི་བཞིན་ བྱརྒྱལ་ཁམས་རིགས་པས་བསྐོར་བའི་གཏམ་རྒྱུད་གསེར་གྱི་ཐང་མ་བྱ ཞེས་བྱ་བ་ཁོ་རང་རྒྱ་གར་དུ་ཕེབས་རྒྱུའི་གོ་སྒྲིག་གིས་འཕགས་ཡུལ་གྱི་པཎྜིཏརཱཧུལསཾའཀྲིཏ྄ཡཱཡན་དང་ལྷན་དུ་རྭ་སྒྲེང་དང༌། གཙང་ཁུལ་རྒྱ་དཔེ་འཚོལ་སྒྲུབ་ཏུ་ཕེབས་པ་ནས་བཟུང་གནས་ཚུལ་གང་གཟིགས་ཀྱི་དོན་གནད་འགང་ཅན་རྣམས་བཀོད་པའི་ལོ་རྒྱུས་དེའི་ཆ་ཤས་སྡེ་ཚན་དང་པོ་དེ་རེད། སྡེ་ཚན་ལྷག་མ་ལྔ་ཡི་ནང་བརྗོད་བྱ་གང་ཡོད་ཀྱང་འདི་གའི་མཇུག་ཏུ་གསལ་འདུག་པ་ཤོག་གྲངས་ ༣༦།༣༧ ལ་ཡོད། སྡེ་ཚན་འདི་གཅིག་པུའི་ཕྱག་དཔེ་ལག་སོན་བྱུང་སྐབས་དགའ་སྐྱོ་འདྲེས་མའི་ཚོར་བ་ཞིག་བྱུང་སྟེ། གསུང་རྩོམ་འདི་རྙེད་པས་དགའ་སྣང་དང་ཆབས་ཅིག་དེའི་སྡེ་ཚན་འཕྲོས་རྣམས་མ་རྙེད་པས་ཡིད་ཕམ་ཧ་ཅང་ཆེན་པོ་ཞིག་བྱུང༌།
གོང་དུ་སྨོས་པ་ལྟར་དེང་སྐབས་དགེ་ཆོས་ཀྱི་གསུང་རྩོམ་ཐོག་དོ་སྣང་བྱེད་མཁན་ཆེས་མང་བས་གཞུང་འདི་དཔར་འགྲེམས་བྱེད་པོར་འཚང་ཁ་ཡོད་པ་སྨོས་མ་དགོས་ཀྱང༌། འདིའི་ནང་གཙོ་ཆེ་བོད་དུ་བཞུགས་པའི་ལེགས་སྦྱར་གྱི་རྒྱ་དཔེ་རིན་ཐང་བྲལ་བ་དེ་རྣམས་ཀྱི་དཀར་ཆག་བཀོད་འདུག་པར་བརྟེན་འདི་གའི་གཙུག་ལག་སློབ་ཁང་ནས་དཔར་འགྲེམས་བྱེད་རྒྱུ་འོས་འཚམས་ཡིན་ཚུལ་སྐུ་ངོ་ངག་དོན་གྱིས་གསུངས་པ་དེ་བཞིན་ཐུགས་ཤིན་ཏུ་མད་པ་དང༌། སློབ་གྲྭར་འདིའི་དཔར་སྐྲུན་གྱི་གོ་སྐབས་ཐོབ་པར་དགའ་སྤོབས་ཆེན་པོ་བྱུང༌།
གཏམ་རྒྱུད་འདིའི་ནང་རང་རེར་མཁོ་བའི་ལོ་རྒྱུས་དང༌། གནས་ཚུལ་ཧ་ཅང་གལ་ཆེ་མང་པོ་འདུག་པ་མ་ཟད། དགེ་ཆོས་རང་ཉིད་ཀྱི་མཛད་རྣམ་སྐོར་གསལ་ཆ་ཐོན་པའི་གནས་ཚུལ་འགའ་ཞིག་ཀྱང་འདུག་པ་དཔེར་ན། ༼དེ་ལ་རང་ལོ་སོ་གཉིས་སུ་སོན་པ་བོད་ཀྱི་རབ་བྱུང་བཅུ་དྲུག་པའི་ཤིང་ཁྱིའི་ལོ་ལ་ཁོ་བོ་རྒྱ་གར་དུ་བརྟོལ་ཅིང༌། ལོ་དེ་ལ་སིངྒལ་པའི་གནས་བརྟན་སྡེ་པ་དག་གིས་བཞེད་པའི་སངས་རྒྱས་མྱ་ངན་ལས་འདས་ནས་ཉིས་སྟོང་བཞི་བརྒྱ་དོན་དྲུག་པ་ཡིན་འདུག་ལ།༽ཞེས་དང༌། ཡང༌། ༼རང་ལོ་སོ་གཉིས་སུ་སོན་པའི་དགུན་ཟླ་ར་བའི་ཚེས་བཅོ་བརྒྱད་ལ་གངྒཱའི་ཆུ་འཐུང་ཞིང༌།༽ཞེས་པ་འདིས་དགེ་ཆོས་རྒྱ་གར་དུ་ཕེབས་ལོ་རབ་བྱུང་བཅུ་དྲུག་པའི་ཤིང་ཁྱི་ཕྱི་ལོ་ ༡༩༣༤ ཡིན་པ་དང༌། སྐབས་དེར་ཁོ་རང་དགུང་ལོ་སོ་གཉིས་སོན་པས་འཁྲུངས་ལོ་རབ་བྱུང་བཅོ་ལྔ་པའི་ཆུ་སྟག་ཕྱི་ལོ་ ༡༩༠༢ ཡིན་པ་བཅས་གསལ་བར་གྲུབ་པས། དགེ་ཆོས་ཀྱི་འཁྲུངས་ལོ་ཕྱི་ལོ་ ༡༨༩༤།༩༥ ཙམ་ལ་ཞེས་པ་དང༌། ཕྱི་ལོ་ ༡༩༠༥ ལ་ཞེས་པ་གཉིས་ཀ་ཇི་བཞིན་མ་ཡིན་པར་རྟོགས་ནུས། དགེ་ཆོས་ནི་ལོ་རྒྱུས་ལ་ཐུགས་སྣང་ཆེ་བས་ལོ་རྩིས་སྐོར་གཏན་ཏིག་ཞིབ་ཆ་ཆེ་རུང༌། ཁོ་རང་གི་གསུང་རྩོམ་རྣམས་སུ་རབ་ལོ་དང༌། སྟོན་པའི་འདས་ལོ་མ་གཏོགས་ཕྱི་ལོའི་མིང་ཙམ་ཡང་མ་སྨོས་པ་ཡང་གཟི་བརྗིད་ཅན་དུ་མཐོང༌། གོང་དུ་དྲངས་པའི་ཚིག་དེ་ལས་དགེ་ཆོས་ཐོག་མར་རྒྱ་གར་དུ་དགུན་ཟླ་ར་བའི་ཚེས་བཅོ་བརྒྱད་ལ་འབྱོར་འདུག་པ་ ༡༩༣༤ ཕྱི་ཟླ་ ༡༢ པའི་ཟླ་སྨད་ཙམ་ཡིན་སྲིད། འདི་ནི་རཱཧུལའི་རྩོམ་ཡིག་ཏུ་ཕྱི་ལོ་ ༡༩༣༤ ལོ་ཕྱི་ཟླ་ ༤ ཚེས་ ༤ ནས་ཕྱི་ཟླ་ ༡༡ ཚེས་ ༡༠ བར་བོད་ཀྱི་ས་ཐོག་ཏུ་བསྡད་པར་གསལ་བ་དང་ཧ་ཅང་འགྲིགས། ༩ བལ་པོའི་རྒྱལ་སར་བདུན་ཕྲག་ཁ་ཤས་བཞུགས་རྗེས་འཕགས་ཡུལ་གྱི་སྐྱ་ནར་བུའི་གྲོང་དུ་འབྱོར་ཏེ་སྣང༌། གཞན་ཡང་༼དབུས་སུ་སླེབས་ནས་འབྲས་སྤུངས་སུ་ལོ་བདུན་ཙམ་སོང་བ་ན་རྒྱ་གར་ནས་པཎྜིཏརཱཧུལ་བྱ་བ་ཞིག་བོད་དུ་བྱོན་པ་དང་འཕྲད་ནས་༽སོགས་གསུངས་པ་འདིས་དགེ་ཆོས་དབུས་སུ་བྱོན་དུས་དགུང་ལོ་ཉེར་ལྔ་ཡིན་པར་གྲུབ་པས་རང་ལོ་ཉེར་གསུམ་པའི་ཐོག་འབྲས་སྤུངས་སྒོ་མང་དུ་ཆོས་ཞུགས་བྱེད་པར་འདོད་པ་སོགས་ཀྱང་མི་འགྲིག་པ་གོ་ཐུབ། ལར་ནས་རེབ་སྐོང་དགོན་ཆེན་དུ་ལོ་ཤས་སློབ་གཉེར་གནང་བ་དང༌། དགུང་གྲངས་བཅོ་བརྒྱད་དུ་ཕེབས་རྗེས་མཁན་ཆེན་དགེ་འདུན་རྒྱ་མཚོའི་ཞབས་ཕྱིར་འཁྲིད་ཅིང༌། རིམ་གྱིས་རབ་ཏུ་བྱུང་བ་སོགས་སྨྲ་བ་ཡང་དོན་ལ་མི་འགྲིག་མོད། གདན་སའི་ལམ་སྲོལ་མ་མཁྱེན་པས་ཁག་མེད། དགེ་ཆོས་ཀྱི་འཛིན་གྲྭར་ཐ་སྙད་འཛིན་གྲྭར་བཏགས་སྐད་ཀྱི་གཏམ་དེ་ཇི་བཞིན་མ་འཁྱོལ་བར་ཁོང་གི་གྲྭ་ཚང་དེ་ཐ་སྙད་གྲྭ་ཚང་ཞེས་བཏགས་ཟེར་བའང་རྩིང་ཞིང༌། གསང་གཏམ་བཤད་ཆེད་ཐ་སྙད་གསར་པ་མང་དུ་བརྩམས་པས་ཐ་སྙད་པར་འདོད་པ་ཡང་ཇི་བཞིན་མ་ཡིན་ཏེ། བགྲོ་གླེང་སྐབས་ཚིག་འཁྲིའི་རྩོད་པ་དང༌། ཐ་སྙད་ལ་གཙིགས་ཆེར་མཛད་པས་དེ་ལྟར་བཏགས་ཀྱི། ཐ་སྙད་གསར་རྩོམ་བྱས་པའི་དོན་མ་ཡིན། དེ་ནི་སྒོ་མང་དགེ་བཤེས་ཤིག་ལ་ཐ་སྙད་འབུར་ཚག་ཅེས་བཏགས་པ་ལྟར་ཡིན་མོད། འདི་རྣམས་གལ་མི་ཆེ་ཡང༌། ལོ་རྒྱུས་འབྲི་བ་པོ་རྣམས་ཀྱིས་དོ་བརྟན་མི་བྱེད་པར་གང་དྲན་བྲིས་པ་འདིས་སྐབས་རེ་སྐྱོན་ཡང་ཡོང་གི་འདུག་པས་བྱ་གཏོང་སྙན་སྒྲོན་ཙམ་དུ་བཀོད། ལར་ནས་ངེད་ཅག་བོད་པ་རྣམས་ལོ་རྒྱུས་ལ་བློ་གྲོས་རྩིང་བར་གྲགས་པ་དེ་བདེན་པར་སྣང་སྟེ། དུས་རབས་འདིའི་ནང་བྱུང་བའི་དགེ་འདུན་ཆོས་འཕེལ་གྱི་འཁྲུངས་ལོ་དང༌། འདས་ལོ། བཙོན་ཁང་དུ་བཞུགས་ལོ་སོགས་ཀྱི་ལོ་ཚིགས་ལ་ངེས་བརྟན་སུ་ལའང་མི་འདུག་ན། ལོ་གྲངས་སྟོང་ཕྲག་སྔོན་གྱི་ལོ་རྒྱུས་རྣམས་སུ་དུས་ཚིགས་དང་གནས་ཚུལ་ནོར་འཁྲུལ་མེད་པར་སུས་སྨྲ་ནུས།
གཞུང་འདིའི་ནང་བོད་དུ་བཞུགས་པའི་རྒྱ་དཔེའི་དཀར་ཆག་བཀོད་གནང་མཛད་པ་དེ་དག་དུས་ཡུན་ཐུང་ངུའི་ནང་བྲེལ་འཚབ་ཀྱིས་བྲིས་པས་ཡིན་ནམ་གང་ལྟར་དཔྱད་དགོས་པ་འགའ་ཞིག་འདུག་ཅིང༌། པཎྜིཏརཱཧུལས་བཀོད་པའི་དཀར་ཆག་དང་མི་མཐུན་པའང་གང་མཚམས་ཤིག་འདུག་པ་རྣམས་མདོར་བསྡུས་སུ་བརྗོད་ན་འདི་ལྟར།
ས་སྐྱ་རྒྱ་དཔེའི་གྲས་༼ཏརྐཛྭལཱ་ རྟོག་གེ་འབར་བ་སློབ་དཔོན་ལེགས་ལྡན་འབྱེད་ཀྱིས་མཛད་པ་ཆ་ཚང༌། འདི་རྩ་བ་དབུ་མ་སྙིང་པོ་རང་ཡིན་གྱི་འགྲེལ་པ་མིན།༽༡༠ ཞེས་བཀོད་འདུག་ཀྱང༌། གལ་ཏེ་དབུ་མ་སྙིང་པོ་རང་ཡིན་ན། དེའི་མཚན་མདྷ྄ཡམཀཧྲྀདཡ་དབུ་མ་སྙིང་པོ་ཞེས་འབྱུང་གི ༼ཏརྐཛྭལཱ༽རྟོག་གེ་འབར་བ་ཞེས་ཡོང་དོན་མེད། པཎྜིཏརཱཧུལ་གྱིས་བཀོད་པའི་ནང་དུའང༼ཏརྐཛྭལཱ་མདྷ྄ཡམཀཧྲྀདཡ་༽ཞེས་བཀོད་དེ་གཉིས་ཀ་གཞུང་གཅིག་གི་མཚན་ཡིན་པ་ལྟ་བུར་བྱས་འདུག་ཀྱང་དོན་དུ་རྩ་བ་དབུ་མ་སྙིང་པོ་དང༌། རང་འགྲེལ་རྟོག་གེ་འབར་བ་གཉིས་ཀ་གླེགས་བམ་གཅིག་ཏུ་བཞུགས་པ་ཞིག་ཡིན་འདུག གང་གིས་མངོན་ན་རཱཧུལའི་ཐོའི་ནང་ཕྱག་དཔེའི་དབུ་༦༨
མཇུག་གི་ཚིག་ཁ་ཤས་དྲངས་འདུག་པར་༼ཨན྄ཡཱཡམཱརྒཱནུགཏཾ༽སོགས་དབུ་མ་སྙིང་པོའི་མཆོད་བརྗོད་ཀྱི་ཚིག་ཏུ་སྣང་ཞིང༌། མཇུག་ཚིག་༼བིམ྄བདར྄ཤདརྤཎ༽སོགས་རྟོག་གེ་འབར་བའི་མཇུག་བྱང་དུ་སྣང་བའི་ཕྱིར་རོ།། འདིའི་འདྲ་བཤུས་ཆ་ཚང་བིཧཱར་ཉམས་ཞིབ་ཚོགས་པའི་དཔེ་མཛོད་དུ་རཱཧུལས་བོད་ནས་གདན་དྲངས་པའི་རྒྱ་དཔེ་གཞན་དག་དང་མཉམ་དུ་བཞུགས་པ་ཕྱིས་སུ་ཕྱི་ལོ་ཆིག་སྟོང་དགུ་བརྒྱ་དྲུག་ཅུ་རེ་གྲངས་ཤིག་ལ་དཔེ་དེ་རྒྱ་གར་གྱི་མཁས་པ་གྲགས་ཅན་ཞིག་གིས་ཞུ་དག་དང༌། དཔར་འདེབས་གནང་རྒྱུར་བསྙད་དེ་བསྣམས་སྐད་ཀྱང༌། འདིའི་སྐོར་འབྲི་རྩོམ་ཐུང་ངུ་ཁ་ཤས་དུས་དེབ་རེ་ཟུང་ནང་ཐོན་པ་མ་གཏོགས་རྩ་བའི་ཕྱག་དཔེ་དེ་དེང་དུས་གར་ཡོད་མེད་པར་གཡས་ཁར་གཡོན་དཀྲིའི་ངང་ཕལ་ཆེར་འཇའ་ལུས་སུ་གཤེགས་ཟིན་པ་འདྲ་ཞིང༌། གང་ལྟར་སྐྱ་ནར་བུའི་གྲོང་གི་དཔེ་མཛོད་དུ་འདི་ད་ལྟ་མ་བཞུགས།
༼ཁམས་ལེའི་དྲི་མེད་དཔེ་རིང་སྤུས་ལེགས་ལྡེབས་ཞེ་དྲུག་ཆ་ཚང༌།༽༡༡ ཞེས་གསལ་བ་དེར་རཱཧུལ་གྱི་ཐོའི་ནང་ཆ་མ་ཚང་ཞེས་བྲིས་འདུག་ཀྱང༌། དྲི་མེད་འོད་ཆ་མ་ཚང་བ་དགོངས་པ་འདྲ། ལྡེབས་ཞེ་དྲུག་ནང་ཁམས་ལེ་ཆ་ཚང་ཡོད་ངེས་སྙམ།
༼སཱརམཉ྄ཇརི་ གནད་ཀྱི་སྙེ་མ་ཆ་ཚང༌། ཙཏུརཱངྒསཱདྷན་ཡན་ལག་བཞིའི་སྒྲུབ་ཐབས་ཀྱི་འགྲེལ་པ་སློབ་དཔོན་སམནྟབྷདྲས་མཛད་པ།༽༡༢ ཞེས་བཀོད་འདུག་པ་འདི་ཡང༌། འདི་གཉིས་བསྟན་བཅོས་གཅིག་གི་མཚན་ཡིན་གྱི་གཞུང་ཚན་སོ་སོ་བ་མ་ཡིན། ༼སཱརམཉ྄ཇརཱིནཱམཙཏུརཱངྒསཱདྷནས྄ཡཊིའཀཱ་༽ཞེས་ཡན་ལག་བཞིའི་སྒྲུབ་ཐབས་ཀྱི་འགྲེལ་པ་གནད་ཀྱི་སྙེ་མ། ཞེས་བྱ་བ་གཞུང་གཅིག་གི་མཚན་ཡིན། འདི་བོད་འགྱུར་བསྟན་འགྱུར་དུ་བཞུགས་པ་ལས་རྟོགས་ནུས་པ་མ་ཟད། རཱཧུལའི་ཐོར་ཡང་འདི་ཁོ་ན་བཞིན་གསལ།
༼ཀྲྀཥ྄ཎཡམཱརིཏནྣྟཔཉ྄ཇིཀཱ་༽༼དགྲ་ནག་གི་རྒྱུད་ཀྱི་དཀའ་འགྲེལ་སློབ་དཔོན་ཀུམཱརཙནདྲས་མཛད་པ།༽༡༣ ཞེས་འཁོད་འདུག་ཀྱང༌། དགྲ་ནག་རྒྱུད་ཀྱི་དཀའ་འགྲེལ་དེ་སློབ་དཔོན་ཀུམཱརཅནྡ྄རས་མ་ཡིན། དཔེ་འདིའི་སྔ་ལོགས་ཉིད་དུ་ཀུམཱརཙན྄དྲས་མཛད་པའི་བཛྲབྷཻརབཏནྣྟཔཉ྄ཇིཀཱ་རྡོ་རྗེ་འཇིགས་བྱེད་ཀྱི་རྒྱུད་ཀྱི་དཀའ་འགྲེལ་རཱཧུལའི་དཔེ་ཐོར་འཁོད་འདུག་པ་དེ་འདིར་མི་གསལ་བས་དཔེ་གཉིས་མཉམ་བསྲེས་ཀྱིས་ནོར་བར་སྣང༌། གོང་གི་དགྲ་ནག་དཀའ་འགྲེལ་དེའི་མཛད་པ་པོ་ནི་སློབ་དཔོན་དྷརྨདཱས་ཏེ་ཆོས་འབངས་ཡིན་པར་གསལ་ལ། འདི་བོད་སྐད་དུ་འགྱུར་མེད་པ་འདྲ་སྙམ། ༡༤ བསྟན་འགྱུར་དུ་བཞུགས་པའི་དགྲ་ནག་པོའི་རྒྱུད་ཀྱི་དཀའ་འགྲེལ་དེ་སློབ་དཔོན་པདྨཔཱཎིས་མཛད་པ་ཡིན་ལ། འདི་དང་རཱཧུལ་གྱི་དཔེ་ཐོར་བཀོད་པ་གཉིས་ཚིག་རིས་མི་མཐུན།
ཡང༌། ༼རྡོ་རྗེ་བདུད་རྩིའི་དཀའ་འགྲེལ་སློབ་དཔོན་བིམལཔྲབྷཱས་མཛད་པ།༽༡༥ ཞེས་པ་ཡང་ཅུང་ཟད་ནོར་བ་སྟེ། འདིའི་མཛད་པ་པོ་བིམལབྷདྲ་དྲི་མེད་བཟང་པོ་ཡིན་གྱི། བིམལཔྲབྷཱ་དྲི་མེད་འོད་མ་ཡིན་ནོ།།
༼ཛྙཱནཤྲིའམིཏྲས་ མཛད་པའི་གཞན་སེལ་གྱི་རབ་ཕྱི་བ་བོད་དུ་མ་བསྒྱུར་བ་ཞེས་པ་ནས་ལེ་ཚན་བཅུ་གཉིས་པོད་ཆེན་གཅིག་ལོན་པ་ཡོད།༽༡༦ ཅེས་པའི་བར་དཔེ་ཚན་བརྒྱད་ཀྱི་མཚན་བཀོད་དེ། དང་པོ་ལྔ་ཛྙཱནཤྲིའམིཏྲས་མཛད་པ་དང༌། ལྷག་མ་གསུམ་མཛད་བྱང་མེད་པར་གསལ་འདུག་ཀྱང༌། རཱཧུལའི་དཔེ་ཐོར་སྐད་ཅིག་འཇིག་པར་གྲུབ་པ་མ་གཏོགས་གཞན་རྣམས་རཏ྄ནཀཱིརྟིས་མཛད་པར་བྱས་འདུག གང་ལྟར་གཞན་སེལ་གྲུབ་པ། སྐད་ཅིག་མ་བརྟག་པ། དབང་ཕྱུག་བརྟག་པ་བཅས་ཀྱི་མིང་ཅན་གྱི་རབ་བྱེད་ཛྙཱནཤྲཱིམིཏྲ་དང་རཏ྄ནཀཱིརྟི་གཉིས་ཀའི་གསུང་དུ་བཞུགས་ཤིང༌། ཐམས་ཅད་མཁྱེན་པར་གྲུབ་པ་དང༌། ནང་གི་ཚད་མ་གྲུབ་པ་གཉིས་ནི་རཏ྄ནཀཱིརྟི་མ་གཏོགས། ཛྙཱནཤྲིའམིཏྲའི་གསུང་དུ་མི་རྙེད་པས་འདིར་འཁོད་པའི་གཞུང་རྣམས་དངོས་དོན་དགེ་ཆོས་ཀྱི་གསུང་ལྟར་ཛྙཱནཤྲིའས་མཛད་པ་ཡིན་ནམ་རཱཧུལས་གསུངས་པ་ལྟར་རཏ྄ནཀཱིརྟིས་མཛད་པ་ཡིན་ཁ་ཚོན་གཅོད་པར་དཀའ། ཁོ་བོར་གཞུང་བཀླགས་པའི་ལོང་མ་བྱུང་ཞིང༌། དེ་ཙམ་གལ་གནད་ཆེ་བར་ཡང་མ་མཐོང་བས་བཏང་སྙོམས་སུ་བཞག གང་ལྟར་འདི་རྣམས་བོད་སྐད་དུ་འགྱུར་བ་ནི་གཅིག་ཀྱང་མེད། འདིར་བཀོད་པའི་ལྡན་གྲུབ་ཀྱི་རྒྱུ་དཔྱོད་པ། ཞེས་པ་དེ་རཱཧུལའི་དཔེ་ཐོར་མ་གསལ། གཉིས་མེད་ཀྱི་སེམས་དཔྱོད་པའི་རབ་བྱེད་ཅེས་པ་དེ་རཱཧུལ་གྱི་ཐོར་རཏ྄ནཀཱིརྟིས་མཛད་པ་བྱས་འདུག་ཀྱང༌། རཏ྄ནཀཱིརྟིའི་གསུང་ཕྲེང་ནང་ནཱནཱདེྭཏཔྲཀཱཤབཱད་སྟེ་སྣ་ཚོགས་གཉིས་མེད་གསལ་བ་ཞེས་པ་ལས་སྣ་ཚོགས་གཉིས་མེད་ཀྱི་སེམས་དཔྱོད་པའི་རབ་བྱེད་ཅེས་པ་ཞིག་མ་བཞུགས། ཡན་ལག་ཅན་མེད་པ་ཡང་རཱཧུལའི་དཔེ་ཐོར་རཏ྄ནཀཱིརྟིས་མཛད་པར་བྱས་འདུག་ཀྱང༌། རཏ྄ནཀཱིརྟིའི་གསུང་རཏ྄ནཀཱིརྟིའི་གསུང་ཕྲེང་དུ་མི་རྙེད། རཱཧུལའི་དཔེ་ཐོར་རཏ྄ནཀཱིརྟིའི་གསུང་གྲས་སུ། བྱཱཔ྄ཏིནིཏ྄ཡས྄ཐིཏསིདྷིདཱུཥཎསཱམཱན྄ཡནིརཱཀརཎ་ཞེས་འདུག་པ་དགེ་ཆོས་ཀྱི་དཔེ་ཐོར་མི་འདུག ལར་ནས་པཎྜིཏརཱཧུལསཱཾཀྲིཏ྄ཡཱཡན་ཁོང་སྐུ་ཚེ་གཅིག་གི་ནང་གསུང་རྩོམ་ཧ་ཅང་མང་པོ་བྲིས་ཟིན་པ་གནང་རྒྱུའི་ཐུགས་བསྐྱེད་ཅན་ཞིག་ཡིན་སྟབས་ཁོང་གི་གསུང་རྩོམ་ཕལ་ཆེར་ཧ་ཅང་བྲེལ་སྟབས་སུ་མགྱོགས་བྲིས་བྱས་པ་མང་ཆེ་བས་བརྗོད་དོན་ནོར་བ་དང༌། འཁྲུགས་པ་སོགས་པཎྜིཏ་མཉམ་པར་མ་བཞག་པའི་གཏམ་དུ་མ་ཞིག་ཡོང་གི་ཡོད་པ་མཐུན་སྣང་དུ་ཡོད། དགེ་ཆོས་མཆོག་ཀྱང་ཐོག་མར་ལེགས་སྦྱར་གྱི་སྐད་གསན་ཡུལ་རཱཧུལ་ཡིན་སྟབས། རིག་གཞུང་གི་ཐོག་འཆད་རྩོམ་གྱི་བྱ་བ་མང་པོ་གནང་རྒྱུའི་ཡིད་བསྐུལ་དང་མཉམ་དུ་བྲེལ་འཚབ་གནང་རྒྱུའི་ཐུགས་གཤིས་ཀྱི་ཤན་ཡང་ཅུང་ཟད་མི་ཐེབས་པའི་ངེས་པ་མེད། དེར་མ་ཟད་སྔོན་གྱི་ལག་བྲིས་མའི་རྒྱ་དཔེ་རྙིང་མ་མང་པོར་ཆད་ལྷག་ཡིག་ནོར་ལྡེབས་འཁྲུགས་ཇི་སྙེད་ཅིག་ཡོང་གི་འདུག་པ། དེང་སང་རེ་ཟུང་ལ་དག་ཞུ་བྱེད་རྒྱུའི་གོ་སྐབས་བྱུང་བ་ན་ཉམས་སྣང་བྱུང་ཞིང༌། ཚུལ་འདི་དག་མཐོང་བའི་ཚེ་རང་རེའི་བོད་ཀྱི་བྲིས་མའི་བཀའ་བསྟན་རྙིང་མ་དེ་རྣམས་ཇི་ཙམ་ངོ་མཚར་ཅན་ཞིག་ཡིན་པ་དང༌། ལྷག་པར་དཔར་ཤིང་བརྐོས་པའི་ལམ་སྲོལ་དར་བ་ནས་བཟུང༌། བོད་དཔེ་རྣམས་ཆད་ལྷག་དང༌། དག་ཆའི་སྐྱོན་སོགས་མེད་པའི་གཞུང་དག་པོ་མི་ཉམས་རྒྱུན་འཛིན་ཡོང་བ་ལ་ཧ་ཅང་གི་ཕན་རླབས་ཆེ་བའི་ཚུལ་འདི་དག་རྒྱལ་ཁབ་གཞན་གྱི་རིག་གཞུང་མཐོང་བ་ན་གཞི་ནས་རང་ཡུལ་གྱི་ཁྱད་ཆོས་དང༌། རིན་ཐང་གོ་བ་ཞིག་ཡོང་གི་འདུག་སྟེ་ཕྱིས་ཏེ་སྣང༌། དེང་སྐབས་ལེགས་སྦྱར་གྱི་སྐད་དུ་ཡོད་པའི་ནང་པའི་གཞུང་ཕལ་ཆེར་ཡང་མ་དག་རྒྱུན་འབྱམས་ཧ་ཅང་ཆེ་བས་བོད་ཀྱི་འགྱུར་ལ་མ་བརྟེན་པར་ཐད་ཀར་ལེགས་སྦྱར་གྱི་སྐད་དུ་རང་ཐོག་ནས་ཞུ་དག་འདྲོངས་པ་ཞིག་ཀྱང་བྱ་ཐབས་དཀའ་བ་ཞིག་ཡིན་པ་དེང་དུས་ཀྱི་མཁས་པ་བློ་གཟུ་བོར་གནས་པ་ཐམས་ཅད་ལ་གྲགས་ཤིང་གྲུབ་པའི་གནས་ཚུལ་དེ་ལགས་མོད། ད་ལྟ་བོད་མི་གཞོན་སྐྱེས་ཚོས་རང་གི་རིག་གཞུང་ལ་སློབ་སྦྱོང་བྱེད་སྟངས་ཀྱི་ཁ་སྟབས་འདི་ལ་བལྟས་ཚེ་བོད་དང་ལེགས་སྦྱར་གྱི་སྐད་དུ་བཞུགས་པའི་གཞུང་ཆེན་མོར་གྲགས་པའི་པོ་ཏི་མཛོ་ཁལ་ཙམ་པ་དེ་རྣམས་ཡུན་རིང་པོར་མ་ལོན་པར་སྤྲོས་བྲལ་ཆོས་ཀློང་དུ་ཐིམ་པའམ། ཡང་ན་འགྲེམས་སྟོན་ཁང་དག་གི་བང་ཁྲི་མཛེས་བྱེད་ཙམ་དུ་བས་པར་འགྱུར་བར་གདོན་མི་ཟ་བར་སྣང་བས། ཀྱེ་མ་འོ་ཅག་ཡང་ན་ལོ་ལྔ་བཅུ་ཙམ་སྐྱེས་སྔ་བ་དང༌། ཡང་ན་ནི་ལོ་ལྔ་བཅུ་ཙམ་སྐྱེས་ཕྱིས་པར་བྱུང་འདུག་མོད། ལས་དབང་བཙན་པ་ལྡོག་ཏུ་མ་མཆིས་པས་ཅི་བྱ།
༼ཀྲྀཡཱསམུཙྪཡགྲུབ་ཆེན་དརྤཎས་མཛད་པ།༽ཞེས་འཁོད་པ་འདི་རཱཧུལའི་དཔེ་ཐོར་མཇུག་གིས་མཛད་པ་ཞེས་འཁོད་འདུག
ཀལཱཔའི་རྣམ་དབྱེ་ཏི་དང་སི་སོགས་ཀྱི་འགྲེལ་པ་སློབ་དཔོན་འཇམ་གྲགས་ཀྱིས་མཛད་པ་བཞུགས་ཞེས་ནང་མོ་གསུང་བྱ་བའི་ཁ་བྱང་ཅན་པོད་ཆུང་གཅིག་༡༧ ཅེས་པ་འདིར་རཱཧུ་ལའི་དཔེ་ཐོར་མཛད་པ་པོ་འཇམ་གྲགས་ཀྱི་ཚབ་ཏུ་ཨུཏ྄སབཀཱིརྟི་སྟེ་དགའ་སྟོན་གྲགས་ཞེས་བྲིས་འདུག་པས་དཔྱད་པར་བྱ། ཡང་རཱཧུལའི་དཔེ་ཐོ་འདི་གའི་མཇུག་ཏུ་ཏྲིལིངྒཔྲཀརཎ་རྟགས་གསུམ་གྱི་རབ་བྱེད་འཇམ་དཔལ་མཉ྄ཛུཡིས་མཛད་པ་འཁོད་འདུག་པ་དེ་དགེ་ཆོས་ཀྱི་ཐོར་མི་གསལ་བས་ཕལ་ཆེར་དཔེ་ཚན་འདི་གཉིས་ཀ་གླེགས་བམ་གཅིག་གི་ནང་དུ་བཞུགས་སམ་སྙམ།
རཱཧུལའི་དཔེ་ཐོར་མེད་པ་དགེ་ཆོས་ཀྱི་ཐོ་ནང་ཡོད་པའི་དཔེ་གཤམ་གསལ།
ཞ་ལུ་དགོན་དུ།
ཁམས་ལེ་དྲི་མེད་འོད་སྤུས་ལེགས་ཆ་ཚང་ལྡེབས་ཞེ་དྲུག
འབུམ་དུམ་བུ་ལེའུ་བཅུ་གཉིས་ནས་བཅུ་དྲུག་བར་སྤུས་ལེགས།
བརྒྱད་སྟོང་པོད་ཆེན་གཅིག་སྤུས་ལེགས།
ཏྲིལོཙན།
དབང་ཕྱུག་རྣམ་པར་བརྟག་པ་ཛྙཱནཤྲིའམིཏྲ།
ལྡན་གྲུབ་རྒྱུ་དཔྱོད་པ།༧༢
བཛྲབཻརབྷ་ རྡོ་རྗེ་འཇིགས་བྱེད།
གདན་བཞིའི་སྒྲུབ་ཐབས།
གྲྭ་ལྔ་ལ་སོགས་པའི་གཟུགས་སྣ་ཚོགས་པོད་ཆེན་གཅིག་སྤུས་ལེགས།
སེངྒེ་བཟང་པོའི་རྒྱུད་འགྲེལ་མ་ཚང་བ།
ཉན་ས་དང་རང་སངས་རྒྱས་ཀྱི་ས་མགོ་མཇུག་མ་ཚང་བ།
སམ྄པུཊ།
ཉན་ས་དང་བྱང་ས།
རྒྱལ་པོ་ལུགས་ཀྱི་བསྟན་བཅོས་ཙཱཎཀྱ།
བརྟག་གཉིས་ཀྱི་འགྲེལ་པ་རིན་ཆེན་ཕྲེང་བ།
གསང་འདུས་རྡོ་རྗེ་སེམས་དཔའི་སྒྲུབ་ཐབས་ལཱིལཱབཛྲ།
ནག་པོ་བའི་རྡོ་རྗེའི་གླུ།
འཕགས་པ་གཉིས་མེད་མཉམ་ཉིད་རྟོག་པ་ཉེར་གཉིས་ཅན།
ངོར་དགོན་དུ།
སྒྲུབ་ཐབས་མཚོ་སྐྱེས་ཀྱི་འགྲེལ་པ།
བརྟག་གཉིས་རྡོ་རྗེ་སྙིང་འགྲེལ།
ཀྱེ་རྡོ་རྗེའི་སྒྲུབ་ཐབས་དེ་ཁོ་ཉིད་བྱུང་བ།
སྤྱོད་འཇུག་ཤེར་ལེའི་འགྲེལ་པ་ཤེར་འབྱུང་བློ་གྲོས་ཀྱིས་མཛད་པ།
ཆོས་ཀྱི་བདུད་རྩིའི་ཚིགས་བཅད་གཞུང་ཚད་ལྔ་བརྒྱ་པ།
ཆོས་མཆོག་ཆུང་བ།
རྩོད་རིག་ཚར་གཉིས།
ཀུན་གླིང་དཔེ་མཛོད་དུ།
འཇམ་དཔལ་མཚན་བརྗོད།
དགེ་ཆོས་ཀྱི་དཔེ་ཐོར་མེད་པ་རཱཧུལའི་ཐོར་ཡོད་པ་གཤམ་གསལ།
ཞ་ལུ་དགོན་དུ་དཔེ་གྲངས་ ༤༦༧༣
ངོར་དགོན་དུ་དཔེ་གྲངས་ ༡༠༦
ས་སྐྱ་སྒོ་རུམ་ལྷ་ཁང་དུ་དཔེ་གྲངས་ ༥
ས་སྐྱ་ལྷ་ཁང་ཆེན་མོར་དཔེ་གྲངས་ ༡༤
ལྷ་ས་ཀུན་གླིང་བླ་བྲང་དུ་དཔེ་གྲངས་ ༡
རྒྱལ་རྩེ་སྤོས་ཁང་དགོན་པར་དཔེ་གྲངས་ ༡ བཅས་ཁྱོན་དཔེ་ཚན་བརྒྱ་དང་དོན་གསུམ་སྐོར་ཁྱད་པར་ཡོང་གི་འདུག་པ་དགེ་ཆོས་ཤིང་ཁྱི་ ༡༩༣༤ ས་སྟག ༡༩༣༨ བཅས་རཱཧུལ་བོད་དུ་ཕེབས་ཐེངས་གཉིས་པ་དང༌། བཞི་པ་ལ་མཉམ་དུ་ཡོད་འདུག་ཀྱང་མེ་བྱི་ལོར་ ༡༩༣༦ རཱཧུལ་བོད་དུ་ཕེབས་ཐེངས་གསུམ་པའི་སྐབས་དགེ་ཆོས་ལྷན་དུ་མེད་པས་དེ་སྐབས་རྙེད་པའི་དཔེ་ཐོ་རྣམས་འདིར་མ་ཚུད་པ་ཡིན་ནམ། ཡང་ན་དུས་དེའི་མཁས་པ་སྟག་སེང་འདྲ་བའི་དབར་དཔེ་མཁྱུད་ལྟ་བུའང་བྱུང་ཡོད་པ་སྲིད་དམ་སྙམ། དགེ་ཆོས་ཀྱི་དཔེ་ཐོར་ཡོད་པ་རཱཧུལའི་དཔེ་ཐོར་མེད་པ་དེ་གྲས་འགའ་ཤས་བོད་ཡིག་ཏུ་བྲིས་པའི་ལེགས་སྦྱར་གྱི་དཔེ་ཡིན་པའང་སྲིད། དེ་མཐའ་གཅིག་ཏུ་ཁ་ཚོན་བཅད་དཀའ། གང་ལྟར་ཡང་ཁོ་བོའི་དཔྱད་ཞིབ་འདི་དག་ནི་ནམ་མཁའི་པདྨོའི་ཁ་དོག་ལ་རྟོགས་པ་དང་འདྲ་བར་སྣང་སྟེ། རིན་ཐང་བྲལ་བའི་རྒྱ་དཔེ་དེ་དག་གཟུངས་དང༌། ཏིང་ངེ་འཛིན་ལ་མངའ་དབང་འབྱོར་བའི་འཕགས་པ་རྣམས་ཀྱི་ཐུགས་སུ་ནི་ཡོད་མཆི། དེ་མིན་ཚུ་རོལ་མཐོང་བ་རྣམས་ཀྱི་དབང་པོའི་ཡུལ་དུ་གྱུར་པ་ཞིག་ནི་ད་གཟོད་རྙེད་པའི་རེ་བ་ཆེས་ཕྲའོ།། དེ་ལྟར་སྲིད་འདིར་རྙེད་དཀའི་རིན་ཐང་བྲལ་བའི་དཔེ་དེ་རྣམས་རང་ལག་ཏུ་ཡོད་དུས་ནི་སུས་ཀྱང་གལ་གནད་ཡོད་པ་མ་ཤེས་ལ། བདག་གཅེས་དང༌། དཔར་འདེབས་སོགས་བྱ་རྒྱུ་ནི་དྲན་ཡུལ་དུའང་མ་བྱུང༌། ད་ཆ་ཤུལ་མེད་དུ་གྱུར་ཟིན་དུས་དཀར་ཆག་ཐོ་ཡིག་ཙམ་ལའང་གཙིགས་སུ་བཟུང་སྟེ་ནན་ཏན་དུ་བྱ་བ་འདི་རྗེ་མི་ལས། ༼དམ་ཆོས་ཡོད་དུས་ཞབས་ཏོག་མེད།། ཞབས་ཏོག་སླེབས་དུས་ཐིག་པས་བརྡུངས།། གཉིས་ཀ་འཛོམས་རུང་སྙིང་པོ་མེད།། བུ་ངས་སྙིང་པོའི་ལྷ་ཆོས་བྱེད།།༽༡༨ ཅེས་གསུངས་པའི་ཚུལ་ཉིད་དུ་བྱུང་སྣང་བས་འདི་ཡང་འཁོར་བའི་གཤིས་ལུགས་ཀྱི་རང་མཚང་གསལ་བྱེད་དུ་སྣང་ངོ༌།། གཏམ་རྒྱུད་གསེར་ཐང་གི་དཔེ་འདིའི་ནང་ལེགས་སྦྱར་༧༤
གྱི་སྐད་ཚང་མར་ཙཏུརཱངྒབཛྲཨམྲྀཏ། ཤིཀྵཱསམུཙྪཡ། ལྟ་བུ་ཅ་སྡེའི་ཡིག་འབྲུ་ཚང་མར་བོད་ལུགས་ཙ་སྡེ་རང་དུ་བྲིས་འདུག་པ་འདི་བཞིན་དགེ་ཆོས་རང་ཉིད་ཀྱི་བཞེད་པ་ག་ལ་ཡིན་ཡང༌། ཡོངས་གྲགས་བོད་ཀྱི་འབྲི་སྲོལ་ལ་མཐུན་འཇུག་ཙམ་དུ་མཛད་པ་ཡིན་ནམ་བརྟག་པར་བྱ་བའི་གནས་སུ་འདུག
གཏམ་རྒྱུད་གསེར་ཐང་གི་སྡེ་ཚན་དང་པོ་འདི་བཞིན་སིངྒལར་བཞུགས་དུས་བོད་དབུས་སམ་ཨ་མདོ་གང་རུང་དུ་དགེ་ཆོས་རང་ཉིད་ཀྱི་མཛའ་གྲོགས་ཞིག་ལ་རེ་འཁང་ཆེན་པོ་དང་བཅས་བསྐུར་གནང་འདུག་ཀྱང་འབུལ་ཡུལ་གྱི་མཛའ་གྲོགས་དེ་སུ་ཡིན་མ་ངེས་ཤིང༌། ད་ལྟའི་དཔེ་འདིའི་རྙེད་ཁུངས་སྐུ་ངོ་ངག་དབང་དོན་གྲུབ་ལའང་ཐུགས་རྒྱུས་མི་འདུག གང་ལྟར་མཁས་པ་ཞིག་ནི་ཡིན་ཚོད་དུ་སྣང་སྟེ། ཡི་གེ་མ་དག་པ་རྣམས་ལ་ཞུས་དག་དང༌། དོན་ལ་མི་གནོད་པའི་ཚིག་སྦྱོར་བཅོས་པ་སོགས་ཀྱང་གནང་རྒྱུའི་མངགས་གཏམ་ཞུས་འདུག ངེད་ཀྱི་དཔེ་ཆུང་འདི་ད་ནས་ཁྱོད་ལ་བཅོལ་བ་ཡིན་པས་སྐྱེས་མ་ཐག་ཏུ་མི་ཤི་བ་ཞིག་མགོན་སྐྱབས་ཅིས་ཀྱང་མཛད་རྒྱུའི་བཀའ་དྲིན་སྐྱོང་བར་ཞུ། ཞེས་གདུང་ཡུས་ཆེན་པོ་མཛད་འདུག་པ་ལྟར་སྐྱེས་མ་ཐག་ཏུ་མ་ཤི་ཡང༌། ད་བར་འཚར་ལོང་མ་བྱུང་བར་ལོ་གྲངས་བཞི་བཅུའི་སྐོར་བྱིས་པའི་གཉིད་ཐུན་གཅིག་ཏུ་ལུས་འདུག་པ་ད་ལམ་དཔར་གྱི་འདུ་བྱེད་ཀྱི་བྱིས་འདྲུད་འཁོར་ལོའི་ནང་དྲངས་ཐུབ་ཙམ་བྱུང་བའང་གློ་བ་དགའ། འབུལ་ཡུལ་དེ་རྙིང་མའི་མཁས་པ་ཞིག་ཡིན་པར་ངེས་ཏེ། བྱབྱཕྱོགས་དེར་རང་བསྟན་སྔ་འགྱུར་གྱི་བཀའ་སྲོལ་བྱེ་ཚན་སྟེང་གི་མར་བཞིན་དུ་གནས་པ་ལ་ཉིད་ལྟ་བུ་རེ་དཔལ་མགོན་དུ་བཞུགས་པས་ཅི་ལྟར་བས་ཀྱང་ཞེ་ཕུགས་ཙམ་དྲོ་བ་ལགས།བྱབྱ ཞེས་གསུངས་པ་འདིས་གསལ་ལོ།།
ད་དུང་ཡང་གཟུར་གནས་དོན་གཉེར་ཅན་རྣམས་ཀྱིས་འདིའི་སྡེ་ཚན་ལྷག་མ་རྣམས་རྙེད་སོན་འབྱུང་ཐབས་ལ་འབད་པ་ཅིས་ཀྱང་མཛད་པར་ཞུ་ཞེས་ཁོ་བོ་ནི་དེ་སྐད་ཐལ་མོ་སྦྱར་བ་ལགས་སོ།།
སླར་སྨྲས་པ།
དགེ་ལེགས་ཀུན་འབྱུང་སྣ་ཚོགས་རིག་གཞུང་ལ།།
འདུན་པ་བཟང་པོས་རྟག་ཏུ་བརྩོན་པ་ལས།།
ཆོས་དང་ཆོས་མིན་འབྱེད་པའི་བློ་གྲོས་ཀྱི།།
འཕེལ་བ་རྫོགས་པའི་སྐྱེས་བུ་དེ་ལ་བསྔགས།།
གངས་རིའི་མུ་ཁྱུད་མཛེས་པའི་སྨན་ལྗོངས་སུ།།
མཁས་གྲུབ་པུཎྜརཱིཀའི་མཚར་སྡུག་འབུམ།།
བཀྲ་བའི་སྔོན་མེད་ཉེ་བའི་ནགས་ཀླུང་ཞིག།
འཛམ་གླིང་འཛིན་མའི་ཏོག་ཏུ་མཛེས་ཞེས་གྲགས།།
ཆེར་སྙིགས་དུས་ཀྱི་རྒུད་པའི་གྲང་རེག་གིས།།
ཞི་བདེའི་སྟོན་གྱི་དཔལ་ཡོན་བཅོམ་པ་ན།།
ལོ་པཎ་པད་མའི་ཚལ་ཆེན་རྙིང་གྱུར་ཚེ།།
དུས་མིན་མེ་ཏོག་གཅིག་ཅིག་བཀྲ་བར་གྱུར།།
ཆེ་རྒུའི་ཅོད་པཎ་མཛེས་པའི་དབུ་རྒྱན་དུ།།
མ་མཆོད་དུས་ཀྱིས་ནོངས་པའི་འདབ་བརྒྱ་པ།།
རང་གཤིས་ཡོན་ཏན་མཆོག་གི་བསུང་ཞིམ་པོ།།
དྲེགས་ལྡན་བླུན་པོས་བརྙས་ཀྱང་ག་ལ་དོར།།
རང་སྡེའི་རིགས་ལ་ཞེན་པའི་ལྷག་བསམ་སྐྱེ་བ་ལྔ་པའི་མདངས་གསལ་ཞིང༌།།
རང་བྱུང་ལེགས་བཤད་ཆེས་སྙན་སྒྲ་དབྱངས་རྨོངས་རིམ་སེལ་བའི་གསོས་སུ་སྒྲོག།
རང་དོན་དོར་བའི་དྲང་པོའི་གཤིས་ཀྱི་གཡས་འཁྱིལ་རི་མོ་ལེགས་བཀྲ་ཡང༌།།
རང་འདོད་ཅན་གྱི་སྐྱེ་བོས་བརྙས་ལ་གདུང་བས་ཡུས་པ་ཐུགས་བདེན་མོད།།
སྔོན་སོང་སྔོན་རབས་བསྐལ་པ་བཟང་དུས་ཀྱང༌།།
མཁས་རྣམས་མཁས་པས་མཆོད་ཀྱི་བླུན་པོས་མིན།།
དམ་པ་དམ་པའི་རང་བཞིན་མི་འདོར་བས།།
ནམ་ཞིག་ནམ་ཕུགས་གསལ་བའི་དུས་ཤིག་འོང༌།།
ཆེན་པོའི་ལུང་དང་གསེར་གྱི་མཎྜལ་བཅས།།
བསྐུལ་བའི་སྐྱེས་བུ་མེད་པ་སྟབས་རེ་ལེགས།།
ཅི་སྟེ་ཡོད་ན་དེ་ཚོའི་གཡར་ངོའི་མདུན།།
བདེན་གཏམ་ཟོལ་མེད་སྨྲ་བའང་དཀའ་ཙམ་ཡོང༌།།
ལྐུགས་པའི་འཛུམ་དང་ཕྱུག་པོའི་ལེགས་སོ་ལ།།
རེ་བའི་རྨི་ལམ་ཁྱོད་ལ་མེད་མོད་ཀྱི།།
གཡམ་རྒྱུགས་སྐྱེན་པའི་དུས་འདིར་ཁྱོད་མཚན་ལ།།
བསྔགས་པའི་བྱེད་པོ་གྲལ་རིམ་གཉིས་དེར་མང༌།།
བདག་ལྟ་ཐོས་བརྩོན་ཤེས་རབ་མི་ལྡན་ཡང༌།།
ཁྱོད་ཀྱི་ལེགས་བཤད་སྙིང་སྒོར་ཞུགས་པས་འཚེངས།།
ཕན་པའི་ལམ་མཚོན་གསུང་གིས་ཕན་བཏགས་པའི།།
མ་མཐོང་གྲོགས་མང་འབད་པ་འབྲས་བཅས་ལགས།།
ཞེས་མདོ་སྨད་པ་དགེ་འདུན་ཆོས་འཕེལ་གྱིས་བརྩམས་པའི་གཏམ་རྒྱུད་གསེར་གྱི་ཐང་མ་ཞེས་བྱ་བ་དཔར་སྐྲུན་བྱེད་སྐབས་གླེང་བསླང་བའི་ཚུལ་ཅུང་ཟད་བརྗོད་པ་འདིའང་ཤཱཀྱའི་དགེ་སློང་ཟམ་གདོང་པ་བློ་བཟང་བསྟན་འཛིན་དུ་འབོད་པས་གཡར་ཁྲལ་ཙམ་དུ་བྲིས་པའི་ཡི་གེ་པ་ནི་བློ་གྲོས་དང་ལྡན་པ་བློ་བཟང་ནོར་བུ་ཤཱསྣྟིའའོ།། ཕྱི་ལོ་ ༡༩༨༦ ལོར།
མཆན་ཁག༡ ྋགོང་ས་སྐུ་ཕྲེང་བཅུ་བཞི་པ། དགེ་ཆོས་ཀྱི་ལོ་རྒྱུས་བཀྲས་མཐོང་ཐུབ་བསྟན་གྱིས་བརྩམས་པ། དྷ་སའི་དཔར་མ། ཤོག་གྲངས་ ༣
༢ མདོ་སྡེ་རྒྱན་ལེའུ་བཅིུག་པ། ཤ྄ལོཀ་ ༤༠
༣ སྤྱོད་འཇུག་ལེའུ་ལྔ་པ། ཤ྄ལོཀ་ ༡༠༠
༤ ཏཱརནཱཐའི་ཆོས་འབྱུང༌། སཱར་ནཱཐའི་དཔར་མ། ཤོག་གྲངས་ ༡༦༥
༥ ཚད་མ་རྣམ་འགྲེལ་ལེའུ་དང་པོ། ཤ྄ལོཀ་ ༢
༦ སྤྱོད་འཇུག་ལེའུ་བཅུ་པ། ཤ྄ལོཀ་ ༤༦
༧ ས་སྐྱ་ལེགས་བཤད་རབ་བྱེད་བཞི་པ། ཤ྄ལོཀ་ ༡༥
༨ སྙན་ངག་མེ་ལོང་ལེའུ་དང་པོ། ཤ྄ལོཀ་ ༥
༩ བིཧཱར་དང་ཨོརིསའི་ཉམས་ཞིབ་ཚོགས་པའི་དུས་དེབ། Vol. XXI ༡༩༣༥ ཤོག་གྲངས་ ༢༢
༡༠ གཏམ་རྒྱུད་གསེར་ཐང༌། ཤོག་གྲངས་ ༡༥
༡༡ གཏམ་རྒྱུད་གསེར་ཐང༌། ཤོག་གྲངས་ ༡༥
༡༢ གཏམ་རྒྱུད་གསེར་ཐང༌། ཤོག་གྲངས་ ༡༦
༡༣ གཏམ་རྒྱུད་གསེར་ཐང༌། ཤོག་གྲངས་ ༡༦
༡༤ གཏམ་རྒྱུད་གསེར་ཐང༌། ཤོག་གྲངས་ ༡༦
༡༥ གཏམ་རྒྱུད་གསེར་ཐང༌། ཤོག་གྲངས་ ༡༦
༡༦ གཏམ་རྒྱུད་གསེར་ཐང༌། ཤོག་གྲངས་ ༡༧
༡༧ གཏམ་རྒྱུད་གསེར་ཐང༌། ཤོག་གྲངས་ ༢༦
༡༨ རྗེ་མི་ལའི་རྣམ་ཐར། འབྲས་སྤྱི་བློན་ཆེན་ཡིག་ཚང་ནས་དཔར་པ། ཤོག་གྲངས་ ༢༤༡༧༨