རྩིས་ཞིབ་ལས་ཁང་གིས་རྩིས་འགྲོ་མ་བཏང་བ་ལས་འཕྲོས་པའི་ཐོག་གསལ་བཤད།
རྩིས་ཞིབ་ལས་ཁང་གིས་རྩིས་འགྲོ་མ་བཏང་བའི་དངུལ་འབོར་ཞིག་གི་སྐོར་རྩིས་ཞིབ་ལས་ཁང་གི་ལམ་སྟོན་གཞིར་བཟུང་གྲོས་ཚོགས་ཚོགས་དུས་སྔ་མའི་ནང་བཀའ་ཤག་གིས་གྲོས་ཆོད་གྲོས་འཆར་བཏོན་པ་ཡིན། དེ་ལ་བརྟེན་ནས་བགྲོ་གླེང་བྱུང་སྐབས་གྲོས་འཆར་ནང་མ་གསལ་བའི་རྩིས་འགྲོ་མ་གཏོང་བའི་རྩིས་འགོ་ཁག་ཇི་སྙེད་ཅིག་ཡོད་པ་དེ་ཚོ་ཚང་མའི་གནས་ཚུལ་ཞིབ་འཇུག་ཆེད་གྲོས་ཚོགས་ནས་ཆེད་འཛུགས་ཚོགས་ཆུང་བཙུགས་གནང་བ་རེད། ད་ལམ་ཆེད་འཛུགས་ཚོགས་ཆུང་གི་སྙན་ཐོ་གྲོས་ཚོགས་སུ་ཕུལ་བའི་སྐབས་ཚོགས་ཆུང་གི་ཕྱག་ལས་ཧ་ཅང་ཚགས་ཚུད་པོ་དང༌། གནད་སྨིན་པོ། དོན་དང་ལྡན་པ་གནང་འདུག་སྙམ་པའི་ཚོར་སྣང་བྱུང༌། དེ་ལ་བཀའ་ཤག་ངོས་ནས་སྙང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན།
ཡིན་ནའང་ཚོགས་ཆུང་གི་སྙན་ཐོ་དང་སྙན་ཐོ་རྗེས་འབྲེལ་གྱི་གྲོས་འཆར་ལ་ལྟ་དུས་དོན་ཚན་གསུམ་ཞིག་སྙན་གསན་མ་ཞུས་ཐབས་མེད་ཆགས་ཀྱི་འདུག དོན་ཚན་དང་པོ། ཆེད་འཛུགས་ཚོགས་ཆུང་གི་ཚོགས་གཙོ་མཆོག་ནས་གསལ་བཤད་གནང་སྐབས་རྩིས་ཞིབ་ལས་ཁུངས་ནས་དོན་གནད་ཁ་ཤས་ཁྲིམས་ཞིབ་ཁང་དུ་ཁྲིམས་གཏུགས་ཞུ་རྒྱུ་གཏན་འཁེལ་བ་ཡིན་ཞེས་ཞུས་པ་དེ་ཚོ་ཐུགས་ཞིབ་གནང་མེད་ཅེས་བཀའ་གནང་སོང༌། སྤྱི་སྲོལ་ལྟར་ན་ཁ་མཆུ་ངོས་འཛིན་ཟིན་པའི་གནས་ཚུལ་ཞིག་ཁྲིམས་ཐག་མ་ཆོད་བར་ཕྱོགས་གཞན་ནས་ཞིབ་འཇུག་གནང་མི་ཆོག་པ་ཡིན་ནའང་མ་འོངས་པར་ཁྲིམས་རྩོད་ཞུ་རྩིས་ཡིན་ཟེར་བ་དེ་ཚོ་ཞིབ་འཇུག་གནང་མི་ཆོག་པའི་ཁྲིམས་དང་སྒྲིག་གཞི་གང་ཡང་ཡོད་མ་རེད། ཁྲིམས་ཞིབ་ཁང་དུ་ཁ་མཆུ་ཉེ་ཆར་མ་གཏོགས་ཚུད་མེད་པ་དང༌། ཆེད་འཛུགས་ཚོགས་ཆུང་གི་ཕྱག་ལས་ཁ་མཆུ་ཚུད་རྒྱུའི་དུས་ཚོད་རིང་པོའི་སྔོན་དུ་གནང་ཡོད་རེད། ངས་ད་ལྟ་ཆེད་འཛུགས་ཚོགས་ཆུང་ལ་བསྐྱར་དུ་ཞིབ་འཇུག་གནང་རོགས་ཞེས་ཞུ་རྒྱུ་མིན་ནའང༌། ལམ་དང་ལུགས་སྲོལ། ཁྲིམས་དང་སྒྲིག་གཞི་གང་གི་ཐོག་ནས་ཆེད་འཛུགས་ཚོགས་ཆུང་ཞིག་གིས་ཞིབ་འཇུག་གནང་བའི་སྐབས་མ་འོངས་པར་ཁྲིམས་གཏུགས་བྱ་རྩིས་ཡོད་ཅེས་ཞུས་པ་ཙམ་གྱིས་ཞིབ་འཇུག་གནང་རྒྱུ་བཞག་པ་ཡིན་ན། མ་འོངས་པར་ཆེད་འཛུགས་ཚོགས་ཆུང་ཁག་གི་ཕྱག་ལས་ལ་བར་ཆད་བྱེད་བདེ་པོ་ཞིག་ཆགས་སྲིད་པ་རེད། སུས་ཀྱང་ཆེད་འཛུགས་ཚོགས་ཆུང་གི་མདུན་གནས་ཚུལ་ཞུ་འདོད་མེད་ན་ངས་རྗེས་ལ་ཁ་མཆུ་རྒྱག་རྩིས་ཡོད་ཅེས་ཞུས་ནས་ཕྱིར་འཐེན་རྒྱག་བདེ་པོ་ཞིག་ཡོང་རྒྱུ་ངེས་པ་རེད། འདི་གྲོས་ཚོགས་ཀྱིས་དགོངས་པ་བཞེས་རྒྱུའི་ཆེད་དུ་ཞུས་པ་ཡིན།
དོན་ཚན་གཉིས་པ་བཀའ་ཤག་གིས་དོན་གཅོད་ཀྱི་འབབ་ཁྲལ་རྩིས་འགྲོ་མ་ཕྱིན་པ་དེ་དག་རྩིས་འགྲོ་གཏོང་རྒྱུའི་གྲོས་ཆོད་གྲོས་འཆར་ཕུལ་བ་རེད། ཡིན་ནའང་གྲོས་ཚོགས་ཀྱིས་དགོངས་པ་རྒྱ་ཆེན་པོ་བཞེས་ནས་དངུལ་འབབ་དེ་ཙམ་མ་ཡིན་པར་རྩིས་འགྲོ་མ་ཕྱིན་པའི་རྩིས་འགོ་གཞན་དག་ལའང་ཞིབ་འཇུག་གནང་སྟེ་འཛིན་སྐྱོང་གི་དཀའ་ངལ་ཆ་ཚང་སེལ་རྒྱུའི་ཐབས་ཤེས་ཤིག་གནང་བ་རེད། ཡིན་ནའང་ད་ལམ་གྲོས་ཆོད་ཀྱི་ལམ་ནས་རྩིས་འགྲོ་མ་བཏང་བ་རྣམས་རྩིས་འགྲོ་གཏང་ཐུབ་པ་ཞིག་བྱུང་བའི་དབང་དུ་བཏང་ཡང༌། འཛིན་སྐྱོང་གི་དཀའ་ངལ་ཆ་ཚང་སེལ་ཐུབ་ཀྱི་མི་འདུག གནད་འགག་གཙོ་བོ་རྩིས་ཞིབ་ལས་ཁང་གིས་རྩིས་ཞིབ་གནང་དུས་རྩིས་འགྲོ་མ་གཏོང་བ་བཀག་རྒྱུའི་དབང་ཚད་ཡོད་དང་མེད། དེའེི་གནས་ཚུལ་གསལ་པོ་བཟོ་དགོས་པ་ཞིག་རེད། ད་ལྟའི་གྲོས་ཆོད་གྲོས་འཆར་འདིའི་ནང་འདིའི་སྐོར་གང་ཡང་གསལ་གྱི་མི་འདུག སྤྱི་འཐུས་རྣམ་པ་ཚང་མས་མཁྱེན་གསལ་ལྟར་རྩིས་ཞིབ་ལས་ཁང་ཚུགས་པ་ནས་བཟུང་སྟེ་རྩིས་ཞིབ་པས་གཞུང་གི་རྒྱུན་གྲོན་དང་དམིགས་བསལ་གྱི་ནང་འགྲོ་སོང་ཕྱིན་ཟིན་པ་མང་པོ་ཞིག་རྩིས་འགྲོ་མ་བཏང་བར་བཀག་པ་དང༌། དེ་ཚོ་ཆ་ཚང་ལས་ཁུངས་སོ་སོའི་ཟུར་དངུལ་ནས་བཏང་སྟེ་འགྲིགས་པ་བྱེད་ཀྱི་ཡོད་རེད། དེ་ལ་རྩིས་ཞིབ་དང་གྲོས་ཚོགས་གཉིས་ཀས་འགྲིགས་ཤག་གནང་ནས་རྩིས་ལོ་ ༢༠༠༡།༠༢ བར་ལམ་སྲོལ་དེ་རང་གནས་པ་རེད། ད་ལྟའི་བཀའ་ཤག་གིས་བཙན་བྱོལ་གཞུང་གི་དཔལ་འབྱོར་གྱི་འགྲོ་ལུགས་ཚད་ལྡན་ཡོང་ཐབས་དང༌། ཕྱོགས་བསྡོམས་མ་དངུལ་དུ་མ་ཚུད་ཅིང་གྲོས་ཚོགས་ཀྱི་བཏང་འཛིན་མེད་པའི་ཟུར་དངུལ་ཕོན་ཆེ་མེད་པ་བཟོ་ཐབས་དང༌། ལྷག་པར་བཙན་བྱོལ་བོད་མིའི་གཞུང་དངུལ་འདུ་འགོད་དང༌། ལོ་འཁོར་སྔོན་རྩིས། དངུལ་རྩིས་བཏང་འཛིན་བཅས་ཀྱི་སྒྲིག་གཞི་དོན་ཚན་ཁག་ཚད་ལྡན་ལག་བསྟར་ཡོང་ཐབས་སུ་ཚོགས་ཆུང་ཟུར་འཛུགས་ཀྱི་ཐོག་ནས་སྔོན་རྩིས་འབུལ་ཚུལ་གྱི་ལམ་སྲོལ་གསར་པ་བཟོས་ཏེ་གྲོས་ཚོགས་ཀྱི་བཏང་འཛིན་འོག་མེད་པའི་གཞུང་དངུལ་ཅིའང་མེད་པ་བཟོ་རྒྱུའི་ཐག་ཆོད་ཆེན་པོ་ཞིག་བྱས་པ་ཡིན། དེ་འདྲ་ཐག་ཆོད་མ་བྱས་པར་སྔོན་སྲོལ་རང་འཇགས་བཞག་པ་ཡིན་ནའང་གྲོས་ཚོགས་ཀྱི་ངོས་ནས་དེ་འདྲ་བྱེད་དགོས་པའི་ལམ་སྟོན་ཡོད་མ་རེད། ཡིན་ནའང་གཞུང་གི་སྒྲིག་འཛུགས་དང་མང་གཙོའི་ལམ་སྲོལ་སྲ་བརྟན་གོང་འཕེལ་ཡོང་ཐབས་ཀྱི་ཆེད་དུ་ཐག་ཆོད་དེ་འདྲ་ཞིག་བྱས་པ་རེད། དེ་འདྲ་ཡིན་ཙང་ད་ལྟའི་གནས་སྐབས་སུ་གཞུང་གྲོན་དུ་བཏང་ཟིན་པའི་དངུལ་འབོར་ཞིག་རྩིས་ཞིབ་ནས་རྩིས་འགྲོ་མ་བཏང་བར་བཀག་པ་ཡིན་ན་དེ་བསབ་རྒྱུའི་ཟུར་དངུལ་གང་ཡང་མེད་སྟབས། ལས་དོན་ཐོག་འགོག་རྐྱེན་འཕྲད་ཀྱི་འདུག་ལ། གལ་སྲིད་ལམ་སྲོལ་འདི་མུ་མཐུད་གནས་པ་ཡིན་ན་སླར་ཡང་ལས་ཁུངས་ཚང་མས་སྔོན་རྩིས་སུ་མ་ཚུད་པའི་ཟུར་དངུལ་ཞིག་མ་ཉར་ཐབས་མེད་ཀྱི་གནས་ཚུལ་ཡོང་སྲིད་པ་རེད། བཀའ་ཤག་གིས་གྲོས་ཚོགས་དང་རྩིས་ཞིབ་ལས་ཁང་གཉིས་ཀར་ཡང་ཡང་སྙན་གསན་ཞུས་པའི་དོན་སྙིང་རྩིས་ཞིབ་ཀྱིས་གཞུང་གྲོན་གཏོང་ཕྱོགས་ཐོག་སྒྲིག་གཞི་དང་ལམ་སྲོལ་མཐུན་མིན་བྱུང་བ་དེ་དག་མཛུབ་སྟོན་གནང་སྟེ་སྒྲིག་མཐུན་བཟོ་དགོས་པ་དང༌། འགྲོ་གྲོན་འཕར་མ་ཕྱིན་པའམ་བར་ཟོས་བྱས་པ་ལྟ་བུ་ཡིན་ན་དངུལ་འབབ་ཕྱིར་བསྡུ་དགོས་པའི་ལམ་སྟོན་གནང་བ་ཙམ་མ་གཏོགས། དངོས་འབྲེལ་གཞུང་གྲོན་དུ་ཕྱིན་པའི་འགྲོ་སོང་བྱུང་འཛིན་ལེན་ཕྱོགས་དང༌། བཀའ་འཁྲོལ་ཞུ་ཕྱོགས་ལྟ་བུའི་སྒྲིག་མཐུན་མ་བྱུང་བ་རྣམས་རྩིས་འགྲོ་མ་གཏོང་བར་བཀག་རྒྱུའི་དབང་ཚད་རྩིས་ཞིབ་པར་ཡོད་མ་རེད་ཅེས་ཞུས་ཡོད། གཞུང་གྲོན་དུ་བཏང་ཟིན་པའི་དངུལ་འབོར་ཞིག་རྩིས་འགྲོ་མ་བཏང་བ་ཡིན་ན་བྱུང་སོང་བསྡད་གསུམ་ཁ་འཐབ་ཀྱིས་ལོ་རེ་ལོ་རེའི་རྩིས་སྒོ་བརྒྱབ་ཐུབ་ཐབས་མི་འདུག ང་ཚོའི་གནས་ཚང་རྒྱ་གར་གཞུང་གིས་གཙོས་པའི་མང་གཙོའི་ལམ་སྲོལ་ཅན་གྱི་རྒྱལ་ཁབ་ག་འདྲ་ཞིག་ལ་བལྟས་ཀྱང་རྩིས་ཞིབ་པས་སྐྱོན་འདོན་བྱེད་རྒྱུ་མ་གཏོགས། རྩིས་འགྲོ་བཀག་རྒྱུའི་ལམ་སྲོལ་ཞིག་ཡོད་པ་མཐོང་མ་སོང༌། ལས་བྱེད་པའི་ཕོགས་དང་ཟུར་ཕོགས་འཕར་འཐོལ་ཕྱིན་པ་ལྟ་བུ་ཕྱིར་བསྡུ་བྱེད་རྒྱུའི་ལམ་སྲོལ་ཡོད་རེད། དེ་མིན་གཞུང་གི་སྐུ་མགྲོན་ཞིག་ལ་སྣེ་ལེན་གསོལ་སྟོན་བཤམས་པ་དང༌། འགྲིམས་འགྲུལ་འགྲོ་སོང་ཕུལ་ཟིན་པ་རྣམས་རྩིས་འགྲོ་མ་ཕྱིན་ན་ཚུར་སློག་རོགས་གནང་ཞུ་ཐུབ་ཐབས་མི་འདུག བཙན་བྱོལ་བོད་མིའི་བཅའ་ཁྲིམས་དང༌། འཛིན་སྐྱོང་དང་དཔལ་འབྱོར་དང་འབྲེལ་བའི་སྒྲིག་གཞི་ཁག རྩིས་ཞིབ་ཀྱི་སྒྲིག་གཞི་གང་གི་ནང་དུ་རྩིས་འགྲོ་བཀག་ན་འགྲིགས་པའི་ཆ་རྐྱེན་ཞིག་གསལ་མི་འདུག དེ་འདྲ་ཡིན་ཙང་གྲོས་ཚོགས་ནས་རྩིས་ཞིབ་པར་རྩིས་འགྲོ་བཀག་རྒྱུའི་དབང་ཚད་ཡོད་མེད་གསལ་པོ་བཟོས་གནང་བ་ཡིན་ན་དཀའ་ངལ་ཚང་མ་སེལ་ཐུབ་ཀྱི་རེད།
དོན་ཚན་གསུམ་པ་ཚོགས་ཆུང་གི་རྒྱབ་གཉེར་ནང་ཐེངས་གཅིག་བཀའ་འཁྲོལ་གནང་འཐུས་ཞེས་དོན་ཚན་མང་པོ་ལ་བཀོད་འདུག དེའི་ཤུགས་ལ་ག་རེ་འཕངས་ཀྱི་རེད་ཅེ་ན། ད་ལམ་ལན་གཅིག་མ་གཏོགས་རྗེས་སུ་གནས་ཚུལ་དེ་འདྲ་བྱུང་ན་ཡང་བསྐྱར་རྩིས་འགྲོ་མ་གཏོང་བར་བཀག་ཆོག་པ་ཞིག་བསྟན་གྱི་འདུག དེ་བཞིན་རྩིས་ཞིབ་པས་སྐྱོན་བརྗོད་བྱས་པ་བདེན་པ་རེད་འདུག་ཀྱང་ལན་གཅིག་བཀའ་འཁྲོལ་གནང་འཐུས་ཞེས་པ་དེ་འདྲའང་བཀོད་འདུག རྒྱབ་གཉེར་གྱི་ཚིག་བརྗོད་འདི་དག་གྲོས་ཚོགས་ནས་ངོས་བཞེས་གནང་སྟེ་གྲོས་ཆོད་ཅིག་བཞག་གནང་བ་ཡིན་ན་རྩིས་ཞིབ་ལས་ཁང་ལ་རྩིས་འགྲོ་མ་བཏང་བར་བཀག་རྒྱུའི་དབང་ཚད་ཡོད་པ་ཞིག་གྲོས་ཚོགས་ཀྱིས་ངོས་བཞེས་གནང་བའི་འགྲེལ་བརྗོད་བྱེད་རྒྱུ་ཡོད་པ་ཞིག་ཆགས་སྲིད་པ་རེད། དེ་འདྲ་སོང་ཙང་འདིའི་ཐོག་ཚང་མས་དགོངས་པ་ཟབ་ནན་བཞེས་ཏེ་ཐག་གཅོད་གནང་རོགས་གནང་ཞུ་རྒྱུ་ཡིན།
རྩིས་ཞིབ་ལས་ཁང་གིས་རྩིས་འགྲོ་མ་བཏང་བ་ལས་འཕྲོས་པའི་ཐོག་སླར་ཡང་གསལ་བཤད་གནང་བ།
བསྐྱར་དུ་གོ་སྐབས་གནང་བར་ཐུགས་རྗེ་ཆེ། ངས་ཚོགས་ཆུང་གི་སྙན་ཐོ་འགྲིགས་མི་འདུག་ཅེས་ཞུ་མ་དགོས་པ་བྱུང་ན་བསམ་སོང་ཡང༌། ད་ལྟ་བགྲོ་གླེང་ནང་བཀུར་འོས་སྤྱི་འཐུས་མང་པོ་ཞིག་གིས་རྩིས་ཁྲ་སྒྲིག་གཞི་དང་འགལ་འདུག་ཅེས་ཐག་ཆོད་པོའི་ཐོག་ནས་གསུངས་སོང༌། དེ་ལ་ཕྱི་ལོ་ ༢༠༠༢ ཚུན་ཆད་ཀྱི་རྩིས་འགྲོ་མ་བཏང་བའི་གྲས་སུ་བཀའ་ཤག་གི་ངོས་ནས་ཁྲིམས་དང་སྒྲིག་གཞི་དང་འགལ་བ་དང༌། འགྲོ་སོང་སྔོན་གཏོང་བཀའ་ཁྲོལ་རྗེས་ཞུས་བྱས་པ་གཅིག་ཀྱང་མེད་ཞུ་རྒྱུ་ཡིན། དོན་ཚན་རེ་རེ་བཞིན་ཞུས་ན་འགོར་གྱི་རེད། མདོར་ན་བསྐྱར་བཅོས་སྔོན་རྩིས་གོང་དུ་གློ་བུར་གཏོང་དགོས་ཀྱི་འགྲོ་གྲོན་ཞིག་ཡོད་ན་སྒྲིག་མཐུན་བཀའ་ཤག་ངེས་མེད་ནས་གཏོང་གི་ཡོད། རྩིས་འགྲོ་དེ་རང་འཇགས་བཞག་ཀྱང་ཆོག་ནའང་བསྐྱར་བཅོས་སྔོན་རྩིས་སྐབས་དེའི་ཆེད་བཀའ་ཁྲོལ་ཐོབ་པ་ཡིན་ན་བཀའ་ཤག་ངེས་མེད་ཀྱི་དངུལ་འབོར་ཕྱིར་ལོག་བྱས་པ་རེ་ཟུང་བྱུང་ཡོད། བཀའ་ཤག་ངེས་མེད་ནས་བཀའ་ཁྲོལ་གཏོང་རྒྱུའི་དབང་ཆ་ཆ་ཚང་བཀའ་ཤག་ལ་ཡོད་པ་ཡིན་ཙང༌། བཀའ་ཁྲོལ་སྔོན་ལ་བཏང་ནས་འགྲོ་སོང་རྗེས་ལ་བཏང་བ་རེད། དེའི་རྗེས་རྩིས་འགོ་དེའི་ཐོག་དབང་ཚད་ཆ་ཚང་ཡོད་པའི་གྲོས་ཚོགས་ནས་བསྐྱར་བཅོས་སྔོན་རྩིས་ནང་བཀའ་ཁྲོལ་ཐོབ་དུས་སྔོན་མའི་འགྲོ་སོང་བཀའ་ཤག་ངེས་མེད་དུ་ཕྱིར་གསབ་བྱས་པ་རེད། དེའང་བཀའ་ཁྲོལ་ཞུས་པའི་རྗེས་སུ་བཏང་བ་ཞིག་རེད། རྩིས་འགྲོ་བཀག་པའི་རྩིས་རེ་རེ་བཞིན་བཀའ་ཤག་གི་ངོས་ནས་སྒྲིག་གཞི་འགལ་མེད་པའི་འགྲེལ་བརྗོད་ཞུས་ཡོད། ད་དུང་རྩིས་ཞིབ་པའི་ངོས་ནས་སྒྲིག་གཞི་འགལ་བ་གཟིགས་ཀྱི་ཡོད་ན་མ་འོངས་པར་རྩིས་ཞིབ་པས་གསུངས་པ་བཞིན་ང་ཚོས་འབད་བརྩོན་བྱ་རྒྱུ་ཡིན་ཞེས་ཞུས་ཡོད། དེ་མིན་རང་ངོས་ནས་སྒྲིག་གཞི་འགལ་བར་ངོས་ལེན་བྱས་པ་གཅིག་ཀྱང་མེད། དཀའ་ངལ་ཆེ་ཤོས་སྒྲིག་གཞི་འགྲེལ་བརྗོད་བྱེད་སྟངས་དེ་རེད། དེ་འདྲ་ཡིན་ཙང་སྤྱི་འཐུས་རྣམ་པ་ཚོས་དོན་ཚན་རེ་རེ་བཞིན་དུ་བཀའ་ཤག་གི་འགྲེལ་བཤད་དེ་གཟིགས་རོགས་གནང༌། གཟིགས་པའི་རྗེས་ལ་བཀའ་ཤག་གི་འགྲེལ་བཤད་དེ་འོས་འཚམས་དང་བདེན་པ་མེད་པ་ཞིག་ཡིན་ན་དེའི་གནས་ཚུལ་གསུང་རྒྱུ་རེད་མ་གཏོགས། ད་ལྟ་ཚོགས་ཆུང་གིས་དོན་ཚན་མང་ཆེ་བའི་ནང་རྩིས་ཞིབ་པས་གསུངས་པ་བདེན་པ་རེད་འདུག་ཅེས་འཛིན་སྐྱོང་གིས་རྩིས་ཞིབ་ལ་འགྲེལ་བརྗོད་བྱས་པ་དེ་ཚད་ལྡན་ཡིན་པ་ངོས་ལེན་གནང་མི་འདུག གྲོས་ཚོགས་ནས་བདེན་པ་གང་ཡིན་དང༌། རྫུན་པ་གང་ཡིན་གྱི་དབྱེ་བ་ཕྱེ་ཆོག་གི་རེད། འོན་ཀྱང་རྒྱུ་མཚན་མེད་པར་མཐའ་གཅིག་ཏུ་འཛིན་སྐྱོང་གིས་གང་ཞུས་ཚད་ལྡན་མིན་པ་དང༌། རྩིས་ཞིབ་ཀྱིས་གང་གསུངས་ཚད་ལྡན་ཡིན་པ་སྔོན་ནས་ཚོད་དཔག་གནང་ན་འགྲིགས་ཀྱི་མི་འདུག དེ་རེ་རེའི་ཐོག་ཞིབ་གཟིགས་གནང་རོགས་གནང་ཞུ་རྒྱུ་ཡིན།
རྩིས་ཞིབ་ལས་ཁང་གིས་རྩིས་འགྲོ་མ་བཏང་བ་ལས་འཕྲོས་པའི་ཐོག་སླར་ཡང་བསྐྱར་ནན་གྱིས་གསལ་བཤད་གནང་བ།
ཡང་ཡང་དུས་ཚོད་ཞུ་རྒྱུ་འཚེར་པོ་འདུག་སྟེ། གྲོས་ཚོགས་ཀྱི་ནང་གནས་ཚུལ་ངོ་མ་གང་ཡིན་དེབ་ཐེར་དུ་བཞག་མ་ཐུབ་པ་ཡིན་ན་མ་འོངས་པར་ཡག་པོ་ཡོང་གི་མ་རེད། མ་གཞི་ཕྱག་འབྲེལ་ཤེས་རིག་བཀའ་བློན་གྱིས་གང་འཚམས་གསལ་པོ་བཟོས་ཟིན་པ་སོང་ཡང༌། ད་དུང་བསྐྱར་ནན་གྱི་ཚུལ་དུ་ཞུ་རྒྱུར། བཙན་བྱོལ་བོད་མིའི་གཞུང་དངུལ་འདུ་འགོད་དང༌། ལོ་འཁོར་སྔོན་རྩིས། དངུལ་རྩིས་བཏང་འཛིན་བཅས་ཀྱི་སྒྲིག་གཞིའི་ནང་རྩིས་ཞིབ་ལས་ཁང་གི་བྱེད་སྒོ་རྣམ་གསུམ་གྱི་སྐོར་གསལ་ཁ་བཏོན་ཡོད་མ་རེད། དེ་གྲོས་ཚོགས་དང་བཀའ་ཤག་གི་ལས་དོན་ཐོག་དམིགས་ཀྱིས་བཀར་བའི་སྒྲིག་གཞི་ཞིག་རེད། བཀའ་ཤག་གིས་རྒྱུན་དུ་ཕྱོགས་བསྡོམས་མ་དངུལ་ནས་གཏོང་དགོས་ཀྱི་འགྲོ་གྲོན་ག་འདྲ་ཞིག་ཡིན་ནའང་སྤྱི་འཐུས་ལྷན་ཚོགས་ཀྱིས་གཏན་ལ་ཕབ་པའི་གཏོང་ལེན་ཁྲིམས་ཡིག་གཞིར་བཟུང་མ་གཏོགས། དེ་དང་འགལ་བའི་འགྲོ་གྲོན་སྣ་གཅིག་བཏང་མེད། གཏོང་ལེན་ཁྲིམས་ཡིག་ཕྱི་ཟླ་གསུམ་པ་དང༌། དེའི་བསྐྱར་བཅོས་བསྐྱར་བཅོས་སྔོན་རྩིས་སྐབས་གནང་གི་ཡོད་རེད། བཀའ་ཤག་སོ་སོས་དུས་ཐོག་སྔོན་རྩིས་ཕུལ་ཐུབ་པ་བྱུང་བ་ཡིན་ཙང༌། ཚོད་དཔག་འཆར་རྩིས་ལ་འོས་ཤོག་འཕེན་དགོས་པ་ཞིག་ད་བར་བྱུང་མེད། ལོ་ལྟར་གཏོང་ལེན་ཁྲིམས་ཡིག་གཏན་ལ་ཕབ་ཐུབ་པ་བྱུང་ཡོད་རེད། ཕྱོགས་བསྡོམས་མ་དངུལ་ནས་གཏོང་དགོས་པའི་འགྲོ་སོང་ཁ་གང་སྐར་མ་ལྔ་ད་ལྟ་ཕན་ཆད་གཏོང་ལེན་ཁྲིམས་ཡིག་གི་ལམ་ནས་བཀའ་ཁྲོལ་མ་ཐོན་པ་ཞིག་བཏང་བ་རྩ་བ་ནས་བྱུང་མེད་ཅེས་བཀའ་ཤག་གིས་ཐག་བཅད་ནས་ཞུ་རྒྱུ་ཡིན། རྩིས་ཞིབ་ཀྱིས་གསུངས་པ་དེ་བདེན་པ་རེད་འདུག་ཀྱང༌། ལན་གཅིག་ཆག་ཡང་གནང་རོགས་གནང་ཞེས་ཞུ་དགོས་དོན་རྩ་བ་ནས་མེད། བཙན་བྱོལ་བོད་མིའི་གཞུང་དངུལ་འདུ་འགོད་དང༌། ལོ་འཁོར་སྔོན་རྩིས། དངུལ་རྩིས་བཏང་འཛིན་བཅས་ཀྱི་སྒྲིག་གཞི་དོན་ཚན་ལྔ་པའི་ནང་གསེས་གསུམ་པའི་ནང་ཕྱོགས་བསྡོམས་མ་དངུལ་ནས་གཏོང་དགོས་ཀྱི་འགྲོ་གྲོན་གང་ཡང་སྤྱི་འཐུས་ལྷན་ཚོགས་ཀྱིས་གཏན་འབེབས་ལོ་རེའི་གཏོང་ལེན་ཁྲིམས་ཡིག་གམ། ཚོད་དཔག་འཆར་རྩིས་ལ་འོས་ཤོག་བསྡུ་བའི་ཐོག་ནས་བཀའ་ཁྲོལ་མ་ཐོབ་པ་ཞིག་ནམ་ཡང་གཏང་མི་ཆོག ཅེས་པ་དེ་བཀའ་ཤག་གིས་འགྲོ་གྲོན་གཏོང་མི་ཆོག་པ་ལ་གོ་དགོས་པ་མ་གཏོགས། རྩིས་ཞིབ་ལས་ཁང་གིས་རྩིས་འགྲོ་མ་བཏང་བ་བྱེད་ཆོག་ཅེས་པའི་གོ་དོན་རྩ་བ་ནས་མ་རེད། སྒྲིག་གཞིའི་དོན་ཚན་འདིའི་འོག་ནས་རྩིས་ཞིབ་པར་རྩིས་འགྲོ་མ་བཏང་བའི་དབང་ཚད་ཡོད་ཚུལ་གསུངས་པ་ཡིན་ན་སྒྲིག་གཞིའི་འགྲེལ་བརྗོད་ལོག་པ་གནང་གི་ཡོད་རེད། སྒྲིག་གཞིའི་དོན་ཚན་འདིའི་འོག་ནས་རྩིས་ཞིབ་པར་རྩིས་འགྲོ་བཀག་རྒྱུའི་དབང་ཚད་ཐོབ་ཚུལ་གསུངས་པ་ཡིན་ན་དྲུང་ཆེ་དྲུང་གཞོན་གཞོན་དྲུང༌། ཐ་ན་སྲང་ལམ་དུ་འགྲོ་མཁན་གྱི་མི་ཞིག་ལའང་རྩིས་འགྲོ་བཀག་རྒྱུའི་དབང་ཚད་ཡོད་པའི་འགྲེལ་བཤད་བྱེད་ཆོག་གི་རེད། བཀུར་འོས་སྤྱི་འཐུས་རྣམ་པས་སྒྲིག་གཞི་འགྲེལ་བརྗོད་གནང་བའི་སྐབས་དངོས་དོན་དང་མཐུན་པའི་ཚད་ལྡན་ཞིག་གནང་དགོས་པ་མ་གཏོགས། བགྲོ་གླེང་དང༌། ཞལ་བདེ་པོ་གསུང་རྒྱུ། འུར་བརྒྱབ་རྒྱུ་ཙམ་གྱི་ཆེད་དུ་སྒྲིག་གཞི་གླ་ལྤགས་ནང་བཞིན་ཕར་འཐེན་ཚུར་འཐེན་གནང་ན་ཕན་ཐོགས་ཡོད་མ་རེད། གང་ལྟར་བཀའ་ཤག་གིས་ད་ལྟ་རྩིས་ཞིབ་ནས་རྩིས་འགྲོ་མ་བཏང་བའི་རྩིས་འགོ་འདི་ཚོ་འགྲོ་སོང་སྔོན་བཏང་བཀའ་ཁྲོལ་རྗེས་ཞུས་བྱས་པ་དང༌། སྔོན་རྩིས་བཏང་འཛིན་སྒྲིག་གཞི་དོན་ཚན་ལྔ་པའི་ནང་གསེས་ཁག་དང་འགལ་བ་བྱུང་མེད་ཅེས་ནན་དུ་བསྣན་ནས་ལན་གཉིས་ལན་གསུམ་དུ་ཞུ་རྒྱུ་ཡིན།
གྲོས་ཚོགས་ཚོགས་དུས་བཅུ་པ། ༢༠༠༥།༩།༡༤ ནས་ ༢༠༠༥།༩།༢༣