བདེ་སྲུང་ལས་ཁུངས་ཀྱི་ལོ་འཁོར་ལས་བསྡོམས་ཐོག་བགྲོ་གླེང་བྱུང་བར་ལན་འདེབས།
བགྲོ་གླེང་ལ་གསལ་བཤད་ཞུ་རྒྱུའི་གོ་སྐབས་གནང་བ་དང༌། ལྷག་པར་དུ་ལས་ཁུངས་བང་རིམ་བཞིན་སྒུག་མ་དགོས་པར་བདེ་སྲུང་གི་གསལ་བཤད་སྔོན་ལ་ཞུ་རྒྱུའི་གོ་སྐབས་གནང་བ་ལ་ཐུགས་རྗེ་ཆེ་ཞུ་རྒྱུ་ཡིན། དང་པོ། བདེ་སྲུང་ལས་ཁུངས་དང་འབྲེལ་བ་ཡོད་པའི་གནས་ཚུལ་གལ་ཆེ་བ་གཅིག་ནི། བལ་ཡུལ་དང་དིལླཱི་སྣེ་ལེན་ཁང་གི་ལས་བྱེད་པ་དེ་ཚོས་ལས་དོན་ཡག་པོ་བྱེད་ཀྱི་མི་འདུག ཁ་འཇམ་པོ་བཤད་ཀྱི་མི་འདུག བོད་ནས་གསར་འབྱོར་ཡོང་མཁན་རྣམས་ལ་ཧ་ཅང་གི་བློ་ཕམ་འགྲོ་གཞི་དེ་འདྲ་བྱེད་ཀྱི་འདུག་ཅེས་གསུངས་སོང༌། གཅིག་བྱས་ན་གནས་ཚུལ་དེ་འདྲ་ཏན་ཏན་བྱུང་ཡོད་ཀྱི་རེད། ཡིན་ནའང་འདས་པའི་ལོ་གསུམ་དང་ཕྱེད་ཀའི་རིང་བལ་ཡུལ་སྣེ་ལེན་ཁང་དང༌། དིལླཱི་སྣེ་ལེན་ཁང༌། དེ་བཞིན་དྷ་ས་སྣེ་ལེན་ཁང་གི་ལས་བྱེད་ཚང་མར་བཀའ་ཤག་དང་བདེ་སྲུང་གཉིས་ཀ་ནས་དམིགས་ཀྱིས་བཀར་ནས་བསྐུལ་མ་དང་ལམ་སྟོན། ཟབ་སྦྱོང་སོགས་སྤྲད་ནས་སྣེ་ལེན་ཞུ་སྟངས་ཀྱི་ཐོག་བོད་ནས་གསར་དུ་ཕེབས་པ་རྣམས་ཀྱི་དགོངས་པ་ལ་མ་འབབ་པའི་གནས་སྟངས་མི་ཡོང་བ་བྱེད་དགོས་པ་དང༌། བོད་མི་གཞིས་བྱེས་གཉིས་ཀྱི་དབར་འབྲེལ་བ་བཟང་ངན་ག་འདྲ་ཞིག་ཡོང་མིན་དེ་སྣེ་ལེན་ཁང་གི་ལས་དོན་བྱེད་ཕྱོགས་ཐོག་ལ་རག་ལུས་པ་ཡིན་སྟབས། དེ་གནད་འགག་ཆེན་པོ་ཡིན་པའི་སྐོར་ཡང་ནས་ཡང་དུ་ལམ་སྟོན་བྱེད་བཞིན་ཡོད། དབུས་སྣེ་ལེན་ཁང་དང༌། བདེ་སྲུང་གི་ལས་བྱེད། བདེ་སྲུང་བཀའ་བློན་བཅས་པས་བོད་ནས་ཕེབས་པའི་གནད་ཡོད་ཀྱི་མི་མང་ཆེ་བ་ངོ་མཇལ་ཞུ་རྒྱུའི་འབད་བརྩོན་བྱེད་ཀྱི་ཡོད། ད་ལྟ་བར་དུ་བོད་ནས་གསར་དུ་ཕེབས་པ་ང་ཚོ་དང་མཇལ་བ་སུས་ཀྱང་གནས་ཚུལ་དེ་འདྲ་བྱུང་ལུགས་བཀའ་གནང་མཁན་མ་བྱུང༌། དབུས་སྣེ་ལེན་ལའང་དེ་འདྲའི་གནས་ཚུལ་གང་ཡང་བྱུང་མི་འདུག དེ་འདྲ་ཡིན་དུས་གནས་ཚུལ་དེ་རིགས་ང་ཚོས་མ་ཤེས་པ་ཞིག་ཆགས་ཀྱི་ཡོད་རེད། སྔོན་མ་ངས་གྲོས་ཚོགས་ནང་ཞུས་མྱོང་ལ། ད་དུང་ཡང་བསྐྱར་ལྡབ་ཀྱིས་ཞུ་རྒྱུ་ཞིག་ལ། མ་འོངས་པར་གནས་ཚུལ་དེ་འདྲ་ཞིག་གསན་བྱུང་ཟེར་བ་ཙམ་མ་ཡིན་པར་སྣེ་ལེན་ལས་བྱེད་འདི་དང་འདི་ཞེས་བྱ་བས་བོད་ནས་གསར་དུ་ཕེབས་པ་འདི་དང་འདི་ཞེས་བྱ་བ་ལ་གནས་ཚུལ་འདི་དང་འདི་བྱུང་འདུག་ཅེས་བཀའ་གནང་ཐུབ་པ་ཡིན་ན། ང་ཚོས་དེའི་ཐོག་ལ་ཞིབ་འཇུག་དང་བཏང་འཛིན་བྱ་རྒྱུ་ལ་ཕན་ཆེན་པོ་ཞིག་ཐོགས་ས་རེད། དེ་མ་གཏོགས་གོ་རྒྱུ་འདུག་སོགས་གསུངས་དུས་ང་ཚོས་ལས་བྱེད་ལ་འདྲི་རྩད་བྱེད་སྐབས་དེ་འདྲ་རྩ་བ་ནས་ཞུས་མེད། དེ་འདྲ་ག་དུས་ཞུས་འདུག སུ་ལ་ཞུས་འདུག་ཁུངས་སྐྱེལ་གནང་རོགས་ཞེས་ཞུས་སྐབས། ང་ཚོས་ལན་རྒྱག་ཐུབ་ཀྱི་མི་འདུག བྱས་ཙང་མ་འོངས་པར་གནས་ཚུལ་འདི་གལ་ཆེན་ཞིག་ཡིན་སྟབས། གནས་ཚུལ་བྱུང་རིམ་གསལ་པོ་ཞིག་བཀའ་གནང་ཐུབ་པ་ཡིན་ན་ཕན་ཐོགས་ཆེན་པོ་ཡོང་ས་རེད་ཅེས་ཞུ་རྒྱུ་གཅིག་དང༌། གཉིས་སུ་དེ་འདྲའི་གནས་ཚུལ་བྱུང་སྐབས་ཟླ་བ་དྲུག་ཙམ་རྗེས་གྲོས་ཚོགས་མ་ཚོགས་བར་སྒུག་དགོས་དོན་མི་འདུག སྐབས་འཕྲལ་བདེ་སྲུང་དྲུང་ཆེའམ་དབུས་སྣེ་ལེན་འགན་འཛིན་ལ་ཞལ་པར་ཞིག་གནང་བ་ཡིན་ན་ང་ཚོའི་ངོས་ནས་ཀྱང་གནས་ཚུལ་གསོས་ཐོག་ཞིབ་འཇུག་བྱ་རྒྱུར་ཕན་ཐོགས་ཡོང་ས་རེད། དེ་མིན་ཟླ་བ་དྲུག་གི་རྗེས་སུ་གྲོས་ཚོགས་ནང་བཀའ་གནང་དུས་འདས་པ་དེ་འདས་པ་རང་རེད། འདས་པའི་རྗེས་གཅོད་རྒྱུ་དེ་ཁག་པོ་རེད།
གཉིས་པ་གནས་ཚུལ་གཞན་ཞིག་ལ། བལ་ཡུལ་ནས་དམིགས་བསལ་རྒྱ་གར་ནང་ཡོང་སླད་ལག་ཁྱེར་གཏོང་སྟངས་དྲང་པོ་བྱེད་ཀྱི་མི་འདུག ཁ་ཤས་ཟླ་བ་མང་པོ་སྒུག་བསྡད་པ་ཡིན་ནའང་ལག་ཁྱེར་མ་ཐོབ་པ་དང༌། ཁ་ཤས་སླེབས་ནས་ཉིན་ཤས་རྗེས་ཐོན་འགྲོ་གི་འདུག་ཅེས་གསུངས་སོང་བས། དེ་ལ་ཡང་མི་འདི་འདྲ་ཞིག་ཟླ་བ་མང་པོ་ལུས་འདུག མི་འདི་འདྲ་ཞིག་ཉིན་ཤས་ནང་ཐོན་འདུག་ཅེས་བཀའ་གནང་བ་ཡིན་ན། ང་ཚོས་ངེས་པར་དུ་ཞིབ་འཇུག་བྱེད་ཆོག་གི་རེད། ད་ལྟའི་ཆར་སྒྲིག་འཛུགས་ཀྱི་ལམ་སྟོན་གཞིར་བཟུང་སྣེ་ལེན་ཁང་དུ་འབྱོར་ཚེས་གོ་རིམ་དང་བསྟུན་ནས་རྒྱ་གར་གཞུང་གིས་ཉིན་རེར་མི་བཅོ་ལྔ་ཙམ་རེ་གཏོང་གི་ཡོད་པ་རེད། དེའི་ནང་ནས་དམིགས་བསལ་གཏོང་རྒྱུའི་ཆ་རྐྱེན་དོན་ཚན་བཞི་ཞིག་ལོ་ལྔ་དྲུག་གི་གོང་ནས་གཏན་འབེབས་བྱས་འདུག རྒྱ་ནག་གཞུང་གི་ཕྱིར་བསྐྱོད་ལག་ཁྱེར་ཡོད་ཁོངས་ནས་བོད་ནང་གི་དགོན་སྡེ་ཁག་གི་གནས་སྟངས་ཛ་དྲག་གི་སྙན་གསན་ཞུ་རྒྱུ་ཡོད་པའི་རིགས་དང་གཅིག ཆབ་སྲིད་དང་འབྲེལ་བའི་མི་ཞིབ་འཇུག་གིས་དངོས་ར་འཕྲོད་པ་དུས་ཚོད་ངེས་ཅན་གྱི་ནང་གནས་ཚུལ་ངེས་ཅན་ཞུ་རྒྱུའི་དགོས་མཁོ་ཡོད་པ་དང་གཉིས། ཆབ་སྲིད་བཙོན་ཟུར་དངོས་འབྲེལ་ཡིན་པ་དང་གསུམ། ཕྲུ་གུ་ལོ་དྲུག་ནས་བཅུའི་བར་འཁྲིད་རྒྱུ་ཡོད་མཁན་རྣམས་ཀྱི་ཕྲུ་གུའི་འཕྲོད་བསྟེན་དང་སློབ་སྦྱོང་གི་གོ་སྐབས་ལ་གནོད་གཞི་འགྱུར་རིགས་དང་བཞི་ལ་སྒུག་ཐོའི་བང་རིམ་བསྒྲིག་མ་དགོས་པར་དམིགས་བསལ་སྔོན་དུ་གཏོང་རྒྱུའི་ལམ་སྟོན་གཏན་འབེབས་ཡོད་པ་རེད་འདུག དེ་འདྲ་མ་ཡིན་པར་ལས་བྱེད་པའི་བྱེད་ཕྱོགས་ཀྱི་ཐོག་ནས་དྲང་མིན་གྱིས་སྔོན་དུ་བཏང་བ་དེ་འདྲ་ཡོད་པ་ཡིན་ན། མིང་དང་ལོ་རྒྱུས་ཁ་གསལ་བཀའ་གནང་རོགས་གནང་ཞེས་ཞུ་རྒྱུ་ཡིན།
གསུམ་པ། ཉེ་ཆར་བལ་ཡུལ་དོན་གཅོད་དང་བོད་མིའི་བདེ་དོན་ལས་ཁུངས་གཉིས་པོ་དེ་དེབ་སྐྱེལ་མེད་པའི་རྒྱུ་མཚན་ལ་བརྟེན་ནས་སྒོ་བརྒྱབས་པའི་དབང་གིས་བོད་མི་གསར་འབྱོར་བ་ཚོ་ལ་དོ་ཕོག་གང་ཕྱིན་ཡོད་དམ་ཞེས་བཀའ་གནང་སོང༌། དེ་ལ་དོ་ཕོག་གང་ཡང་འགྲོ་མི་འདུག་ཞུ་རྒྱུ་ཡིན། བལ་ཡུལ་གཞུང་གིས་བོད་མི་སྐྱབས་བཅོལ་བ་ལ་འཛིན་པའི་སྲིད་བྱུས་ལ་འགྱུར་བ་མེད་ཅེས་གསལ་བསྒྲགས་གནང་བ་བཞིན། སྣེ་ལེན་ཁང་གི་ལས་དོན་གྱི་ཐོག་ལ་ད་བར་མངོན་གསལ་དོད་པའི་དོ་ཕོག་ཕྱིན་པ་གང་ཡང་བྱུང་མི་འདུག བོད་ནས་གསར་འབྱོར་སྣེ་ལེན་ཞུ་ཕྱོགས་དང༌། རྒྱ་གར་དུ་གཏོང་རྒྱུའི་ལས་དོན་ཐོག་ཉིན་ཤས་འགྲུལ་ལམ་ཆ་ཚང་འགག་པའི་སྐབས་སུ་གནས་སྟངས་གཅིག་གྱུར་བྱུང་བ་མ་གཏོགས། དེ་མིན་དམིགས་བསལ་གྱིས་དཀའ་ངལ་ཆེ་བ་དེ་འདྲ་གང་ཡང་བྱུང་མི་འདུག་ཞུ་རྒྱུ་ཡིན། ཡིན་ནའང་མ་འོངས་པར་དཀའ་ངལ་ཡོང་གི་མ་རེད་ཅེས་ཞུ་རྒྱུ་ཁག་པོ་འདུག བལ་ཡུལ་གྱི་གནས་བབ་ཐོག་ཧ་ཅང་གིས་སེམས་འཚབ་ཆེན་པོ་ཡོད། མ་འོངས་པར་བལ་ཡུལ་ནང་བོད་མིའི་མདུན་ལམ་དེ་ག་འདྲ་ཞིག་ཆགས་ཀྱི་ཡོད་མེད་ད་ལྟ་ཞུ་ཐུབ་ཀྱི་མི་འདུག གནས་ཚུལ་འདི་གྲོས་ཚོགས་ཀྱི་ནང་གསལ་པོ་ཞུ་རྒྱུ་གལ་ཆེན་པོ་མཐོང་སོང༌།
བཞི་པ། ཆབ་སྲིད་བཙོན་ཟུར་ཕྱི་རྒྱལ་དུ་གཞིས་ཆགས་གཏོང་ཚུལ་སྐོར་ལ་བཀའ་མོལ་ཞིག་བྱུང་སོང༌། དེ་གཏན་ལ་ཕབ་པའི་སྲིད་ཇུས་གཞིར་བཟུང་ཐོག་འགྲོ་བསྡད་ཀྱི་ཡོད། ད་ལྟ་གཞིས་ཆགས་གཏོང་བཞིན་པ་ཡིན་ལ། མ་འོངས་པར་ཡང་དུས་ཡུན་གང་འཚམས་ཤིག་བར་དུ་གཏོང་ཐུབ་པའི་རེ་བ་བྱེད་ཀྱི་ཡོད། འདིའི་སྐོར་ཞིབ་ཚགས་པོ་གྲོས་ཚོགས་ནང་ཞུ་མི་དགོས་པ་བྱུང་ན་ཡག་པོ་འདུག་ཅེས་ཞུ་རྒྱུ་ཡིན།
ལྔ་པ། དེ་ནས་གནད་འགག་ཆེ་ཤོས་ཤིག་ལ། བོད་མི་སྐྱབས་བཅོལ་བའི་ལག་འཁྱེར་སྐོར་སྤྱི་འཐུས་མང་པོ་ཞིག་གིས་ཐུགས་འཚབ་ཆེན་པོའི་ངང་བཀའ་གནང་སོང༌། དེ་དངོས་ཡོད་ཀྱི་གནས་ཚུལ་རེད། ང་ཚོས་བསམ་པ་ནང་བཞིན་བོད་མི་ཡོངས་རྫོགས་ལ་སྐྱབས་བཅོལ་ལག་ཁྱེར་བཟོ་རྒྱུའི་ལས་དོན་དེ་འགྲུབ་ཡོད་མ་རེད། དེ་ལ་བཀའ་ཤག་དང་བདེ་སྲུང་ངོས་ནས་དགོངས་སེལ་ཞུ་རྒྱུ་ཡིན། གྲོས་ཚོགས་ཀྱི་བརྒྱུད་ནས་མང་ཚོགས་ལའང་དགོངས་སེལ་ཞུ་རྒྱུ་ཡིན། ལས་དོན་མ་འགྲུབ་པ་དེ་ང་ཚོས་ཐབས་ཤེས་དང་འབད་བརྩོན་མ་བྱས་པའི་དབང་གིས་མ་འགྲུབ་པ་ཞིག་མ་རེད། གཞན་དབང་སྟབས་བསྟུན་བྱེད་དགོས་ཙང་དེའི་དབང་གིས་མ་འགྲུབ་པ་ཞིག་རེད་ལ། ལས་དོན་མ་འགྲུབ་པ་དེ་དང་བཙན་བྱོལ་བོད་མི་ཚོས་རྒྱ་གར་གྱི་ལས་བྱེད་ལ་ལྐོག་རྔན་སྤྲད་རྒྱུའི་གཤིས་ཀ་གཉིས་ཧ་ཅང་འབྲེལ་བ་ཉེ་པོ་ཡོད་ཅེས་ཡང་བསྐྱར་བསྐྱར་ལྡབ་བྱས་ནས་ཞུ་འདོད་བྱུང༌། ད་ལྟ་ལས་དོན་ལམ་ལྷོང་མ་ཕྱིན་པ་དེ་གཙོ་ཆེ་བ་ཞིག་ས་གནས་སོ་སོའི་འབྲེལ་ཡོད་ཀྱི་ལས་བྱེད་ཁག་གིས་དབུས་གཞུང་ལ་གསང་སྙན་དང་ཡོངས་གྲགས་ཀྱི་སྙན་ཞུ་འབུལ་སྟངས་ལ་བརྟེན་ནས་དུས་འགྱངས་བྱུང་བ་རེད། སྐྱབས་བཅོལ་བའི་ལག་ཁྱེར་ཁྲིམས་མཐུན་ཐོག་ལས་སླ་པོ་བྱས་ནས་བཟོ་ཐུབ་པའི་གནས་ཚུལ་ཞིག་བྱུང་བ་ཡིན་ན། ས་གནས་ཀྱི་རྒྱ་གར་གྱི་ལས་བྱེད་མང་པོ་ཞིག་གི་ཡོང་འབབ་ཀྱི་བརྒྱུད་ལམ་ཆེན་པོ་ཞིག་འགག་འགྲོ་རྒྱུ་ཡིན་སྟབས། གནས་ཚུལ་དེ་དང་རྒྱ་གར་ནང་ས་གནས་སོ་སོའི་ལས་བྱེད་དང༌། བལ་ཡུལ་ནས་ཐོངས་མཆན་གཏོང་མཁན་བར་འབྲེལ་བ་ཆགས་པ་དང༌། དེ་འདྲའི་རྐྱེན་གྱིས་གནས་ཚུལ་དེ་ནར་འགྱངས་ཕྱིན་པ་ཞིག་དང༌། ལྷག་པར་དུ་གནས་ཚུལ་མང་པོ་ཞིག་མཐའ་མའི་ཐག་གཅོད་ཡོང་ལ་ཉེ་བའི་སྐབས་དེར་རྒྱ་གར་དབུས་གཞུང་འགྱུར་བ་ཕྱིན། གཞུང་གསར་པ་བཙུགས་པའི་རྗེས་སུ་གཞི་ནས་ལས་དོན་གསར་དུ་འགོ་འཛུགས་བྱེད་དགོས་པའི་གནས་སྟངས་ཤིག་བྱུང་བ་རེད། འོན་ཀྱང་ད་ལྟ་རེ་བ་མེད་པ་ཆགས་མེད་ལ། འབད་བརྩོན་བྱེད་རྒྱུ་ཡང་མཚམས་བཞག་མེད་ཞུ་རྒྱུ་ཡིན། ང་ཚོའི་ངོས་ནས་ལས་དོན་དེ་གལ་ཆེ་ཆུང་ཇི་ཙམ་རྩིས་ཀྱི་ཡོད་མེད་གྲོས་ཚོགས་སུ་གསལ་པོ་ཞུས་པ་ཡིན་ན། རྒྱ་གར་ཕྱི་སྲིད་དྲུང་ཆེ་ཉེ་ཆར་ྋགོང་ས་མཆོག་མདུན་མཚམས་ཞུར་བཅར་བའི་སྐབས་ྋགོང་ས་མཆོག་ཉིད་ནས་ཕྱི་སྲིད་དྲུང་ཆེ་ལ་དེའི་སྐོར་བཀའ་མངགས་ནན་པོ་གནང་སོང༌། ལས་ཁུངས་མང་པོ་དང་འབྲེལ་བ་ཡོད་པའི་ Interdepartmental གནས་སྟངས་ཤིག་སོང་བ་ཡིན་ཙང༌། ཕྱོགས་གཅིག་ནས་བྱེད་ཐུབ་ཀྱི་མི་འདུག ཉེ་ཆར་ Interdepartmental ཚོགས་འདུ་ཞིག་ཚོགས་ཚར་བ་དང༌། ཡང་བསྐྱར་ཚོགས་རྒྱུའི་གྲ་སྒྲིག་བྱེད་བཞིན་པ་བཅས་རྒྱ་གར་གཞུང་གི་ངོས་ནས་ཐུགས་སྣང་གནང་བཞིན་པ་དང༌། ལས་ཀ་འགྲོ་བཞིན་པ་ཞིག་རེད། གལ་སྲིད་ད་ལམ་ལན་གཅིག་ལས་ཀ་ལམ་ལྷོང་བྱུང་བ་ཡིན་ནའང༌། བོད་པས་ལྐོག་རྔན་སྤྲོད་པའི་གཤིས་ཀ་དེ་མེད་པ་མ་ཆགས་ཀྱི་བར་དུ་ག་དུས་ཡིན་ཡང་དཀའ་ངལ་ཞིག་ཡོང་བསྡད་ཀྱི་རེད། གང་ལྟར་བོད་པའི་ལྐོག་རྔན་སྤྲོད་རྒྱུའི་ལམ་སྲོལ་དང་གཤིས་ཀ་དེ་ལ་འགྱུར་བ་ཞིག་མ་ཕྱིན་བར་གནས་ཡུལ་གཞུང་གི་ལས་ཁུངས་ཁག་ནས་བཀའ་འཁྲོལ་ཞུ་དགོས་པའི་ལས་དོན་གྱི་རིགས་ལ་དཀའ་ངལ་མེད་པ་ཞིག་ཡོང་རྒྱུ་མེད་པ་ཐག་གཅད་ཆོག་གི་རེད་ཅེས་ངས་གྲོས་ཚོགས་ལ་གསལ་པོ་ཞུ་རྒྱུ་ཡིན། རྒྱ་གར་གཞུང་དང་གོ་བསྡུར་བྱས་ནས་ཐག་བཅད་པ་གཞིར་བཟུང་གིས་ ༢༠༠༣ སྔོན་རྒྱ་གར་ལ་འབྱོར་བའི་སྐྱབས་བཅོལ་ལག་ཁྱེར་འཁྱེར་རྒྱུ་མེད་མཁན་མི་གྲངས་ ༧༣༥༧ གྱི་མཚན་ཐོ་རྒྱ་གར་གཞུང་ལ་སྤྲད་ཟིན་པ་རེད། དེ་ཚོས་སྐྱབས་བཅོལ་ལག་ཁྱེར་སྒུག་བསྡད་ཡོད་རེད། དེའི་རྗེས་ལ་དམིགས་བསལ་ལག་ཁྱེར་ཞུས་ནས་འབྱོར་བ་མི་ ༤༡༩༦ ད་ལྟ་སྐྱབས་བཅོལ་ལག་ཁྱེར་མ་སྤྲད་པའི་ཐོ་ཡང་རྒྱ་གར་གཞུང་ལ་སྤྲད་ནས་ཕལ་ཆེར་ལོ་གཅིག་འཁོར་གྲབས་ཡོད། དེ་དངོས་སུ་ལག་ལེན་བསྟར་རྒྱུ་དེ་ས་གནས་སོ་སོའི་འབྲེལ་ཡོད་ཀྱི་ལས་བྱེད་ལ་ཐུག་ཡོད་པ་དང༌། རྒྱ་གར་ནང་སྲིད་ལས་ཁུངས་ཀྱི་མཐུན་འགྱུར་ལ་རག་ལུས་པ་སོང་ཙང༌། དེའི་ཐོག་ནས་འགག་པ་ཞིག་རེད། ད་ལྟ་ངས་བསྐྱར་ལྡབ་བྱས་ནས་ཞུ་རྒྱུ་ཞིག་ལ། རྒྱ་གར་གཞུང་གི་ངོས་ནས་ཁྲིམས་དང་མཐུན་པའི་ལག་ཁྱེར་གནང་རྒྱུ་དང༌། ཁྲིམས་དང་མཐུན་པའི་སྐྱེས་ཚེས་ཀྱི་ལག་ཁྱེར་ལ་ངོས་ལེན་གནང་རྒྱུ་དང༌། སློབ་གྲྭ་ཁག་གི་ཡིག་ཐོག་ལ་བཀོད་པའི་སྐྱེས་ཚེས་ལ་ངོས་འཛིན་གནང་རྒྱུ་དེ་ཚོ་ཚང་མ་ཞལ་བཞེས་གནང་གྲུབ་པ་ཞིག་རེད། དེ་འདྲ་སོང་ཙང་གྲོས་ཚོགས་སྔོན་མའི་སྐབས་ལ་ངས་སྐད་གསངས་མཐོན་པོ་བྱས་ནས་ཞུས་སོང་ཞེས་བཀའ་གནང་སོང༌། དེ་རིང་ངས་སྐད་གསངས་དམའ་པོ་བྱས་ནས་ཞུ་རྒྱུ་ལ། ད་དུང་ཡང་ང་ཚོས་རེ་བ་རྒྱག་གི་ཡོད། རྩ་བའི་སྲིད་བྱུས་ཀྱི་ཐོག་ནས་ཆོག་མཆན་བྱུང་ཟིན་པ་རེད། ལག་ལེན་ལ་འཁྱེར་དང་མ་འཁྱེར་དེ་གནས་ཚུལ་མང་པོ་ཞིག་ལ་རག་ལུས་ཀྱི་འདུག་ཅེས་ཞུ་རྒྱུ་ཡིན། ཕལ་ཆེར་དེ་ཙམ་ཡིན་པ་འདྲ།
གྲོས་ཚོགས་ཚོགས་དུས་དགུ་པ། ༢༠༠༥།༣།༡༥ ནས་ ༢༠༠༥།༣།༢༨