༄༅།། ༸སྤྱི་ནོར་༸གོང་ས་རྒྱལ་བ་རིན་པོ་ཆེས་མཛད་པའི་༸སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་གི་ཞབས་བརྟན་གསོལ་འདེབས་བཞུགས་སོ།།
༄༅།། ༸སྤྱི་ནོར་༸གོང་ས་རྒྱལ་བ་རིན་པོ་ཆེས་མཛད་པའི་༸སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་གི་ཞབས་བརྟན་གསོལ་འདེབས་བཞུགས་སོ།།
༄༅།། དཔག་ཡས་སྙིང་རྗེའི་རླབས་ཆེན་སྤྱོད་པ་ཡིས། །
རང་གཞན་དོན་གཉིས་གྲུབ་པའི་སར་གཤེགས་པ། །
འདྲེན་པ་འགྲོ་བའི་ཉི་མ་གང་དེ་ཡིས། །
དགེ་ལེགས་རྒྱ་མཚོས་དེང་འདིར་སྲུངས་ཤིག་གུ། །
ཚེ་འོད་དཔག་མེད་ཡིད་བཞིན་འཁོར་ལོའི་མགོན། །
རྣམ་པར་རྒྱལ་མ་ཚེ་ཡི་མཆོག་སྩོལ་མ། །
འཆི་མེད་རིག་པ་འཛིན་པའི་ལྷ་ཚོགས་ཀྱིས། །
དེང་འདིར་མི་ཤིགས་ཚེ་ཡི་ཤིས་པ་སྩོལ། །
བློ་གྲོས་བཟང་པོས་ལུགས་གཉིས་ཕ་མཐར་སོན། །
ཆོས་བཞིན་སྤྱོད་པས་བསྟན་འཛིན་དཔལ་དུ་གྱུར། །
བཤེས་གཉེན་ཞབས་སར་རྟག་ངུའི་བརྟུལ་ཞུགས་ཅན། །
ཆོས་ཀྱི་རྒྱལ་མཚན་ཞབས་པད་བརྟན་པར་ཤོག །
གངས་ལྗོངས་བསྟན་སྲིད་ཆེས་ཆེར་རྒུད་པའི་དུས། །
སྔོན་གྱི་སྨོན་ལམ་དུས་སུ་སྨིན་པ་ཡིས། །
གོང་དུ་སྤེལ་ལ་མདུན་ན་འདོན་པའི་གཙོ། །
མཚུངས་མེད་དཔལ་ལྡན་བླ་མའི་ཞབས་བརྟན་ཤོག །
རྨད་བྱུད་སྲས་བཅས་རྒྱལ་བའི་བྱིན་རླབས་དང། །
རྟེན་འབྲེལ་བསླུ་བ་མེད་པའི་བདེན་པ་དང། །
ལྷག་བསམ་རྣམ་པར་དག་པའི་བདེན་སྟོབས་ཀྱིས། །
རྣམ་དག་སྨོན་པའི་དོན་ཀུན་མྱུར་འགྲུབ་ཤོག །
ཅེས་པ་འདི་ནི་ལུགས་གཉིས་ཀྱི་རྣམ་དཔྱོད་མཆོག་ཏུ་དགེ་བའི་བཀའ་བློན་ཁྲི་ཟུར་ཟམ་གདོང་རིན་པོ་ཆེ་བློ་བཟང་བསྟན་འཛིན་ཆོས་ཀྱི་རྒྱལ་མཚན་གྱི་ཞབས་བརྟན་སྨོན་ཚིག་འདི་ལྟ་བུ་ཞིག་དགོས་ཞེས་འབྲེལ་ཡོད་རྒྱ་གར་བ་ཁག་གཅིག་ནས་བསྐུལ་ཞིང། རང་ཉིད་ནས་ཀྱང་རིན་པོ་ཆེ་རྒྱ་གར་དུ་ཐོག་མར་ཕེབས་དུས་ཙམ་ནས་ངོ་ཤེས་པ་དང་སྐབས་དེ་ནས་ངོས་ཀྱིས་བོད་བསྟན་སྲིད་ཆེད་གང་བསྒོ་བར་ཤར་བསྐྱོད་དང། ལུས་ངག་ཡིད་གསུམ་ངོས་ཀྱིས་ཅི་ཟེར་ལ་བཏང་ནས་བོད་ཀྱི་བསྟན་འགྲོའི་བདེ་ཐབས་ལ་དཀའ་བ་དུ་མ་སྤྱད་ཡོད་ཅིང། ད་དུང་ཡང་ལོ་ན་བགྲེས་རུང་ངོས་ཀྱི་ཉེ་འཁྲིས་སུ་གང་ཅིར་འགན་བཞེས་བཞིན་ཡོད་པས་རིན་པོ་ཆེ་རིང་འཚོའི་སྨོན་ཚིག་འདི་ལྟ་བུ་ཞིག་འབྲི་འདུན་གྱི་ཀུན་ནས་བསླངས་ཏེ་ཤཱཀྱའི་དགེ་སྦྱོང་ཆོས་སྨྲ་བ་ཏཱ་ལའི་བླ་མས། རབ་བྱུང་བཅུ་བདུན་པའི་ས་ཕག་ཟླ་བ་ ༥ ཚེས་ ༢༣ ཕྱི་ལོ་ ༢༠༡༩ ཟླ་བ་ ༧ ཚེས་ ༢༥ ཉིན་སྦྱར་པའོ།
