༢༠༠༨ ཕྱི་ཟླ་༨ ཚེས་༡༨ ཉིན། ༄༅།། དེ་རིང་འདིར་ཟབ་སྦྱོང་དུ་ཕེབས་པའི་རྒན་ལགས་རྣམ་པ་ཚང་མར། ཐོག་མར་བཙན་བྱོལ་བོད་གཞུང་བཀའ་ཤག་དང༌། ང་རང་སྒེར་བཅས་ཀྱི་ངོས་ནས་འཚམས་འདྲི་དང་བཀྲིས་བདེ་ལེགས་ཞུ་རྒྱུ་ཡིན། ཁྱེད་རང་ཚོ་ཤེས་རིག་ལས་ཁུངས་ཀྱིས་གྲ་སྒྲིག་ཞུས་པའི་ཟབ་སྦྱོང་ལ་གལ་ཆེན་པོར་བརྩིས་ཏེ་ཐག་རིང་པོའི་སློབ་གྲྭ་མང་པོ་ནས་སྐུ་ངལ་འཛེམས་མེད་ཀྱིས་ཕེབས་པ་རེད། ཟབ་སྦྱོང་ཉིན་མང་པོ་དེའི་རིང་ཐུགས་སྣང་ཆེན་པོས་ཤེས་ཡོན་སྲིད་བྱུས་སྐོར་ལ་ཉམས་ཞིབ་དང་སློབ་སྦྱོང་གཏིང་ཟབ་གནང་རྒྱུའི་གོ་སྐབས་བྱུང་ཡོད་པར་བརྟེན། ཟབ་སྦྱོང་དུ་མ་ཕེབས་སྔོན་གྱི་སློབ་ཁྲིད་གནང་སྟངས་དང༌། ཟབ་སྦྱོང་རྗེས་སློབ་ཁྲིད་གནང་སྟངས་ཀྱི་སྤུས་ཀའི་ཐོག་ཏན་ཏན་ཁྱད་པར་དང་ཡར་རྒྱས་ཡོང་བའི་ཡིད་ཆེས་བྱེད་ཀྱི་ཡོད། དེ་མ་བྱུང་ན་ཟབ་སྦྱོང་རྣམས་ཆོ་ག་ཕྱག་ལེན་ལྟ་བུ་ཆགས་ཉེན་ཡོད།