ས་གནས་འཐུས་ཚོགས་ཀྱི་ཚོགས་གཙོ་དང་ཚོགས་མིར་བཙན་བྱོལ་བོད་མིའི་བཅའ་ཁྲིམས་ཟབ་སྦྱོང་།

༄༅། །བླ་མ་དང་དབྱེར་མ་མཆིས་པའི་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་དང་ལྡན་པའི་ཞབས་ལ་ཕྱག་འཚལ་ཞིང་སྐྱབས་སུ་མཆིའོ་བརྩེ་བ་ཆེན་པོས་རྗེས་སུ་གཟུང་དུ་གསོལ། 

༢༠༠༤ ཕྱི་ཟླ་ ༣ ཚེས་ ༡༦ ཉིན་བཙན་བྱོལ་བོད་མིའི་གནས་སྡོད་ས་གནས་ཁག་གི་ས་གནས་འཐུས་ཚོགས་ཀྱི་ཚོགས་གཙོ་དང༌།  ཚོགས་མིའི་མི་འཐུས་བཅས་ལ་བཙན་བྱོལ་བོད་མིའི་བཅའ་ཁྲིམས་གཟབ་སྦྱོང་སློབ་ཚན།

དོན་ཚན་བརྒྱ་དང་བཅོ་ལྔ་ཡོད་པའི་བཅའ་ཁྲིམས་དུས་ཡུན་ཚོུད་གཉིས་ནང་སློབ་ཁྲིད་བྱེད་རྒྱུ་ནི་ལས་སླ་བ་ཞིག་མ་རེད།  འོན་ཀྱང་བཤད་ཐབས་ཡན་ལག་ལྔ་ལས་དགོས་པ་དང་བསྡུས་དོན་རྐྱང་པའི་བརྒྱུད་ནས་བསྡུས་དོན་ས་བཅད་ཙམ་གྱི་ངོ་སྤྲོད་ཞུ་རྒྱུ་ཡིན། རྗེས་སུ་དྲི་བ་དྲིས་ལན་གྱི་དུས་ཚོད་ལྷག་ན་བརྒལ་ལན་ཕྲན་བུ་ཞུས་ཆོག་པ་ཞུ་རྒྱུ་ཡིན།

༄༅། །མིའི་འགྲོ་བ་ནི་སྤྱི་ཚོགས་ལ་བརྟེན་པའི་སྲོག་ཆགས་ཤིག་ཡིན་པས།  སྤྱི་ཚོགས་མེད་པར་འཚོ་མི་ནུས་སྤྱི་ཚོགས་རྒྱ་ཆེར་ཕྱིན་སྐབས་སྒྲིག་འཛུགས་མེད་ན་གནས་མི་ཐུབ།  སྒྲིག་འཛུགས་ནི་ལམ་སྲོལ་དང་ཁྲིམས་ལ་བརྟེན་དགོས།  སྒྲིག་འཛུགས་དང་ཁྲིམསཀྱི་ཐོག་མའི་བྱུང་རབས་དེང་རབས་སྤྱི་ཚོགས་ཚན་རིག་ལྟར་ན་གདོད་མའི་མི་ནས་རིམ་གྱིས་ཚོད་བལྟ་དང་ཉམས་མྱོང་ལ་བརྟེན་ནས་ཡར་རྒྱས་སུ་ཕྱིན་པ་དང༌།  ནང་པའི་ལྟ་ཚུལ་ལྟར་ན་བསྐལ་པ་རྫོགས་ལྡན་ནས་མར་འགྲིབ་ཀྱིས་རྩོད་ལྡན་གྱི་དུས་སུ་གསོག་འཇོག་དང་རྐུ་འཕྲོང་སོགས་བྱུང་བས།  སྲུང་མི་དང་ཞལ་ལྕེ་གཅོད་པ་པོ་དགོས་གལ་བྱུང་ནས་རྒྱལ་པོ་བྱུང་བར་འདོད།

སྤྱི་ཚོགས་ཀྱི་འཕེལ་རིམ་མམ་ཉམས་རིམ་གྱི་ནང་མི་རིགས་དང༌།  རྒྱལ་པོ།  རྒྱལ་ཁབ་སོགས་རིམ་གྱིས་བྱུང་བ་ལས།  ·རྒྱལ་པོའི་ལམ་སྲོལ་དང༌།  ཚོགས་ཀྱི་གཙོ་བའི་ལམ་སྲོལ།  དམག་མིས་སྲིད་སྐྱོང༌།  གཅིག་སྡུད་དབང་འཛིན།  གཅིག་སྡུད་གྲལ་རིམ་གྱི་དམངས་གཙོ།  མང་གཙོའི་རིང་ལུགས་སོགས་བྱུང༌།

གོང་གསལ་ཚང་མའི་ནང་མང་གཙོའི་རིང་ལུགས་ལེགས་ཤོས་ཡིན།  གང་ལགས་ཟེར་ན།  མང་ཚོགས་ཀྱི་མངོན་འདོད་དང་མཐུན་ཚབ་ཆེ་བ་ཡིན།

མང་ཚོགས་ཀྱི་མངོན་འདོད་དང་བསྒྲུབ་བྱའི་གཙོ་བོ།

  • རང་དབང༌།
  • འདྲ་མཉམ།
  • རང་བདེན།
  • ཆིག་བསྒྲིལ་བཅས་ཡིན་ཞིང༌།  དེ་རྣམས་མང་གཙོའི་ལམ་ནས་བདེ་བླག་ཏུ་བསྒྲུབ་ནུས་མང་གཙོའི་ལམ་སྲོལ་ཡང་ཐད་ཀའི་མང་གཙོ་དང་སྐུ་ཚབ་ཀྱི་མང་གཙོ་གཉིས་ཡོད་ཅིང༌།  དེང་སང་མི་འབོར་མང་བས་ཐད་ཀའི་མང་གཙོ་ཕལ་ཆེར་མེད།

ཆབ་སྲིད་ཀྱི་མངའ་དབང་གང་ཟག་གཅིག་གམ་སྡེ་ཚན་གཅིག་ལ་གནས་པ་མ་ཡིན་པར།  མངའ་དབང་མང་ཚོགས་ལ་གནས་ཤིང༌།  མང་ཚོགས་ཀྱིས་ཐད་ཀར་རམ་འོས་འདེམས་བྱས་པའི་གང་ཟག་གམ།  འོས་འདེམས་བྱས་པའི་སྐུ་ཚབ་ཀྱི་ཚོགས་སྡེ་ལ་དུས་ཚོད་ངེས་ཅན་བར་མངའ་དབང་ཁྱབ་སྒྱུར་བྱེད་རྒྱུའི་དབང་ཚད་སྤྲད་དེ་དུས་ཚོད་རྫོགས་མཚམས་སམ།  ཡང་ན་དེའི་སྔོན་ནས་དབང་ཚད་ཕྱིར་བསྡུ་བྱེད་ཆོག་པས་ནོར་འཁྲུལ་ཡོང༌།  གཞི་ཉུང་ཞིང༌།  ནོར་བཅོས་བྱེད་བདེ།  ཡང་མང་གཙོའི་བཅའ་ཁྲིམས་ཅན་གྱི་གོང་མའི་རིང་ལུགས་ཀྱི་ལམ་སྲོལ་ནང་ཆབ་སྲིད་ཀྱི་མངའ་དབང་རྒྱུད་འཛིན་གྱི་གོང་མ་གཅིག་ལ་གནས་རུང༌།  དེ་ལ་མངའ་དབང་ཁྱབ་སྒྱུར་བྱེད་པའི་ནུས་པ་མེད་པར།  མང་ཚོགས་ཀྱི་སྐུ་ཚབ་རྣམ་པས་གོང་མའི་མཚན་ཐོག་ནས་མངའ་དབང་ཁྱབ་སྒྱུར་བྱེད་པ་དབྱིན་ཡུལ་དང་བལ་ཡུལ་ལྟ་བུ་མང་པོ་ཡོད།

མདོར་ན་མི་མང་ལ་གནས་པའི་མངའ་དབང་ངམ་གོང་མར་གནས་པའི་མངའ་དབང་མི་མང་ངམ་མི་མང་སྐུ་ཚབ་བརྒྱུད་ཁྱབ་སྒྱུར་བྱེད་པ་ཇི་ལྟར་ཡང༌། མང་གཙོའི་མངའ་དབང་ཁྱབ་སྒྱུར་ནི་མང་ཚོགས་ཀྱི་གཏན་ལ་ཕབ་པའི་ཁྲིམས་ཀྱི་ལམ་ནས་དབང་སྒྱུར་བྱེད་རྒྱུ་མ་གཏོགས།  གང་ཟག་སྒེར་གྱིས་རང་འདོད་ལྟར་ཁྱབ་སྒྱུར་བྱེད་རྒྱུ་མེད་པ་ཞིག་དགོས་པས།  ཁྲིམས་ཀྱི་དབང་སྒྱུར་ཞེས་པ་དེ་ཧ་ཅང་གལ་ཆེན་པོ་རེད།  གང་ལགས་ཟེར་ན།  མང་ཚོགས་ཀྱི་བསམ་ཚུལ་ནི་མང་ཚོགས་སམ་དེའི་སྐུ་ཚབ་ཀྱིས་གོ་བསྡུར་གཏིང་ཟབ་བྱས་ནས་གཏན་ལ་ཕབ་པའི་ཁྲིམས་ཀྱི་ལམ་ནས་མཚོན་ནུས་པ་མ་གཏོགས།  གང་ཟག་སྒེར་གྱིས་རང་འདོད་ལྟར་ཁྱབ་སྒྱུར་བྱེད་རྒྱུ་མེད་པ་ཞིག་དགོས་པས།  ཁྲིམས་ཀྱི་དབང་སྒྱུར་ཞེས་པ་དེ་ཧ་ཅང་གལ་ཆེན་པོ་རེད།  གང་ལགས་ཟེར་ན།  མང་ཚོགས་ཀྱི་བསམ་ཚུལ་ནི་མང་ཚོགས་སམ་དེའི་སྐུ་ཚབ་ཀྱིས་གོ་བསྡུར་གཏིང་ཟབ་བྱས་ནས་གཏན་ལ་ཕབ་པའི་ཁྲིམས་ཀྱི་ལམ་ནས་མཚོན་ནུས་པ་མ་གཏོགས།  གང་ཟག་སྒེར་གྱི་བསམ་ཚུལ་དང་ཐག་གཅོད་ཀྱིས་མཚོན་མི་ཐུབ།  རྒྱུ་མཚན་དེ་ལ་བརྟེན་ནས་མང་གཙོའི་ལམ་སྲོལ་ནང་འཛིན་སྐྱོང་གི་སྡེ་ཚན་ནི་ཁྲིམས་ལ་འགྲེལ་བརྗོད་དང་ལག་བསྟར་བྱེད་མཁན་ཙམ་ལས།  རང་ངོས་ནས་ཐག་གཅོད་བྱེད་མཁན་མིན།  དེས་ན་མང་གཙོ་དང་ཁྲིམས་ཀྱི་དབང་སྒྱུར་གཉིས་དོན་གཅིག་མིང་གི་རྣམ་གྲངས་ལྟ་བུ་ཡིན།  ཁྲིམས་ཀྱི་དབང་སྒྱུར་ཚད་ལྡན་ཡོང་བ་ལ་རྒྱལ་ཁབ་དང་མི་རིགས་ཀྱི་ཆབ་སྲིད་དང༌།  དཔལ་འབྱོར།  སྤྱི་ཚོགས་ཀྱི་བྱེད་སྒོ་ཡོངས་ལ་ཁྲིམས་དང་སྒྲིག་གཞི་གཏན་འབེབས་དགོས་པ་དང༌།  ཁྲིམས་དང་སྒྲིག་གཞི་ཇི་འདྲ་ཞིག་གཏན་འབེབས་བྱས་པ་ཡིན་ནའང༌།  དེ་དག་གི་ཁུངས་གཏུག་ས་དང་གཞི་བཏིང་ས།  དེ་ཙམ་དུ་མ་ཟད་གཞུང་གི་ཁྲིམས་བཟོ་དང༌།  འཛིན་སྐྱོང༌།  ཁྲིམས་ལུགས་དབང་འཛིན་ལ་སོགས་པའི་སྒྲིག་འཛུགས་ཡོངས་ཀྱི་གྲུབ་ཆ་དང་འགན་དབང་སྟོན་པའི་གཞི་རྩའི་ཁྲིམས་ལུགས་ཤིག་མེད་དུ་མི་རུང་བ་ཡིན།  དེ་འདྲའི་གཞི་རྩའི་ཁྲིམས་ལུགས་ཡིག་ཐོག་ཏུ་བཀོད་པ་དང༌།  ཡིག་ཐོག་ཏུ་མ་བཀོད་ཀྱང་སྲོལ་རྒྱུན་ཙམ་དུ་གནས་པ་གཉིས་ཀ་ཡོད་ཀྱང༌། དེང་སྐབས་དབྱིན་ཡུལ་ཙམ་མ་གཏོགས། རྒྱལ་ཁབ་ཕལ་ཆེ་བའི་གཞི་རྩའི་ཁྲིམས་ཡིག་ཐོག་ཏུ་བཀོད་ཡོད།  དེ་ལ་མིང་འདོགས་ཚུལ་གྱི་དབང་དུ་བྱས་ན།

༡་         རྩ་ཁྲིམས།  (Constitution)

༢་        གཞི་རྩའི་ཁྲིམས་ཡིག  (Basic Law)

༣་         བཅའ་ཁྲིམས་ (Charter)ཞེས་འབོད་སྲོལ་ཡོད། འདི་དག་ལ་ཁྱད་པར་ཆེན་པོ་མེད་ནའང༌།  རྩ་ཁྲིམས་ཞེས་པ་ས་ཁྱོན་དང༌།  མང་ཚོགས།  མངའ་དབང་གསུམ་ག་ལྡན་པའི་རང་བཙན་ཅན་གྱི་རྒྱལ་ཁབ་རྣམས་ཀྱི་གཞི་རྩའི་ཁྲིམས་ཡིག་ལ་རྩ་ཁྲིམས་ཞེས་བརྗོད་པ་དང༌།  རྒྱལ་ཁབ་གཅིག་གི་མངའ་དབང་གི་འོག་ནང་གི་རང་སྐྱོང་ལྡན་པའི་ལྗོངས་སམ།  མངའ་སྡེ་ཁག་གི་གཞི་རྩའི་ཁྲིམས་ཡིག་ལ་གཞི་རྩའི་ཁྲིམས་ཞེས་ཟེར་བ་དང༌།  བཅའ་ཁྲིམས་ཞེས་པའང་གོང་མཚུངས་རང་སྐྱོང་ལྗོངས་སམ།  ཡང་ན་ས་ཁྱོན་དང་མངའ་དབང་མེད་པའི་སྒྲིག་འཛུགས་ཁག་གི་གཞི་རྩའི་ཁྲིམས་ཡིག་ལ་བཅའ་ཁྲིམས་ཞེས་འབོད་སྲོལ་དར་ཆེ་བས། བཙན་བྱོལ་བོད་མིའི་གཞི་རྩའི་ཁྲིམས་ཡིག་ལའང་རྩ་ཁྲིམས་དང་གཞི་རྩའི་ཁྲིམས་ཡིག་ཅེས་མ་འབོད་པར་བཅའ་ཁྲིམས་ཞེས་འབོད་ཅིང༌།  བོད་ཀྱི་གནའ་བོའི་སྐད་དུའང་བཅའ་ཡིག་གམ་ཁྲིམས་བཅའ་ཡིག་ཆེན་མོ་ཞེས་པ་གཞི་རྩའི་ཁྲིམས་ཡིག་ལ་གོ་སྲོལ་ཡོད།  བཅའ་ཁྲིམས་འདི་གཞི་རྩའི་ཁྲིམས་ཡིག་ཡིན་ཙང༌། ཁྲིམས་དང་སྒྲིག་གཞི་ལམ་སྲོལ་ཇི་འདྲ་ཞིག་གཏན་ལ་ཕབ་ཀྱང་འདི་དང་མི་འགལ་བ་ཞིག་དགོས།  དེ་འདྲའི་གཞི་རྩའི་ཁྲིམས་ཡིག་ཀྱང༌། ·བསྐྱར་བཅོས་དཀའ་བའི་ཁྲིམས་ཡིག་དང༌།  ·བསྐྱར་བཅོས་སླ་བའི་ཁྲིམས་ཡིག  ·བསྐྱར་བཅོས་དཀའ་སླ་འཚམས་པའི་ཁྲིམས་ཡིག་བཅས་རང་བཞིན་མི་འདྲ་བ་གསུམ་ཡོད་པ་ནས་བཙན་བྱོལ་བོད་མིའི་བཅའ་ཁྲིམས་འདི་བསྐྱར་བཅོས་དཀའ་སླ་འཚམས་པའི་ཁྲིམས་ཡིག་ཅིག་ཡིན།  བཅའ་ཁྲིམས་བསྐྱར་བཅོས་ཆེད་བཅའ་ཁྲིམས་ཁྲིམས་བཟོ་ལྷན་ཚོགས་ཟུར་དུ་འོས་འདེམས་མ་དགོས་པར།  བོད་མི་མང་སྤྱི་འཐུས་ལྷན་ཚོགས་རང་གིས་བཅའ་ཁྲིམས་ཀྱི་དོན་ཚན་ཕལ་ཆེ་བ་སྤྱི་འཐུས་རྩ་འབོར་གྱི་གསུམ་ཆ་གཉིས་དང་དོན་ཚན་འགའ་ཤས་སྤྱི་འཐསུ་རྩ་འབོར་གྱི་བཞི་ཆ་གསུམ་གྱི་མོས་མཐུན་བྱུང་ན་བསྐྱར་བཅོས་ཆོག་པའི་ཁྲིམས་ཡིག་ཅིག་ཡིན།  དེ་ལ་བརྟེན་ནས་འདས་པའི་ངོ་ངོ་བཅུ་གསུམ་ཙམ་གྱི་རིང་སྤྱི་འཐུས་སྐབས་གསུམ་གྱིས་བཅའ་ཁྲིམས་བསྐྱར་བཅོས་གྲངས་བཅུ་གཉིས་བཅུ་གསུམ་ཙམ་བྱས་ཡོད།  ཡས་སོ་ལས་འ་གེལ་གྱིས་ལོ་རེར་བཅའ་ཁྲིམས་བསྐྱར་བཅོས་ཐེངས་རེ་ཙམ་བྱུང་ཡོད།

མང་གཙོའི་ལམ་སྲོལ་ཅན་གྱི་གཞི་རྩའི་ཁྲིམས་ཡིག་ཕལ་ཆེ་བའི་སྒྲོམ་གཞི་མདོར་བསྡུས་ན།

༡་         གྲོས་ཚོགས་ཀྱི་ལམ་སྲོལ་ཅན་ (Parliamentary Form)

༢་        སྲིད་འཛིན་གྱི་ལམ་སྲོལ་ཅན་ (Presidentail Form)གཉིས་སུ་འདུས་པ་ཡིན་ནའང༌།  བཙན་བྱོལ་བོད་མིའི་བཅའ་ཁྲིམས་དེ་གཉིས་གང་དུའང་མ་གཏོགས་པའི་དམིགས་བསལ་ཅན་ཞིག་ཡིན།  དེའི་རྒྱུ་མཚན་ཡང་གོང་གསལ་གྱི་སྒྲོམ་གཞི་གཉིས་ཀ་སྲིད་དོན་ཚོགས་པ་མང་པོ་ཅན་ (Multi-Party Democracy)གྱི་མང་གཙོའི་ལམ་སྲོལ་དང་འཚམས་པ་ཡིན་ནའང༌།  བཙན་བྱོལ་བོད་མིའི་སྤྱི་ཚོགས་ནང་སྲིད་དོན་གྱི་ཚོགས་པ་མང་པོ་མེད་པ་མ་ཟད།  ད་ལྟའི་རང་རེའི་གནས་བབས་དང་ཡང་མི་འཚམས་པར་བརྟེན་ང་ཚོའི་ལམ་སྲོལ་འདི་སྲིད་དོན་ཚོགས་པ་མེད་པའི་མང་གཙོ་ (Partyless Democracy)ཟེར་བ་དེ་ཡིན།  ནུས་ཕྱོགས་པ་མང་ཆེ་བས་སྲིད་དོན་ཚོགས་པ་མང་པོ་མེད་པ་དང༌།  ཆོས་ལུགས་རིས་མེད་ (Secular)མིན་པ་ཡིན་ན་མང་གཙོ་ཚད་ལྡན་ཡོང་ཐབས་མེད་ཚུལ་བཤད་མཁན་ཡོད་ཀྱང༌།  ང་ཚོས་ལྟ་གྲུབ་དེ་ལ་ཁས་ལེན་བྱེད་ཀྱི་མེད།  རྒྱ་གར་གྱི་མཁས་དབང་ཇ་ཡ་སྲ་ཀཱ་ཤ་ནཱརཱ་ཡ་ཎ་སོགས་མང་པོས་ཤར་གླིང་གི་ཡུལ་གྲུ་ཁག་ལ་ཚོགས་པ་མང་བའི་མང་གཙོ་ལས།  ཚོགས་མེད་པའི་མང་གཙོའི་ལམ་སྲོལ་འོས་འཚམས་ཆེ་བའི་རིག་པའི་གཞུང་ལུགས་བརྩོམས་ཡོད་པ་མ་ཟད།  ནུས་ཕྱོགས་པས་བཤད་པའི་ Secularཞེས་པའི་ཚིག་ཀྱང་ཆོས་མེད་རིང་ལུགས་དང༌།  ཆོས་འགལ་རིང་ལུགས།  ཆོས་འགོག་རིང་ལུགས་སོགས་སུ་གོ་མི་དགོས་པར།  ཆོས་ལུགས་དང་ཆོས་བརྒྱུད་ཡོངས་ལ་འདྲ་མཉམ་གྱི་གུས་བརྩི་ཞུ་བའི་ཆོས་ལུགས་རིས་མེད་དང་ཆོས་སྲིད་ཟུང་འབྲེལ་མཉམ་དུ་འགྲོ་ཐུབ་པ་དང༌།  བཙན་བྱོལ་བོད་མིའི་བཅའ་ཁྲིམས་ཀྱི་སྒྲོམ་གཞི་སྲིད་དོན་གྱི་ཚོགས་པ་མེད་པའི་མང་གཙོ་དང༌།  ཆོས་སྲིད་ཟུང་འབྲེལ་གྱི་ངོ་བོར་གནས་ཡོད་ཀྱང༌།  ཆོས་ལུགས་ཡོངས་རྫོགས་ཁྲིམས་ཀྱི་མདུན་སར་འདྲ་མཉམ་ཡིན་པས་ Secularཞེས་པའི་གོ་དོན་འགྲེལ་སྟངས་མཐོ་ཤེས་ཆོས་ལུགས་ཀུན་ལ་གུས་བརྩི་གཅིག་གྱུར་རམ།  བདག་ཉིད་ཆེན་པོ་གན་རྡིས་གསུངས་པའི་སརྦ་རྡརྨ་སམ་བྷཱབ་ཞེས་པའི་དགོངས་དོན་དང་མཐུན་པ་ཡིན་པས།  བཅའ་ཁྲིམས་འདི་སྲིད་དོན་གྱི་ཚོགས་པ་མེད་པའི་མང་གཙོ་དང༌།  ཆོས་སྲིད་ཟུང་འབྲེལ་ཡིན་རུང༌།  མང་གཙོའི་མཚན་ཉིད་དང་ཆ་ལག་ཡོངས་སུ་རྫོགས་པ་ཡིན་ཞེས་ཐག་བཅད་དེ་བརྗོད་ཐུབ་དེ་འདྲ་བའི་ཁྱད་ཆོས་དང་ལྡན་པའི་བཙན་བྱོལ་བོད་མིའི་བཅའ་ཁྲིམས་དེ་བཞིན་ྋགོང་ས་ྋསྐྱབས་མགོན་ཆེན་པོས་ཐད་བསྐོས་གནང་བའི་ཟིན་བྲིས་ཚོགས་ཆུང་གི་རགས་ཟིན་ཐོག་བཙན་བྱོལ་བོད་མིའི་སྤྱི་ཚོགས་ནང་བགྲོ་གླེང་གོ་བསྡུར་མཐར་ཕྱིན་ཞུས་རྗེས་མཐའ་མའི་ཟིན་བྲིས་སྐབས་བཅུ་གཅིག་པའི་སྤྱི་འཐུས་ལྷན་ཚོགས་སུ་ྋགོང་ས་ཆེན་པོས་བསྩལ་གནང་མཛད་པ་ལྟར།  སྤྱི་འཐུས་ལྷན་ཚོགས་ཀྱིས་བཅའ་ཁྲིམས་ཁྲིམ་སབཟོ་ལྷན་ཚོགས་ཀྱི་ངོ་བོར་བགྲོ་གླེང་མཐར་ཕྱིན་མཛད་དེ་གཏན་ལ་ཕབ་པར་སྤྱི་ནོར་ྋགོང་ས་ྋསྐྱབས་མགོན་ཆེན་པོས་ ༡༩༩༡ ཕྱི་ཟླ་ ༦ ཚེས་ ༢༨ ཉིན་ཆོག་མཆན་བསྩལ་ཏེ་ཁྲིམས་སུ་བཅས་པ་ཡིན་ཞིང༌།  འདི་ལ་ལེའུ་བཅུ་གཅིག་དང༌།  དོན་ཚན་བརྒྱ་དང་བཅོ་ལྔའི་བདག་ཉིད་དུ་ཡོད།

ལེའུ་དང་པོ་གཞི་རྩའི་ལམ་སྟོན་གྱི་ནང་དོན་ཚན་བརྒྱད་ཡོད་ཙང༌།  དང་པོ་བཅའ་ཁྲིམས་ཀྱི་འགོ་འཛུགས།་་་་་་་་་་་་་་་་་་་་་་་་་རྒྱད་པ་བོད་ཀྱི་ཡུལ་མིའི་འགྲེལ་བརྗོད་བཅས་ཚུད་ཡོད།  དོན་ཚན་བརྒྱད་པོ་དེ་དག་ནི་བཅའ་ཁྲིམས་ཀྱི་རྩིག་རྨང་ལྟ་བུ་ཡིན་པ་དང༌།  ཆབ་སྲིད་ཀྱི་རང་བཞིན་འཚེ་མེད་ཞི་བའི་ལྟ་བར་གཞི་བཅོལ་ཏེ་རང་དབང་དང༌།  སྤྱི་ཚོགས་བདེ་དོན། ཆོས་སྲིད་ཟུང་འབྲེལ་མང་གཙོ་མཉམ་འབྲེལ་གྱི་རང་བཞིན་དུ་གཏན་ལ་ཕབ་ཡོད་ལ།  འཚེ་མེད་ཞི་བའི་ལྟ་བར་གཞི་བཅོལ་བའི་དབང་གིས་དོན་ཚན་བདུན་པའི་ནང་མ་འོངས་བོད་ཀྱི་ཡུལ་ཁམས་འཚེ་མེད་ཞི་བའི་བསྟི་གནས་སུ་གནས་རྒྱུ་དང༌།  གོ་མཚོན་དུག་རླངས་རིགས་ཀྱི་ཐོན་སྐྱེད་ནམ་ཡང་མི་བྱེད་རྒྱུའི་འབད་བརྩོན་བྱ་རྒྱུ།  ད་ལྟ་ནས་བོད་དོན་བདེན་མཐའ་གསལ་ཐབས་ཀྱིས་མཚོན་དོན་གནད་གང་གི་ཆེད་དུའང་དམག་འཐབ་སྤང་རྒྱུའི་ཆ་རྐྱེན་འཁོད་ཡོད་པ་འདི་དག་ནི་བཅའ་ཁྲིམས་འདིའི་ནང་དོན་གྱི་ཁྱད་ཆོས་རླབས་ཆེ་བ་རྣམས་ཡིན།

བོད་ཀྱི་རྒྱལ་ཁབ་དབུ་བརྙེས་པ་ནས་བཟུང་ ༡༩༦༡ ཕྱི་ཟླ་ ༩ ཚེས་ ༢ ཉིན་མང་གཙོའི་ལམ་སྲོལ་དབུ་བརྙེས་པའི་བར་སྲོལ་རྒྱུན་བོད་ཀྱི་ཆབ་སྲིད་ཀྱི་རང་བཞིན་རྒྱལ་པོའི་དབང་སྒྱུར་གྱི་ངོ་བོར་གནས་པ་ཡིན་སྟབས།  བོད་མི་རྣམས་ལ་ བྱབྱཆབ་འབངས་བྱབྱདང་བྱབྱམི་སེར་བྱབྱགྱི་ཐ་སྙད་བེད་སྤྱོད་བྱེད་བཞིན་པ་དང༌། དེང་རབས་ཀྱི་མང་གཙོའི་ལམ་སྲོལ་ནང་དུའང་མངའ་དབང་རྒྱལ་པོའམ་གོང་མར་གནས་པའི་རིགས་ལ་བྱབྱཆབ་འབངས་བྱབྱཞེས་པའི་ཐ་སྙད་བརྗོད་སྲོལ་ཡོད་ནའང༌།  བཅའ་ཁྲིམས་ཀྱི་འོག་བོད་མིའི་ཆབ་སྲིད་ཀྱི་རང་བཞིན་ནི་མངའ་དབང་མང་ཚོགས་ལ་གནས་པའི་མང་གཙོ་གཙང་མ་ཞིག་ཏུ་གྱུར་ཟིན་པ་ཡིན་སྟབས།  བོད་མི་རྣམས་ལ་བྱབྱབོད་ཀྱི་ཡུལ་མིབྱབྱཞེས་ཐ་སྙད་སྦྱར་ཏེ་ བྱབྱཆབ་འབངས་བྱབྱདང་བྱབྱམི་སེར་བྱབྱགྱི་ཐ་སྙད་ཕྱིར་བསྡུ་བྱས་ཡོད།  ད་ཆ་བོད་མི་ཡོངས་རྫོགས་འདྲ་མཉམ་བོད་ཀྱི་ཡུལ་མི་ཡིན་པ་མ་གཏོགས་མངའ་དབང་དང་ཆབ་འབངས་ཀྱི་དབྱེ་བ་མེད།  ད་ལྟའི་བོད་མིའི་གནས་བབས་དང་བསྟུན་ཏེ་བོད་ཀྱི་ཡུལ་མིའི་མཚན་ཉིད་ཀྱང་སྐྱེ་ཡུལ་གྱི་ས་མཚམས་སམ།  ཤ་ཁྲག་གི་རྒྱུད་པ་ཁོ་ནར་བརྟེན་པ་མ་ཡིན་པར།  སྐྱེ་ཡུལ་དང་རིགས་རྒྱུད།  ཡང་ན་དྭང་བླངས་ཀྱིས་ཡུལ་མིར་ཞུགས་པ་གསུམ་གའི་ལམ་ནས་བོད་ཀྱི་ཡུལ་མིར་ཚུད་ཐུབ་པ་དང༌།  རྒྱལ་ཁབ་གཞན་གྱི་ཡུལ་མིའི་རང་བཞིན་ལེན་དགོས་བྱུང་ཡང་བཅའ་ཁྲིམས་དོན་ཚན་བཅུ་གསུམ་པའི་ནང་གསལ་གྱི་ཡུལ་མིའི་ལས་འགན་བསྒྲུབ་ན་བོད་ཀྱི་ཡུལ་མིའི་རང་བཞིན་འདོར་མི་དགོས་པའི་ཆ་རྐྱེན་བཀོད་ཡོད།

ལེའུ་གཉིས་པ་གཞི་རྩའི་ཐོབ་ཐང་དང་ལས་འགན་སྐོར་གྱི་ནང་དོན་ཚན་དུག་པ་ཁྲིམ་སཀྱི་མདུན་སར་འདྲ་མཉམ་་་་་་་་་་བཅུ་བཞི་པ་གཞི་རྩའི་ཐོབ་ཐང་དང་ལས་འགན་ལག་ལེན་དོན་འཁེལ་བཅས་གསལ་ཡོད།  ལེའུ་འདིའི་ནང་གི་དོན་ཚན་ཁག་དྲུག་གི་ནང་ཁྲིམས་ཀྱི་མདུན་སར་འདྲ་མཉམ་དང༌།  ཆོས་དད་རང་དབང་གཞི་རྩའི་ཐོབ་ཐང་གི་ནང་བཀོད་པ་འདི་ལ་བརྟེན་ནས་བཅའ་ཁྲིམས་འདིའི་རང་བཞིན་ཆོས་སྲིད་ཟུང་འབྲེལ་ཡིན་ནའང༌།  ཆོས་ལུགས་རིས་མེད་ཀྱི་གནད་དོན་ལག་ལེན་གྱི་ཐོག་ཚང་བ་བྱུང་ཡོད།  འོས་བསྡུ་དང་འོས་གཞིར་ཞུགས་པའི་ཐོབ་ཐང་ཡང་གཞན་དག་དང་མི་འདྲ་བར་གཞི་རྩའི་ཐོབ་ཐང་ནང་ཚུད་ཡོད་པ་མ་ཟད།  གཞི་རྩའི་རང་དབང་དང་ཐོབ་ཐང་གཞན་དག་གི་ནང་དེང་དུས་ཡར་ཐོན་ཅན་གྱི་རྒྱལ་ཁབ་མང་པོ་ལ་མེད་པའི་ཐོབ་ཐང་ཁག་ཚུད་ཡོད།

ལེའུ་གསུམ་པ་གཞུང་གི་རྩ་བའི་བྱེད་སྒོ་ལམ་སྟོན་གྱི་ནང་དོན་ཚན་བཅོ་ལྔ་པ་བོད་དོན་བདེན་མཐའ་གསལ་ཐབས་དང་བཙན་བྱོལ་བའི་སྤྱི་ཚོགས་བདེ་ཐབས་་་་་་་་་་་་་་བཅོ་བརྒྱད་པ་འཕྲོད་བསྟེན་བཅས་ལེའུ་འདིའི་ནང་ཚན་ཁག་བཞིས་བཙན་བྱོལ་གཞུང་གི་བྱེད་སྒོ་ལམ་སྟོན་གྱི་ནང་བོད་དོན་བདེན་མཐའ་གསལ་ཐབས་དང༌།  སྤྱི་ཚོགས་བདེ་དོན་གྱི་ལས་འགན་ཞུ་སྒོ་གཙོ་ཆེ་བ་རྣམས་ཀྱི་ལམ་སྟོན་གསལ་པོ་གནང་ཡོད་པ་འདིའི་ཐོག་ནས་འཛན་སྐྱོང་གི་སྲིད་བྱསུ་གཏན་འབེབས་དང་ལས་འཆར་ལག་བསྟར་བྱེད་ཕྱོགས་ཀྱི་ལམ་སྟོན་གསལ་པོ་ཡོད་པ་མ་ཟད།  མང་ཚོགས་ཀྱིས་ཀྱང་ཆ་རྐྱེན་འདི་དག་གི་ཐོག་ནས་རང་རང་གི་དགོས་མཁོ་བསྒྲུབ་པའི་ཆེད་དུ་བཙན་བྱོལ་གཞུང་ལ་རེ་འདུན་བཏོན་ཆོག་པ་ཡིན།

ལེའུ་བཞི་པ་གཞུང་གི་འགན་འཛིན་གྱི་ནང་དོན་ཚན་བཅུ་དགུ་པ་འགན་འཛིན་དབང་ཆ་་་་་་་་་ཉེར་གསུམ་པ་བཀའ་བློན་འོས་འདེམས་སྤྱི་འཐུས་ལྷན་ཚོགས་ཀྱི་ལས་རིམ་ནང་བྱ་རྒྱུ།  དོན་ཚན་ཉེར་བཞི་པ་བཀའ་བློན་ཁྲི་པ་དང་བཀའ་ཤག་གི་ཡུན་ཚད་་་་་་་་་་སོ་ལྔ་པ་སྡེ་སྲིད་ཀྱི་ཡུན་ཚད་དང་ཕོགས་ཐོབ་བཅས་ལེའུ་འདིའི་ནང་གསལ་བའི་དོན་ཚན་ཁག་བཅུ་བདུན་ནང་གཞུང་གི་འགནའཛིན་དབང་ཆ་ྋགོང་ས་ྋསྐྱབས་མགོན་ཆེན་པོ་མཆོག་ལ་ཡོད་པ་དང༌།  ྋགོང་ས་མཆོག་རྒྱལ་ཁབ་ཀྱི་དབུ་འཛིན་དང་གཞུང་གིས་དབུ་འཛིན་གཉིས་ཀ་ཡིན་པའི་ཆ་ནས་བཅའ་ཁྲིམས་འདིའི་དོན་ཚན་ཁག་གཞིར་བཟུང་དབང་ལུང་ཁྱབ་སྒྱུར་མཛད་རྒྱུ།  ྋགོང་ས་ྋསྐྱབས་མགོན་ཆེན་པོའི་དབུ་ཁྲིད་འགོ་གཞུང་གི་ཆབ་སྲིད་ཀྱི་ལས་དོན་འགན་ཁུར་རྐང་ལེན་བྱེད་པོ་བཀའ་ཤག་དང༌།  དེའི་འགོ་འཛིན་བཀའ་བློན་ཁྲི་པ་ཞིག་དགོས་པ་བཀའ་བློན་ཁྲི་པ་དང་བཀའ་བློན་གཞན་གྱི་འོས་འདེམས་བྱེད་ཕྱོགས།  དེ་དག་གི་ལས་ཡུན།  ལས་དོན་ཞུ་ཕྱོགས་ྋགོང་ས་མཆོག་གིས་རྒྱལ་ཁབ་དང་གཞུང་གི་དབུ་འཛིན་གྱི་མཛད་ཁུར་མ་བཞེས་པའི་གནས་ཚུལ་བྱུང་སྐབས་སྡེ་སྲིད་ལྷན་ཚོགས་ཀྱི་སྒྲིག་འཛུགས་བཟོ་སྟངས་སོགས་གསལ་བ་མ་ཟད།  བཀའ་ཤག་གི་འགན་ཁུར་བཀའ་བློན་ཚང་མ་མཉམ་འདུས་ཀྱི་འགན་ཁུར་ཡིན་པ་དང་བཀའ་ཤག་གིས་རྒྱུན་དུ་སྤྱི་འཐུས་ལྷན་ཚོགས་ལ་འགན་ཁུར་བའི་ཐོག་ནས་ལས་དོན་སྙན་ཞུ་དང༌།  དྲི་བར་ལན་འདེབས་བྱ་དགོས་པ།  དགོས་གལ་བྱུང་ཚེ་སྤྱི་འཐུས་ལྷན་ཚོགས་སམ་ྋགོང་ས་ྋསྐྱབས་མགོན་ཆེན་པོས་བཀའ་ཤག་ཡོངས་རྫོགས་སམ་བཀའ་བློན་བྱེ་བྲག་པ་འཕོ་འགྱུར་གཏོང་གནང་མཛད་ཕྱོགས་བཅས་ཀྱི་ཆ་རྐྱེན་རྣམས་གསལ་པོར་འཁོད་ཡོད།

ལེའུ་ལྔ་པའི་ཁྲིམས་བཟོ་དབང་འཛིན་ནི་སྤྱི་འཐུས་ལྷནཚོགས་ཀྱི་སྐོར་ཡིན་པ་དང༌།  ལེའུ་འདིའི་ནང་དོན་ཚན་སོ་དྲུག་པ་ཁྲིམས་བཟོའི་དབང་ཆ་དོན་ཚན་རེ་གཅིག་པ་ཚོགས་དྲུང་ལས་ཁུངས་བཅས་ལེའུ་འདིའི་དོན་ཚན་ཁག་ཉེར་དྲུག་གིས་ཁྲིམས་བཟོའི་དབང་ཆ་དང༌།  བོད་མི་མང་སྤྱི་འཐུས་ལྷན་ཚོགས་ཀྱི་སྒྲིག་འཛུགས།  སྤྱི་འཐུས་ཀྱི་འོས་ཆོས་དང༌།  ཡུན་ཚད་འཆར་འཕར་གྱི་ཚོགས་འདུ།  སྤྱི་འཐུས་རྒྱུན་ལས་ྋགོ་ས་མཆོག་གི་གསུང་བཤད་དང་གསུང་འཕྲིན་བཀའ་བླན་གྲོས་ཚོགས་སུ་ཞུགས་སྟངས། ཚོགས་གཙོ་དང་ཚོགས་གཞོན་གྱི་འོས་འདེམས་དང་ལས་འགན།  གྲོས་ཚོགས་ཀྱི་དམིགས་བསལ་ཐོབ་ཐང༌།  དམིགས་བསལ་ཚོགས་ཆེན་བོད་རང་དབང་བདེན་པའི་ལས་འགུལ་གྱི་ས་གནས་ཚོགས་ཆུང་ཚོགས་དྲུང་ལས་ཁུངས་ཀྱི་སྒྲིག་འཛུགས་སོགས་སྤྱི་འཐུས་ལྷན་ཚོགས་ཀྱི་ལས་དོན་དང་འབྲེལ་བའི་གཞི་རྩའི་ཆ་རྐྱེན་ཁག་ཞིབ་གསལ་ཡོད་པ་མ་ཟད།  ཁྱད་པར་ཁྲིམས་ཡིག་འཆར་ཟིན་འགོད་ཕྱོགས་དང་གཏན་འབེབས་གནང་ཕྱོགས།  དཔལ་འབྱོར་དང་སྔོན་རྩིས་ཀྱི་བཏང་འཛིན་གནང་ཕྱོགས།  འཛིན་སྐྱོང་ལ་སྲིད་བྱུས་དང་ལས་འཆར་ལག་བསྟར་བྱེད་ཕྱོགས་ཀྱི་ལམ་སྟོན་དང་བཀོད་མངགས་བསྐྱར་ཞིབ་གནང་ཕྱོགས་སོགས་ཀྱི་ཆ་རྐྱེན་ཞིབ་རྒྱས་འཁོད་ཡོད།  ལེའུ་འདིའི་དོན་ཚན་ཞེ་དྲགས་པའི་ནང་སྤྱི་འཐུས་ཀྱི་དམིགས་བསལ་ཐོབ་ཐང་དང༌།  དོན་ཚན་ང་གསུམ་པའི་ནང་སྤྱི་འཐུས་ལྷན་ཚོགས་ཀྱི་ལས་དོན་སྒྲིག་གཞི་སྤྱི་འཐུས་རང་ཉིད་ཀྱིས་གཏན་འབེབས་རྩ་འཚིན་གནང་འཐུས་དང༌། དོན་ཚན་ང་བཞི་པའི་ནང་ཁྲིམས་ཁང་མཐོ་ཤོས་ཀྱི་ཁྲིམས་ཞིབ་པ་ཆེ་བ་དང་ཁྲིམས་ཞིབ་པ་གཞན་འཕོ་འགྱུར་གཏོང་རྒྱུའི་ཆ་རྐྱེན།  དོན་ཚན་ང་ལྔ་དང་ང་དྲུག་པའི་ནང་ྋགོང་ས་ཆེན་པོས་ཁྲིམས་ཡིག་འཆར་ཟིན་ཕྱིར་སློག་གནང་བར་གྲོས་ཚོགས་ཀྱིས་བསྐྱར་འབུལ་ཞུས་རྗེས་མང་མོས་ཐག་གཅོད་འོས་བསྡུ་བསྩལ་རྒྱུ་ལས་ཐབས་ལམ་གཞན་མེད་པ་དང༌།  དོན་ཚན་ང་བརྒྱད་པའི་ནང་སྤྱི་འཐུས་ལྷན་ཚོགས་ཀྱི་ལས་དོན་ལ་ཁྲིམས་ཞིབ་བརྩད་གཅོད་མི་ཆོག་པ་སོགས་ཀྱི་ཆ་རྐྱེན་དང༌།  གཞན་ཡང་ལེའུ་བཞི་པའི་དོན་ཚན་སོ་གཅིག་པའི་ནང་གསེས་དང་པོའི་ཁ་པའི་ནང་སྤྱི་འཐུས་རྩ་འབོར་བཞི་ཆ་གསུམ་གྱི་མོས་མཐུན་བྱུང་ན་ྋགོང་ས་མཆོག་གི་འགན་འཛིན་མཛད་ཁུར་རྣམས་སྡེ་སྲིད་ལྷན་ཚོགས་ལ་བསྐུར་དགོས་པའི་ཐག་གཅོད་བྱ་རྒྱུའི་ཆ་རྐྱེན་དང༌།  ལེའུ་དྲུག་པའི་དོན་ཚན་རེ་གསུམ་པའི་ནང་གསེས་བཞི་པའི་ནང་སྤྱི་འཐུས་རྩ་འབོར་གསུམ་ཆ་གཉིས་ཡན་གྱིས་ཁྲིམས་ཞིབ་པ་ཆེ་བ་དང༌།  ཁྲིམས་ཞིབ་པ་གཞན་གཉིས་བཅས་སུ་རུང་འཕོ་འགྱུར་དགོས་པའི་གྲོས་ཆོད་འཇོག་འཐུས་ཀྱི་ཆ་རྐྱེན་དང་ལེའུ་བརྒྱད་པའི་དོན་ཚན་གོ་དགུ་པའི་ནང་གསེས་དང་པོ་དང་ལེའུ་དགུ་པའི་དོན་ཚན་བརྒྱ་དང་ལྔའི་ནང་གསེས་གཉིས་པ་ལེའུ་བཅུ་པའི་དོན་ཚན་བརྒྱ་དང་བཅུ་བཅས་ཀྱི་འོག་འོས་བསྡུ་འགན་འཛིན་དང༌།  གཞུང་ཞབས་འདེམས་ལྷན་ཚོགས་གཙོ་རྩིས་ཞིབ་སྤྱི་ཁྱབ་བཅས་འཕོ་འགྱུར་གཏོང་འཐུས་ཀྱི་ཆ་རྐྱེན་འདི་དག་ལ་གཞིགས་ན་གཞུང་གི་འགན་འཛིན་དང་ཁྲིམས་བཟོ་ལྷན་ཚོགས།  ཁྲིམས་ལུགས་དབང་འཛིན་གསུམ་གྱི་ནང་ནས་དབང་ཚད་མཐོ་ཤོས་དང༌།  མཐའ་མའི་ཐག་གཅོད་བྱེད་པོ་སྤྱི་འཐུས་གྲོས་ཚོགས་ཡིན་པ་གསལ་པོར་རྟོགས་ཐུབ།

ལེའུ་དྲུག་པ།  ཁྲིམ་སལུགས་དབང་འཛིན་ནི་ཁྲིམས་ཞིབ་ཁང་གི་སྐོར་ཡིན་ཞིང༌།  ལེའུ་འདིའི་ནང་དོན་ཚན་རེ་གཉིས་པ་ཆེས་མཐོའི་ཁྲིམས་ཞིབ་ཁང་་་་་་་་་་་་་་་་་་་བདུན་བཅུ་པ་ཁྲིམས་དོན་ལས་ཁུངས་བཅས་ལེའུ་འདིའི་དོན་ཚན་ཁག་དགུས་ཆེས་མཐོའི་ཁྲིམས་ཞིབ་ཁང་གི་སྒྲིག་འཛུགས་དང༌།  ཁྲིམས་ཞིབ་པ་ཆེ་བ་དང་ཁྲིམས་ཞིབ་པ་གཞན་གཉིས་འོས་ཆོས་དང་བསྐོ་གཞག་གནང་ཕྱོགས།  བཤེར་དཔང་དང་གཟུ་དཔང་གི་ཆ་རྐྱེན་ཆེས་མཐོའི་ཁྲིམས་ཞིབ་ཁང་གི་དབང་ཚད་དང་རྩ་འཛིན་སྒྲིག་གཞི།  ྋགོང་ས་མཆོག་གིས་ཆེས་མཐོའི་ཁྲིམས་ཞི་བཁང་ནས་བསམ་འཆར་འབུལ་བཞེས།  ཁྲིམས་ཞིབ་ཁང་འོག་མ་ཁག་གི་གནས་བབས།  ཁྲིམས་དོན་ལས་ཁངས་བཅས་ཀྱི་ཆ་རྐྱེན་གཏན་ལ་ཕབ་ཡོད།  བོད་མི་རྣམས་བཙན་བྱོལ་དུ་ཡོད་པ་དང༌།  གནས་ཡུལ་རྒྱལ་ཁབ་ཏུ་བཙན་བྱོལ་གཞུང་གི་ངོས་ལེན་ཁྲིམས་ཐོག་ནས་གསལ་པོ་མེད་པ་བཅས་ལ་བརྟེན།  གཞི་རྩའི་ནག་ཉེས་དང་སྤྱི་ཚོགས་ཀྱི་ཁྲིམས་ཀྱི་ཐོག་གནས་ཡུལ་རྒྱལ་ཁབ་སོ་སོའི་ཡུལ་ཁྲིམས་ཀྱི་འོག་འགྲོ་རྒྱུ་ལས།  ཟུར་དུ་ཁྲིམས་གཏུགས་ཁྲིམས་བཅད་མི་ཆོག་པ་བཅས་གནས་ཚུལ་དུ་མའི་དབང་གིས་ཁྲིམས་ཁང་ (Court)འཛིན་སྐྱོང་ཆོག་མིན་སྟབས།  ཁྲིམས་ཁང་གི་ཚབ་ཏུ་ཁྲིམས་ཞིབ་ཁང་ (Justice Commission)གི་ཐ་སྙད་སྦྱར་ཞིང༌།  བཙན་བྱོལ་བོད་མིའི་བཅའ་ཁྲིམས་ཀྱི་ཚིག་དོན་འགྲེལ་བརྗོད་བྱེད་ཕྱོགས་ལ་བརྟེན་པའི་རྩོད་གླེང་དང༌།  གཞུང་གི་འགན་འཛིན་ལས་ཁུངས་སམ་ལས་བྱེད་པའི་ལས་དོན་བྱེད་ཕྱོགས་དྲང་བདེན་བྱུང་མིན།  གཞུང་ཞབས་སྲི་ཞུ་བ་རྣམས་ཀྱི་ཁེ་ཕན་རྗེས་འབྲེལ་གྱི་རྩོད་གླེང་བོད་མིའི་སྡོད་སྒར་ཁག་གི་ས་ཁང་སོགས་ཀྱི་རྩོད་གླེང་རྣམས་གནས་ཡུལ་རྒྱ་གར་གཞུང་གི་གཟུ་བོའི་ (Arbitration)  ཁྲིམས་གཞིའི་འོག་ཡུལ་ཁྲིམས་དང་མི་འགལ་བར་ཁྲིམས་ཞིབ་དང་ཐག་གཅོད་གནང་རྒྱུའི་ཆ་རྐྱེན་བསྐྲུན་ཡོད།  ལེའུ་འདིའི་དོན་ཚན་ཁག་ལ་བརྟེན་ནས་བཙན་བྱོལ་དུ་གནས་རིང་འཛིན་སྐྱོང་དང་ཁྲིམས་བཟོ་ཙམ་མ་ཟད།  ཁྲིམས་ལུགས་དབང་འཛིན་གྱི་ཡན་ལག་ཀྱང་ཚང་བར་བྱས་ཏེ། མང་གཙོ་ཀ་བ་གསུམ་ལྡན་ཡོང་ཐབས་གནང་ཡོད།  ལྷག་པར་དུ་བོད་མིའི་སྡོད་སྒར་ཁག་དང༌།  ཁ་ཐོར་དུ་གནས་པའི་བོད་རིགས་ཉམ་ཐག་འཁོས་ཞན་ཚོའི་བསམ་བློའི་ནང་གཞུང་དང་གཞུང་གི་ལས་བྱེད།  གཞན་ཡང་བོད་མི་ནང་ཁུལ་དཔལ་འབྱོར་དང་ཁ་ཤུགས་ཆེ་བ་ཚོ་དྲང་བདེན་མིན་པའི་ཐུབ་ཚོད་གཉའ་གནོན་སོགས་བྱས་པ་བྱུང་ཚེ་རང་གི་བདེན་པ་བདེན་ཐོག་ཏུ་འཁྱོལ་བའི་ཆེད་ཁྲིམས་ཀྱི་མདུན་སར་འདྲ་མཉམ་གྱི་ཐོག་ནས་ཞུ་གཏུག་བྱེད་ས་ཞིག་ཡོད་སྙམ་པའི་བློ་སྤོབས་སྤེལ་བའི་ཆེད་དུ་ཡིན་ཞེས་ྋགོང་ས་མཆོག་གི་བཀའ་སློབ་ཡང་ཡང་ཕེབས་ཡོད་པ་ལྟར།  མང་ཚོགས་ཀྱི་ནང་ཁྲིམས་དོན་ལ་ཡིད་ཆེས་སྤེལ་བའི་དོགས་པ་ཆེན་པོ་ཡོད།  ཆེས་མཐོའི་ཁྲིམས་ཞིབ་ཁང་དུ་རྩོད་གླེང་གང་འཚམས་ཞུ་གཏུག་ཐག་ཆོད་ཐུབ་པ་བྱུང་ཡོད།  ས་གནས་ཁྲིམས་ཞིབ་ཁང་ཁག་ཏུ་ད་ཕན་ཁ་མཆུ་ཞུ་གཏུག་བྱེད་མཁན་བྱུང་མེད་ཀྱང་མང་གཙོའི་ཆ་རྐྱེན་གྱི་ཡན་ལག་དང༌།  དགོས་གལ་བྱུང་ཚེ་ཁྲིམས་གཏུག་ཞུ་ས་ཡོད་པའི་མཐུན་རྐྱེན་དང་མང་ཚོགས་ཀྱི་ནང་ཁྲིམས་དང་འབྲེལ་བའི་གོ་རྟོགས་སྤེལ་རྒྱུ་སོགས་ཀྱི་དོན་ཕན་ཡོད་པ་ཡིན།

ལེའུ་བདུན་པ།  འདི་ནི་བོད་མིའི་གནས་ཡུལ་ས་གནས་ཁག་གི་སྒྲིག་འཛུགས་དང་འབྲེལ་བ་ཡིན་ཞིང༌།  དོན་ཚན་དོན་གཅིག་པ།  བཙན་བྱོལ་བོད་མིའི་གཞིས་སྒར་ཁག་ཏུ་གནས་སྡོད་བོད་མིའི་སྒྲིག་འཛུགས་་་་་་་་་་་་་་་་་་་་གོ་ལྔ་པ་བོད་མིའི་འདུ་གནས་གསར་ཆགས་བཅས་ལེའུ་འདིའི་ནང་གི་དོན་ཚན་ཁག་ཉེར་ལྔས་བོད་མིའི་གཞིས་སྒར་གྱི་ངོ་འཛིན་དང་ས་གནས་འགོ་འཛིན་དང་འགོ་འཛིན་ལས་རོགས་འོས་འདེམས་སམ་བཀོད་བསྒྲིགས་བྱེད་ཕྱོགས།  ས་གནས་འགོ་འཛིན་དང་འགོ་འཛིན་ལས་རོགས་ཀྱི་ལས་འགན།  ས་གནས་འཐུས་མིའི་ཚོགས་འདུའི་གྲུབ་ཆ་དང༌།  གྲངས་ཚད།  ལས་ཡུན། ས་གནས་འཐུས་ཚོགས་ཀྱི་ཚོགས་གཙོ་དང་ཚོགས་གཞོན་ས་གནས་འཐུས་མིའི་ཚོགས་འདུའི་འོས་བསྡུ་བྱེད་ཕྱོགས་དང་དབང་ཚད།  ལས་དོན་བྱེད་ཕྱོགས།  ས་གནས་ལོ་འཁོར་སྔོན་རྩིས།  ས་གནས་འགོ་འཛིན་དང་འགོ་འཛིན་ལས་རོགས། ཚོགས་ཞུགས་བྱེད་སྟངས།  ས་གནས་འགོ་འཛིན་དང་འགོ་འཛིན་ལས་རོགས་འཕོ་འགྱུར་གཏོང་ཕྱོགས།  ས་གནས་འཐུས་ཚོགས་དང་འཐུས་མི་བྱེ་བྲག་པ་འཕོ་འགྱུར་གཏོང་ཕྱོགས།  ས་གནས་མཉམ་འབྲེལ་ཁག་གི་བདག་དབང་དང་འཛིན་སྐྱོང༌།  ས་གནས་ཁྲིམས་ཞིབ་ཁང༌།  བོད་མིའི་འདུ་གནས་གསར་ཆགས་བཅས་ཀྱི་སྐོར་ཆ་རྐྱེན་རྣམས་གསལ་བཀོད་བྱས་ཡོད།  ལེའུ་འདིའི་དོན་ཚན་ཁག་ལ་བརྟེན་ནས་བོད་མིའི་འདུ་གནས་ས་གནས་སོ་སོའི་ལས་དོན་རྣམས་ས་གནས་རང་ནས་ཐག་གཅོད་དང་འཛིན་སྐྱོང་བཏང་འཛིན་ཐུབ་པའི་ས་གནས་ཀྱི་རང་སྐྱོང་ཚད་ལྡན་ཡོང་ཐབས་དང་བཙན་བྱོལ་བོད་མིའི་མང་གཙོའི་འཕེལ་རིམ་གྱི་ཁེ་ཕན་དང་ཉམས་མྱོང་གཞི་རིམ་མང་ཚོགས་ཀྱི་བར་དུ་བསྙེགས་ཐུབ་པ་བཅས་ཀྱི་ཆ་རྐྱེན་བསྐྲུན་ཡོད།

ལེའུ་བརྒྱད་པ་འོས་བསྡུའི་ལས་དོན་དང་ལེའུ་དགུ་པ་གཞུང་ཞབས་འདེམས་བསྐོའི་ལས་དོན།  ལེའུ་བཅུ་པ་རྩིས་ཞིབ་ཀྱི་ལས་དོན་བཅས་འཛིན་སྐྱོང་གི་བཏང་འཛིན་འོག་མེད་པའི་རང་དབང་ཅན་གྱི་སྡེ་ཚན་གསུམ་གྱི་ལས་དོན་བྱེད་ཕྱོགས་ཀྱི་ཆ་རྐྱེན་བཅའ་ཁྲིམས་ནང་བཀོད་རྒྱུ་མང་གཙོའི་ལམ་སྲོལ་ཚད་ལྡན་ལག་བསྟར་ཡོང་ཐབས་དང་དེ་དག་ལ་སྲུང་སྐྱོབ་ཀྱི་ཆེད་མེད་དུ་མི་རུང་བའི་ཆ་ཤས་ཤིག་ཡིན།

ལེའུ་བརྒྱད་པ།  འོས་བསྡུའི་ལས་དོན་གྱི་དོན་ཚན་གོ་དྲུག་པ་འོས་བསྡུ་ལས་ཁང་་་་་་་་་་་་་་གོ་དགུ་པ་འོས་བསྡུ་ལས་ཁང་གི་སྤྱི་ཁྱབ་འགན་འཛིན་གྱི་ཡུན་ཚད་བཅས་ལེའུ་འདིའི་ནང་གི་དོན་ཚན་ཁག་བཞིས་རང་དབང་ཅན་གྱི་འོས་བསྡུའི་ལས་དོན་དང་འབྲེལ་བའི་འགན་དབང་དང་ལས་དོན་བྱེད་ཕྱོགས་སོགས་ཀྱི་ཆ་རྐྱེན་རྣམས་བསྟན་པ་དང༌།

ལེའུ་དགུ་པ།  གཞུང་ཞབས་འདེམས་བསྐོའི་ལས་དོན་གྱི་དོན་ཚན་བརྒྱ་ཐམ་པ་གཞུང་ཞབས་འདེམས་བསྐོ་ལྷན་ཁང་་་་་་་་་་་་་་་་་བརྒྱ་དང་ལྔ་འདེམས་བསྐོ་ལྷན་ཁང་གི་ཡུན་ཚད་བཅས་ལེའུ་འདིའི་ནང་གི་དོན་ཚན་ཁག་དྲུག་གིས་གཞུང་ཞབས་འདེམས་བསྐོ་ལྷན་ཁང་གི་སྒྲིག་འཛུགས་དང་འགན་དབང༌།  ལས་དོན་བྱེད་ཕྱོགས།  ཡུན་ཚད་སོགས་ཀྱི་ཆ་རྐྱེན་རྣམས་བསྟན་ཡོད།                 ལེའུ་དགུ་པ།  རྩིས་ཞིབ་ལས་དོན་གྱི་དོན་ཚན་བརྒྱ་དང་དྲུག་རྩིས་ཞིབ་ལས་ཁང་་་་་་་་་་་་་་་་་བརྒྱ་དང་བཅུ་རྩི་ཞིབ་སྤྱི་ཁྱབ་པའི་ཡུན་ཚད་བཅས་ལེའུ་འདིའི་ནང་གི་དོན་ཚན་ཁག་ལྔས་རྩིས་ཞིབ་ལས་ཁང་གི་སྒྲིག་འཛུགས་དང་འགན་དབང༌།  ལས་ཡུན་སོགས་ཀྱི་ཆ་རྐྱེན་རྣམས་བསྟན་ཡོད་རང་དབང་ཅན་གྱི་སྡེ་ཚན་འདི་གསུམ་གྱིས་གྲོས་ཚོགས་དང༌།  བཀའ་བློན་ཁྲི་པ།  ས་གནས་གྲོས་ཚོགས་སོགས་འོས་བསྡུའི་ལས་དོན་ཁག་རང་དབང་དང་དྲང་བདེན་གྱི་ཐོག་ནས་བྱེད་ཐུབ་པ་དང༌།  གཞུང་ཞབས་སྲི་ཞུ་བ་རྣམས་ཀྱི་འདེམས་བསྐོ་དང༌།  གནས་སྤར།  སྦྱོང་བདར་སོགས་དང་འབྲེལ་བའི་ལས་དོན་རྣམས་འཛིན་སྐྱོང་སོགས་ཀྱི་ཐེ་བྱུས་མེད་པར་རང་དབང་གི་ཐོག་ནས་བྱེད་ཐུབ་པ་ཡོང་ཐབས།  རྩིས་ཞིབ་ལས་ཁང་གིས་གཞུང་གི་ལས་ཁུངས་མ་ལག་ཁྱབ་ཁོངས་དང་བཅས་པའི་གཞུང་དངུལ་བྱུང་སོང་ཡོངས་རྫོགས་སྤྱི་འཐུས་ལྷན་ཚོགས་ཀྱི་བཀའ་ཁྲོལ་དང་མཐུན་པར་བཏང་འཛིན་ཚད་ལྡན་བྱུང་ཡོད་མེད་ཀྱི་རྩིས་ཞིབ་བྱས་ཏེ་རྩིས་ཞིབ་སྙན་ཐོ་གྲོས་ཚོགས་སུ་འབུལ་རྒྱུ་བཅས་ཀྱི་ཆ་རྐྱེན་ཡོད།

ལེའུ་བཅུ་གཅིག་པ་ནི།  བཅའ་ཁྲིམས་བསྐྱར་བཅོས་དང་བར་བརྒལ་གྱི་ཆ་རྐྱེན་སྐོར་ཡིན་ཞིང་ལེའུ་འདིའི་དོན་ཚན་བརྒྱ་དང་བཅུ་གཅིག་བཅའ་ཁྲིམས་བསྐྱར་བཅོས་་་་་་་་་་་་་་་བརྒྱ་དང་བཅོ་ལྔ་སྐད་ཡིག་ཚད་འཛིན་བཅས་ལེའུ་འདིའི་དོན་ཚན་ཁག་ལྔས་བཅའ་ཁྲིམས་བསྐྱར་བཅོས་ཀྱི་ཆ་རྐྱེན་དང༌།  བར་བརྒལ་གྱི་ཆ་རྐྱེན།  སྒྲིག་འཛུགས་བསྐྱར་བཅོས་ཀྱི་དུས་ཚིགས་བཅའ་ཁྲིམས་ཀྱི་སྐད་ཡིག་ཚད་འཛིན་གང་ཡིན་བཅས་ཀྱི་ཆ་རྐྱེན་རྣམས་བསྟན་ཏེ་བཅའ་ཁྲིམས་འདིའི་སྒྲོམ་གཞི་དང་ཡན་ལག་ཡོངས་སུ་ཚང་བ་བྱས་ཡོད།