རི་བོ་དགེ་ལྡན་པའི་དམིགས་བསལ་ཚོགས་ཆེན་ཐོག་ཚོགས་ཞུགས་གནང་བ།

༢༠༡༦ ཕྱི་ཟླ་ ༦ ཚེས་ ༡༡ ཉིན་སྔ་དྲོ་སློབ་དཔོན་ཟམ་གདོང་རིན་པོ་ཆེ་མཆོག་གིས་འཛམ་གླིང་རྒྱལ་སྤྱིའི་དགེ་ལྡན་ལྷན་ཚོགས་ (Geluk International Foundation) ཀྱི་གོ་སྒྲིག་འོག་དགའ་ལྡན་ཁྲི་ཐོག་ཁང་གི་གཙུག་ལག་ཁང་དུ་རི་བོ་དགེ་ལྡན་པའི་དམིགས་བསལ་ཚོགས་ཆེན་གྱི་དབུ་འཛུགས་མཛད་སྒོའི་ཐོག་དགེ་ལུགས་པའི་གདན་ས་ཁག་ལ་དམིགས་པའི་༧གོང་ས་༧སྐྱབས་མགོན་ཆེན་པོའི་དགོངས་བཞེད་གང་ཡིན་ཐོག་ལམ་སྟོན་གསུང་བཤད་རྒྱས་པར་གནང་ཞིང་། སྐབས་དེ་དུས་དགའ་ལྡན་ཁྲི་རིན་པོ་ཆེ་མཆོག་དང་། ཤར་བྱང་གི་ཆོས་རྗེ་རྣམ་པ་གཉིས་ཀྱིས་ཀྱང་ལམ་སྟོན་བཀའ་སློབ་ཕེབས་འདུག

Samdhong Rinpoche South India 1ཕྱི་དྲོ་སླར་ཡང་སློབ་དཔོན་ཟམ་གདོང་རིན་པོ་ཆེ་མཆོག་གིས་དགེ་ལུགས་པའི་གདན་ས་ཁག་ལ་དམིགས་པའི་༧གོང་ས་༧སྐྱབས་མགོན་ཆེན་པོའི་དགོངས་བཞེད་གང་ཡིན་ཐོག་དོན་ཚན་འགའ་ཤས་ལྷག་ལུས་བྱུང་བ་རྣམས་འགྲེལ་བརྗོད་གནང་མཐར། ཚོགས་ཞུགས་པ་རྣམས་ཀྱིས་སློབ་དཔོན་ཟམ་གདོང་རིན་པོ་ཆེས་སྔ་དྲོ་རི་བོ་དགེ་ལྡན་པའི་དམིགས་བསལ་ཚོགས་ཆེན་གྱི་དབུ་འཛུགས་མཛད་སྒོའི་ཐོག་དང་། དེ་བཞིན་ཉིན་རྒྱབ་བཅས་སུ་དགེ་ལུགས་པའི་གདན་ས་ཁག་ལ་དམིགས་པའི་༧གོང་ས་༧སྐྱབས་མགོན་ཆེན་པོའི་དགོངས་བཞེད་གང་ཡིན་ཐོག་གནང་བའི་གསུང་བཤད་ལས་གྲུབ་པའི་གྲོས་གཞི་ཁག་ལས་ ༡། དགེ་བཤེས་ལྷ་རམས་པ་ཚོས་ནང་ཆོས་ཁྱབ་སྤེལ་དང་སློབ་ཁྲིད་ཡུལ་དུས་དང་མཐུན་པ་ཡོང་ཆེད་དུ་ནང་ཆོས་སློབ་ཁྲིད་དགེ་རྒན་གྱི་འོས་སྦྱོང་དང་། གཞན་ཡང་དེ་འབྲེལ་སྐད་ཡིག་སྦྱོང་བདར་སོགས་ཀྱི་ལས་གཞི་གསར་འཛུགས་ཞུ་ཐབས་སྐོར། ༢། གདན་སའི་སློབ་གཉེར་བ་ཚོའི་ནང་ནས་ནང་པའི་གཞུང་ནས་བཤད་པའི་སེམས་ཁམས་ཚན་རིག་དང་། དངོས་ཁམས་ཚན་རིག འཕེལ་འགྱུར་རམ་སྐྱེ་ཁམས་ཚན་རིག་སོགས་ལ་དམིགས་བསལ་རིག་གཅིག་རྐང་འཛིན་གནང་ཐོག་དེང་དུས་ཚན་རིག་དང་མཚུངས་བསྡུར་གྱིས་ཉམས་ཞིབ་ཡོང་ཐབས་སྐོར་བཅས་ཀྱི་ཐོག་བཀའ་བསྡུར་ལྷུག་པོར་གནང་འདུག

Samdhong Rinpoche South India 2༢༠༡༦ ཕྱི་ཟླ་ ༦ ཚེས་ ༡༢ ཉིན་ཧྲིལ་པོར་ ༣། ད་ཡོད་གདན་སའི་སློབ་གཉེར་གྱི་ལས་རིམ་ནང་ཡོད་པའི་ཕར་ཕྱིན་དང་དབུ་མའི་གཞུང་ཚན་ཁག་གི་སློབ་གཉེར་གྱི་ཐོག་བྱམས་ཆོས་སྡེ་ལྔ་དང་རིགས་ཚོགས་དྲུག་ལ་སོགས་པའི་རྒྱ་གཞུང་གལ་ཆེ་ཁག་ལ་ཡང་སློབ་གཉེར་བ་ཚོར་ངེས་པར་རྒྱུས་མངའ་ཡོད་པ་བཟོ་ཐབས་སྐོར། ༤། གདན་སའི་སློབ་གཉེར་བ་ཚོར་ཚན་རིག་སློབ་སྦྱོང་གི་ལས་གཞི་གལ་ཆེན་གྲྭ་ཚང་སོ་སོའི་ཁོངས་སུ་ཚུགས་ནས་ད་ལྟ་ལས་རིམ་གང་ལེགས་འགྲོ་བཞིན་པ་དེ་དག་ཉམས་མེད་རྒྱུན་གནས་ཡོང་ཐབས་སྐོར། ༥། དགེ་ལུགས་སྤྱིའི་སྒྲིག་འཛུགས་ཁག་དང་། གདན་ས་དང་བཤད་སྒྲ་ཁག་ནས་རྒྱ་གར་དང་ཕྱི་རྒྱལ་གྱི་མཐོ་སློབ་ཁག་ལ་འབྲེལ་མཐུད་བྱས་ཏེ་ཕན་ཚུན་སློབ་ཁྲིད་སོགས་ཀྱི་ལས་རིམ་ལ་མཉམ་ཞུགས་ཡོང་ཐབས་སྐོར། ༦། གདན་ས་དང་བཤད་སྒྲ་ཁག་ཏུ་ཧིམཱལཡའི་རི་རྒྱུད་ཀྱི་སློབ་གཉེར་བ་ཚོ་དང་། ཆེན་པོ་ཧོར་གྱི་སློབ་གཉེར་བ། གཞན་ཡང་རྒྱ་གར་དབུས་དང་ལྷོ་སོགས་ནས་སློབ་གཉེར་བ་ཁ་ཤས་ཡོད་པ་ཚོར་ད་ལྟའི་ཆར་མཐུན་རྐྱེན་སྦྱོར་སྟངས་སོགས་ཇི་ཡིན་དང་། སླད་མར་འགྲོ་སྟངས་སྤྱི་མཚུངས་ཡོང་སླད་དུ་དེ་དག་གི་ཐད་ལ་དགེ་ལུགས་སྤྱིའི་སྲིད་བྱུས་གཏན་འབེབས་ཞུ་ཐབས་ཇི་དགེའི་སྐོར་བཅས་ཀྱི་ཐོག་བཀའ་བསྡུར་ཞིབ་ཚགས་གནང་སྟེ། དྭོགས་མ་ཆོད་པ་དང་གསལ་པོ་མ་བྱུང་བའི་རིགས་ལ་སློབ་དཔོན་ཟམ་གདོང་རིན་པོ་ཆེ་མཆོག་གིས་གསལ་བཤད་སོགས་ཀྱང་ཕེབས་འདུག

Samdhong Rinpoche South India 4ཉིན་རྒྱབ་ཏུ་དགའ་ལྡན་ཁྲི་ཐོག་ཁང་གི་ཡང་ཐོག་ཚོགས་ཁང་དུ་རྒྱལ་སྤྱིའི་དགེ་ལྡན་ལྷན་ཚོགས་ཀྱི་སྒྲིག་གཞི་བསྐྱར་བཅོས་གནང་དགོས་ཐོག་ལམ་སྟོན་རྒྱས་པར་གནང་འདུག

༢༠༡༦ ཕྱི་ཟླ་ ༦ ཚེས་ ༡༣ ཉིན་རི་བོ་དགེ་ལྡན་པའི་དམིགས་བསལ་ཚོགས་ཆེན་གྱི་གྲོས་གཞི་ལྷག་མ་ ༧། གདན་ས་དང་བཤད་སྒྲ་ཁག་གི་སློབ་གཉེར་ཡར་རྒྱས་འབྱུང་ཐབས་སུ་ཐབས་ལམ་བསྟེན་འོས་རིགས་གྲོས་བསྡུར་གྱིས་༧གོང་ས་ཆེན་པོར་དེ་ལྟར་ལག་ལེན་ཞུ་འཆར་སྙན་ཐོ་འབུལ་ཕྱོགས་སྐོར། ༨། སྤྲུལ་སྐུ་ངོས་འཛིན་ཞུ་ཕྱོགས་ཀྱི་ཐད་ལ་དགེ་ལུགས་སྤྱིའི་སྒྲིག་གཞིར་གསལ་བ་བཞིན་ལག་ལེན་དུ་འཁེལ་ཡོད་མེད་དང་། དེའི་ཐད་༧གོང་ས་ཆེན་པོའི་བཀའ་སློབ་ཁག་ལག་ལེན་འཁེལ་ཐབས་ཇི་དགོས། ༩། རིགས་ལམ་སྦྱོང་མཁན་སློབ་མ་སྐྱ་བོ་ཕོ་མོ་ཚོར་རང་མཉམ་གྲྭ་སའི་སློབ་གཉེར་བ་ཚོ་དང་ལྷན་དུ་རྩོད་པར་མཉམ་ཞུགས་ཀྱི་གོ་སྐབས་ཐོབ་ཆེད་དུ་ཁོར་ཡུག་དང་ཆ་རྐྱེན་སྐྲུན་ཐབས་ཇི་དགོས། ༡༠། རི་བོ་དགེ་ལྡན་པའི་སྒྲིག་འཛུགས་བཀོད་འདོམས་ཀྱི་ལྟེ་བ་དགའ་ལྡན་ཁྲི་ཐོག་ཁང་གི་ལས་དོན་ཚགས་སུ་ཚུད་པ་ཡོང་ཐབས་ཇི་དགོས་དང་། དེའི་ལས་བྱེད་པ་ཆེ་ཕྲ་ཡོངས་ཀྱི་རྩ་འཛིན་ཞུ་དགོས་པའི་ལས་བྱེད་པའི་རྩ་འཛིན་ཡིག་ཆ་གཏན་འབེབས་ཇི་དགོས།

Samdhong Rinpoche South India 3དགའ་ལྡན་ཁྲི་ཐོག་ཁང་གི་དྲུང་ཆེ་ཤེས་འཇོན་དང་ལྷག་བསམ་ལྡན་པ་ཞིག་འཛུགས་ཐབས་ཇི་དགོས་སྐོར་དང་། ད་ཡོད་རྒྱལ་སྤྱིའི་དགེ་ལྡན་ལྷན་ཚོགས་འདི་ཚགས་སུ་ཚུད་པ་དངོས་གནས་ལ་ཚོགས་པའི་ངོ་བོ་དང་དམིགས་ཡུལ་ལས་འགུལ་གང་ཐད་ནས་ཀྱང་རྒྱལ་སྤྱིའི་གནས་བབས་ལྡན་པ་བཟོ་ཐབས་ཇི་དགོས་སྐོར་བཅས་ཀྱི་ཐོག་བཀའ་བསྡུར་ལྷུག་པོ་གནང་མཐར་ཕྲན་བུའི་བཟོ་བཅོས་དང་བཅས་གྲོས་ཆོད་ཁག་གཏན་འབེབས་གནང་ཞིང་། དེའི་སྔོན་དུ་དྭོགས་མ་ཆོད་པ་དང་གསལ་པོ་མ་བྱུང་བའི་རིགས་ལ་སློབ་དཔོན་ཟམ་གདོང་རིན་པོ་ཆེ་མཆོག་གིས་བར་བར་དུ་གསལ་བཤད་སོགས་ཀྱང་གནང་བ་མ་ཟད། མཇུག་བསྡོམས་སུ་གསུང་བཤད་རྒྱས་པ་ཞིག་ཀྱང་གནང་འདུག དེ་བཞིན་ཤར་པ་ཆོས་རྗེ་རིན་པོ་ཆེ་མཆོག་དང་། དགའ་ལྡན་ཁྲི་རིན་པོ་ཆེ་མཆོག་ནས་ཀྱང་མཇུག་བསྡོམས་སུ་བཀའ་སློབ་བསྩལ་ཡོད།

དམིགས་བསལ་ཚོགས་ཆེན་འདིར་གདན་ས་གསུམ་དང་། རྒྱུད་གྲྭ་སྟོད་སྨད། རྣམ་རྒྱལ་གྲྭ་ཚང་། བཀྲ་ཤིས་ལྷུན་པོ། རྭ་སྟོད་གྲྭ་ཚང་བཅས་ཀྱི་མཁན་པོ་དང་མཁན་ཚབ། ཕྱག་མཛོད་བཅས་དང་། རྒྱལ་སྤྱིའི་དགེ་ལྡན་ལྷན་ཚོགས་ཀྱི་ལས་སྣེ་བཅས་མཉམ་ཞུགས་གནང་འདུག