འཛམ་གླིང་ཡོངས་སུ་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་སྨྱུང་གནས་གསོལ་སྨོན་གནང་སྐབས་བཀའ་ཤག་གི་གཏམ་བཤད།
ཕྱི་ལོ་ ༢༠༠༨ ཟླ་ ༨ ཚེས་ ༣༠ ཉིན། ༄༅། །ད་རིང་ཕྱི་ལོ་ ༢༠༠༨ ཟླ་ ༨ ཚེས་ ༣༠ བོད་ས་བྱི་ཟླ་བ་ ༦ པའི་གནམ་གང་གི་དུས་ཚིགས་ཉིན། བོད་གཞུང་མང་ཛ་དྲག་ལས་འགུལ་ཚོགས་ཆུང་གིས་འབོད་སྐུལ་གནང་དོན་ལྟར་འཛམ་གླིང་ཁྱོན་ཡོངས་སུ་གནས་འཁོད་བོད་མི་དང༌། བོད་དོན་རྒྱབ་སྐྱོར་བ། དེ་བཞིན་ཞི་བདེ་ལ་དགའ་བའི་མང་ཚོགས་རྣམས་ཀྱིས་དུས་ཡུན་ཚོུད་ ༡༢ རིང་ཟས་བཅད་སྨྱུང་གནས་དང་འབྲེལ་གསོལ་འདེབས་སྨོན་ལམ་གྱི་ལས་རིམ་སྤེལ་བ་འདིའི་ཐོག་སྤྱི་ནོར་ྋགོང་ས་ྋསྐྱབས་མགོན་རྒྱལ་བའི་དབང་པོ་མཆོག་སྐུ་ངོ་མ་མཉམ་ཞུགས་གནང་རྒྱུའི་དགོངས་བཞེད་བཀའ་བཟང་ཕེབས་པ་བདག་ཅག་གི་བསོད་ནམས་ཀྱི་སྐལ་བར་བཀའ་དྲིན་བླ་མེད་དུ་ཆེ་ཞིང༌། སྐུ་ཁམས་ཅུང་ཟད་བདེ་མིན་དབང་གིས་འདི་གར་འདུས་ཚོགས་སུ་ྋཞབས་འཁོད་མ་ཐུབ་ཀྱང་མུམ་བྷའི་ནས་སྨྱུང་གནས་གསོལ་སྨོན་གནང་བཞིན་ཡོད་པར་ཐུགས་རྗེ་དང་བཀའ་དྲིན་བླ་མེད་དུ་ཆེ་ཞེས་ཞུ་རྒྱུ་ཡིན།
བོད་མི་དང༌། བོད་དོན་རྒྱབ་སྐྱོར་བ། འཚེ་མེད་ཞི་བའི་ལམ་ལ་ཡིད་ཆེས་ཡོད་པའི་མི་ཚོགས་མང་པོ་སྨྱུང་གནས་གསོལ་འདེབས་ཀྱི་ལས་རིམ་དུ་ཞུགས་གནང་མཛད་མཁན་ཚང་མར་བཙན་བྱོལ་བོད་གཞུང་བཀའ་ཤག་གིས་སྙིང་ནས་ཐུགས་རྗེ་ཆེ་ཞེས་ཞུ་རྒྱུ་ཡིན།
ལས་རིམ་འདི་ནི་སྡང་སེམས་དང༌། འཁོན་འཛིན། ཁོང་ཁྲོ་སོགས་ཀྱིས་ཀུན་ནས་བསླངས་པའི་ངོ་རྒོལ་རྔམ་སྟོན་གྱི་བྱ་བ་ཞིག་མ་ཡིན་པར། སྟོན་པ་ཐུགས་རྗེ་ཅན་གྱིས་ལེགས་པར་གསུངས་པའི་དམ་པའི་ཆོས་ཀྱི་སྙིང་དོན་གཞན་གནོད་གཞི་དང་བཅས་པ་ལས་ལྡོག་པའི་ཐེག་པ་ཐུན་མོང་བའི་ལམ་དང༌། གཞན་ཕན་མཐའ་དག་བསྒྲུབ་པའི་བྱམས་བརྩེ་སྙིང་རྗེའི་སྙིང་པོ་ཅན་གྱི་ཐེག་པ་ཆེན་པོའི་ལམ་དང་བཅས་པའི་ཉམས་ལེན་དེ་དག་སྤྱི་ཚོགས་དང་མི་རིགས་ཀྱི་ཕན་བདེ་བསྒྲུབ་པའི་འཇིག་རྟེན་ཆབ་སྲིད་ཀྱི་བྱ་བར་ཡང་ལག་ཏུ་བླང་ཆོག་པ་བདག་ཉིད་ཆཻན་པོ་གྷན་དྷིས་ལག་ལེན་དམར་འཁྲིད་དུ་བསྩལ་བ་བཞིན་དེང་རབས་ཀྱི་འཇིག་རྟེན་འདིར་སླར་ཡང་ལག་བསྟར་བྱ་རྒྱུའི་འབད་རྩོལ་གྱི་མཚོན་རྟགས་ཤིག་ཡིན།
སྤྱི་ནོར་ྋགོང་ས་ྋསྐྱབས་མགོན་ཆེན་པོས་བོད་དོན་བདེན་མཐའ་གསལ་ཐབས་ཀྱི་ལས་འགུལ་ཡོངས་རྫོགས་འཚེ་མེད་ཞི་བའི་ལམ་དུ་སྒྱུར་ཐབས་ཀྱི་ལམ་སྟོན་བླ་མེད་རྒྱུན་བསྲིངས་གནང་བའི་འབྲས་བུར་ད་ཆ་བོད་མིའི་ལས་འགུལ་ཕལ་ཆེ་བ་ལུས་ཀྱི་འཚེ་བ་རགས་པ་དང་བྲལ་ནས་ལོ་གྲངས་མང་ཙམ་ཕྱིན་ཟིན། དེའི་དབང་གིས་འཇིག་རྟེན་ཡོངས་སུ་བོད་དང་བོད་མིར་བསམ་ཡུལ་ལས་འདས་པའི་རྒྱབ་སྐྱོར་དང་མཐུན་འགྱུར་ཐོབ་ཡོད་ཅིང༌། དེ་ལ་བརྟེན་ནས་བོད་ཀྱི་གནད་དོན་གསོན་གནས་ཐུབ་པ་མ་ཟད། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་ཀྱང་སྣང་མེད་དུ་བཞག་མ་ཐུབ་པར་དོ་སྣང་དང་གཡོ་སྒྱུ་ཁྲམ་གསུམ་གྱི་སྒོ་ནས་ཡ་ལན་ཞིག་མ་བྱེད་ཐབས་མེད་ཆགས་ཡོད། འོན་ཀྱང་བོད་རིགས་ཡོངས་ཀྱིས་ཡིད་དང་ངག་གི་འཚེ་བ་གཏན་སྤོང་མ་ཐུབ་པའི་དབང་གིས་ང་ཚོའི་ད་བར་གྱི་འབད་རྩོལ་མཐའ་དག་ཟོ་ཆུན་གྱི་འཁྱུད་མོ་ལྟར་འཁོར་བ་ལས་ནུས་པ་ཐོན་ཏེ་དོན་དམ་གྱི་གྲུབ་འབྲས་ཐོབ་མེད། བོད་རིགས་ཡོངས་ལ་བོད་དོན་བདེན་མཐའ་གསལ་བའི་མངོན་འདོད་དང་ལྷག་བསམ་རྣམ་དག་ཅིག་ཡོད་ན་ང་ཚོའི་འཚེ་བ་མེད་པའི་ནུས་ཤུགས་འདི་གོང་མཐོར་གཏོང་དགོས། བོད་མི་རྣམས་ཀྱི་ཡིད་ཀྱི་འཚེ་བ་མངོན་གྱུར་བ་མགོ་ནོན་ཙམ་ཞིག་མ་བྱུང་གི་བར་བོད་དོན་བདེན་མཐའ་གསལ་རེ་ཤིན་ཏུ་དཀའ། རྒྱུ་མཚན་དེ་ལ་བརྟེན་ནས་ད་རིང་གི་གོ་སྐབས་འདིའི་བརྒྱུད་བོད་རིགས་སྤྱི་དང༌། ཁྱད་པར་ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ཏེ་ཁྱིམ་ནས་ཁྱིམ་མེད་པར་རབ་ཏུ་བྱུང་བའི་དགེ་སྦྱོང་དང་བཙུན་མ་ཡོངས་ལ་ཞེ་སྡང་དང༌། ཁོང་ཁྲོ་མངོན་འགྱུར་བའི་དབང་དུ་མ་སོང་བར་འཚེ་བ་མེད་པའི་བློ་ཐ་ན་བཅོས་མ་ཚུན་ཆད་སྐྱེད་ཐབས་དང༌། དེས་དྲངས་པའི་ལུས་ངག་གི་རྣམ་རིག་འཚེ་བ་མེད་པ་ཞིག་སྐྲུན་ཐབས་ངེས་པར་དུ་གནང་དགོས་པའི་ཛ་དྲག་གི་རེ་བསྐུལ་ནན་པོ་ཞུ་རྒྱུ་ཡིན།
ད་རེས་སྨྱུང་གནས་དང་གསོལ་སྨོན་གྱི་ལས་རིམ་འདི་བོད་མིའི་འཚེ་བ་མེད་པའི་ལས་འགུལ་གྱི་གོམ་རིམ་གསར་པ་ཞིག་གི་ནང་བསྐྱོད་རྒྱུའི་སྒོ་དབྱེ་ལྟ་བུ་ཞིག་ཏུ་འགྱུར་ཐུབ་ན་སྨྱུང་བར་གནས་པའི་དོན་གོ་ཚང་ཞིང༌། དེ་མིན་སྡང་སེམས་དང་ཁོང་ཁྲོའི་ངན་རྟོག་བསྐྱར་སློང་བྱ་རྒྱུའི་གོ་སྐབས་ཤིག་ཏུ་གྱུར་ན་འདྲེ་ཤར་སྒོ་དང་བླུད་ནུབ་སྒོའི་དཔེ་ལྟར་འགྲོ་རྒྱུ་ལས་མ་འདས།
ད་རེས་དམིགས་བསལ་ཅན་གྱི་གོ་སྐབས་བཟང་པོ་འདིའི་ཐོག་བོད་དང་བོད་མིའི་ཆེད་དུ་སྨྱུང་གནས་གསོལ་སྨོན་གྱི་ལས་རིམ་འདིའི་ནང་འཛམ་གླིང་ཁྱོན་ཡོངས་སུ་མི་གྲངས་ཧ་ཅང་མང་པོ་ལྷག་བསམ་བཟང་པོས་མཉམ་ཞུགས་གནང་བའི་རྣམ་དཀར་གྱི་བྱ་བའི་སྟོབས་ཀྱིས་བོད་མིའི་སྤྱི་མཐུན་གྱི་ལས་ངན་བྱང་ཞིང་བསོད་ནམས་གོང་མཐོར་འཕེལ་བ་དང༌། དེ་ལ་བརྟེན་ནས་བོད་རིགས་ཡོངས་ཀྱིས་སེམས་ཅན་སྤྱི་དང་ཁྱད་པར་བོད་མིར་སྡུག་སྦྱོང་གཏོང་མཁན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་དབང་འཛིན་པ་ཚོར་དམིགས་པའི་ཁོང་ཁྲོ་དང་སྡང་སེམས་སྤངས་ནས་བྱམས་པ་དང་སྙིང་རྗེའི་ཡུལ་དུ་འཛིན་ཐུབ་པ་དང༌། རང་རེའི་འཚེ་མེད་ཞི་བའི་ནུས་སྟོབས་སྨིན་ཏེ་རྒྱ་ནག་དབང་འཛིན་པ་རྣམས་ཀྱི་བློ་ཁ་བཟང་ཕྱོགས་སུ་བསྒྱུར་ཐུབ་པ། འཚེ་མེད་ཞི་བའི་ཐབས་ལམ་ལ་ཚང་མས་ཡིད་ཆེས་རྙེད་ཐུབ་པ་བཅས་ཡོང་བའི་རེ་བ་དང་སྨོན་འདུན་ཞུ་རྒྱུ་མ་ཟད། བོད་ནང་བཙན་གནོན་མནར་གཅོད་ཀྱི་བྱ་བ་རང་ཡལ་དུ་འགྲོ་བའི་ཆེད་འཚེ་བ་མེད་པའི་འབད་རྩོལ་ནུས་ཤུགས་ཆིག་སྒྲིལ་ཡོང་བའི་འབོད་སྐུལ་ནན་པོ་ཞུ་རྒྱུ་ཡིན།
ཉེ་ཆར་བོད་དུ་དུས་ཟིང་སྐབས་ལུས་སྲོག་ཤོར་བ་རྣམས་དང་ཉེས་བརྡུང་བཙོན་འཇུག་ཕོག་པ་ཡོངས་ལ་གདུང་སེམས་མཉམ་བསྐྱེད་དང་འབྲེལ་ལུས་སྲོག་གི་མཆོད་སྦྱིན་དོན་ལྡན་དུ་འགྲོ་བ་དང་སྡུག་སྦྱོང་མནར་གཅོད་ལས་མྱུར་དུ་གྲོལ་བའི་སྨོན་འདུན་ཡང་ཞུ་རྒྱུ་ཡིན། དེ་བཞིན་སྔོན་དུ་ཟི་ཁྲོན་ཁུལ་དང་ཉེ་ཆར་བོད་སྟོད་ཕྱོགས་སུ་ས་ཡོམ་དང༌། ས་ཁུལ་འགར་ཆུ་ལོག་སོགས་ཀྱི་ཉེས་སྐྱོན་བྱུང་བ་རྣམས་ལའང་སྨོན་འདུན་དང་ཐུགས་གསོ་ཞུ་རྒྱུ་ཡིན། མཐའ་དོན་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་སྐུ་ཚེ་ྋཞབས་པད་བསྐལ་བརྒྱར་བརྟན་ཅིང༌། བོད་དོན་བདེན་མཐའ་མྱུར་དུ་གསལ་བའི་སྨོན་ལམ་དང་བཅས།།