ཕྱི་ལོ་ ༢༠༡༦ ལོའི་ནང་སྐྱབས་རྗེ་ཟམ་གདོང་རིན་པོ་ཆེ་མཆོག་གི་མཛད་འཕྲིན་རགས་བསྡུས།

༡༦། ༢༠༡༦ ཕྱི་ཟླ་ ༥ ཚེས་ ༢༨ ཉིན་མེས་དབོན་གཙུག་ལག་དཔེ་སྟོན་སློབ་གྲྭ་ནས་ཇི་ལྟར་གསོལ་བ་བཏབ་པ་བཞིན་སློབ་དཔོན་ཟམ་གདོང་རིན་པོ་ཆེས་དྷ་སར་རྟེན་གཞི་བྱས་པའི་སྟེང་ཤོད་གཉིས་ཀྱི་དཔེ་སྟོན་སློབ་གྲྭའི་དགེ་རྒན་རྣམས་ལ་བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་ཀྱི་སྙིང་དོན་སྐོར་གསུང་བཤད་དང་། དྲི་བ་ཁག་ལ་བཀའ་ལན་གནང་།

༡༥། ༢༠༡༦ ཕྱི་ཟླ་ ༥ ཚེས་ ༢༣ ཉིན་སྔ་དྲོ་༧སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་གིས་བ་ལུཀ་པོང་ས་ཁུལ་དུ་གནས་པའི་ནང་པ་རྣམས་ཀྱིས་ཇི་ལྟར་གསོལ་བ་བཏབ་པ་བཞིན་བླང་དོར་གསུང་བཤད་བཀྲིན་བསྐྱངས།

༡༤། ༢༠༡༦ ཕྱི་ཟླ་ ༥ ཚེས་ ༢༢ ཉིན་རྒྱབ་ཏུ་༧སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་དཱ་ཧུང་དབུས་ཧིམཱལཡའི་ལེགས་བྱང་མཐོ་རིམ་སློབ་གཉེར་ཁང་དུ་སློབ་ཕྲུག་གི་མ་འོངས་པའི་མདུན་ལམ་ཞེས་པའི་བརྗོད་གཞིའི་ཐོག་གསུང་བཤད་དང་དྲི་བ་ཁག་ལ་བཀའ་ལན་ཡང་གནང་།

༡༣། ༢༠༡༦ ཕྱི་ཟླ་ ༥ ཚེས་ ༢༡ ཉིན་སྔ་དྲོ་༧སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་གིས་འབུམ་སྡེ་ལ་དགོན་རྩེ་དགའ་ལྡན་རབ་རྒྱས་གླིང་གི་གཙུག་ལག་ཁང་དུ་སྒྲོལ་དཀར་ཚེ་དབང་གནང་བ་དང་། དེ་བཞིན་འབུམ་སྡེ་ལ་དགོན་རྩེ་དགའ་ལྡན་རབ་རྒྱས་གླིང་ནས་༧སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས།

༡༢། ༢༠༡༦ ཕྱི་ཟླ་ ༥ ཚེས་ ༡༣ ནས་ ༢༠༡༦ ཕྱི་ཟླ་ ༥ ཚེས་ ༢༠ བར་འབུམ་སྡེ་ལ་དགོན་རྩེ་དགའ་ལྡན་རབ་རྒྱས་གླིང་ནས་ཇི་ལྟར་གསོལ་བ་བཏབ་པ་བཞིན་དེ་གའི་གཙུག་ལག་ཁང་དུ་༧སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་གིས་རྗེ་ཙོང་ཁ་པས་མཛད་པའི་བྱང་ཆུབ་ལམ་རིམ་འབྲིང་པོའི་བཀའ་ཁྲིད་དབུ་འཛུགས་བསྐྱངས།

༡༡། ༢༠༡༦ ཕྱི་ཟླ་ ༥ ཚེས་ ༡༡ ཉིན་སྔ་དྲོ་སློབ་དཔོན་ཟམ་གདོང་རིན་པོ་ཆེ་མཆོག་བསྟན་འཛིན་སྒང་ནས་འབུམ་སྡེ་ལ་ཕྱོགས་སུ་ཕེབས་སྐབས་རུ་པ་ས་གནས་ཀྱི་དགོན་པ་ཞིག་ཏུ་མང་ཚོགས་ནས་ཕེབས་བསུ་ཞུས་པ་མ་ཟད། གསོལ་བ་བཏབ་པ་ལྟར་རིན་པོ་ཆེ་མཆོག་ནས་བླང་དོར་གསུང་བཤད་མདོར་བསྡུས་ཤིག་ཀྱང་བསྩལ།

༡༠། ༢༠༡༦ ཕྱི་ཟླ་ ༥ ཚེས་ ༩ ཉིན་སྔ་དྲོ་སློབ་དཔོན་ཟམ་གདོང་རིན་པོ་ཆེ་མཆོག་དིལླཱི་ནས་ཕེབས་ཐོན་གྱིས་གུ་ཝ་ཧ་ཊིའི་གནམ་ཐང་དུ་ཕེབས་འབྱོར་སྐབས་འབུམ་བདེ་ལ་དགོན་རྩེའི་མཁན་པོ་དང་། བསྟན་འཛིན་སྒང་རྒྱུད་སྟོད་གྲྭ་ཚང་གི་ཕྱག་མཛོད། བསྟན་འཛིན་སྒང་བོད་མིའི་གཞིས་སྒར་གྱི་ས་གནས་འགོ་འཛིན་སོགས་ནས་ཕེབས་བསུ་དང་༢༠༡༦ ཕྱི་ཟླ་ ༥ ཚེས་ ༡༠ ཉིན་སྔ་དྲོ་ཇི་ལྟར་བསྟན་འཛིན་སྒང་རྒྱུད་སྟོད་གྲྭ་ཚང་ནས་གསོལ་བ་བཏབ་པ་བཞིན་༧སྐྱབས་རྗེ་ཟམ་གདོང་རིན་པོ་ཆེ་མཆོག་གིས་དེ་གའི་ས་གནས་མང་ཚོགས་ལ་སྒྲོལ་དཀར་ཡིད་བཞིན་འཁོར་ལོའི་སྒོ་ནས་ཚེ་དབང་བསྩལ།

༩། ༢༠༡༦ ཕྱི་ཟླ་ ༥ ཚེས་ ༨ ཉིན་རྒྱ་གར་གྱི་རྒྱལ་ས་དིལླཱིར་རྟེན་གཞི་བྱས་པའི་རྒྱ་གར་རྒྱལ་སྤྱིའི་ལྟེ་གནས་ (India International Centre) ཀྱི་ཚོགས་ཁང་ཞིག་ཏུ་སློབ་དཔོན་ཟམ་གདོང་རིན་པོ་ཆེ་མཆོག་གིས་ “དེང་རབས་དང་སྲོན་རྒྱུན་” ཞེས་པའི་བརྗོད་གཞིའི་ཐོག་གསུང་བཤད་དང་། དེ་རྗེས་དྲི་བ་ཁག་ལ་ལན་འདེབས་དང་གསལ་བཤད་གནང་།
༨། ༢༠༡༦ ཕྱི་ཟླ་ ༥ ཚེས་ ༧ ཉིན་རྒྱ་གར་གྱི་རྒྱལ་ས་དིལླཱིར་རྟེན་གཞི་བྱས་པའི་རྒྱ་གར་རྒྱལ་སྤྱིའི་ལྟེ་གནས་ (India International Centre) ཀྱི་ཚོགས་ཁང་ཞིག་ཏུ་སློབ་དཔོན་ཟམ་གདོང་རིན་པོ་ཆེ་མཆོག་གིས་ “ང་ཚོའི་འཇིག་རྟེན་གྱི་གནས་སྟངས་དང་ང་ཚོའི་ལས་འགན་” ཞེས་པའི་བརྗོད་གཞིའི་ཐོག་གསུང་བཤད་གནང་འཕྲལ་དྲི་བ་ཁག་ལ་ལན་འདེབས་གནང་།

༧། ༢༠༡༦ ཕྱི་ཟླ་ ༥ ཚེས་ ༡ ཉིན་སློབ་དཔོན་ཟམ་གདོང་རིན་པོ་ཆེ་མཆོག་བཀའ་ཟུར་འབྲོང་ཆུང་དངོས་གྲུབ་མཆོག་གིས་གཞུང་མང་གི་ཞབས་ཞུ་བསྒྲུབས་ཏེ་མི་ལོ་ ༤༠ འཁོར་བར་བཀའ་དྲིན་རྗེས་དྲན་དང་། ཕེབས་སྐྱེལ་ཐུགས་རྗེ་ཆེ་ཞུའི་མཛད་སྒོར་སྐུ་མགྲོན་གཙོ་བོའི་ཚུལ་དུ་གདན་ཞུས་ཀྱིས་གསུང་བཤད་ཀྱང་བསྩལ།

༦། ༢༠༡༦ ཕྱི་ཟླ་ ༤ ཚེས་ ༦ ཉིན་སློབ་དཔོན་ཟམ་གདོང་རིན་པོ་ཆེ་མཆོག་བྲག་གཡབ་སྐྱབས་མགོན་ལྷན་དུ་དྷ་སའི་ཉེ་འཁོར་དུ་ཕྱི་ལོ་ ༡༩༦༠ རེ་གྲངས་ནང་བཞུགས་སྐབས་ཀྱི་གནས་ཚུལ་རྣམས་བསྐྱར་དྲན་གཟིགས་སྐོར་ལ་ཕེབས་གནང་མཛད།

༥། ༢༠༡༦ ཕྱི་ཟླ་ ༤ ཚེས་ ༡༢ ནས་ ༢༠༡༦ ཕྱི་ཟླ་ ༤ ཚེས་ ༢༥ བར་༧སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་དཔལ་ལྡན་རྒྱུད་སྟོད་གྲྭ་ཚང་གི་གཙུག་ལག་ཁང་དུ་ཨ་ཁུ་ཤེས་རབ་རྒྱ་མཚོས་མཛད་པའི་འཇམ་དཔལ་དུས་དགྲའི་དབང་པོ་མ་ཧེའི་གདོང་ཅན་བཅུ་གསུམ་ལྷའི་འཁོར་ལོའི་རིམ་གཉིས་ཀྱི་ཟབ་ཁྲིད་ཟིན་བྲིས་འཇིགས་མཛད་རྡོ་རྗེའི་ཞལ་ལུང་གི་བཀའ་ཁྲིད་གནང་བ་དང་། ཚེས་ ༢༦ ཉིན་སྔ་དྲོ་ཇི་ལྟར་དཔལ་ལྡན་རྒྱུད་སྟོད་གྲྭ་ཚང་ནས་གསོལ་བ་བཏབ་པ་བཞིན་༧སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་ནས་རྡོ་རྗེ་སེམས་དཔའ་དང་དམ་ཚིག་རྡོ་རྗེའི་རྗེས་གནང་སྩལ་བ་མ་ཟད། དེའི་མཇུག་ཏུ་དཔལ་ལྡན་རྒྱུད་སྟོད་གྲྭ་ཚང་ནས་༧སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས།

༤། ༢༠༡༦ ཕྱི་ཟླ་ ༣ ཚེས་ ༢༡ ནས་༢༠༡༦ ཕྱི་ཟླ་ ༣ ཚེས་ ༢༨ བར་སློབ་དཔོན་ཟམ་གདོང་རིན་པོ་ཆེ་མཆོག་གིས་སེར་བྱེས་སློབ་གྲྭའི་ཚོགས་ཁང་དུ་དབུ་མ་རིན་ཆེན་ཕྲེང་བའི་བཀའ་ཁྲིད་སྔ་ལོ་སེར་བྱེས་ལྭ་བ་ཁམས་ཚན་དུ་གནང་བའི་འཕྲོས་བསྐྱངས།

༣། ༢༠༡༦ ཕྱི་ཟླ་ ༢ ཚེས་ ༡༩ ཉིན་ཕྱི་དྲོ་སློབ་དཔོན་ཟམ་གདོང་རིན་པོ་ཆེ་མཆོག་གིས་རྒྱ་གར་གྱི་རྒྱལ་ས་དིལླཱི་གསར་པར་རྟེན་གཞི་བྱས་པའི་རྒྱ་གར་རྒྱལ་སྤྱིའི་ལྟེ་གནས་ཀྱི་ཚོགས་ཁང་ཞིག་ཏུ་སློབ་དཔོན་ཆེན་པོ་དྷརྨ་པཱལ་གྱི་འབྲི་རྩོམ་གལ་ཆེའི་དཔེ་དེབ་ཐོག་བགྲོ་གླེང་གི་ཚོགས་གཙོ་གནང་སྟེ་གསུང་བཤད་གནང་།

༢། ༢༠༡༦ ཕྱི་ཟླ་ ༢ ཚེས་ ༡༢ ནས་ ༡༦ བར་སློབ་དཔོན་ཟམ་གདོང་རིན་པོ་ཆེ་མཆོག་གིས་མ་སུ་རི་ཉེ་འགྲམ་དུ་གནས་པའི་སིདྡྷ་ཞེས་པའི་བསྟི་གནས་ཁང་དུ་བསམ་ཞིབ་པ་དང་། ཤེས་ཡོན་པ། སྤྱི་ཚོགས་ཞབས་ཞུ་བ་ཁག་གཅིག་ལ་དེང་རབས་དང་། སྲོལ་རྒྱུན། བློ་སྦྱོང་སོགས་ཀྱི་ཐོག་ལམ་སྟོན་གསུང་བཤད་དང་བགྲོ་གླེང་བཅས་གནང་།
༡། ༢༠༡༦ ཕྱི་ཟླ་ ༢ ཚེས་ ༦ ཉིན་སློབ་དཔོན་ཟམ་གདོང་རིན་པོ་ཆེ་མཆོག་གིས་རྒྱ་གར་གྱི་གྲོང་ཁྱེར་ཨི་ལཱ་ཧཱ་བཱད་ནང་གནས་པའི་བལ་རཱམ་མཐོ་སློབ་ཀྱི་གོ་སྒྲིག་འོག་ནང་ཆོས་དང་རྒྱ་གར་གྱི་ལེགས་བྱང་ཞེས་པའི་བརྗོད་གཞིའི་ཐོག་རྒྱལ་སྤྱིའི་བགྲོ་གླེང་ཚོགས་འདུར་གསུང་བཤད་གནང་།